அறிவியல் ஆயிரம்

விவரங்கள்

சிதம்பரம் இரவிச்சந்திரன்

பிரிவு: இயற்கை & காட்டுயிர்கள்

வெளியிடப்பட்டது: 27 டிசம்பர் 2024

• அறிவியல்

தாவர விலங்குகள் (Florra & Foana) போல பூஞ்சைகளுளையும் தனிப்பிரிவாக அங்கீகரிக்க வேண்டும். இந்த இலட்சியத்திற்காக இங்கிலாந்து மற்றும் சிலி நாடுகள் தீவிரமாக முயன்று வருகின்றன. நாய்க்குடை, பூஞ்சை உருவாகும் நிலைக்கு முன்புள்ள மோல்டு (Mould), மில்ட்யூ (Mildew) , ஈஸ்ட் மற்றும் லைக்கன்கள் இந்த திட்டத்தினால் பூஞ்சைகள் என்னும் தனிப்பிரிவில் முக்கிய இடம் பெறும் என்று நம்பப்படுகிறது.சூழல் மண்டலத்தின் பொறியியலாளர்கள்

சட்டப்படி இவை கொள்கைகள், பன்னாட்டு உடன்படிக்கைகளில் ஒரு தனிப்பிரிவாக அங்கீகரிக்கப்படும்போது அது இவற்றின் பாதுகாப்பு, இன்று நிலவும் மும்மடங்கு மோசமான காலநிலையை சமாளிக்க உதவும். இதனால் சூழல் நலம் பெறும். மக்களுக்கு எண்ணற்ற நன்மைகள் ஏற்படும். மண் தூய்மை, புதைபடிம எரிபொருட்களின் கார்பன் உமிழ்வில் மூன்றில் ஒரு பகுதியை சேமிக்கும் திறன், பிளாஸ்டிக், வேதிப்பொருட்களை பகுப்படையச் செய்வதில் காளான்கள் முக்கிய பங்கு வகிக்கின்றன.

“பெரும்பாலான தாவரங்கள் பூஞ்சைகள் இல்லாமல் நீருக்கு வெளியில் உயிர் வாழ முடியாது. பூமியில் நாம் இப்போது பார்க்கும் உயிர்கள் எப்போதோ அழிந்து போயிருக்கும் என்று பூஞ்சையியலாளர்கள் கூறுகின்றனர். தாவர விலங்குகள் போல பூஞ்சைகளுக்கும் உரிய அங்கீகாரம் பெற 3எஃப் (3F) என்ற முன் முயற்சி தொடங்கப்பட்டுள்ளது. இது தாவர, விலங்குகளின் செழுமை போல பூஞ்சைகளின் செழுமையை அங்கீகரிப்பதை நோக்கமாகக் கொண்டது.

தாவர விலங்கு செழுமை என்பது ஒரு குறிப்பிட்ட பிரதேசம் அல்லது ஒரு குறிப்பிட்ட காலத்தில் வாழும் ஒட்டுமொத்த தாவர விலங்குகளைக் குறிக்கிறது. அறிவியலில் வழங்கப்பட்டு வரும் பல பெயர்கள் போல ஃபங்கி (Fungi) என்ற சொல் இலத்தீன் மொழிச்சொல் இல்லை” என்று சிலியன் பிரிட்டிஷ் பூஞ்சைகள் அறக்கட்டளையின் தலைமைச் செயல் அலுவலர் ஜுயூலியானா ஃபெர்சை (Giuliana Furci) கூறுகிறார்.

பூஞ்சைகள் இல்லாமல் இயற்கையை பார்ப்பது இரத்தப் பரிசோதனை செய்யாமல் ஒரு புதிய நோயைக் கண்டறிய முயல்வது போல. வாழ்வின் வான மண்டலத்திற்கு ஒப்பானவை இவை. சூழல் மண்டலங்களை உருவாக்குகின்றன.

