அறிவியல் ஆயிரம்

விவரங்கள்: மு.குருமூர்த்தி; பிரிவு: தொழில்நுட்பம்; வெளியிடப்பட்டது: 20 ஜனவரி 2010

அறிவியல்

'கார்போஹைட்ரேட்' என்பது தான் சரியான பதில்.

Glucose காரின் எஞ்சினுக்கு பெட்ரோல் எப்படியோ அப்படித்தான் உடல் என்கிற எந்திரத்திற்கு கார்போஹைட்ரேட் என்கிற உணவுப் பொருள். குளுகோஸ் என்பதுதான் எளிமையான கார்போஹைட்ரேட். இது ரத்த ஓட்டத்தில் உடனடியாகக் கலந்து உடல் வேலை செய்வதற்குத் தேவையான சக்தியைக் கொடுக்கிறது. பட்டினியாய் கிடப்பவன் சோர்ந்து போவதும், உணவு சாப்பிட்டவுடன் உடலுக்கு சுறுசுறுப்பு ஏற்படுவதும் இதனால்தான்.

நீங்கள் தண்ணீரில் குளுகோசை கரைத்துக் குடித்தால் உங்களுடைய செரிமான உறுப்புகள் வழியாக குளுகோஸ் நேரடியாக இரத்தத்தில் கலந்து சக்தி கிடைத்துவிடுகிறது. குளுகோஸ் மூலக்கூறில் கார்பன் அணுக்களும், நீர் மூலக்கூறும் அடங்கியிருக்கின்றன. ஒரு குளுகோஸ் மூலக்கூறில் ஆறு கார்பன் அணுக்களும், ஆறு நீர் மூலக்கூறுகளும் அடங்கியுள்ளன.

குளுக்கோஸ் ஒரு எளிமையான சர்க்கரைப்பொருள். இதனால்தான் நாக்கில் பட்டவுடன் இனிக்கிறது. குளுக்கோஸின் வேறொரு வடிவம் ஃப்ரக்டோஸ். இது பழங்களில் இருக்கிறது. ஃப்ரக்டோஸும், குளுக்கோஸும் ஒரே மாதிரியான மூலக்கூறுகள்தான். ஆனால் அணுக்களின் அமைப்பில் கொஞ்சம் வேறுபாடு இருக்கிறது. நம்முடைய கல்லீரல் ஃப்ரக்டோசை குளுக்கோசாக மாற்றுகிறது. இதேபோல் நாம் சீனி என்றழைக்கும் சுக்ரோஸ், பாலில் மறைந்துள்ள லாக்டோஸ், மாவில் மறைந்துள்ள மால்டோஸ் என்பவையும் குளுக்கோசின் வெவ்வேறு வடிவங்கள் ஆகும்.

குளுக்கோசும், ஃப்ரக்டோசும் நேரடியாக ரத்தத்தில் கலந்து கொள்ளக்கூடியவை. ஆனால் லாக்டோஸ், சுக்ரோஸ், மால்டோஸ் இவையெல்லாம் என்சைம்கள் உதவியால் மாற்றமடைந்து ரத்ததில் கலக்கப்படுகின்றன. அடுத்தமுறை பாக்கெட் உணவை வாங்கும்போது கார்போஹைட்ரேட் என்கிற தலைப்பில் என்னென்ன உள்பிரிவுகள் எழுதியிருக்கிறார்கள் என்பதைப் பார்த்து அறிந்து கொள்ளுங்கள்.

மிகவும் சிக்கலான குளுக்கோஸ்களைப் பற்றியும் நாம் தெரிந்து கொள்ளவேண்டும். அரிசி, கோதுமை, ஓட்ஸ், சோளம் போன்ற தானியங்களும், உருளைக்கிழங்கு, வாழைப்பழம் போன்றவற்றில் சிக்கலான கார்போஹைட்ரேட்கள் உள்ளன. இந்த சிக்கலான கார்போஹைட்ரேட்டுகளை என்சைம்களின் உதவியால் சிதைவடையச் செய்து எளிமையான குளுக்கோஸாக உடல் உறுப்புகள் மாற்றுகின்றன.

