அறிவியல் ஆயிரம்

விவரங்கள்

சிதம்பரம் இரவிச்சந்திரன்

பிரிவு: விண்வெளி

வெளியிடப்பட்டது: 25 ஆகஸ்ட் 2026

• அறிவியல்

கனவு காணவும் அந்த கனவுகள் நனவாகவும் மனிதனை ஊக்குவிப்பது வானின் வர்ணஜாலங்களே. நட்சத்திரங்கள் தாலாட்டு பாடும் இரவில் பல அற்புதங்கள் ஒளிந்திருக்கும் வானம் ஒரு அதிசய உலகமே. சூரியன், சந்திரன், நட்சத்திரங்கள் மனிதனின் கவனத்தை எப்போதும் ஈர்ப்பவை. நாள் தவறாமல் சூரியன் கிழக்கில் உதிக்கிறது; மேற்கில் மறைகிறது. சூரியன் பூமியைச் சுற்றுகிறது என்று ஆதிகால மனிதன் நம்பினான்.

பிரபஞ்சம் எந்த அளவிற்குப் பெரியது? அதற்கு எல்லைகள் உண்டா? அதற்கும் அப்பால் என்ன? அறிய வேண்டும் என்ற மனிதனின் ஆவலில் பிறந்ததே வானியல். நட்சத்திரக் கூட்டங்கள், சந்திரன் உட்பட்ட அன்றாட வான் காட்சிகளைத் தேதியிட்டுப் பதிவு செய்வதே வான் உற்றுநோக்கலில் ஆரம்பப் படி. படிப்படியாக புதிய நட்சத்திரங்களைக் காணும்போது அவற்றின் பெயர்களையும் பதிவு செய்து முன்னெடுத்துச் செல்ல வேண்டும். செய்தித்தாள்களில் வெளியிடப்படும் நட்சத்திர வரைபடங்கள், ஸ்டெல்லாரியம் (Stellarium), மொபைல் ஸ்டார் மேப் (Mobile Star Map), ஸ்கை வியூ (SkyView), ஐஎஸ்எஸ் டிடெக்டர் (ISS Detector) போன்ற மொபைல் போன் செயலிகள் இதற்கு உதவும்.

ஒவ்வொரு நாளும் நட்சத்திரங்களையும் சந்திரனையும் உற்றுநோக்குபவர்களுக்கு வானத்தைப் பார்த்தே சரியான நேரத்தைக் கண்டுபிடிக்க முடியும். மொபைல் போன் சிக்னல்கள் கிடைக்காத இடங்களில் கூட நேரமறிய வானத்தை உற்றுநோக்கி அறியலாம். சூரியனும் எட்டு கோள்களும் அடங்கிய சூரிய மண்டலமும், அதன் பகுதியாக உள்ள கோள்கள், குறுங்கோள்கள் (சிறிய கோள்கள்), வால் நட்சத்திரங்கள், விண்கற்கள் ஆகியவை அனைத்தும் சூரிய மண்டலத்தின் பகுதிகளே.

ஆகாய கங்கை அல்லது பால்வீதி (Milky Way) என்பது நாம் வாழும் பூமி இருக்கும் சூரிய மண்டலம் உட்பட கோடிக்கணக்கான நட்சத்திரங்கள் அடங்கும் வியூகமே. இதற்கு அருகில் ஏராளமான நட்சத்திர மண்டலங்களும் அவற்றில் கோடிக்கணக்கான நட்சத்திரங்களும் உள்ளன. நட்சத்திரங்களில் சில மங்கலானவை; வேறு சில பிரகாசமானவை. ஒளி வீசும் நட்சத்திரங்கள் எப்போதும் பெரியவையாக இருக்க வேண்டும் என்று அவசியமில்லை.

பிரகாசமான நட்சத்திரங்களுக்கு அருகில் அவை இருக்கக்கூடும்; கோடிக்கணக்கான கிலோமீட்டர்கள் தூரத்தில் உள்ளன. இந்த பிரம்மாண்டமான தூரத்தைக் கிலோமீட்டரைப் பயன்படுத்தி அளக்க முடியாது. அதனால் இது ஒரு ஆண்டில் ஒளி பயணிக்கும் தூரத்தைக் கொண்டு 'ஒளி ஆண்டு' (Light year) என்ற அலகினால் அளக்கப்படுகிறது. சூரியன் தவிர நமக்கு மிக அருகில் இருக்கும் இரண்டு நட்சத்திரங்கள் ஆல்ஃபா செண்டாரி (Alpha Centauri) மற்றும் பீட்டா செண்டாரி (Beta Centauri). இவை நான்கு ஒளி ஆண்டுகளுக்கு அப்பால் தொலைவில் உள்ளன.

நான்கு ஒளி ஆண்டுகள் என்பது ஒரு ஒளிக்கீற்று அங்கிருந்து பூமியை அடைய நான்கு ஆண்டுகள் எடுத்துக்கொள்ளும் என்று பொருள். பிரபஞ்சத்தில் பலதரப்பட்ட நட்சத்திரக் கூட்டங்கள் உள்ளன. இவற்றில் இருந்து வரும் பலவித சிக்னல்களை வைத்தே பிரபஞ்சத்தைப் பற்றி விஞ்ஞானிகள் ஆராய்கின்றனர். குவாசார்கள் (Quasars), பல்சார்கள் (Pulsars), நியூட்ரான் நட்சத்திரங்கள், ரேடியோ நட்சத்திரங்கள், கருந்துளைகள் (Black holes) போன்றவை இவற்றில் ஒரு சில. ஆனால் இவை எவற்றிலும் பூமியைப் போல மண்ணும் நீரும் இல்லை.

