கீற்றில் தேட...
அறிவியல் ஆயிரம்
- விவரங்கள்
- சு.உலோகேசுவரன்
- பிரிவு: இயற்கை & காட்டுயிர்கள்
மண்புழுக்களும் மண்ணுக்குள் வாழும் பல கோடி நுண்ணுயிர்களும் மண்ணை வளப்படுத்துவதற்கு உதவுகின்றன என்பது புதிய செய்தியன்று. தரைக்கு மேலும் வானிலைக்கேற்ப பறவைகளும் தேனீக்களும் மலர்களிலிருந்து மகரந்தம் சேமித்தும் பகிர்ந்தளித்தும் மண்ணை வளப்படுத்த பெரும்பங்கு செய்கின்றன.
உழவர்கள் தமது காய்கனி பயிர் சாகுபடிக்கு மகரந்தச் சேர்க்கையின் இன்றியமையாத் தன்மையை நன்கு உணர்ந்திருப்பர். காய்கனி பயிர் வளர்ப்பு அதன் மலர்களிலுள்ள படியெடுத்தலைப் பெரிதும் சார்ந்துள்ளது. எனவே இயற்கை வேளாண்மை என்பது தேனீக்கள் இன்றி அமையாது என்கிறார் தேனீக்கள் வளர்த்து வரும் சாமிநாதன் என்பவர். சிறு வயது முதலே இவர் தேனீக்கள் வளர்ப்பில் ஈடுபட்டு வருகிறார்; இந்திய வகை, இத்தாலிய வகை ஆகிய தேனீக்களை வெவ்வேறு தேன்கூட்டுப் பெட்டகங்களில் வைத்து வளர்க்கிறார். குறிப்பாக தேன்கூட்டுப் பெட்டகங்களை நாட்டின் வெவ்வேறு இடங்களிலிருந்து பெற்றிருக்கிறார். கட்டுப்படியின்மையால் பல தச்சர்கள் தேன்கூட்டுப் பெட்டகங்களைச் செய்துதர மறுத்தனர்.
அரசு வழங்கும் 
பெட்டகங்களும் ஒரு மழைக்காலத்தைக் கூடத் தாங்குவதில்லை. இதனால், நல்ல தரமான தேன்கூடு பெட்டகங்கள் கிடைப்பதற்குத் தொல்லைகள் நேர்ந்தன. தேனீ வளர்ப்பிலுள்ள வேறு சிலருக்கும் இதே தொல்லைகள் இருந்திருக்கலாம். ஆனால், இவர் இதற்கு மாற்றாகச் சமையலறையில் பயன்படுத்தப்படும் கடப்பா பலகைகளை வைத்து தேன்கூடு அமைக்கத் தொடங்கினார். அவை கனமாக இருப்பதால் ஓரிடத்திலிருந்து வேறிடத்திற்கு மாற்றக் கடினமாக இருக்கும். ஆனால் நெடுநாள் நீடித்திருக்கும்.
வணிக அடிப்படையில் பெருநகரங்களில் தேனீ வளர்ப்பு நடைமுறைக்கு ஒத்துவருமா?
ஊர்ப்புறங்களில் பயிர்களுக்கு அடிப்பது போல நகரங்களில் வளர்ந்துள்ள சில மரங்களில் பூச்சிக் கொல்லிகளோ வேதிப்பொருட்களோ அடிக்கப்படுவதில்லை. எனினும், இங்கு சுற்றுச்சூழல் மாசு மிகுந்திருக்கும். ஆனாலும் அவை பூச்சிக்கொல்லிகளைப் போலத் தேனீக்களுக்குப் பெரிதும் பாதிப்பு ஏற்படுத்துவதில்லை.
உணவுத்தட்டுப்பாட்டைத் தீர்க்கும் தேனீக்கள்:
- தனிப்பட்ட முறையில் பணம் பார்ப்பதற்காகத் தேனீக்களை வளர்ப்பதில்லை. அவற்றைப் படித்து அறிந்து கொள்வதற்காகவே வளர்க்கப்படுகிறது.
- தேனீக்கள் மட்டுமல்லாமல் மற்றைய பூச்சிகளும் வளர்வதற்கு நகரங்களில் ஏற்ற சூழல் உள்ளதாக சாமிநாதன் கூறுகிறார். பொதுவாக மக்கள் தேனீக்களின் கொட்டுக்கு அஞ்சுகின்றனர். ஆனால், சில ஆண்டுகளில் அவை நம்முடன் நன்றாகப் பழகிச் செல்லமாகிவிடும் என்று தமது அநுபவங்களைச் சொல்லி வியக்க வைக்கிறார்.
- அவை நம் கைகளின் மீது மென்மையாக ஊர்ந்து செல்லும். எப்போதாவது தான் கொட்டும்.
- நம் நாட்டில் பலர் தேனீக்களைத் தேன் சொரியும் பூச்சிகளாகத் தான் பார்க்கின்றனர். ஆனால், அவை இல்லாவிட்டால் உணவுத் தட்டுப்பாடு வருங்காலத்தில் மேலும் கடுமையாவது உறுதி என்றும் அச்சுறுத்துகிறார்.
- மனிதர்களோடு வயல் விலங்குகளும் இதனால் பாதிக்கப்படும். ஏனெனில், அந்த விலங்குகள் மேயும் மசால்புற்கள் வளர்வதற்குத் தேனீக்கள் மகரந்தம் சேர்க்கின்றன.
தர வரிசை:
- காய்கனி சாகுபடியில் சீனாவிற்குப் பின் இந்தியா உலக அளவில் இரண்டாம் இடத்தில் உள்ளது. தேனீக்களைப் போன்ற மகரந்த சேர்ப்பிகளின் செழிப்புக்கும் காய்கனி விளைச்சலுக்கும் தொடர்பு உள்ளது. தேனீக்கள் அரிதாகும்போது காய்கனி விளைச்சலும் குறைந்து போகும் என்று கூறுகிறார்.