உணவு மற்றும் மருந்துகளின் உற்பத்தியிலும் அவற்றை வீணாகாமல் பாதுகாப்பதிலும் ஆயிரக்கணக்கான ஆண்டுகளாக மனிதன் பூஞ்சைகளையே பயன்படுத்தி வருகிறான்.

ரொட்டி, சோயா பொருட்கள், பாலாடைக்கட்டி, மதுபானங்கள், போன்ற பல பொருட்களின் தயாரிப்பில் இவற்றின் பங்கு தவிர்க்க முடியாதது. “பூஞ்சைகள் நம் வாழ்வின் உருவாக்கத்தில், மன மாற்றத்தில், வருங்கால வடிவமைப்பில் மிக முக்கிய பங்கு வகிக்கின்றன. வாழும் உலகின் மறு உருவாக்கத்தை எழுதும் இவை பெரும்பாலும் கண்ணுக்குப் புலப்படாத சூழல் மண்டலத்தின் பொறியியலாளர்கள்.

நீதிப்பூர்வமான அங்கீகாரம்

காலநிலையை ஒழுங்குபடுத்துவதிலும் நீடித்த நிலையான வளர்ச்சியுடன் கூடிய உயிர்ப் பன்மயத்தன்மை பாதுகாப்பிலும் இவற்றிற்கு முக்கிய பங்கு உண்டு. என்றாலும் பூஞ்சைகளுக்கு உரிய அங்கீகாரத்தை பல அரசுகள் கொடுக்காமல் உள்ளன. இவற்றின் இழப்பு உயிர்ப் பன்மயத்தன்மையின் இழப்பே என்று “சிக்கிய வாழ்வு” என்ற நூலின் ஆசிரியரும் உயிரியலாளருமான மெர்லின் ஷெல்ட்ரேக் (Merlin Sheldrake) கூறுகிறார்.

பூஞ்சைகளின் அங்கீகாரத்திலும் பாதுகாப்பிலும் சிலி முன்னணியில் உள்ள ஒரு நாடு. பூஞ்சைகளை அரசு அமைப்புகள், நிறுவனங்களின் சூழல் தாக்க மதிப்பீட்டு திட்டங்களில் உட்படுத்த வேண்டும் என்ற தேசிய சட்டம் அங்கு அமலில் உள்ளது. இத்தகைய ஆய்வுகளில் பூஞ்சைகளின் நிலைக்கு பாதிப்பு ஏற்பட வாய்ப்பு இருந்தால் அதை பட்டியலிட்டு சரி செய்ய வேண்டும் என்று அந்த சட்டம் கூறுகிறது.

“பூஞ்சைகள் காலநிலை, இயற்கை, மாசுபடுதல் ஆகிய மூன்று முக்கிய அம்சங்களை ஒன்று சேர்த்து நம்மை காண வைக்கிறது. பூமியின் ஒட்டுமொத்த வாழ்வின் இயக்கத்தைப் புரிந்து கொள்ள இவை நமக்கு உதவுகின்றன. அதனால் இவை தேசிய சட்டங்களிலும் கொள்கைகள் வகுக்கப்படும்போதும் சேர்த்துக் கொள்ளப்பட வேண்டும்” என்று சிலியின் சூழல் அமைச்சர் மைஸா ரோஹாஸ் (Maisa Rojas) கூறுகிறார்.

“பூஞ்சைகளை தாவர விலங்குகள் போல உரிய மரியாதை கொடுத்து அங்கீகரிப்பது நீதிப்பூர்வமானது” என்று மூன்றாண்டுகளுக்கு முன்பிருந்து 3எஃப் இயக்கத்தில் இணைந்து செயல்பட்டு வரும் நியூயார்க் பல்கலைக்கழக பூமியின் உரிமைகளுக்கான செயல்பாட்டு க்ளினிகின் கொலம்பிய சட்ட நிபுணர் சேஸாரோட்ரீகஸ்-கெரவீட்டோ (César Rodríguez-Garavito) கூறுகிறார். பன்னாட்டு இயற்கை வளப் பாதுகாப்பு சங்கம் (IUCN மற்றும் க்யூ (Kew) ராயல் தாவரவியல் பூங்கா ஆகியவை இவ்வியக்கத்தை ஆதரிக்கின்றன.

