அறிவியல் ஆயிரம்

விவரங்கள்

மு.குருமூர்த்தி

பிரிவு: தொழில்நுட்பம்

வெளியிடப்பட்டது: 02 ஜூலை 2010

ஒவ்வொரு காந்தமும் வடக்கு தெற்கு என இரண்டு துருவங்களைக் கொண்டது. ஓரினத் துருவங்கள் அருகருகே வரும்போது அவற்றிற்கிடையே விலக்குவிசை தோன்றும். எதிரினத் துருவங்கள் அருகருகே வைக்கப்படும்போது அவற்றிற்கிடையே கவர்ச்சி விசை தோன்றும். காந்தங்களின் இந்த அடிப்படைப் பண்பு காந்த மிதவை ரயிலை இயக்க பயன்படுகிறது.

காந்த மிதவை இரயில் வழக்கமான இரும்புத் தண்டவாளங்களில் ஓடும் இரயில் அல்ல. guideway எனப்படும் சிறப்புப்பாதைகள் வழியாக இந்த மிதவை இரயில்கள் ஓடுகின்றன. guideway யின் வழியாகச் செல்லும் வலிமையான காந்தச்சுருள் இரயில் பெட்டியின் அடிப்பகுதியுடன் ஒரு விலக்கு விசையை தோற்றுவிப்பதால் guideway யில் இருந்து 1 முதல் 10 செமீ தொலைவிற்கு இரயில் வண்டி உயர்த்தப்படுகிறது. Guideway ன் பக்கச்சுவர்களுக்கு கொடுக்கப்படும் மின்னோட்டம் காரணமாக மற்றொரு காந்தப்புலம் தோற்றுவிக்கப்படுகிறது. மின்னோட்டத்தின் திசை மாறும்போதெல்லாம் காந்தவிசையின் துருவங்களும் மாறிக்கொண்டிருக்கும். இதன் விளைவாக ஒரு இழுத்தல் - தள்ளுதல் விசை தோற்றுவிக்கப்படுகிறது.

இரயில் வண்டியின் முன்புறம் இழுத்தல் விசை தோற்றுவிக்கப்படும் அதே வேளையில் பின்புறம் தள்ளுதல் விசை தோற்றுவிக்கப்படும். எனவே, இரயில் வண்டி காற்றுமெத்தையின்மீது சுகமான பயணத்தை மேற்கொள்ளுகிறது. உராய்வு இல்லை என்பதாலும், இரயில் வண்டியின் உடலமைப்பு காற்றை கிழித்துச்செல்லும் வகையில் சிறப்பாக வடிவமைக்கப்பட்டிருப்பதாலும் வண்டியின் வேகம் அதிகமாக இருக்கும். அதாவது ஒரு மிதவை இரயிலின் வேகம் போயிங்-777 விமானத்தின் வேகத்தை விட அதிகமாக இருக்கும்.

மிதவை இரயிலில் பயன்படும் காந்தவிசையின் கவர்ச்சி-விலக்கல் தத்துவம் உணவுப்பொருட்களின் இயற்பியல், வேதியியல் பண்புகளை ஆராயப் பயன்படுகிறது என்பது அண்மைக்கால கண்டுபிடிப்பாகும். காந்த மிதவை மண்டலத்தில் வைக்கப்படும் உணவு, நீர் மற்றும் பானங்கள் இவற்றின் தன்மைகள் எளிதில் அளவிடப்படுகின்றன. உணவுசார்ந்த தொழில்நுட்பங்களில் ஒரு பொருளின் அடர்த்தி முக்கியமான பங்கு வகிக்கின்றது.

ஒரு உணவுப்பொருளில் அடங்கியுள்ள வேதிப்பண்புகளை அறிந்துகொள்ள அதன் அடர்த்தி பற்றிய அறிவு அவசியம். ஒரு மென்பானத்தில் அடங்கியுள்ள சர்க்கரையின் அளவு, ஒயினில் அடங்கியுள்ள ஆல்கஹாலின் அளவு, பாசன நீரில் அடங்கியுள்ள உப்பின் அளவு, பாலில் அடங்கியுள்ள கொழுப்பின் அளவு இவையெல்லாம் அடர்த்தியை சார்ந்தவை. இதுவரை உபயோகத்தில் இருந்துவந்த ஆய்வுக்கருவிகள் அனைத்தும் விலை கூடியவை, எளிதில் கையாள முடியாதவை, மேலும் சிக்கலானவை.
 
காந்த மிதவை மண்டலத்தில் அளவீடுகளை செய்வதற்கென ஒரு உணர்கருவி உருவாக்கப்பட்டுள்ளது. இரண்டு முனைகளிலும் காந்தங்கள் பொருத்தப்பட்ட இந்த உணர்கருவியில் ஒரு திரவம் நிரப்பப்பட்டிருக்கும். சோதித்து அறிய வேண்டிய உணவுப்பொருட்களின் மாதிரிகள் இந்த திரவத்திற்குள் கடந்துசெல்லும்போது உணவுப்பொருட்களின் அடர்த்தியை எளிதில் அளவிட்டுக் கொள்ளலாம்.