- ஐ.நா வின் உணவு மற்றும் வேளாண்மை அமைப்பு அறிக்கையின் படி 140க்கும் மேற்பட்ட நாடுகளில் 90 விழுக்காடு உணவு வழங்கும் 100 பயிர்வகைகளில் 71 பயிர்கள் மகரந்தச் சேர்க்கையினால் செழிப்பவை என்று புள்ளி விவரங்கள் கூறுகின்றன.
- தேனீக்கள் காலை கூட்டிலிருந்து கிளம்பி சராசரி 3 முதல் 5 கி.மீ வரை பயணிக்கும். மலர்களிலிருந்து மகரந்தம் எடுத்து சேமித்துக்கொண்டு அதன் கூட்டில் தமக்கு உணவு சமைக்கும்.
தேனீக்களின் கழிவுகள்:
செரித்து மீந்த மகரந்த உணவைத் தேனீக்கள் கழிக்க வேண்டும். தேனீக்களின் கழிவு என்பது வெளிர் மஞ்சள் நிறத்தில் நீர்த்துளியைப் போன்ற நீர்மம். இவை தேனீச்சாணம் என்று அழைக்கப்படுகிறது.
தேனீக்கள் தமது கூட்டிலிருந்து 10 – 30 மீட்டர் தொலைவு கொண்ட இடத்தைக் கழிப்பிடமாகக் கொள்ளும். சராசரியாக ஒரு தேன்கூடு ஆண்டுக்கு 45 – 50 கிலோ சாணம் கழிக்கும். மழை பொழியும்போது இந்தச் சாணம் மண்ணோடு குழைந்து அருமையான இயற்கை உரமாகிவிடுகிறது. இதனால், இயற்கை வேளாண்மை செய்யும் உழவர்கள் தேனீக்கள் வளர்ப்பதன் வாயிலாகத் தேனீக்கழிவு இயற்கை உரம் கொண்டு கூடுதல் விளைச்சல் காணலாம்.
உழுவார் தாம் கொல்லைகளில் 3 – 4 கூடுகளில் தேனீக்கள் வளர்த்து அவை தரும் பயன்பாடுகளைப் பெற்று பயனடைய வேண்டும் என்று வேண்டுகோள் விடுக்கிறார்.
இவர் தேனீக்கள் வளர்ப்பிற்கு கூடுகளை வாடகைக்கு அளிக்கிறார்.
மேலும் விவரங்களுக்கு:
ஆங்கில மூலம்: http://www.thehindu.com/sci-tech/article1564787.ece
- விவரங்கள்
- பா.சதீஸ் முத்து கோபால்
- பிரிவு: இயற்கை & காட்டுயிர்கள்
இந்தியாவில் கடந்த 2006 ஆம் ஆண்டு 1411 ஆக இருந்த புலிகளின் எண்ணிக்கை தற்போது 1706 ஆக, உயர்ந்துள்ளதாக மத்திய அரசு அறிவித்துள்ளது. இதற்காக நாடு முழுவதும் உள்ள புலிகள் காப்பகங்களிலும், தேசிய வன விலங்கு சரணாலயங்களிலும் புலிகள் கணக்கெடுக்கும் பணி நடைபெற்றது. இந்த கணக்கெடுப்பின் முடிவில் தெரிவிக்கப்பட்டுள்ள அறிக்கையின் படி புலிகளின் எண்ணிக்கை பதினைந்து சதம் உயர்ந்துள்ளது.
இதே அறிக்கை தெரிவிக்கும் மற்றொரு தகவல், தற்போதைய கணக்கெடுப்பில் 612 புலிகள் இரண்டு வயதுக்கு உட்பட்டவை. எனவே இந்த புலிகள் 2006 ஆம் ஆண்டு கணக்கெடுப்பில் இருந்திருக்காது. எனவே புதிதாக பிறந்த இந்த 612 புலிகளை 1411 உடன் கூட்டினால் 2023 புலிகள் இருக்க வேண்டும். ஒருவேளை சில புலிகள் இயற்கையாகவே இறந்திருக்கலாம். புலியின் வயது 12 முதல் 15 க்குள் இருக்கும். எனவே கடந்த நான்கு ஆண்டுகளில் இறந்து போன எல்லா புலிகளும் 317 (2023 - 1706 ) புலிகளும் வயது முதிர்ந்து இறந்திருக்குமா என்பது சந்தகேமே. மத்திய அமைச்சர் புலிகள் வேட்டையாடப்பட்டதை ஒப்புக்கொள்கிறார். எனவே புலிகளை பாதுகாப்புக்காக மேலும் தொடர் நடவடிக்கைகளை எடுக்க வேண்டியுள்ளது.
இந்த முறை புலிகள் கணக்கெடுப்புக்காக முற்றிலும் அறிவியல் முறைகள் பின்பற்றப்படவில்லை. Camera Trapping என்ற முறை கொண்டு புலிகள் ஒவ்வொன்றையும் தனித் தனியாக அடையாளம் காண முடியும். எனவே துல்லியமான கணக்கெடுப்புக்கு இந்த முறை பின்பற்றப் பட வேண்டும். பெரும்பாலான மாநிலங்களில் இன்னமும் காலடி தடத்தை வைத்தே எண்ணிக்கை கணக்கெடுக்கப்படுவதாக தெரிகிறது. மேலும், புலிகளின் கழிவுகளை மரபணு பரிசோதனைக்கு உட்படுத்தி, புலிகளை தனித் தனியாக அடையாளம் காண முடியும்.
புலிகள் தங்களுக்கென்று ஒரு தனி எல்லையை நிர்ணயிப்ப்பதால் அவற்றின் இடப்பெயர்ச்சிக்கு இடையூறு இல்லாத வண்ணம் காடுகளை இணைக்க வேண்டும். இரவு நேர போக்குவரத்தை வனப் பகுதிகளில் முற்றிலும் தடை செய்ய வேண்டும்.