“பொதுமக்களின் உரிய கவனத்தை இவ்வுயிரினங்களின் பாதுகாப்பு பெறவில்லை. அதனால் இவற்றின் பாதுகாப்புக்கு எங்கும் நிதி ஒதுக்கப்படுவதில்லை. இது வரை வெறும் 0.4% பூஞ்சைகள் மட்டுமே பலவீனமானவை என்று மதிப்பிடப்பட்டுள்ளன. ஆனால் உணவுப் பாதுகாப்பு, மருத்துவம், சூழல் மண்டலங்களின் நிர்வாகம் மற்றும் பலவற்றில் இவற்றின் பங்கு முக்கியமானது. அறிவியல் தெளிவாக உள்ளது, ஆனால் சமூக அங்கீகாரம் மட்டுமே தேவை.

ஆண்டுக்கு இரண்டாயிரம் புதிய இனங்கள்

உலகின் மிகப் பெரிய பூஞ்சை மாதிரிகளின் சேகரம் இலண்டன் க்யூ பூங்காவில் உள்ளது. இங்கு உலகின் எல்லாப் பகுதிகளிலும் இருந்து சேகரித்து உலர வைக்கப்பட்ட 1.5 மில்லியன் மாதிரிகள் உள்ளன. இவற்றால் ஏற்படும் நஞ்சு பாதிப்புகள், கிடைக்கும் மருத்துவப் பயன்கள் பற்றி அறிய இவற்றின் டி என் ஏ வரிசைப்படுத்துதல் (DNA sequencing) நடைபெறுகிறது. இவற்றின் பகுப்பாய்வில் இருந்து தாவரங்களை விட, விலங்குகளுக்கு இவை நெருக்கமானவை என்பதும், உயிரினங்களில் ஒரு தனி சாம்ராஜ்யம் என்றும் உறுதி செய்யப்பட்டுள்ளது.

சூழல் பாதுகாப்பு கலந்துரையாடல்களில் பூஞ்சைகள் சேர்க்கப்பட வேண்டும். விஞ்ஞானிகள் இது வரை வெறும் 10 சதவிகிதத்துக்கும் குறைவான பூஞ்சைகளைப் பற்றி மட்டுமே விவரித்துள்ளனர். மேற்பரப்பை மட்டும் ஆராய்வது போலவே இது. பூஞ்சைகளே அறிவியலின் அடுத்த முக்கிய பிரிவாக வளரப் போகின்றன. அவை பற்பல மூலக்கூறுகளை உருவாக்குகின்றன. ஆனால் இவை பற்றி மிகக் குறைவாகவே ஆராயப்பட்டுள்ளது.

வருங்கால பெரும் தொற்றுகளுக்கு இவையே தீர்வாக அமையக்கூடும். அலெக்சாண்டர் ப்ளெமிங் பெனிசிலியத்தில் இருந்து மில்லியன் கணக்கானோரின் உயிரைக் காத்த பென்சிலின் என்ற முக்கிய நோய் எதிர்ப்புப் பொருளை கண்டுபிடிப்பதற்கு பல நூற்றாண்டுகளுக்கு முன்பிருந்தே மனிதன் ரொட்டியை உண்கிறான்.

இழைத் தன்மையுடைய காளான்களே கொலஸ்ட்ரால், உயர் இரத்த அழுத்தம், இதயநோய் ஆபத்தைக் குறைக்க உதவும் ஸ்டேட்டின் (statin) என்ற மருந்துப் பொருளின் அடிப்படை என்று ராயல் தாவரவியல் பூங்காவின் அறிவியல் பிரிவு இயக்குனர் அலெக்சாண்டர் ஆண்டனெல்லி (Alexandre Antonelli) கூறுகிறார்.