சிக்கலான கார்போஹைட்ரேட்டுகள் சிதைவடைந்து இரத்தத்தில் கலப்பதற்கு கூடுதல் நேரம் பிடிக்கும். ஒரு இனிப்பான சோடவைக் குடித்தால் ஒரு நிமிடத்திற்கு 30 கலோரிகள் என்ற வீதத்தில் குளுக்கோஸ் இரத்தத்துடன் கலந்து விடுகிறதாம். ஆனால் சிக்கலான கார்போஹைட்ரேட்டுகள் ஒரு நிமிடத்திற்கு 2 கலோரிகள் என்ற வேகத்தில் இரத்தத்துடன் கலக்கிறதாம்.

- மு.குருமூர்த்தி

விவரங்கள்: நளன்; பிரிவு: தொழில்நுட்பம்; வெளியிடப்பட்டது: 20 ஜனவரி 2010

அறிவியல்

அமெரிக்காவில் ட்ரெக்வான் ஆராய்ச்சிக் கூடமும் நாசா விண்வெளி மையமும் இணைந்து ஒருவர் பறந்து செல்லக்கூடிய சிறிய காற்றாடி விமானத்தை கண்டுபிடித்துள்ளனர். ஆங்கிலத்தில் springtail என்று அழைக்கப்படும் இந்த காற்றாடி விமனாங்களில் வானில் மணிக்கு 182 கிலோமீட்டர் வேகத்தில் கூட பறந்து செல்லலாம். 46 லிட்டர் அளவுள்ள டாங்கியில் நிறப்பிய எரிபொருளை கொண்டு 296 கிலோ மீட்டர் வரை பயணிக்கலாம். தரையிலிருந்து 11,000 அடி உயரம் வரை இந்த விமானத்தால் பறக்க முடியும். இத்தனை திறன் இருந்தும் இதனை சராசரியாக 400 அடி உயரத்தில் மணிக்கு 150 கிலோமீட்டர் வேகத்தில் பயன்படுத்தப்போவதாக ட்ரெக் ஆராய்ச்சிக்கூட விஞ்ஞானிகள் தெரிவிக்கின்றனர்.

காற்றாடி விமானத்தில் பயணிக்கும் நபருக்கு சில உடற்தகுதிகள் வேண்டும். அவர் உயரத்தில் ஐந்தரை அடியிலிருந்து ஆறரை அடிக்குள்ளும். எடையில் 50 கிலோவிலிருந்து 125 கிலோ வரை மட்டும் இருக்கவேண்டும். அப்போதுதான் விமானத்தை அதிக உயரங்களில் கட்டுப்பாடாக ஓட்ட முடியும்.

காற்றாடி விமானங்களின் முக்கியப் பகுதியாக இருப்பது 118 குதிரை சக்தி மிக்க சக்திவாய்ந்த மோட்டார் இயந்திரம். இதனை கொண்டு இதன் மேல் உள்ள இரு பெரிய காற்றாடிகள் சுழன்று இவை வானில் பறக்க ஆரம்பிக்கின்றன. வீடியோ விளையாட்டுகளில் பயன்படுத்தப்படும் ஜாய்ஸ்டிக் கருவிகள் இந்த விமானத்தில் பயன்படுத்தப்படுகிறது. இடது பக்கமிருக்கும் ஜாய்ஸ்டிக் கருவியின் மூலம் விமானத்தின் உயரத்தையும், வலது பக்க கருவியின் மூலம் விமானத்தின் திசையையும் மாற்றி கட்டுப்படுத்தலாம். ஹெலிகாப்டர் எப்படி பறக்கிறதோ, அதே போல இவையும் ஒரே இடத்தில் அந்தரத்தில் பறந்தபடி நிற்க முடியும். பல வகைகளிலும் அளவுகளிலும் காற்றாடி விமானங்கள் உருவாக்கப்பட்டுள்ளன. உயர்தர 120 ஆக்டேசன் பெட்ரோலை கொண்டு இயக்கக்கூடிய வகையில் முதல் காற்றாடி விமானங்கள் தயாரிக்கப்பட்டாலும் தற்போது சாதாரண பெட்ரோலையும், ஏன் டீசலை கொண்டும் இயங்கும் படி புதிய விமானங்கள் வடிவமைக்கப்பட்டுள்ளன.