மத்திய அரசின் சமீப கால முயற்சிகள் பாராட்டுக்குரியதே. ஆனால், இன்னும் தீவிரமான நடவடிக்கைகளை நிச்சயம் மேற்கொண்டாக வேண்டும்.
புலிகள் வேட்டையாடப்படும் தகவல் தெரிந்தாலோ, அல்லது புலியின் தோலையோ, உறுப்புகளையோ யாராவது வியாபாரம் செய்தாலோ, கீழ்காணும் இணையதள முகவரியில் புகார் செய்யலாம்.
Report a crime: http://projecttiger.nic.in/reportacrime.asp
தேசமெங்கும் திரியட்டும் செம்மஞ்சள் வரிப்புலிகள்.
- விவரங்கள்
- பா.சதீஸ் முத்து கோபால்
- பிரிவு: இயற்கை & காட்டுயிர்கள்
மிகவும் அரிய வகை உயிரினமாக கருதப்படும் வெள்ளைப் புலிகள், உண்மையில் தனி இனம் கிடையாது. உலகில் சுமார் எட்டு வகையான புலிகள் வாழ்த்து வந்ததாக கூறப்படுகிறது. இவற்றில் தற்ச்சமயம் ஐந்து மட்டுமே காணப்படுகிறது. மற்ற இனங்கள் முற்றிலுமாக அழிக்கப்பட்டுவிட்டன. எந்த வகை புலியாக இருந்தாலும், அவற்றின் நிரமிக்குறைபாடு காரணமாகவே அவை வெள்ளை நிறத்தில் காட்சி அளிக்கின்றன. இந்தியாவின் பெரும்பாலான மிருகக் காட்சி சாலைகளில் காணப்படும் வெள்ளைப்புலிகள் யாவும் வங்கப் புலிகளே. அவை தனிப்பட்ட புலி இனம் கிடையாது.
இது போன்ற நிறக்குறைபாடு பெரும்பாலான விலங்குகளுக்கு ஏற்ப்படுவதுண்டு. எனவே அப்படி மாறுபட்ட நிறத் தோற்றத்தில் இருக்கும் யாவும் தனி ஒரு உயிரினமாக எடுத்துக் கொள்ள முடியாது. சென்ற ஆண்டு வனப் பகுதியில் விலங்குகள் கணக்கெடுப்புக்காக நான் சென்றிடுந்த போது வெள்ளை நிற புள்ளி மான் ஒன்ற நேரடியாகவே பார்த்து அதிசயித்தேன்.
நிறக்குறைபாடு காரணாமாக இருந்தாலும், இவை நிச்சயம் அதிசயமான, அரிய உயிரினங்கள் என்பதில் மாற்றுக் கருத்து இருக்க முடியாது.
ஆப்ரிக்க சிறுத்தைகளிலும் இது போன்ற விலங்குகள் உண்டு. அவை முற்றிலும் நிறம் மாறாமல் அவற்றின் வடிவமைப்பில் மட்டும் மாற்றம் காணப்படுவதுண்டு.
வெள்ளை சிங்கங்கள் இன்றும் ஆப்ரிக்க காடுகளில் காணப்படுகின்றன. பராமரிப்பில் வளர்க்கப்படும் வெள்ளை சிங்கங்களும் உண்டு.
வேங்கை புலியோ அல்லது சிறுத்தை புலியோ நிறக்குறைபாடு காரணமாக முற்றிலும் கருமை நிறத்தில் காணப்படுவதுண்டு. கம்பீரமாகவும் அழகாகவும் இருக்கும் இவை மிக மிக அரிதாகவே காணப்படுகிறது. கருஞ்சிறுத்தை என்று அழைக்கப்படும் இவை இந்தியக் காடுகளில் வாழ்வதற்கான ஆதாரங்கள் உள்ளன.
பொதுவாகவே விலங்குகளும், பறவைகளும் மிகவும் அச்சுறுத்தலுக்கு உள்ளாகி இருக்கும் இன்றைய காலகட்டத்தில், இயற்கையிலேயே அரிதாக உருவாக்கப்படும் இது போன்ற உயிரினங்களும் பாதுகாக்கப்பட வேண்டியது மிகவும் அவசியம்.
அவ்வளவு சுலபத்தில் காணக் கிடைக்காத, இந்தியா காடுகளில் இல்லை என்று நம்பப்படுகிற, மிக மிக அரிய கருஞ்சிறுத்தை தோல், சென்ற மாதம் தாராபுரத்தில் பதுக்கிவைக்கப்பட்டிருப்பதை வனத் துறையினர் (திரு.அருண்) கண்டுபிடித்தனர்.
- விவரங்கள்
- ச.முகமது அலி
- பிரிவு: இயற்கை & காட்டுயிர்கள்
“யானை வரும் பின்னே, மணியோசை வரும் முன்னே’’... இது மாட்சிமை தங்கிய யானைகளை செயற்கையாக்கி விட்டதாகக் களித்த மனிதன் உருவாக்கிய பழமொழிகளில் ஒன்று.
அனைத்துண்ணியான மாந்தரினம் கடந்த பல்லாயிரம் ஆண்டுகளாகவே தன் உணவுக்காகவும், உறைவிடத்திற்காகவும் விலங்குகளைக் கொன்று வந்துள்ளது. இந்தப் பண்பாடு ஒரு அர்த்தத்துடன் அன்றைக்கு இருந்திருந்தாலும், இன்றைய காலத்திலும் அது போன்ற (வேட்டை) ஆசைகள் பலருக்கும் வருவதன் காரணம்: மூடநம்பிக்கை, குறிக்கோளற்ற இலக்கியவெறி, சோம்பல், டாம்பீகம் மற்றும் சாதியமைப்பு போன்றவைதான்.