பெரும்பாலான நட்சத்திரங்கள் வாயுக்கோளங்களே. சூரியனே ஒரு பெரிய வாயுக் கோளம்தான். ஹைட்ரஜனும் ஹீலியமும் உள்ள சூரியனில் ஹைட்ரஜன், ஹீலியமாக மாறிக்கொண்டேயிருக்கிறது. அப்போது உருவாகும் ஆற்றலே சூரிய ஆற்றல். சூரியனில் எப்போதும் அணு இணைவு (Nuclear fusion) நிகழ்ந்து கொண்டிருக்கிறது. அதனால் இது ஒரு பிரம்மாண்டமான அணு உலை. இவ்வாறு ஹைட்ரஜன் ஹீலியமாக மாறிக்கொண்டே இருந்தால் என்றேனும் ஒரு நாள் சூரியன் மறைந்து விடாதா?

ஒரு காலத்தில் சூரியன் இல்லாமல் போய்விடும். ஆனால் இதற்கான சாத்தியம் நூறு கோடி ஆண்டுகளுக்குப் பிறகே நிகழும் என்று விஞ்ஞானிகள் கருதுகின்றனர். அதுவரை இந்த பூமியில் நாம் சுகமாக வாழலாம். சுமார் 10,000 கோடி கிலோமீட்டர் அளவுள்ள நம் பால்வீதி நட்சத்திர மண்டலம் நிற்காமல் சுழன்று கொண்டேயிருக்கிறது. மற்ற விண்மீன் மண்டலங்களிடம் இருந்து விலகிக்கொண்டிருக்கிறது. பிரபஞ்சம் விரிவடைந்துகொண்டிருக்கிறது. பிரபஞ்சத்தின் அளவு நாம் ஊகிப்பதைக் காட்டிலும் பல மடங்கு அதிகம்.

விண்மீன் மண்டலங்களில் நட்சத்திரங்கள் பிறந்துகொண்டும் மரணமடைந்தும் கொண்டிருக்கின்றன. இதனால் அவற்றில் இருந்து கிடைக்கும் அலைகளில் வேறுபாடு உருவாகிறது. இந்திய விஞ்ஞானி டாக்டர் எஸ். சந்திரசேகர் (சுப்பிரமணியன் சந்திரசேகர்) இதில் பெரும் பங்காற்றியுள்ளார். முதன்முதலாகத் தொலைநோக்கி மூலம் உற்றுநோக்கிச் சூரிய மண்டல கோள்களைப் பற்றிக் கூறியவர் இத்தாலியரான கலிலியோ கலிலி. வியாழன், யுரேனஸ், சனி ஆகியவற்றுடன் ஒப்பிடும்போது பூமி சிறிய ஒரு கோள் என்று அவர் கூறினார்.

அவரே வான் அறிவியலுக்கு அடித்தளம் அமைத்தவர். இங்கிலாந்தில் ஒரு தேவாலயத்தில் இசைக்கருவி வாசிப்பவராக இருந்த வில்லியம் ஹெர்ஷல் 1781-ல் யுரேனஸைக் கண்டுபிடித்தார். விண்மீன்களை உற்றுநோக்குவதே அவரது முதன்மைப் பொழுதுபோக்கு. யுரேனஸின் கண்டுபிடிப்பு தற்செயலான ஒன்று. தொலைநோக்கி மூலமே அதைக் காண முடியும். இக்கண்டுபிடிப்பினால் மகிழ்ந்த அரசர் அவருக்குப் பெரியதொரு தொகையைப் பரிசாகக் கொடுத்தார்.

தொடர்ந்து அவர் முழுநேரமும் வானை ஆராயத் தொடங்கினார். முன்பின் தெரியாத ஏதோ ஒரு கோள் யுரேனஸின் மீது தாக்கம் செலுத்துகிறது என்பதை விஞ்ஞானிகள் ஊகித்தனர். இது பற்றி மேலும் ஆராய்ந்தபோதே நெப்டியூன் கண்டுபிடிக்கப்பட்டது. 1846-ல் அர்பன் லேவேரியர் (Urbain Le Verrier) என்ற பிரெஞ்சு விஞ்ஞானி புதியதொரு கோளைக் கணக்கிட்டார். தொடர்ந்து நெப்டியூன் கண்டுபிடிக்கப்பட்டது. பெர்லின் உற்றுநோக்கல் மையத்தில் யோகான் காலே (Johann Galle) மற்றும் ஹெய்ன்ரிச் டாரஸ்ட் (Heinrich d'Arrest) ஆகியோர் நெப்டியூனைக் கண்டறிந்தனர்.