இயந்திரக்கோளாறு காரணமாக விமானம் நடுவானில் நின்று விட்டாலும் அதில் பயணிப்பவர் பயப்படத் தேவையில்லை. விமானத்திலிருக்கும் பாராசூட்டின் மூலம் அவர் தப்பித்து விடலாம். முதல் பாராசூட் வேலை செய்யவில்லையென்றால் கூட கவலையில்லை. இருக்கவே இருக்குகிறது இரண்டாம் பாராசூட். ஆம் இதில் இரண்டு பாராசூட்கள் உள்ளன.

இந்த விமானத்தை சோதனை முயற்சியாக முதலில் பயன்படுத்தும் போது ஒரு இராட்சத கிரேன் இயந்திரத்துடன் விமானம் கயிற்றின் மூலம் கட்டப்பட்டிருந்தது. விமானம் செயலிழந்தால் உடனே கிரேன் வழி கயிற்றின் மூலம் விமானம் தரையில் விழாமல் பாதுகாக்கவே இவ்வாறு செய்யப்பட்டது. கயிற்றின் மூலம் கட்டப்பட்டு இதுவரை 200 முறையும் கயிற்றில்லாமல் 20 முறையும் வெற்றிகரமாக காற்றாடி விமானங்கள் இதுவரை பறந்துள்ளன. இதன் பயன்கள் என்று பார்த்தால் தற்போதைக்கு போர் வீரர்களுக்கும், இயற்க்கை பேரழிவு காலங்களில் அவசரகால பாதுகாப்பு பணிகளுக்கும், தீயணைப்புப்படை வீரர்களுக்கும் காற்றாடி விமானங்கள் பயன்படுத்தப்படும் என்று தெரிகிறது. வருங்காலத்தில் நீங்கள் கனவு காண்பதை போல் தனி நபர்கள் அலுவலகம் செல்வதற்கு பயன்படலாம்

விவரங்கள்: முல்லைத் தமிழ்; பிரிவு: தொழில்நுட்பம்; வெளியிடப்பட்டது: 20 ஜனவரி 2010

அறிவியல்

இன்றைய அறிவியல் உலகம் தகவல் தொடர்பு தொழில் நுட்பங்களின் மூலம் மிக உன்னதமான பிணைப்பை உலக மக்களிடையே எளிமையாக்கிவிட்டது.

கண்ணிமைக்கும் நேரத்தில் கடல் கடந்து பறக்கும் குரல் ஒலிகளின் ஒப்புயவர்வற்ற செயல்பாடுகளுக்கு செல்பேசி முக்கிய பங்காகிவிட்டது. காடுகள் மேடுகள் எல்லாம் உழைத்து களைத்துப்போன ஏழைமக்கள் வாழும் குடிசைப்பகுதிகளின் சந்து பொந்துகளிலெல்லாம் சந்தடியில்லாமல் நுழைந்து சாகசம் படைத்து அவர்தம் வாழ்க்கைத் தொடர்பை வலுவாக்கி வருவதும் செல்பேசிகளே. செல்போன்களின் சேவைகள் நாளுக்கு நாள் பெருகிக் கொண்டே செல்கின்றன. 2005 - ஆண்டு கணக்கெடுப்பின்படி உலகில் இதனை பயன்படுத்துவோரின் எண்ணிக்கை 126 கோடியாக இருந்தது என்றும் அது, நாளொன்றுக்கு 46000 பேர் வீதம் புதிதாக அதிகரித்து வருவதாகவும் கணக்கிட்டுள்ளனர்.