உயிரின உலகில் பூஞ்சைகள் ஒரு தனிப்பிரிவாக அங்கீகரிக்கப்படும்போது தாவர விலங்குகள் மற்றும் பூஞ்சைகள் என்று உயிரினங்களின் வகைப்பாடு மாறும். உயிர் வாழும் இயற்கை இனங்களின் பாதுகாப்புக்கான பன்னாட்டு யூனியன் (International Union for the Conservation of Nature Species Survival Commission (IUCN SSC), பன்னாட்டு வனம் மற்றும் இயற்கை வள பாதுகாப்பு சங்கம் (IUCN Re:wild) ஆகிய அமைப்புகள் ஆகஸ்ட் 2021ல் பூஞ்சைகளை உயிரினங்களின் தனி வகையாக அங்கீகரித்தன.

பூஞ்சைகள் மேலோட்டமாக பார்க்கப்படுகின்றன. இதனால் இவை சூழல் பாதுகாப்புக் கோட்பாடுகளில் இருந்து புறக்கணிக்கப்படுகின்றன. அதனால் சூழல் சட்டங்களால் இவை பாதுகாக்கப்படுவதில்லை.

அங்ககப் பொருட்களை சிதைப்பதிலும் வன மறு உருவாக்கத்திலும் பூஞ்சைகள் முக்கிய பங்கு வகிக்கின்றன. மரங்களின் வாழ்வு, பாலூட்டிகளின் செரிமானம், கார்பன் சேமிப்பு, உலக சத்துகள் சுழற்சியை நிலைநிறுத்த, பாக்டீரியா எதிர் மருந்துகள் உற்பத்தியில் பெரும் பங்கு வகிக்கின்றன.

ரொட்டி, மது பானங்கள், சாக்லெட் போன்றவற்றை பூஞ்சைகள் இன்றி தயார் செய்ய முடியாது. சூழலில் நொதிகளை உற்பத்தி செய்து இவை உடலுக்கு வெளியில் செரிமானம் அடையச் செய்கின்றன. அங்ககப் பொருட்களை செல்களுக்குள் மீண்டும் உறிஞ்சுகின்றன. 2.5 முதல் 3.8 மில்லியன் பூஞ்சைகளில் வெறும் 8% மட்டுமே இது வரை விஞ்ஞானிகளால் அறிவியல்பூர்வமாக அறியப்பட்டுள்ளன. உலகம் முழுவதும் ஆண்டுதோறும் 2,000 புதிய இனங்கள் கண்டுபிடிக்கப்படுகின்றன.

அங்கீகாரம் வேண்டி நிற்கும் அற்புத உயிரினங்கள்

அதிகமான பூஞ்சைக் கொல்லிகளின் பயன்பாடு, அளவுக்கு மீறிய அறுவடை, நைட்ரஜன் வளப்படுத்துதல் போன்றவை இவற்றில் எதிர்மறை பாதிப்பை ஏற்படுத்துகின்றன. பூமியின் வட கோடி முனையில் உள்ள உலகின் மிகப் பெரிய தரைப்பகுதி காடுகளில் (Boreal forests) தாவரங்களுடன் சேர்ந்து வாழும் கூட்டுயிரி வாழ்க்கையில் (symbiotic) பூஞ்சைகள் பெருமளவு கார்பனை உறிஞ்சுகின்றன.

சிதைப்பவை என்பதால் இவை மண்ணில் உள்ள மாசுக்களை தூய்மைப்படுத்துகின்றன. விலங்கு உணவுகளுக்குப் பதில் இந்த உயிரினங்கள் மாற்று உணவுகளைத் தரவல்லவை என்று பன்னாட்டு இயற்கை வளப் பாதுகாப்பு சங்கம் கூறுகிறது.