வான் அறிவியலின் வரலாற்றைப் பார்த்தால் கி.மு 624-ல் கிரேக்கப் பகுதியில் ஒன்றில் பிறந்த தாலீஸில் (Thales) இருந்து தொடங்கி கி.பி 180-ல் இறந்த தாலமியுடன் (Ptolemy) எட்டு நூற்றாண்டு காலம் நீடித்த புராதன கிரேக்க வானியலின் பொற்காலம் முடிவிற்குக் வந்தது. கி.மு 330-ல் பிறந்த ஆர்க்கிமிடிஸ் உட்பட்டவர்கள் சூரியன் பூமியைச் சுற்றுகிறது என்று நம்பினர். அரிஸ்டார்க்கஸ் (Aristarchus) என்ற கிரேக்க விஞ்ஞானி பூமியே சூரியனைச் சுற்றுகிறது என்று சொன்னார். ஆனால் அதை எவரும் நம்பவில்லை. பல நூறாண்டுகளுக்குப் பிறகே அறிவியல் உலகம் இந்த உண்மையை ஏற்றுக்கொண்டது.

சந்திரனையும் சூரியனையும் புரிந்துகொண்டு அவற்றின் அன்றாடப் பயணப் பாதையைக் கொண்டு பொழுது, நாள், மாதம், ஆண்டுகளைக் கணக்கிட்டனர். எகிப்தியர்கள் சிரியஸ் (Sirius) விண்மீனின் உதயத்தை வைத்தே நைல் நதியில் வெள்ளப்பெருக்கு எப்போது ஏற்படும் என்பதை அறிந்தனர். பூமி அதன் அச்சில் சுழல்வதாலேயே இரவு பகல் ஏற்படுகிறது என்று ஆரியபட்டர் கூறினார். ஆனால் இந்தச் சிந்தனைக்கு அன்று போதிய ஆதரவு கிடைக்கவில்லை. அன்று புகழ்பெற்றிருந்த வானியலாளர்கள் அவருடைய கொள்கையை ஏற்க மறுத்தனர்.

ஒரு வால் நட்சத்திரத்தின், ஒரு சந்திர கிரகணத்தின், ஒரு சூரிய கிரகணத்தின் வரவு அன்று மனிதரிடையில் பெரும் பரபரப்பையும் பீதியையும் ஏற்படுத்தியது. 1986-ல் பூமிக்கு வருகை தந்த ஹேலி வால் நட்சத்திரத்தைப் பார்த்த நினைவு இன்றும் நம்மில் பலர் மனதில் பசுமையாக இருக்கும். வால் நட்சத்திரங்களின் வரவு எப்போதும் அதிசயங்கள் நிறைந்த காட்சிகளைத் தந்து செல்கின்றன. ஹேலி பூமிக்கு வந்த காலம் உற்றுநோக்குபவர்களின் திருவிழாக் காலம்.

கேரளாவில் இந்த வால் நட்சத்திரத்தை வரவேற்று எல்லா இடங்களிலும் சுவரொட்டிகள் ஒட்டப்பட்டன. எட்மண்ட் ஹேலி 1682-ல் ஒரு வால் நட்சத்திரத்தின் பயணப் பாதையை ஆராய்ந்தபோது அது சூரியனைச் சுற்றுவதை அறிந்தார். 1758-ல் அது மீண்டும் பூமிக்கு வரும் என்று ஊகித்தார். பிறகு அது 1835, 1910, 1986 ஆகிய ஆண்டுகளில் மீண்டும் பூமிக்கு வந்தது. இனி 2062-ல் அது பூமியைக் காண மறுபடியும் வருகை தரும்.

ரேடியோ வானியல், புறஊதாக் கதிர் வானியல், எக்ஸ்-கதிர் வானியல், ஆப்டிகல் வானியல், காமா வானியல் போன்றவை இன்று உருவாகியுள்ள சில பிரிவுகள். உலகின் பல பகுதிகளிலும் நிறுவப்பட்டுள்ள பெரிய தொலைநோக்கிகள் வாயு மண்டலத்தின் தடைகள் இல்லாமல், பிரபஞ்சத்தில் இருந்து வரும் சிக்னல்களைக் கண்டறிய உதவுகின்றன. 1990-ல் நிறுவப்பட்ட ஹப்பிள் (Hubble) தொலைநோக்கி இதில் முக்கியமானது.

அமெரிக்காவின் நாசா, ஐரோப்பிய விண்வெளி முகமை ஆகியவை இணைந்து இத்தொலைநோக்கியை ஏவின. ஒரு செயற்கைக்கோள் போல இது விண்வெளியைச் சுற்றிக் கொண்டிருக்கிறது. தொடர்ந்து 1999-ல் சந்திரா மற்றும் 2009-ல் கெப்லர் தொலைநோக்கிகள் விண்வெளிக்கு அனுப்பப்பட்டன. இந்திய விஞ்ஞானி சுப்பிரமணியன் சந்திரசேகரின் பெயரில் 'சந்திரா' தொலைநோக்கி ஏவப்பட்டது. 2021-ல் ஜேம்ஸ் வெப் (James Webb) தொலைநோக்கி அமெரிக்கா மற்றும் ஐரோப்பிய முகமையால் ஏவப்பட்டது.

