தொலைந்து போவதற்கு
யாராவது தேடுவார்களா?
உன்னைத் தேடி
தொலைந்து போன
என்னைத் தவிர.

நீ மட்டும் ஏன் இப்படி
சாகசக்காரியாக
மேனாமினுக்கியாக
அணு அணுவாய்
நேசித்து விட்டு
அடுத்தவன் கை பிடித்தாய்...

தாடி வைத்து அலைகையில்
சிலுப்பித் திரியும்
மேனாமினுக்கியாக
இருந்து தொலைக்காமல்

ஏற்க முடியாத இரவுகளிலும்
விலக்க முடியாத பகல்களிலும்
அன்பால் மட்டுமே
என்னைத் தின்னும்
நீ மட்டும் ஏன் இப்படி




என்ன சொல்வீர்கள்
எனது எழுதாத
பக்கங்களைப் பற்றி

பொய்யாய் எழுதுபவனை விட
எழுதாமல் விட்ட இவன்
பரவாயில்லை என்பீரோ

தேவையற்றதைத் தவிர்த்து
தேவையானதையே வைத்து
பிம்பங்களை உருவாக்கும்
பித்தலாட்டக்காரன் என்பீரோ?

ஒருவேளை
எழுதாமல் விட்டதைத் தவிர்த்து
ஏன் எழுதவில்லை என்பதை
விவாதமாக்கும் நரித்தனத்தைக்
கண்டறிந்து சொல்வீரோ?

எழுதாமல் விட்டதில் உண்மையும்
எழுதியதில் பொய்யும்
கலந்திருக்கும்
என்று அறியாதவரா நீங்கள்?