கோடை வெய்யிலில் ஒரு கோப்பை மோரை அருந்த நினைக்கும்போதும், உங்களுக்கு விருப்பமான சாக்லேட்டை சுவைக்கும்போதும் பூஞ்சைகள் என்ற இந்த அற்புத உயிரினங்களுக்கு நன்றி சொல்லுங்கள்!

மேற்கோள்கள்: https://www.theguardian.com/environment/2024/oct/16/fungi-status-boost-conservation-cop16-uk-chile-biodiversity-plan

&

https://www.downtoearth.org.in/wildlife-biodiversity/fungi-may-get-its-own-taxonomical-kingdom-named-funga-for-conservation-purposes

- சிதம்பரம் இரவிச்சந்திரன்

விவரங்கள்

சிதம்பரம் இரவிச்சந்திரன்

பிரிவு: இயற்கை & காட்டுயிர்கள்

வெளியிடப்பட்டது: 19 டிசம்பர் 2024

பாலூட்டிகள் சூழலுக்குப் பாதிப்பை ஏற்படுத்தாமல் மின்னுகின்றன என்று ஆய்வுகள் கூறுகின்றன. 86% பாலூட்டி இனங்களின் உரோமம் புற ஊதாக்கதிர் (UV) பட்டு ஒளிர்வதை விஞ்ஞானிகள் கண்டறிந்துள்ளனர். பாலூட்டிகளில் ஒளிரும் பண்பு முன்பு நினைத்திருந்ததை விட பொதுவான ஒரு பண்பு என்று இந்த புதிய ஆய்வின் மூலம் தெரிய வந்துள்ளது.

ஆஸ்திரேலியாவில் வாழும் ப்ளாட்டிப்யூசஸ் (platypuses) வாம் வௌவால் என்ற வௌவால் இனம் (wombats), டாஸ்மேனியா டெவில்ஸ் Tasmanian devils), எச்சிட்னெஸ் (echidnas), ஆரஞ்சு இலை மூக்கு வௌவால் (orange leaf-nosed bat), பில்பிஸ் (Bilbis) மற்றும் பேண்டிகூட்ஸ் (Bandicoots) போன்ற மார்சுப்பியல் (marsupial) பாலூட்டி விலங்குகளில் ஒளிரும் பண்பு காணப்படுகிறது என்று முன்பே கண்டறியப்பட்டிருந்தது. மார்சுப்பியல் பாலூட்டிகளில் பெண் விலங்குகள் குட்டிகளைப் பராமரித்து வளர்க்க வயிற்றுப் பகுதியில் பை போன்ற அமைப்பை (pouch) பெற்றுள்ளன.

A glowing orange leaf-nosed bat. Photograph: Western Australian Museum

ஒளிர்தலுக்கு காரணமாகும் உரோமம்

பாலூட்டிகளில் ஒளிரும் பண்பு மிகப் பொதுவான ஒன்று என்று 125 வகையைச் சேர்ந்த வெவ்வேறு இனப் பாலூட்டிகளை ஆராய்ந்த பிறகு விஞ்ஞானிகள் கண்டுபிடித்துள்ளனர். இந்த உயிரினங்கள் அனைத்தும் ஏதோ ஒரு வகையில் ஒளிரும் பண்பை வெளிப்படுத்துகின்றன. ஆய்வு செய்யப்பட்ட 125 இனங்களில் 86% அல்லது 107 விலங்கினங்கள் புற ஊதாக்கதிர்களின் கீழ் மின்னும் பண்பை உடைய உரோமத்தைப் (fur) பெற்றுள்ளன.

ஆய்வு செய்யப்பட்ட 125 பாலூட்டியினங்கள் இன்று வாழும் அனைத்து 27 பாலூட்டி வரிசைகளையும் உட்படுத்தியது. இது இன்று பூமியில் வாழும் பாலூட்டி குடும்பங்களில் பாதியை பிரதிநிதித்துவப் படுத்துகிறது.