2023-ல் யூக்ளிட் (Euclid) தொலைநோக்கி ஐரோப்பிய முகமையால் அனுப்பப்பட்டது. இத்தொலைநோக்கிகளில் இருந்து புதிய அறிவுகள் கிடைத்துக் கொண்டிருக்கின்றன. 1972-ல் அனுப்பப்பட்ட பயோனியர் (Pioneer) விண்கலம் வியாழன், சனியை அருகில் சென்று ஆராய்ந்த பிறகு இப்போது சூரிய மண்டலத்திற்கும் அப்பால் பயணம் செய்து கொண்டிருக்கிறது. 2003-ல் கூட இதில் இருந்து சிக்னல்கள் கிடைத்தன.

வியாழன், சனி, யுரேனஸ், நெப்டியூன் கோள்களை ஆராய 1977-ல் வாயேஜர் 1 மற்றும் 2 (Voyager 1 & 2) விண்கலங்கள் ஏவப்பட்டன. இவற்றில் வாயேஜர் 2 யுரேனஸ் மற்றும் நெப்டியூனை ஆராய்ந்தது. இரண்டு விண்கலங்களும் முடிவில்லாத விண்வெளிப் பயணத்தில் ஈடுபட்டுள்ளன. பூமியில் இருந்து எந்த உயிரினம் இந்த விண்கலனை அனுப்பியது என்பதை அடையாளப்படுத்த படங்கள், அடையாளங்கள் வைத்து அனுப்பப்பட்டுள்ளன. இசை, பல மொழிகளில் வாழ்த்துகள், இயற்கையின் ஒலிகள், மனிதர் மற்றும் பூமியின் படங்கள் அதில் பதிக்கப்பட்டுள்ளன.

ஐம்பது ஆண்டுகளுக்குப் பிறகும் இந்த வாகனங்களில் இருந்து சிக்னல்கள் மெல்லிய அளவில் கிடைக்கின்றன. எல்லையில்லாத தொலைவிற்குச் சென்று கொண்டிருக்கும் இவற்றின் பயணங்கள் வெற்றி பெற வாழ்த்துவோம். விண்கற்கள், எரிகற்கள் ஆகியவை வானில் நாம் காணும் வேறு சில அதிசயக் காட்சிகள். நட்சத்திரங்கள் வழிமாறி பூமியின் மீது வந்து விழுகின்றன என்று முன்பு நம்பப்பட்டது.

உண்மையில் இவை பூமியின் வளிமண்டலத்திற்கு வழிமாறி வந்துவிழும் பெரிய பாறைகள் மற்றும் வால் நட்சத்திரங்களின் மிச்சமீதிகளே. அதிவேகத்தில் வரும் இவை பூமியின் வளிமண்டலத்தின் வழியாகப் பயணிக்கும்போது தீ பிடித்து ஆவியாகிப்போகின்றன. அபூர்வமாக அவற்றில் சில பகுதிகள் பூமியில் வந்து விழுவதும் உண்டு. இவ்வாறு வந்து விழுந்தவற்றில் சில பல நாடுகளின் அருங்காட்சியகங்களில் காட்சிப்படுத்தப்பட்டுள்ளன. 1947-ல் சைபீரியாவில் விழுந்த விண்கற்களில் 23 டன் எடையுள்ள ஒரு விண்கல்லின் பகுதி கண்டுபிடிக்கப்பட்டுள்ளது.

இவை அனைத்தும் பாறைகளே. இவற்றில் இரும்பு மற்றும் நிக்கல் அதிகம் உள்ளது. ஆகாயமே தேடலில் அடங்காத ஆர்வம் உடைய மனிதனை ஆதிகாலம் முதல் அற்புதப்படுத்தி வந்த ஒன்று. நட்சத்திரங்களை உற்றுநோக்குவது பிரபஞ்சத் தேடலின் முதல் படி. ஆகாயத்தில் ஒளிவீசும் பொருட்களைச் சிதறச் செய்தது போல காட்சி தருபவையே கோடிக்கணக்கான விண்மீன்கள். அவை ஒவ்வொரு நொடியிலும் மின்மினிப் பூச்சிகள் போல ஒளிவீசிக்கொண்டிருக்கின்றன.

ஐரோப்பியர்களே 17-ம் நூற்றாண்டில் தொலைநோக்கிகளை முதலில் கண்டுபிடித்தனர். ஜெய்பூர் மகாராஜா ஜெய் சிங் என்பவரே வான் உற்றுநோக்கலுக்காக முதலில் ஐரோப்பாவில் இருந்து இந்தியாவிற்குத் தொலைநோக்கிகளை இறக்குமதி செய்தார். உற்றுநோக்கும் மையங்களை டெல்லி உட்பட பல இடங்களில் நிறுவினார். ஐரோப்பாவில் இருந்து வந்த கருவிகளை வைத்தே டெல்லியில் ஜந்தர் மந்திர் உருவாக்கப்பட்டது. இந்தியாவின் பல நகரங்களிலும் இன்று கோளரங்கங்கள், அருங்காட்சியகங்கள், விண்வெளி காட்சிக்கூடங்கள் உள்ளன. இவற்றிற்குச் சென்று பார்த்தால் பல அறிவுகளை நாம் பெறலாம் என்பது உறுதி.