இங்ஙனம் பரவிவரும் செல்பேசிகளின் பயன்பாடுகள் உடல் ஆரோக்கியத்துக்கு மிகவும் கேடுகள் விளைவிக்கின்றன என்பதனை சமீபத்திய அறிவியல் ஆய்வுகள் தெளிவுபடுத்தி உள்ளன. இயற்கையின் இயற்கையான கதிர்வீச்சுகளிடையே அறிவியல் கண்டுபிடிப்புகளாகிய ஒயர்லெஸ், ரேடியோ, டிவி, ரேடார், செல்போன்கள் இவைகளின் இயக்கத்தால் வெளிவிடப்படும் ரேடியோ அலைகள், கதிரியக்க அதிர்வுகள், நுண்ணலை அதிர்வுகள், நுண்ணலை கதிர்வீச்சுகள் போன்றவை உயிர்களின் மீது பல்வேறு தீயவிளைவுகளை உருவாக்கி வருகின்றன. இதில் இன்றைய செல்பேசிகளே அபரிமிதமான விளைவுகளை ஏற்படுத்துகின்றன என்பதனை அறிய முடிகிறது.

இதுபோலவே செல்பேசி "டவர்களும்" மிகவும் ஆபத்தானவை தான். அவற்றிலிருந்து வரும் பாதுகாப்பற்ற நுண்ணலை கதிர்வீச்சுகளில் சுமார் 60%, தலைப்பகுதிகளில் கிரகிக்கப்பட்டு, கொஞ்சம் மூளையினுள் ஊடுருவி செல்வதாக கண்டறிந்துள்ளனர்.

சிறுகுழந்தைகள் செல்பேசிகளை பயன்படுத்துவது மிகவும் பாதிப்பான விளைவுகளை ஏற்படுத்துகிறது என்பதனையும் பிரிட்டீஷ் தேசிய கதிரியக்க பாதுகாப்புக்கழகம் ஆய்வுகள் மூலம் கண்டறிந்துள்ளது. பெரியவர்களைவிட குழந்தைகளை 3.3 மடங்கு கதிர்வீச்சுகள் அதிகமாக பாதிக்கின்றன என்றும், குழந்தைகளின் மண்டைஓடுகள் மிகவும் மெல்லிய தன்மையுடையதாக இருப்பதால் அவை ஆபத்தான கதிர்வீச்சுகளினால் எளிதாக பாதிக்கப்படுவதால் 30 முதல் 40 வயதிற்குள் பெரும்பாலோருக்கு மூளைக்கட்டிகள் வருவதற்கு வாய்ப்புகள் உள்ளன என்றும் உறுதிபடுத்தியுள்ளனர்.

செல்பேசிகளின் தீயவிளைவுகள் பற்றி பல்வேறு நாட்டைச் சேர்ந்த அறிவியல் அறிஞர்களின் தீவிர ஆய்வுகளில் பல உண்மைகள் வெளியாகி உள்ளன.

இஸ்ரேல் நாட்டைச் சேர்ந்த "ராப்பாபோல்ட் மருத்துவ அறிஞர்கள் அமைப்பு" செல்பேசி கதிர்வீச்சுகளை விலங்குகளில் பரிசோதனை செய்ததில் அவற்றின் கண்கள் வெகுவாக பாதிக்கப்படுவதாக கண்டறிந்துள்ளனர். கண்களுக்கு அருகில் செல்பேசி கதிர்வீச்சு செல்லும்போது வெப்பநிலை சுமார் 3டிகிரி செல்சியஸ் அதிகரிப்பதால் கண்புரை நோய்கள் எளிதில் (Cataract) உருவாவதனை கண்டுபிடித்துள்ளனர்.

அமெரிக்க அறிவியலறிஞர்கள் மேற்கொண்ட பல்வேறு ஆய்வுகளின்படி செல்பேசி பயன்படுத்துபவர்கள் பெரும்பாலோர் ஆண்மைக்குறைவு, விந்தணுக்குறைவு, மகப்பேறின்மை போன்ற ஆபத்திற்குள்ளாவதை கண்டுபிடித்துள்ளனர். இந்தியாவில் மும்பையைச் சேர்ந்த மருத்துவ அறிஞர்களும் பல்வேறு ஆய்வுகள் மூலம் இதை தெளிவுபடுத்தியுள்ளனர். சாதாரணமான மனிதர்களைவிட நாள்தோறும் குறைந்தபட்சம் நான்கு மணிநேரம் செல்பேசிகளை பயன்படுத்துவோரின் விந்தணு எண்ணிக்கை 25% குறைவாகவே காணப்படுவதனை அறிவியல் ஆய்வுகள் தெளிவுபடுத்தி உள்ளன.