ஒளிர்தல் பண்பு இரவு நேர விலங்குகளில் (nocturnal animals) மிகப் பொதுவாகவும் மிகத் தீவிரமாகவும் காணப்படுகிறது என்று ஆய்வாளர்கள் கண்டுபிடித்துள்ளனர். ஆனால் இப்பண்பு மலை வரிக்குதிரை, துருவக்கரடி போன்ற பகலில் சுறுசுறுப்பாக செயல்படும் விலங்குகளிலும் (diurnal animals) காணப்படுகிறது என்று கண்டறியப்பட்டுள்ளது.

“அதிக எண்ணிக்கையிலான பாலூட்டிகள் ஒளிரும் தன்மையைப் பெற்றுள்ளது இதுவரை அறியப்படாமல் இருந்தது. இந்த ஆய்வின் மூலமே இது வெளியில் தெரிய வந்துள்ளது. இவை ஒளிரும் தன்மையுடைய தோல் அல்லது உரோமத்தைப் பெற்றுள்ளன என்று இவ்வளவு காலம் தெரியவில்லை. புற ஊதாக்கதிர்கள் ஒளிர்தல் பண்புடைய விலங்குகளின் தோல் அல்லது உரோமத்தின் மீது படும்போது அதில் உள்ள புரதங்கள் அந்த கதிரியக்கத்தை உறிஞ்சி அதை பார்க்கக்கூடிய ஒளியாக உமிழ்கிறது.

ரோமம் அல்லது தோல் மற்றும் புரதங்களின் மீது மோதி நமக்கு புலனாகக் கூடிய ஒளியாக இது மாற்றப்படுகிறது. அதனால்தான் ஒளிரும் உடற்பகுதிகள் நீலம், பச்சை அல்லது கறுப்பு நிறத்தில் ஒளிர்கின்றன. மனிதன் உட்பட எல்லா பாலூட்டிகளும் ஒளிரும் தன்மையுடைய பற்களைப் பெற்றுள்ளன. பல விலங்குகள் ஒளிரும் பண்புடைய நகங்களைப் பெற்றுள்ளன” என்று ஆய்வுக் கட்டுரையின் முன்னணி ஆசிரியரும் மேற்கு ஆஸ்திரேலியா பாலூட்டிகள் அருங்காட்சியகத்தின் மேற்பார்வையாளருமான டாக்டர் கெனி ட்ராவுயிலன் (Dr Kenny Travouillon) கூறுகிறார்.

டுவார்ஃப் ஸ்பின்னர் டால்பின் (dwarf spinner dolphin) என்ற வகை பாலூட்டி இனம் மட்டுமே அவற்றின் உடலில் ஒளிரும் தன்மையுடைய ஒரே உறுப்பாகப் பற்களை பெற்றுள்ளன. பதப்படுத்துதல் செயல்முறையினால் ஒளிர்தல் நிகழ்கிறதா என்பதை அறிய ஆய்வாளர்கள் பாதுகாக்கப்பட்ட மற்றும் உறை நிலையில் வைக்கப்பட்ட இறந்த விலங்குகளின் உடல் மாதிரிகளை குறிப்பாக மேற்கு ஆஸ்திரேலியா அருங்காட்சியகத்தில் இருந்த மாதிரிகளை ஆராய்ந்தனர்.

பதப்படுத்துதல் செயல்முறையால் ஒளிரும் பண்பில் தீவிரத் தன்மை சில மாதிரிகளில் வேறுபடுகிறது என்று ராயல் சங்கத்தின் (journal Royal Society Open Science) என்ற ஆய்விதழில் வெளிவந்த இது பற்றிய ஆய்வுக்கட்டுரை கூறுகிறது. பதப்படுத்தப்பட்ட பிளாட்டிபஸ் மாதிரிகளில் ஒளிர்தல் குறைவாக இருந்தது.