- சிதம்பரம் இரவிச்சந்திரன்

விவரங்கள்

அ.தமிழ்ச்செல்வன்

பிரிவு: விண்வெளி

வெளியிடப்பட்டது: 21 ஆகஸ்ட் 2026

• அமெரிக்க ஏகாதிபத்தியம்
• அறிவியல்

“America Is Finally Taking Extraterrestrials Seriously” — அமெரிக்காவின் புகழ்பெற்ற TIME இதழில் 2026 ஆகஸ்ட் 6 அன்று வெளியான இந்தத் தலைப்பு, வேற்றுகிரகவாசிகள் பற்றிய ஆர்வம் கொண்டவர்களின் கவனத்தை ஈர்க்கக் கூடியது.

என்னைப் போன்ற “வேற்றுகிரகவாசிகள் இருக்கலாம்” என்று நம்புகிறவர்களுக்கு இது மகிழ்ச்சியான செய்தியாக இருக்கலாம். ஆனால் அமெரிக்கா வேற்றுகிரகவாசிகளைக் கண்டுபிடித்துவிட்டது என்பதல்ல இந்தச் செய்தியின் பொருள்.

அப்படியானால் உண்மையில் என்ன நடக்கிறது?அடையாளம் காணப்படாத வான்வெளி நிகழ்வுகள் குறித்து முன்பைவிட அதிகமான தரவுகளைச் சேகரித்து, அவற்றை அறிவியல் முறையிலும், தேசியப் பாதுகாப்பு கோணத்திலும் ஆராய வேண்டும் என்ற எண்ணம் அமெரிக்காவில் வலுப்பெற்று வருகிறது.

முன்பு பொதுவாக UFO (Unidentified Flying Object) என்று அழைக்கப்பட்டவற்றை, தற்போது UAP (Unidentified Anomalous Phenomena) — அடையாளம் காணப்படாத அசாதாரண நிகழ்வுகள் — என்று குறிப்பிடுகின்றனர்.

ஆனால் இங்கே ஒரு முக்கியமான கேள்வி இருக்கிறது.

இருந்தால் என்ன? இல்லாவிட்டால் என்ன?

வேற்றுகிரகவாசிகள் இருந்தால் என்ன? இல்லாவிட்டால் என்ன?

இந்தக் கேள்விக்கான பதில், வேற்றுகிரகவாசிகளைத் தேடுவதைக் கடந்தும் செல்கிறது.

நாம் மட்டும் தனியாக இருக்கிறோமா?

நீண்ட நெடுங்காலமாகவே வானியல் விஞ்ஞானிகளைத் தொடர்ந்து வரும் கேள்வி:

இந்தப் பிரபஞ்சத்தில் நாம் மட்டும்தானா?

நாம் வாழும் பூமி, அளவிட முடியாத அளவுக்கு விரிந்துள்ள பிரபஞ்சத்தில் ஒரு சிறிய புள்ளி மட்டுமே. நம்மைச் சுற்றி கோடிக்கணக்கான நட்சத்திரங்கள்; அவற்றைச் சுற்றி எண்ணற்ற கோள்கள். அப்படியிருக்கும்போது, இந்தப் பிரபஞ்சத்தில் சிந்திக்கக்கூடிய உயிர்கள் பூமியில் மட்டுமே இருக்கின்றனவா?

நமக்குத் துணையாக வேறு அறிவார்ந்த உயிர்கள் எங்காவது இருக்கிறார்களா? இந்த ஆதங்கம்தான் வேற்றுகிரகவாசிகள் தேடலின் அடிப்படைக் கேள்வி.

மனித இனத்தின் எதிர்காலம் என்ன?

பூமிக்கு வயதாகிக்கொண்டே இருக்கிறது. அதைவிடக் கவலைக்குரியது, நாம் வாழும் இந்தப் பூமியையே மாசு, கழிவு, அளவுக்கு மீறிய வளச் சுரண்டல் ஆகியவற்றால் சீரழித்து வருகிறோம். எதிர்காலத்தில் மனித இனம் வேறு ஒரு உலகில் வாழ வேண்டிய சூழ்நிலை உருவாகுமா?

அதனால்தான் செவ்வாய், சனியின் டைட்டன், வியாழனின் யூரோப்பா போன்ற உலகங்கள் குறித்து விஞ்ஞானிகள் ஆராய்கின்றனர். ஆனால் ஒரு முக்கியமான வேறுபாடு இருக்கிறது.

மனிதர்கள் வாழத் தகுந்த உலகைத் தேடுவது வேறு; வேற்றுகிரகவாசிகளைத் தேடுவது வேறு.

ஆனால் இரண்டு தேடல்களும் ஒரே பெரிய கேள்விக்குள் வந்து சேர்கின்றன:

பூமிக்கு வெளியே உயிர் அல்லது அறிவார்ந்த வாழ்க்கை இருக்கிறதா?

வேற்றுகிரகவாசிகளைத் தேடுவது மட்டுமல்ல...

வேற்றுகிரகவாசிகள் குறித்த தேடுதல், “அவர்கள் இருக்கிறார்களா?” என்ற கேள்வியோடு முடிந்துவிடுவதில்லை.

“வேறு எங்காவது அறிவார்ந்த வாழ்க்கை இருக்கிறதா?”