அமெரிக்க ஓஹியோவின், கிளீவ்லேண்ட் இனப்பெருக்க மருத்துவ ஆய்வு மையத்தின் இயக்குநர் பேராசிரியர் அசோக் அகர்வால் விலங்கினங்களில் மேற்கொண்ட ஆய்வுகளின்படி விந்தணுக்களை உருவாக்கும் செல்கள் மின்காந்த கதிர்வீச்சுகளினால் அல்லது அதனால் ஏற்படுத்தப்படும் வெப்பத்தினால் பாதிக்கப்படுவதனை கண்டறிந்து வெளியிட்டார். செல்பேசிகளை இடுப்பு பகுதியில் வைத்திருப்பவர்களின் அடிவயிறு, தொடையிணைப்பு பகுதிகள் எளிதில் சூடாவதும் இத்தகைய பாதிப்புகளுக்கு காரணமாகும்.

அன்னாள் நரம்பியல் ஆய்வுகளும், டாக்டர் பாவ்லோ ரோஷினியின் ஆய்வுகளும் செல்பேசி கதிர்வீச்சுகள் மூளைசெல்களை தூண்டுகின்றன என்பதனை வெளிப்படுத்தியுள்ளன. இத்தகைய தூண்டுதல்கள் காக்கைவலிப்பு போன்ற விளைவுகளை ஏற்படுத்தக்கூடும் என தெரிவித்துள்ளார்.

சுவீடன் தேசிய உழைப்பாளர் வாழ்வு மையம் வெளியிட்டுள்ள ஆய்வாளர்களின் அறிக்கையின் படி 2000 மணி நேரத்துக்கு மேல் செல்பேசியை பயன்படுத்திய 905 முதியவர்கள் மூளைப்புற்றுநோயால் பாதிக்கப்பட்டுள்ளனர் என்பதனை வெளிப்படுத்தியுள்ளனர். சாதாரணமாக செல்பேசி பயன்படுத்தாதவர்களை விட 3.7 மடங்கு அதிகமாக செல்பேசி பயன்படுத்துவோர் பாதிக்கப்படுகின்றனர் என்பதையும் ஒப்பிட்டுள்ளனர்.

இலண்டன் புற்றுநோய் ஆராய்ச்சி மையம் - மூன்று பிரிட்டிஷ் பல்கலை கழகங்களுடன் சேர்ந்து நான்கு ஆண்டுகளாக மேற்கொண்ட ஆய்வு முடிவுகள் படி அதிக செல்பேசி பயன்பாடு உடல் ஆரோக்கியத்திற்கு தீங்கு விளைவிப்பதை கண்டறிந்துள்ளனர்.

எனவே செல்பேசி பயன்படுத்துவோர் குழந்தைகளிடம் செல்பேசிகளை கொடுப்பதை தவிர்க்கவும்.

செல்பேசி வைத்திருப்போர் கவனத்திற்கு :

பேசும்போது உடலுக்கு சற்று தொலைவில் வைத்து பேசுவதும், வாய்ப்புகள் உள்ளபோது சாதாரண தொலைபேசிகளை பயன்படுத்துவதும். வாகனங்களில் செல்லும்போது கண்டிப்பாக செல்பேசி தொடர்புகளை தவிர்ப்பதும், அதிகமாக சூடாகும் வரை பேசுவதை தவிர்ப்பதும். செல்பேசி பயன்படுத்துபவருக்கு மிகவும் பாதுகாப்பானதாகும்.