தகவல்: மு.குருமூர்த்தி (இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)
இன்னும் படிக்க: http://www.sciencedaily.com/releases/2010/06/100623124256.htm

விவரங்கள்

மு.குருமூர்த்தி

பிரிவு: தொழில்நுட்பம்

வெளியிடப்பட்டது: 30 ஜூன் 2010

உயிர்களின் அடிப்படை அலகு செல். அனைத்து உயிர்களும் செல்களால் ஆனவை. உயிர் தோன்றக் காரணமாக இருக்கும் செல்களே ஸ்டெம் செல்கள் எனப்படும். முதல் அல்லது ஆதிசெல்கள் என்றும் இவற்றை அழைக்கலாம். நோய்க்கிருமிகளை அழிக்கும் ஆற்றல் உள்ள வெள்ளை அணுக்களும், உடலுக்குத் தேவையான பிராணவாயுவை இரத்த ஓட்டத்தின் மூலமாக அனைத்து உடல் பாகங்களுக்கும் கொண்டு செல்லும் சிவப்பு அணுக்களும், இரத்தம் உறையவும் நோய் எதிர்ப்பு சக்தியை அளிக்கவும் காரணமான பிளாட்டிலெட்ஸ் என்பவையும் இந்த ஸ்டெம் செல்களில் தான் உள்ளன. ஸ்டெம் செல்கள் தன்னைத்தானே புதுப்பித்துக் கொள்ளும் ஆற்றல் உடையவை. தேவையான தருணத்தில் உடலில் உள்ள 210 வித்தியாசமான அணுக்களாக தன்னை உருமாற்றிக் கொள்ளக்கூடியவை. ஸ்டெம் செல்களை நாம் குருத்தணுக்கள் என்று அழைக்கலாம். 

ஸ்டெம் செல்கள் இரு வகைப்படும். முதல்வகை சிசு ஸ்டெம் செல்கள் எனப்படும் Embryonic Stem Cells (ESC). இரண்டாவது வகை  உடலின் சிலவகையான திசுக்களில் காணப்படும் Tissue Stem Cells/Adult Stem Cells. இவையன்றி Induced Pluripotent Stem Cells (IPS cells) எனும் தூண்டப்பட்ட ஸ்டெம் செல்கள் என்ற வகையும் உண்டு. நமது உடலில் உள்ள தோல், ரோமம் இவற்றின் அணுக்களை மரபணுவியல் தொழில்நுட்பத்தின் மூலம் ஸ்டெம் செல்லாக மாற்றும் நிகழ்வே தூண்டப்பட்ட ஸ்டெம் செல்கள் எனப்படும். ஸ்டெம் செல்களை மூன்று வழிகளில் பெறலாம். 

1.கருக்கள் மூலம் (Embryonic)

2.ஆட்டோலொகஸ் (Autologous)

3.தொப்புள் கொடி மூலம் (Umbilical cord)

நோயுற்ற உடல்செல்களை அகற்றிவிட்டு புதிய செல்களை மனித உடலில் உருவாக்கும் முயற்சியே ஸ்டெம் செல் ஆராய்ச்சியின் நோக்கம். ஸ்டெம் செல்கள் வழியாக அனைத்து நோய்களுக்கும் தீர்வு காணமுடியும் என்று கூறுவதற்கு இயலாது. அதே நேரத்தில் இன்னும் பத்து அல்லது பதினைந்து ஆண்டுகளில் பல குறிப்பிடத்தக்க நோய்களை ஸ்டெம் செல்கள் மூலம் தீர்க்க இயலும் என்று ஜப்பானிய ஆய்வாளர் நோர் என்பவர் குறிப்பிடுகிறார்.

பால் பற்கள், ஞானப்பற்கள் இவற்றை பிடுங்க நேரும்போது அவற்றிலிருந்து ஸ்டெம் செல்களை உருவாக்கும் முயற்சிகள் பல்லாண்டுகளாக நடைபெற்றுவந்தன. ஆனால் அண்மையில் ஜப்பானிய ஆய்வாளர்கள் இந்த முயற்சியில் வெற்றி பெற்றுள்ளனர். ஞானப்பல்லின் (Wisdom Teeth) உட்புறம் இருக்கும் உயிருள்ள செல்களில் இருந்து ஸ்டெம் செல்களை உருவாக்க இயலும் என்று ஜப்பானிய ஆய்வாளர்கள் கண்டறிந்துள்ளனர். இதன்மூலம் ஸ்டெம் செல் வங்கிகளை உருவாக்கும் சாத்தியம் அதிகரித்திருக்கிறது. 

பிடுங்கப்பட்ட பற்களின் பற்கூழில் இருந்து ஸ்டெம் செல் வங்கிகள் உருவாக்கப்பட்டன. அவை ஜப்பானியர்களுக்கு ஒத்துப்போகிறதா என்றும் ஆராயப்பட்டது. ஏறக்குறைய 20 சதவீத ஜப்பானியர்களின் மரபியலுக்கு இந்த ஸ்டெம் செல்கள் ஒத்துப்போவதாகவும் ஆய்வு முடிவுகள் தெரிவிக்கின்றன. சில நாட்களே வயதுடைய கருக்குழந்தையிடமிருந்து ஸ்டெம் செல்களைப் பெறுவது சரியா தவறா என்பதில் கருத்துவேறுபாடு நிலவுகிறது. ஆனால் பற்களின் உட்கூழில் இருந்து எடுக்கப்படும் ஸ்டெம் செல்கள் அனைவராலும் ஏற்றுக்கொள்ளக்கூடியவை என்பதால் இந்த ஆய்வு முக்கியத்துவம் பெறுகிறது.

தகவல்:மு.குருமூர்த்தி (இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)

இன்னும் படிக்க: http://news.discovery.com/human/teeth-stem-cells.html