“அந்த வாழ்க்கையின் தொழில்நுட்பச் சுவடுகளை நாம் கண்டுபிடிக்க முடியுமா?”

“நமது வான்வெளியில் இதுவரை அடையாளம் காண முடியாத நிகழ்வுகள் என்ன?”

என்ற கேள்விகளும் இணைந்துள்ளன. இதனால்தான் SETI (Search for Extraterrestrial Intelligence) போன்ற முயற்சிகள் வேறு நட்சத்திரங்களில் இருந்து வரும் சாத்தியமான தொழில்நுட்பச் சமிக்ஞைகளைத் தேடுகின்றன. அதே நேரத்தில் பூமியின் வான்வெளியில் தோன்றும் UAP நிகழ்வுகளும் ஆய்வு செய்யப்படுகின்றன.

சில சுவாரஸ்யமான தடயங்கள்

வேற்றுகிரகவாசிகள் இருப்பதற்கான நேரடி ஆதாரம் இதுவரை கிடைக்கவில்லை. ஆனால் சில சுவாரஸ்யமான அறிவியல் கருத்துகளும் மர்மமான சம்பவங்களும் தொடர்ந்து விவாதிக்கப்பட்டு வருகின்றன.

டிரேக் சமன்பாடு

அமெரிக்க வானியலாளர் ஃபிராங்க் டிரேக் 1961-இல் உருவாக்கிய Drake Equation, நமது பால்வீதியில் தொடர்புகொள்ளக்கூடிய அறிவார்ந்த நாகரிகங்களின் எண்ணிக்கையை மதிப்பிடுவதற்கான ஒரு முயற்சி.

நட்சத்திரங்கள் எத்தனை, அவற்றில் எத்தனை நட்சத்திரங்களுக்குக் கோள்கள் உள்ளன, அந்தக் கோள்களில் உயிர் தோன்றுவதற்கான வாய்ப்பு என்ன, உயிரிலிருந்து அறிவார்ந்த வாழ்க்கை உருவாகும் வாய்ப்பு என்ன போன்ற பல காரணிகள் இதில் கணக்கில் எடுத்துக்கொள்ளப்படுகின்றன.

ஸ்டீபன் ஹாக்கிங்கின் எச்சரிக்கை

புகழ்பெற்ற இயற்பியலாளர் ஸ்டீபன் ஹாக்கிங், வேற்றுகிரக நாகரிகங்கள் இருந்தால் அவற்றுடன் தொடர்புகொள்வதில் மனிதர்கள் எச்சரிக்கையாக இருக்க வேண்டும் என்று கூறினார்.

அதாவது, வேற்றுகிரகவாசிகளைத் தேடுவது ஒரு சுவாரஸ்யமான அறிவியல் முயற்சி என்றாலும், அவர்கள் நம்மைவிட மேம்பட்ட நாகரிகமாக இருந்தால் அதன் விளைவுகள் என்னவாக இருக்கும் என்பதையும் சிந்திக்க வேண்டும்.

ஜில் டார்டரின் “கடல்–கோப்பை” ஒப்பீடு

வேற்றுகிரக நாகரிகங்களைத் தேடும் முயற்சியில் முன்னணி விஞ்ஞானிகளில் ஒருவரான ஜில் டார்டர் (Jill Tarter) ஒரு அழகான ஒப்பீட்டை முன்வைத்துள்ளார். பிரபஞ்சத்தில் நாம் இதுவரை தேடிய பகுதி, மிகப்பெரிய கடலில் இருந்து ஒரு சிறிய கண்ணாடிக் கோப்பை அளவு தண்ணீரை எடுத்து அதில் மீன் இல்லை என்று பார்த்துவிட்டு, “கடலில் மீன்களே இல்லை” என்று முடிவு செய்வதைப் போன்றது.

அதாவது, நாம் தேடியது பிரபஞ்சத்தின் மிகச் சிறிய பகுதி மட்டுமே.

அதனால், “இதுவரை எதுவும் கிடைக்கவில்லை” என்பது “எங்குமே எதுவும் இல்லை” என்பதற்கான நிரூபணம் அல்ல.

சில மர்மமான சம்பவங்கள்

1977 — “Wow!” Signal

1977-இல் அமெரிக்காவின் ஓஹியோவில் செயல்பட்ட Big Ear ரேடியோ தொலைநோக்கி, வானிலிருந்து வந்த ஒரு வலுவான, குறுகிய கால ரேடியோ சமிக்ஞையைப் பதிவு செய்தது. அதன் பதிவைக் கண்ட வானியலாளர் ஜெர்ரி எஹ்மான் அருகில் “Wow!” என்று எழுதினார். அதுவே பின்னர் “Wow! Signal” என்று புகழ்பெற்றது. அந்தச் சமிக்ஞை சுவாரஸ்யமானதாக இருந்தாலும், அது வேற்றுகிரக நாகரிகத்திலிருந்து வந்தது என்று நிரூபிக்கப்படவில்லை. அதே வகையான சமிக்ஞையும் மீண்டும் உறுதியாகப் பெறப்படவில்லை.