(நன்றி : புதிய தென்றல் ஆகஸ்ட் 2007)

விவரங்கள்: க.மணி; பிரிவு: தொழில்நுட்பம்; வெளியிடப்பட்டது: 09 ஜனவரி 2010

அறிவியல்

மண்டை ஓட்டுக்குக் கீழே, மூளையின் பரப்பில் பட்டானி அகலத்திற்கு எலெக்ட்ரானிக் சிப்பங்களைப் பதிக்கும் அறுவைச் சிகிச்சைகள் பரவலாகிக் கொண்டு வருகிறது. பார்க்கின்ஸன், டிஸ்டோனியா போன்ற மூளை நரம்பு சம்மந்தப்பட்ட நோய்களைக் குணப்படுத்த இத்தகைய சிப்பங்கள் மூளையில் பதிக்கப்படுகின்றன. இதன் உதவியால் தக்க அளவு மின்தூண்டலை வேண்டும்போது வழங்குவதன் மூலம் நரம்பு சம்மந்தமான நோய்களுக்கு நிவாரணம் கிடைக்கிறது.

கட்டுப்பாடில்லாமல் அதனிஷ்டத்திற்கு நரம்புசெல்கள் துடிப்பதால் உடல் அஷ்டக் கோணல்களாக முறுக்கிக் கொள்ளும் நோய்க்கு டிஸ்டோனியா என்று பெயர். இந்நோயை சிப்பத்தைப் பதிப்பதின் மூலம் மிக எளிதில் சமாளித்துவிடலாம். மிதமான மின்தூண்டலை, குறிதவறாமல் நரம்பு செல்களுக்கு வழங்குவதன் மூலம் மனநோய், மையநரம்பு மண்டலப் பிரச்சனைகள் போன்றவற்றைச் சரிப்படுத்தலாம். ஆக்ஸ்ஃபோர்டு பல்கலைக்கழக நரம்பியல்துறை மூளையின் ஆழத்தில் சிப்பங்களைப் பதிக்கும் அறுவைச் சிகிச்சைகளைப் பற்றி ஆய்வு செய்துவருகிறது. இது வெற்றி பெற்றால், நினைவாற்றலை அதிகப்படுத்தலாம், தீய பழக்கங்களை மறக்கடிக்கலாம்.

மூளையில் "இன்ப மையம்' என்றொரு இடம் இருக்கிறது. அந்த இடத்தைத் தூண்டினால் மனதில் திருப்தியும் மகிழ்ச்சியும் ஏற்படும். இதைப்பற்றி 2008 இல் " Pleasure center" என்றொரு நூல் வெளிவந்தது. எழுதியவர் அஸிஸ் என்பவர். பணம் பணமென்று அலைந்து வாழ்க்கையின் சுவாரசியமான காலங்களை இழக்கும் வாலிப வயோதிகர்களுக்காக "இன்பம் தூண்டும்" சிப்பங்களை வடிவமைக்க ஆக்ஸ்ஃபோர்டு பல்கலை முயன்றுவருகிறது.

ராபர்ட் ஹீத் என்றொரு சைக்கியாட்ரிஸ்ட் 1960 இல் ஒரு வினோத அறுவைச்சிகிச்சை செய்தார். ஓரினச்சேர்க்கைப் பிரியரான "கே' ஆணின் மூளையில் (ஆ19 பரிசோதனை என்று அதற்குப் பெயரிட்டார்) மின் தூண்டலை தேவைப்படும்போது வழங்கியதும் அவரது ஆவல் தணிந்ததாம். அதன்பிறகு அவரைப்பற்றி எந்த தகவலும் இல்லை. இப்போதைய "ஹைடெக்" தொழில் நுட்பம் சிப்பம் பதிக்கும் சிகிச்சையை 95 சதம் வெற்றிக்கு இட்டுச்செல்லும் என நம்பலாம்.

தக்க புள்ளியல் மின்தூண்டலை "லேப்" செய்தால் உள்ளத்தில் பேரின்பம் பெருக்கெடுக்கும். செக்ஸ் - சர்க்யூட் - சிப்பங்கள் தயாராகிக் கொண்டுள்ளன.

- முனைவர் க.மணி