13,000 ஆண்டுகளுக்கு முன்னரே சடையானைகளை மனிதர்கள் வேட்டையாடிய சான்றுகள் அகழ்வாராய்ச்சிகளின் வழியே கிடைத்துள்ளன. வேட்டையாடிய யானையின் மத்தகத்தைப் பிளந்து அதன் மூளையைக் கூட தின்றிருக்கின்றனர் வரலாற்றுக் காலத்திற்கு முற்பட்டோர். அதுமுதல் இன்றுவரை எல்லா விலங்குகளையும் வேட்டையாடுகிறான் மனிதன். துப்பாக்கி கண்டுபிடிக்கப்படுவதற்கு முன்பு ஈட்டி, வேல், அம்பு போன்ற ஆயுதங்கள் நேரடியாகவும், விஷத்தில் துவைத்தும் யானைகளைப் பதம் பார்த்திருக்கின்றன.
1000 ஆண்டுகளுக்கு முன்னர், யானை விக்னேசுவரக் கடவுளாக்கப்பட்ட காலம் முதல், இன்று விமரிசையாகக் கொண்டாடப்படும் விநாயகர் சதுர்த்தி காலம்வரை, யானைகளுக்கு ஏற்படும் அநியாயத்தை யாருமே கேட்பதில்லை. சரித்திர கால மன்னர்கள் நாடு பிடிக்கும் பேராசையுடன் போரில் பயன்படுத்த பயிற்சியளிப்பதற்கும், பட்டத்து யானை என பவிசு காட்டவும் காட்டு யானைகளைக் கண்மூடித்தனமாகப் பிடித்தனர். பழைய பிடிப்பு முறையாக யானைகளுக்கு `குழி பறித்து’ ஏமாற்றி வீழ்த்தி பிடித்தபோது, நூற்றுக்கணக்கான யானைகள் எலும்பு ஒடிந்து செத்துப் போனதற்கும், மனிதப் போரில் ஆயிரக்கணக்கான யானைகள் கொல்லப்பட்டதற்கும் கணக்கு வழக்கில்லை. ஒரு கணக்கின்படி கடந்த 200 ஆண்டுகளில் இந்தியாவில் மட்டும் சுமார் 1,30,000 யானைகள் கொன்று அழிக்கப்பட்டிக்கின்றன.
தற்போது அசாம், மேகாலயா பகுதிகள், ஒரிசா, பீகார், ஜார்கண்ட், உத்தராஞ்சல், உத்தரபிரதேசம் மாநிலங்களில் நில ஆக்கிரமிப்பு, காட்டழிப்பு, வேளாண்மை, சமூக மோதல் போன்றவற்றால் பெருமளவு காட்டுப்பகுதிகள் அழிக்கப்பட்டும் அவற்றின் தரத்தில் பெருங்கேடும் ஏற்பட்டுள்ளது. அதன் பின்னணியில் அங்கு நடக்கும் யானைக் கொலை விதங்கள் பல: துப்பாக்கிச் சூடு, விஷ அம்பு, மின்னதிர்ச்சி, விஷமிட்ட உணவு, கண்ணிவெடி, ரயில் மோதல் அவற்றுள் சில. இத்தகைய கொடூரங்களுக்கான முதன்மை காரணங்கள்: தந்தம், இறைச்சி மற்றும் பயிர்ப்பாதுகாப்பு என்பனவே. அசாம் மாநிலம் சோனிட்பூர் மாவட்டத்தில் மட்டும் யானைகளின் மீது ஒரு இரகசியப் போர் 2003ம் ஆண்டு நடத்தப்பட்டது. அப்போது 70 நாட்களில் 31 யானைகள் விஷம் வைத்து கொலை செய்யப்பட்டன. இச்செய்தி உலகையே குலுக்கியது.
தமிழ்நாட்டில் நீலகிரி, கோவை, ஈரோடு மாவட்டங்களில் துப்பாக்கி வேட்டை மிகக் குறைவென்றாலும் மின்னதிர்ச்சியால் யானைகள் மடிவது கூடுதலாகும். ஆனால் யானைகள் அழிப்புப் பணியில் தென்-னிந்தியாவைவிட வட இந்தியாவே முதலிடம் பெறுகிறது. மொத்தத்தில் வட இந்தியாவில் அசாம், தென்னிந்தியாவில் கேரளா முதலிடம் பெறுகிறது. (இங்கு 25 பெண் யானைகளுக்கு 1 ஆண் யானை என்று சமன்கெட்ட விகிதமே உள்ளது.) கூட்டிக் கழித்துப் பார்க்கும்போது 3 நாட்களுக்கு ஒரு யானை வீதம் இந்தியாவில் கொல்லப்படுவதாகப் புரிந்து கொள்ளலாம்.
மனிதர் அன்போடு வளர்ப்பதாகக் கூறப்படும் யானைகள் வண்டி இழுத்தன, கடும் வெயிலில் ஏர் உழுதன, மூட்டை சுமந்தன, கல்லையும், கட்டைகளையும் இழுக்கின்றன. வழிபாட்டுத்தலங்களில் வெந்ததைத் தின்று விதி வந்து சாகும்வரை வதைபட்டு பெருமை காட்டுகின்றன. சர்க்கஸ் செய்கின்றன, தன் சகோதரனுடன் சண்டையிட வைக்கப்பட்டன. மன்னர்கள் என்ற மமதை கொண்ட குண்டர்களைத் தூக்கிச் சுமந்தன, பிச்சை எடுக்கின்றன, அடிமையாக சந்தைகளில் விற்பனைக்குள்ளாகின்றன, கெட்டவார்த்தைகளால் திட்டு வாங்குகின்றன, அடி உதைகளால் ரத்தம் சிந்தி அழுகின்றன.