”போராக்ஸில் பதப்படுத்தப்பட்ட மாதிரி அதிகமாக ஒளிர்ந்தது. அதை விட அதிகமாக ஆர்சினிக்கில் பதப்படுத்தப்பட்ட மாதிரியில் ஒளிர்தல் காணப்பட்டது. ஆனால் வேறு உடல் மாதிரிகளில் இதே ஆய்வுகள் நடத்தப்பட்டபோது பலன் எதிர்மறையாக இருந்தது. பிரகாசமான ஒளிர்தல் உற்ற நிலையில் வைக்கப்பட்ட மாதிரிகளில் அதிகமாகக் காணப்பட்டது. இந்த மாதிரிகளில் பதப்படுத்துதல் மூலம் ஒளிர்தலின் தீவிரத் தன்மை குறைந்தது. கோ ஆலா (ko ala), டாஸ்மேனியா டெவில்ஸ், எட்ச்சிட்னெஸ் போன்றவை இதற்கு எடுத்துக்காட்டு” என்று டாக்டர் கெனி கூறுகிறார்.

“அருங்காட்சியகத்தின் சில மாதிரிகளில் பதப்படுத்துதலால் ஒளிர்தலில் வேறுபாடு ஏற்படுவது இந்த ஆய்வில் தடுமாற்றத்தை ஏற்படுத்துகிறது. இந்த விலங்குகள் அவற்றின் இயல்பான வனச்சூழலில் எவ்வாறு ஒளிர்கின்றன என்பது பற்றி மேலும் ஆய்வுகள் நடத்தப்பட வேண்டும். ஆராயப்பட்ட 86% வகை பாலூட்டிகளில் மட்டுமே ஒளிரும் தன்மையுடைய உரோமம் இருப்பது அறியப்பட்டுள்ளது என்றாலும் அவை அனைத்திற்கும் ஒளிரும் நகங்கள் அல்லது பற்கள் உள்ளன.

ஆராயப்பட்ட பல மாதிரிகளில் தூரிகை வால் பாசம்ஸ் (brushtail possums), கங்காருகள், கறுப்பு எலிகள், ஐரோப்பிய ஹெட்ஜ்காக்குகள் (European-hedgehogs) போன்றவற்றில் முந்தைய ஆய்வில் கூறப்பட்டதை விட ஒளிர்தல் குறைவாகவே உள்ளது என்று இந்த ஆய்வு கூறுகிறது. இந்த வேறுபாடு புவியியலால் ஏற்பட்டதா அல்லது பதப்படுத்துதலில் உள்ள செயல்முறை வேறுபாட்டால் நிகழ்ந்ததா என்பது தெரியவில்லை” என்று ஜேம்ஸ் குக் பல்கலைக்கழக விலங்கியல் ஆய்வாளர் லிண்டா ரைன்ஹோல்ட் (Linda Reinhold) கூறுகிறார்.

பாலூட்டிகள் ஏன் ஒளிர்கின்றன?

பாலூட்டிகளில் ஒளிர்தலின் உண்மையான பொருள் இன்னும் புதிராகவே உள்ளது. என்றாலும் விலங்குகள் குறிப்பாக இரவு நேரங்களில் சுறுசுறுப்புடன் செயல்படும் விலங்குகளில் அவை பளபளப்புடன் தோற்றமளிக்க, அதன் பார்வையின் மூலம் நடைபெறும் சமிக்ஞைப் பரிமாற்றங்களை மேம்படுத்த ஒளிர்தல் உதவலாம் என்று ஆய்வாளர்கள் நம்புகின்றனர்.

”வழக்கமாக ஊண் உண்ணிகளின் முதுகுப்பகுதியில் வரிகள், புள்ளிகள் காணப்படுகின்றன. தங்கள் இனத்தைச் சேர்ந்த மற்ற விலங்குகளுக்கு தங்களை அடையாளம் காட்டுவதற்கு இது அவற்றிற்கு பயன்படுகிறது என்று கருதப்படுகிறது. ஆனால் பெரும்பாலான விலங்குகளில் எதிரிகளால் அவற்றை எளிதாகப் பார்க்க முடியாத வயிற்றுப் பகுதியிலேயே ஒளிர்தல் நிகழ்கிறது.