2004 — “Tic Tac” சம்பவம்

2004-இல் அமெரிக்கக் கடற்படை விமானிகள் வானில் வெள்ளை நிற “Tic Tac” வடிவத்தை ஒத்த ஒரு மர்மப் பொருளைக் கண்டதாகத் தெரிவித்தனர். இந்தச் சம்பவம் ராணுவ விமானிகள், விமான உணர்கருவிகள் மற்றும் பின்னர் வெளியான வீடியோ பதிவுகள் காரணமாகப் பெரும் கவனத்தைப் பெற்றது. ஆனால் இன்றுவரை அந்தப் பொருள் வேற்றுகிரகவாசிகளின் விண்கலம் என்று நிரூபிக்கப்படவில்லை.

சென்னை சம்பவம்

2023 ஜூலை 26 அன்று சென்னை அருகிலுள்ள முட்டுக்காடு கடல் பகுதியில் ஓய்வுபெற்ற சிபிசிஐடி டிஜிபி பிரதீப் வி. பிலிப், வானில் நான்கு ஒளிரும் மர்மப் பொருட்களைக் கண்டதாகவும், அவற்றைப் புகைப்படம் எடுத்ததாகவும் தெரிவித்தார். அவை சுமார் 20 முதல் 25 விநாடிகள் மட்டுமே தென்பட்டதாகக் கூறப்பட்டது. அவை பறக்கும் தட்டுகளா, ட்ரோன்களா அல்லது வேறு ஏதேனும் வானியல் நிகழ்வா என்ற விவாதம் எழுந்தது. ஆனால் அவை வேற்றுகிரகவாசிகளின் விண்கலங்கள் என்பதற்கான அறிவியல் ஆதாரம் இல்லை.

இம்பால் சம்பவம்

2023 நவம்பர் 19 அன்று மணிப்பூர் தலைநகர் இம்பால் விமான நிலையத்தின் வானில் அடையாளம் காணப்படாத வெள்ளை நிறப் பொருள் ஒன்று தென்பட்டதால் விமானப் போக்குவரத்து பாதிக்கப்பட்டது. தகவல் கிடைத்ததும் இந்திய விமானப்படை இரண்டு Rafale போர் விமானங்களைத் தேட அனுப்பியது. ஆனால் அந்தப் பொருளைக் கண்டறிய முடியவில்லை. பின்னர் வான்வெளி பாதுகாப்பானது என உறுதி செய்யப்பட்டதும் விமானப் போக்குவரத்து மீண்டும் தொடங்கியது. அந்தப் பொருள் என்ன என்பது அதிகாரப்பூர்வமாகத் தெரியவில்லை. அது வேற்றுகிரகவாசிகளின் விண்கலம் என்பதற்கும் ஆதாரம் இல்லை.

பழங்காலத்திலிருந்தே வேற்றுகிரகவாசிகளா?

இன்றைய UAP சம்பவங்கள் ஒருபுறம் இருக்கட்டும். பல ஆயிரம் ஆண்டுகளாகவே மனிதர்களுக்கும் வேற்றுகிரகவாசிகளுக்கும் தொடர்பு இருந்ததாகக் கூறப்படும் கதைகள் உலகின் பல பகுதிகளில் உள்ளன. எகிப்திய பிரமிடுகள், துட்டன்காமனின் கத்தி, இந்தியாவின் பஸ்தார் பகுதியில் காணப்படும் பாறை ஓவியங்கள் போன்ற பல விஷயங்களும் வேற்றுகிரகவாசிகளுடன் தொடர்புபடுத்தப்பட்டுள்ளன.

ஆனால் இவற்றில் பெரும்பாலான விளக்கங்களுக்கு நேரடி அறிவியல் ஆதாரம் இல்லை. எனவே மர்மம் இருப்பது உண்மை என்றாலும், மர்மத்துக்கு நாம் விரும்பிய விளக்கத்தை உடனடியாகக் கொடுப்பது அறிவியல் அல்ல.

வேற்றுகிரகவாசிகள் இல்லை என்று கருதுவதற்கான காரணங்கள்

மறுபக்கத்தையும் பார்க்க வேண்டும். விஞ்ஞானிகள் “வேற்றுகிரகவாசிகள் இல்லை” என்று நிரூபித்துவிட்டதாகக் கூறவில்லை. அவர்கள் கூறுவது:

“இதுவரை நம்பகமான, மீண்டும் சரிபார்க்கக்கூடிய அறிவியல் ஆதாரம் கிடைக்கவில்லை.” என்பதுதான். மற்றொரு கோளில் உயிரினம் அல்லது அறிவார்ந்த நாகரிகம் இருப்பதற்கான உறுதியான ஆதாரம் இதுவரை கிடைக்கவில்லை. பல ஆண்டுகளாக SETI போன்ற முயற்சிகள் ரேடியோ அலைகள் உள்ளிட்ட தொழில்நுட்பச் சுவடுகளைத் தேடியும், வேற்றுகிரக நாகரிகத்திலிருந்து வந்தது என்று உறுதிப்படுத்தக்கூடிய செய்தி கிடைக்கவில்லை.

இதனுடன் தொடர்புடைய முக்கியமான கேள்விதான் Fermi Paradox — ஃபெர்மி முரண்பாடு.