வேண்டிய நீரும், உணவும், நிழலும் கிடைக்காமல் துடிக்கின்றன, அழுக்கடைந்த, கூச்சல் மிகுந்த வீதிகளில் அலைக்கழிக்கப்படுகின்றன, தனிமையில் தவிக்கின்றன, மொட்டை வெயில், புகைதூசிகளால் மன உளைச்சலடைகின்றன, இயற்கையான சத்துள்ள ஆகாரமின்றி நோயால் கஷ்டப்படுகின்றன, தன் வாழ்விடத்தை தானே அழிக்கவும், தன் இனத்தை தானே பிடிக்கவும் உள்ளாக்கப்படுகின்றன. “இருந்தாலும் ஆயிரம் பொன், இறந்தாலும் ஆயிரம் பொன்’’ என கொல்லப்பட்டு தனது தந்தத்திலேயே செய்த தன் உருவத்தைச் சுமக்கும் கொடுமைக்கு ஆளாகின்றன. ஆனால் இவ்வளவையும் பரிதாபத்திற்குரிய யானைகள் மகிழ்ச்சியோடு செய்வதாகவே நினைக்கிறது `ஆறறிவு கொண்ட’ மாந்தரினம்.
கொடும் கூண்டிலடைத்து, கடும் சங்கிலியால் பிணைத்து, ஒரு விலங்குயிரின் பிறப்புரிமை புரியாத மக்களால் தலைவர், ஞானி, முனிவர், விஞ்ஞானி என கருதிக் கொண்டிருக்கும் பலர், வளர்ப்பு யானையின் தெய்வத் தன்மையையும், அறிவுக்கூர்மையையும், புத்தியையும், பலத்தையும் மெச்சி சிலாகிப்பர். அப்படியானால் மாவுத்தன் கையில் கொடிய அங்குசமும், தடியும், இரும்புச் சங்கிலியும், ஈட்டியும் எதற்கு என ஒரு கணமும் சிந்திக்கமாட்டார்கள். நம்மைச்சுற்றி “பாரம்பரிய சுற்றுச் சூழல், ஆரண்யப் பண்பாடு, திராவிடம், தேசியம்‘’ என்று முழங்குவோர் ஒருபுறம், “உயிர்களிடத்தில் அன்பு வேண்டும், ஈசாவாஸ்யம் இதம் ஸர்வம்‘’ என போதிப்போர் மறுபுறம். இந்நிலையில் எதிர்காலத்தில் மிஞ்சப் போவது மேற்கண்டோரின் மாளிகைகளில் யானைத் தந்தத்தில் செய்து பூஜிக்கப்படும் ஸ்ரீ மகா கணபதியின் சிலைகள் மட்டுமே எனத் தெரிகிறது. ஆங்கிலேயர் அரசின் துவக்க காலத்திலும் இந்தியாவில் யானையும் ஒரு “தீங்கிழைக்கும் மிருகமாகக்‘’ கருதப்பட்டது. எனவே, வேட்டையாடிக் கொல்லப்படும் ஒவ்வொரு யானைக்கும் பரிசாக ரூபாய் 50 தரப்படும் என அறிவிக்கப்பட்டிருந்தது ஒரு காலம். 1870களில் வெளியான அத்தகைய அறிவிப்புகளை அப்போதைய அஹிம்சாவாதிகள், ஆன்மிக ஞானிகள், விநாயக பக்தர்கள் யாரும் எதிர்த்து நின்றதாகத் தெரியவில்லை.
இன்றும் யானை ஆராய்ச்சியாளர்கள் உள்ளிட்ட இயற்கையியலாளர்கள், காட்டுயிர் ஆர்வலர்கள், சுற்றுச்சூழல்வாதிகள், வனத்துறையினர் ஆகியோரில் 90 விழுக்காட்டினர் சமூகப் புரிதல்களோ, பகுத்தறிவோ பெற்றவர்களல்லர். மேலும், அவர்கள் தங்கள் சாதி, மத பொருளியல் சார்புகளுடன்தான் இயற்கை பாதுகாப்பு பற்றி பேசுகிறார்கள். நம்நாட்டைப் பொறுத்தவரை அறிவியல் துறையில் பணிபுரியும் விஞ்ஞானிகளும் சரி, அல்லது அரசு சாரா அமைப்பினர்களும் சரி, தங்கள் ஆய்வுகளுடன் தங்கள் பாரம்பரிய மூடநம்பிக்கைகளை ஒரு போதும் ஒப்பிட்டுப் பார்த்து உண்மைகளை உணர்வதில்லை. ஏனெனில் இவர்கள் மனிதரை ஒருபோதும் நவீனப்படுத்தாத இந்தியப் பாரம்பரியங்களையும், பண்பாடுகளையும் மனத்தளவில் பெருமையோடு போற்றுபவர்களாகவே நடமாடுகிறார்கள். இந்த வேளையில் நாம் ஒன்றை புரிந்துகொள்ள வேண்டும்:
நம்மைப் போலவே யானைகள் அதனளவுக்கு மேல் சிந்தித்தல், செயல்படுதல், பிரச்சனைகளைச் சமாளித்தல், புரிதல், நினைவாற்றல், வருந்துதல், பிரிவு, மகிழ்தல், ஏமாறுதல், கோபம் என பல மனநிலைமைகளைப் பெற்றுள்ளன. ஆனால் மனிதர்க்கு உள்ளதைப் போல வஞ்சனை, சுயநலம், பழிவாங்கல், தாக்குதல், கொள்ளை, அட்டகாசம், போக்கிரித்தனம் போன்ற எதுவும் அவற்றிடம் இல்லை. எனவே, உயிர் இலக்கணம் புரியாமல் அதன் ஒரு செயல்பாட்டை `தவறு’ என எண்ணும் போது, அச் செயலின் பின்னேயும் ஒரு காரணம் இருக்கும், ஆனால் அதை யோசிக்க மாட்டோம். ஏனெனில் எதையும் சுயநலத்தோடு லாபக் கணக்கிட்டுப் பழகியவர்களாயிற்றே நாம்.