ஒரே இனத்தைச் சேர்ந்த விலங்குகள் ஒன்று மற்றொன்றின் அருகில் வரும்போது அவை ஒளிர்தல் மூலம் ஒன்றையொன்று அடையாளம் கண்டு கொள்கின்றன. ஆய்வாளர்கள் ஆராய்ந்தவற்றில் மிக அதிகமான ஒளிர்தல் பண்பை வெளிப்படுத்திய மஞ்சள் மற்றும் வெள்ளை நிற உரோமத்தால் மூடப்பட்ட, பார்வை தெரியாத, நிலத்திற்கடியில் வலைகளை அமைத்து வாழும் தகவமைப்பை உடைய சதர்ன் மார்சுப்பியல் சிற்றெலிகள் (Southern MarsupialMole) போன்ற சில இன விலங்குகளில் ஒளிர்தல் எந்த செயல்முறை பயனையும் தருவதில்லை.

இவற்றில் நிறமூட்டப்பட்ட உரோமங்கள் இல்லாததால் ஏற்பட்ட ஒரு பக்கவிளைவே இது என்று ஆய்வாளர்கள் கருதுகின்றனர். வெள்ளை தவிர மற்ற நிறத்தில் மனித தலைமுடி இருப்பதற்கு பிறவியிலேயே ஏற்படும் ஒளிர்தலே காரணம். இருக்கும் இடம், எதிரியின் இடம் அறிய இருப்பிடம் அறியும் தொழில்நுட்பத்தைப் பயன்படுத்தும் மைக்ரோ வௌவால்கல் (microbats) போன்ற சில வகை பறக்கும் பாலூட்டிகளில் ஒளிர்தல் அதிக முக்கியத்துவம் பெறவில்லை என்று ஆய்வாளர்கள் கூறுகின்றனர்.

இரவு நேரங்களில் பூமிக்கு வரும் புற ஊதாக்கதிர்களின் அளவு குறைகிறது என்பதால் பாலூட்டிகளில் நிகழும் இந்த உயிரி ஒளிர்தல் (Bio Fluorescence) நிகழ்வின் முக்கியத்துவம் பற்றி இன்னும் அதிக ஆய்வுகள் நடத்தப்பட வேண்டும் என்று விஞ்ஞானிகள் வலியுறுத்துகின்றனர். மனிதரல்லாத பாலூட்டிகளில் இந்நிகழ்வு பற்றி முதல்முதலாக 1911ல் ஐரோப்பிய முயல்களில் நடத்தப்பட்ட ஆய்வுகள் பற்றிய செய்தி வெளிவந்தது.

“இந்த ஆய்வுக்கட்டுரையை வாசித்துவிட்டு செல்லப்பிராணி வளர்ப்பவர்கள் புற ஊதாக்கதிர்களை வெளியிடும் கருவிகளை வாங்கி செல்லப்பிராணிகள் மீது ஒளியைப் பாய்ச்சி ஆராய முற்படக் கூடாது. அவர்களுக்கு ஒரு எச்சரிக்கை! அவர்கள் புற ஊதாக்கதிர்களை கண்களில் பாய்ச்சக்கூடாது. அந்த கதிர்கள் அவற்றின் கண்களைப் பாதிக்கும்!” என்று கெனி கூறுகிறார்.

பாலூட்டிகளில் ஒளிர்தல் பற்றிய இந்த ஆய்வு இயற்கையின் படைப்பில் நமக்குத் தெரியாமலேயே நம்மைச் சுற்றிலும் நிகழ்ந்து வரும் அதிசயங்களில் ஒரு சிறு துளி மட்டுமே!

மேற்கோள்கள்: https://www.theguardian.com/science/2023/oct/04/positively-glowing-fluorescent-mammals-are-far-more-common-than-earlier-thought-study-suggests?

- சிதம்பரம் இரவிச்சந்திரன்