ஒருகையில் தொரட்டிக்கம்பு
ஒருகையில் தூக்குவாளி
விந்தி விந்தி நடப்பார் வீரையா
விடிஞ்சது தொட்டு அடஞ்சது வரைக்கும்
ஆடுகளைக் கட்டியலையும் அன்றாடப் பொழப்பு
அவர் வயிறு நிறைவதை விடவும்
ஆடுகள் வயிறு நிறைவது தான் அவருக்கு முக்கியம்
அறுபதைக் கடந்த பின்னும் அசராமக் கொழை ஒடிப்பார்
அஞ்சாறு வருசம் முந்தி பொஞ்சாதி தவறிப்போக
வெசனத்துல உடைந்து போனார்
நோவு கண்ட ஆட்டுக்காக நோன்பிருந்து நேர்ந்துகொள்வார்
ஏசப்பா மாதிரி எப்பொழுதும் குட்டி ஆட்டைச் சுமந்து போவார்
அமட்டுவார் அடிக்கமாட்டார் ஆடுகள் மேல்
அப்படியொரு பேரன்புயார் கண்பட்டதோ
மேகாட்டு மேய்ப்பனுக்கு கிழக்கிருந்து வந்தது கெட்டநேரம்
ரோட்டுக்குப் போன ஆடொன்றைக் காருகாரங்கிட்ட
காப்பாத்த காலெடுத்து ஓடுகையில்
அளவைக் கல்லில் தடுக்கி அங்கனயே
ஆவிவிட்டார் ஆடுகளைக் கதறவிட்டு

- ஸ்ரீதர்பாரதி