காட்டு யானைத் தாக்குதல் என்பது பெரும்பாலும் விரட்டி விடுவதே ஆகும். ஒருவேளை அதனிடம் மனிதன் சிக்கிக் கொள்ளும் போது நாம் நினைப்பது போல் மிதிப்பதில்லை. காலால் உதைக்கலாம், தந்தத்தால் நசுக்கலாம், தலையால் முட்டலாம். ஆனால் பொதுவாக 10, 20 மீட்டர்கள் விரட்டித் துரத்திவிட்டுத் திரும்பிவிடும். இத்தகைய நிலையில் விரட்டப்படுபவர் தன்னிலை இழந்து, தவறி விழுந்து விடுவதால் கடும் காயங்கள் அடையக்கூடும். மேலும், அவர் கனவில்கூட அப்படி ஒரு காட்சியை கற்பனை செய்து பார்த்திராததால் ஏற்பட்ட அதிர்ச்சியில் மாரடைப்பு, மயக்கம், காய்ச்சல் ஏற்பட வாய்ப்புள்ளது. இவை எல்லாம் கூட யானைத் தாக்குதல் என்றே அவதூறாகக் கூறப்படுகின்றன.
1992ஆம் ஆண்டு கொண்டுவரப்பட்ட Project Elephant என்ற திட்டம் பத்தாண்டுகள் நிறைவுற்று (1991_2001) பல நடவடிக்கைகளில் குறிப்பிடத்தக்க முன்னேற்றம் அடைந்துள்ளது. இன்னும் சில குறைபாடுகள், நடைமுறைச் சிக்கல்கள் கண்டறியப்பட்டு அவற்றை நீக்க வனத்துறை எடுத்து வரும் முயற்சிகளும், உத்திகளும் ஆர்வலர்களால் ஓரளவு பாராட்டப்படுகின்றன. யானைகளுக்கும் மனிதர்களுக்கும் இடையே ஏற்படும் பிணக்குகளுக்கு காரணம் யானைகளின் வாழிடக் குறைவு மற்றும் அது துண்டாடப்பட்டதேயாகும் என்பது ஒரு முக்கியப்புள்ளி. சில சமயங்களில் காடுகளில் ஏற்படும் உணவுத் தட்டுப்பாடு யானைகளை பாதிக்கும்போது, யானை மனிதர் பிணக்குக்கு அது வழிவகுக்கிறது. உணவு தேடிப் போகும் இப்பேருயிர்கள், தமது நடமாடும் வழியில் அமைந்த வேளாண் நிலங்களில் அப்போதே நுழைகின்றன. இந்த உண்மையை அறிந்து கொண்டு `வாழு வாழ விடு’ என்ற முறையில் மக்களிடமிருந்தும் விவசாயிகளிடமிருந்தும் போதுமான புரிதல்களும் உதவிகளும் வேண்டப்படுகின்றன.
யானைப் பாதுகாப்பு திட்டத்தின் குற்றங்குறைகளைத் தவிர்க்க மேலதிகப் பணிகள் முடுக்கி விடப்பட்டுள்ளன. இருப்பினும் யானை உய்விட தீவிர ஆராய்ச்சிகளின் முடிவாக மேலும் பல நடவடிக்கைகள் அவசியமாகின்றன. இவையே முழுமையாக, உறுதியாக யானைகளைக் காப்பாற்ற உதவும் என்பது வல்லுநர் முடிவு. அவையாவன: துண்டாடப்பட்டு சிதறுண்டு மாறிப்போன கானகப்பகுதிகளை ஒன்றிணைத்தல், கானகப் பரப்பை அதிகரித்தல், கள்ள வேட்டையை முற்றிலுமாக ஒழித்தல், ஆராய்ச்சி அடிப்படையில் இயற்கையான தாவரங்களை வளர்த்தல், யானைகள் அழிந்துவிட்ட காடுகளில் பாதுகாப்புடன் யானைகளை மீண்டும் விடுதல், குற்றவாளிகளின் மூல காரணமறிந்து அவர்களின் கல்வி, பொருளாதார முன்னேற்றத்திற்கு வழிவகைசெய்தல், மக்களிடையே மாநில மொழிகளில் அறிவியல் கண்ணோட்டத்தில் யானைகளின் மீது புரிதல், அகச்சார்பு, அன்பு மலர அச்சு, திரைப்பட ஊடகப் பிரச்சாரங்களை மேற்கொள்ளுதல் ஆகும்.
யானைகளுக்காக, சில தவிர்க்க முடியாத நிலையில், பழங்குடிகள் மற்றும் காட்டோரங்களில் வாழும் மக்களை காடுகளிலிருந்து இடம்பெயர்த்து, ஊர்ப்புறங்களில் குடியமர்த்தி வசதி செய்துதரல்; காடுகளில் விறகு, காய், இலை, புல் போன்ற பொருள் சேகரிப்பை நிறுத்தி, மக்கள் காட்டுக்குச் செல்வதை தவிர்க்க அவர்களுக்கு மாற்று ஏற்பாடுகளைச் செய்தல்; நவீன எரிபொருட்களைத் தந்து, உபயோகிக்க அவர்களை ஊக்குவித்தல்; காடுகளை நம்பி வாழ்ந்தவர்களுக்கு மாற்று வேலை, கைவினைத் தொழில் போன்றவற்றை ஏற்படுத்துவது; மேலும் காபி, தேயிலை, தைலம், இரப்பர், சீகை மற்றும் வணிக மரங்கள் ஏனையவற்றின் பயன்பாட்டைக் குறைக்க பிரச்சாரம் செய்தல்; சுரங்கங்கள், மிகப் பெரிய அணைகள் அமைப்பது தவிர்க்கப்படல் போன்றவை அவசரமான அடிப்படை செயல்திட்டங்களாக இருக்க வேண்டும். இன்னும் முக்கியமாக மத்திய, மாநில அரசுகள் காட்டோரமுள்ள தனியார் நிலங்களைக் கையகப்படுத்தி, காடுகளை இணைத்து பெரிதாக்குவதும் அதன் எல்லைக் கோடுகளாக இயற்கையான ஆறுகள், ஏரிகள் போன்றவற்றை நிர்ணயிப்பதும் மிக முதன்மையானவை.