பிரபஞ்சத்தில் அறிவார்ந்த நாகரிகங்கள் ஏராளமாக இருந்தால், அவற்றில் சில நமது ஆகாயகங்கையிலும் இருந்திருக்க வேண்டாமா? அவற்றின் தடயங்கள் எங்கே? இதுவரை தெளிவான பதில் இல்லை. மேலும், பூமியில் உயிர் தோன்றியுள்ளது என்பதால், பொருத்தமான சூழல் இருக்கும் ஒவ்வொரு கோளிலும் உயிர் தோன்றும் என்று கூற முடியாது. அதைவிட, நுண்ணுயிரிலிருந்து அறிவார்ந்த, தொழில்நுட்ப நாகரிகம் உருவாகுவது இன்னும் மிகப்பெரிய கேள்வி.

எனவே இன்றைய அறிவியல் நிலை மிகவும் எளிமையானது:

வேற்றுகிரகவாசிகள் இருக்கிறார்கள் என்று நிரூபிக்கப்படவில்லை.

அவர்கள் இல்லை என்றும் நிரூபிக்கப்படவில்லை.

இந்த நிலையில்தான் அமெரிக்காவின் புதிய அணுகுமுறை முக்கியத்துவம் பெறுகிறது.

2026-இல் TIME சொல்லும் புதிய செய்தி

இந்தப் பின்னணியில்தான் 2026 ஆகஸ்ட் 6-ஆம் தேதி TIME இதழ், “America Is Finally Taking Extraterrestrials Seriously” என்ற தலைப்பில் கட்டுரையை வெளியிட்டுள்ளது. இதன் செய்தி “அமெரிக்கா வேற்றுகிரகவாசிகளைக் கண்டுபிடித்துவிட்டது” என்பதல்ல.

பல ஆண்டுகளாகக் கேலி, கற்பனை, சதிக்கோட்பாடுகள் ஆகியவற்றுடன் இணைத்துப் பார்க்கப்பட்ட UFO சம்பவங்களை, இப்போது தேசியப் பாதுகாப்பு, அறிவியல் ஆய்வு, தொழில்நுட்பம், தரவுகள் மற்றும் வெளிப்படைத்தன்மை ஆகிய கோணங்களில் தீவிரமாக ஆராய வேண்டிய விஷயமாக அமெரிக்கா பார்க்கத் தொடங்கியுள்ளது என்பதுதான் இந்தக் கட்டுரையின் முக்கியச் செய்தி.

இதனால் கேள்வியும் சற்று மாறுகிறது.

“வேற்றுகிரகவாசிகள் இருக்கிறார்களா?” என்பது மட்டுமல்ல, “வானில் நாம் காணும் இந்த அடையாளம் காணப்படாத நிகழ்வுகள் உண்மையில் என்ன?” என்பதும் முக்கியமான அறிவியல் கேள்வியாகிறது. TIME கட்டுரையின் ஆச்சரியம் இதுதான்:

அமெரிக்கா வேற்றுகிரகவாசிகளைக் கண்டுபிடித்துவிட்டதாக TIME சொல்லவில்லை. ஆனால், “அவர்கள் இருக்கிறார்களா?” என்ற கேள்வியை இனி கேலியாக ஒதுக்காமல், ஆதாரங்களுடனும் அறிவியல் கருவிகளுடனும் ஆராய வேண்டிய நேரம் வந்துவிட்டது என்பதைத்தான் அது சுட்டிக்காட்டுகிறது.

நான் வேற்றுகிரகவாசிகளைச் சந்திப்பேன்...

அமெரிக்காவின் தற்போதைய முயற்சிகள், வேற்றுகிரகவாசிகள் இருக்கிறார்களா இல்லையா என்ற கேள்விக்கு ஒருநாள் தெளிவான விடையைத் தரும் என்று நம்புகிறேன். அவர்கள் இருந்தாலும் சரி, இல்லாவிட்டாலும் சரி; இந்த விவாதம் மனிதர்களுக்கு ஒரு முக்கியமான உண்மையை உணர்த்த வேண்டும்.

இந்தப் பூமியின் மதிப்பை.

“அரிது... அரிது... மானிடராய்ப் பிறத்தல் அரிது” என்கிறார் அவ்வையார்.

அதேபோல நான் சொல்வேன்:

“அரிது... அரிது... பூமியைப் போல இன்னொரு கிரகம் இருப்பது அரிது.”

வேறு எங்காவது உயிர் இருக்கலாம். ஒருநாள் அவர்களை நாம் சந்திக்கவும் கூடும். மனித பரிணாமம் தொடர்ந்து செல்ல ஒருநாள் வேறு ஒரு பூமி நமக்குத் தேவைப்படலாம். அதேபோல, பிரபஞ்சத்தின் இன்னொரு மூலையில் இருக்கும் உயிர்களுடன் நட்பு பாராட்டும் நாளும் வரலாம்.

அந்த நாளை எதிர்பார்த்தபடியே, இன்றைக்கு நமக்குக் கிடைத்திருக்கும் இந்த ஒரே பூமியைப் பாதுகாப்போம்.

எனக்கு ஒரு நம்பிக்கை இருக்கிறது.

நான் வேற்றுகிரகவாசிகளைச் சந்திப்பேன் என்று.

உங்களுக்கு அந்த நம்பிக்கை இருக்கிறதா, நண்பர்களே?

- அ.தமிழ்ச்செல்வன்