யானைகளின் வாழ்க்கையில் ஒரு பெரும் பிரச்சனையே மனிதன்தான். இதை யானைகளும் புரிந்து கொண்டிருக்கின்றன. ஆகையால் யானைகளின் நல வாழ்வு சீரழியக் காரணமான மனிதப் புத்திகளில் முக்கியமானவை ஐந்தாகும். முதலாவது, மனிதத் தொகை அதிகரிப்பு. இரண்டாவது, மிதமிஞ்சிய பொருள் நுகர்வு. மூன்றாவது, இயற்கையன்பர் எனக் கூறிக் கொள்வோரின் அறியாமை, தைரியமின்மை, நேர்மையின்மை. நான்காவது, எந்த அரசியல் கட்சியினரும் யானைகள் உள்ளிட்ட உயிரினங்கள் மீது ஒரு ஆழமான அறிவியல் அக்கறை கொள்ளாதது. கடைசியாக, பலதுறை சார்ந்த அறிவாளிகள், பகுத்தறிவாளர், சிந்தனையாளர், இலக்கியவாதிகள் எவரும் இயற்கையை மேலைத்துவ அறிவியலாகப் பார்க்காதது.
யானையினப் பாதுகாப்பில், இந்திய ஊடகங்களின் நிலை என்ன? வருந்தத்தக்க நிலையே! பொதுவாக மக்களின் சிந்தனைகளை முடக்குவதாகவே நமது எல்லாவித அறிவியல் ஊடகங்களின் போக்கும் அமைக்கப்பட்டிருக்கின்றன. நமது ஒலி, அச்சு, தொலைக்காட்சி, திரைப்பட, நாடக ஊடகங்கள் யாவும் எதார்த்தத்திற்கு எதிராகச் செயல்பட்டு குமுறும் பிரச்சனைகளை மறைப்பதோடு, அறிவு என்பதற்கு `புது’ வியாக்கியானம் சொல்வதாகவும் செயல்படுகின்றன. இது இயற்கைப் பாதுகாப்புத் தளத்திலும் எதிரொலிக்கவே செய்கிறது. இதனால்தான் நமது புறச்சூழலும், புலனறிவும் நமக்கே அந்நியமாகிப் போயுள்ளன.
மனிதரின் செயல்பாடுகளுக்கு உண்டான சொற்றொடர்கள் யானைகள் மீதும் மற்ற உயிரினங்கள் மீதும் ஏற்றப்படுகின்றன. ஒரு பத்திரிகை, நீரைத் தேடி தேயிலைத் தோட்டத்திற்குள் புகுந்த யானைக் கூட்டம் ஒன்றினை `தேயிலைத் தோட்டத்திற்குள் யானைகள் கும்மாளம்‘ என்று தலைப்பிட்டது. மற்றொரு நாளிதழ் `யானைகள் வாழைத் தோட்டத்தினுள் படையெடுத்துக் கொள்ளயடித்தன’ என்றது. இன்னொரு நாளிதழ் `ஓட, ஓட விரட்டிச் சென்று சிறுமியை மிதித்துக் கொன்றது சிறுவாணி யானை’ என செய்தி போடுகிறது. பத்திரிகைகள் இன்னும் எழுதுகின்றன... `மதம் பிடித்த அந்த யானை ஓடஓட அவரைப் பிடித்து தூக்கிப் போட்டு மிதித்தது’ என்று ஆய்வுக் கண்ணோட்டத்தோடு நேரில் பார்த்ததுப் போல.
மேலும் பேட்டி என்று வந்து விட்டால் யானையால் தற்செயலாக பாதிக்கப்பட்டவர்கள்கூட இழப்பீடு நோக்கத்தில் வேண்டுமென்றே பொய் சொல்கிறார்கள். இது யானைகளைப் பற்றிய உண்மை நிலைமைகளை மறைத்து விடுகிறது. இவற்றையே தொலைக்காட்சி சானல்களும், தம் பங்கிற்கு படங்களாகக் காட்டின. திரைப்படமும் இதே வழியில்தான் என்பதை விளக்கத் தேவையில்லை. இந்த ஊடகங்களில் வருகின்ற யானைகள் சம்மந்தப்பட்ட செய்திகள் முக்கால்வாசிக்கும் மேல் தவறானவை, கண்டிக்கத்தக்கவை. எனவே அவற்றை அப்படியே நம்பாதீர்; விமர்சனப்படுத்துங்கள். குறிப்பாக யானைகளின் மேலான “அட்டகாசம், கொள்ள, கும்மாளம், சூறையாடுதல்’’ போன்ற தகாத வார்த்தைப் பிரயோகங்களைக் கண்டித்து அவற்றைப் பயன்படுத்தக் கூடாதென சம்மந்தப்பட்ட நிருபர், நிர்வாகி, ஆசிரியர்க்கு கடிதம் எழுதுங்கள்.
இப்படிப்பட்ட நிலையில், இத்தகைய மனிதரின் சொல் அட்டூழியத்தை தடுத்து நிறுத்திட வல்லோர் ஏதாவதொன்று செய்ய வேண்டும். மாறாக கணபதி ஹோமமும், கஜ பூஜையையும்தான் நடத்திக் கொண்டிருக்கின்றனர். மக்களின் எண்ணிலடங்கா மூடநம்பிக்கைப் பொருள்களில் பிரபலமானவற்றுள் ஒன்று யானை வாலின் உரோமம். இது அணிகலன்களில், குறிப்பாக மோதிரங்களில் சுற்றப்படுகிறது. இந்தியாவிலும், ஆப்பிரிக்காவிலும் இத்தகைய யானை மயிர் மோதிரங்கள் அணிவது அதிர்ஷ்டம் என நம்பப்படுகிறது. இது போன்ற குருட்டு நம்பிக்கைகளாலும் யானை என்ற பேருயிர் அழிந்துபோகிறது. இதன் பொருட்டு நாம் செய்ய வேண்டியது என்ன? யானைத் தந்தங்களால், வனப்படுபொருள்களால் செய்யப்பட்ட பொம்மைகளையோ, வளையல்களையோ, யானை வாலின் முடிகளையோ, யானையின் சிறுநீர், சாணத்தையோ வாங்கக்கூடாது. இவை யாவும் அநாகரிக மூடநம்பிக்கைகள் என்பதை மக்கள் புரிந்து கொள்ள வேண்டும். இன்னும் யானையின் தும்பிக்கையால் ஆசிர்வாதம் பெறுவது, அதற்கு பிச்சை இடுவது, உணவு தருவது, வணங்குவது, சாணத்தை மிதிப்பது, இப்படி எந்தச் செயல்களையும் செய்ய வேண்டாம். இவற்றாலும் யானைகளின் மறுபுறம் வேதனைக்குரியதாக இருக்கிறது என்பதை உணர வேண்டும்.
யானைக்கும், நமக்கும் பங்காளி, பகையாளி, வரப்புவாய்க்கால், கொடுக்கல் வாங்கல் பிரச்சனை என்ன உள்ளது? யானை ஒரு விலங்கு, அதன் மனதில் உணவுத் தேடலும், தண்ணீர் நாடலும், காட்டு வழித்தடத் தேவையும்தான் ஒரே நோக்கமாக இருக்கும்; சொத்து சேர்ப்பதல்ல, அகப்பட்டதைச் சுருட்டுவதல்ல. காட்டுத் தீவனம் கிடைக்காத வகையில் தடுக்கப்படும்போது, பசியால் உந்தப்பட்டு, வேறு வழியின்றி, உயிரைப் பணயம் வைத்து துணிவான முயற்சியை எடுக்கிறது யானை. இதில் குறுக்கீடு செய்யும் மனிதனுடன் மோதும் நிலையில் இரு தரப்பிலும் தற்செயலாக விபத்துக்கள் ஏற்படுகின்றன. உடனே, சிறிதும் பகுத்தறிவின்றி பிரச்சனை ஊதிப் பெரிதாக்கப்பட்டு “காட்டுயானைகள் அபாயகரமானவை’’ எனத் தூற்றப்படுகின்றன. இது போன்ற நிலையில் யானையின் சார்பாக நின்று பேச, மனிதன் எப்போதும் முன்வந்ததில்லை. காரணம் கொலைகாரர்களும், கொள்ளைக்காரர்களும் மனிதர்கள்தானே. எனவே சமுதாய மன மாற்றத்திற்கும் சம்மந்தப்பட்டோர் பாடுபட வேண்டும். உயிரினங்கள் குறித்த நியாயமான ஒருமித்த கருத்துக்களும், தகவல்களும் மக்களுக்குக் கிடைக்க அரசு நடவடிக்கை எடுக்க வேண்டும். நாணயமான காட்டுயிர் பாதுகாப்புச் சங்கங்களுக்கும் இயற்கை மற்றும் காட்டுயிர், சுற்றுச்சூழல் கழகங்களுக்கும், அறக்கட்டளைகளுக்கும் உதவி, ஊக்குவித்து, ஒருங்கிணைப்பை ஏற்படுத்தி இவர்களைக் கொண்டு ஊர்க்காவல் படை போல வனக்காவல் படை ஒன்றை அமைக்கவேண்டும். மேலும் சுற்றுச்சூழல் விருதுகள், பரிசுத் திட்டங்களை அரசு நிறுவுதல் வேண்டும்.
அரசியலில் மாறுபாடுகள், பண்பாட்டில் வேறுபாடுகள், சமூக நீதியில் முரண்பாடுகள், குடும்பத்தில் கூறுபாடுகள் என்றே வாழும் மனிதன், யானைகள் உட்பட்ட காட்டுயிரினங்கள் குறித்த சங்கதியிலாவது ஓரணியில் திரள வேண்டும். ஏனெனில் முன்னர் சொன்னவற்றுக்கெல்லாம் ஒரு மாற்று இருக்கக்கூடும். ஆனால், காட்டுயிர் பிரச்சனைகளில் மாற்றுக்கு வழியே இல்லை. எனவே... நாம்... “டுமீல்’’. அதோ கோடிக்கணக்கான ஆண்டுகள் பரிணாமத்தில் இப்புவியில் வாழும் உரிமையை நமக்கு முன்பே பெற்றுவிட்ட, தந்தம் தாங்கிய ஆண் யானை ஒன்று துப்பாக்கியால் சுடப்பட்டு காடே எதிரொலிக்கும் கதறலுடன் கீழே சாய்கிறது., இப்போது நாம் என்ன செய்யப் போகிறோம்?
(இளைஞர் முழக்கம் மார்ச் 2011 இதழில் வெளியானது)
- இந்தியாவில் மீண்டும் சிறுத்தைகள்
- பறவைகளுக்கும் பொருந்துமா காதலர் தினம்?
- புலிகள் பாதுகாப்புக்கு என்ன செய்ய வேண்டும்?
- மனங்கவரும் பறவைகள்
- நான் ஒரு குட்டி யானை
- பாண்டா கரடிகள்: சீனாவின் சூப்பர் ஸ்டார்
- சுமத்திரா புலிகள் - இன்னும் கொஞ்சமே மிச்சம் இருக்கு
- வீழ்ந்து கொண்டிருக்கும் வரையாடுகள்
- காணாமல் போகும் நீர் நாய்கள்
- அழிந்து வரும் சோலை மந்தி
- பழனி மலை தொடர்ச்சி
- மிரட்டும் தவளைகள்
- எறும்புக்கூட்டம் - யார் அந்த ராணி?
- டார்வினின் விதி மீறும் நாய்கள்
- பறவைகளின் ரேடியேட்டர்
- மீன்களின் உலகம்
- அபசகுனமா? ஆஸ்திரேலியப் பறவையா?
- நான்கு கொம்பு மான் (Four horned antelope–Tetracerus quadricornis)
- சிறுத்தைப் புலி - இயற்கையின் கொடை
- புலிகளும் புரிதலும்