அறிவியல் ஆயிரம்

விவரங்கள்

நெல்லை சலீம்

பிரிவு: சுற்றுச்சூழல்

வெளியிடப்பட்டது: 08 ஆகஸ்ட் 2019

• சுற்றுச்சூழல்
• இஸ்ரேல்
• பாலஸ்தீனம்

ஃபாலஸ்தீன் காஸாவில் ஏற்பட்டு வரும் மனிதர்கள் உயிர் வாழ்வதற்கான நெருக்கடியான நிலைமை, இஸ்ரேலில் உடனடியாக சில சீரமைப்புகளை செய்ய வேண்டிய நிர்ப்பந்தத்தை ஏற்படுத்தி உள்ளது. காஸா கிட்டத்தட்ட ஒரு திறந்தவெளி சிறைச்சாலை என்றே அழைக்கப்படுகிறது. இங்கு தினம் தினம் இஸ்ரேல் வீசும் குண்டுகளால் கட்டிடங்கள் இடிந்து விழுகின்றது. முற்றிலும் சுற்றுச்சூழல் பாதிப்புகளை எதிர்நோக்கியுள்ளது காஸா.

இஸ்ரேல் அரசு காஸாவில் மேற்கொண்ட சுற்றுச்சுழல் பாதிப்புகள் அனைத்தும், அதனுடைய தலைநகரான டெல் அவிவில் ஆபத்துக்கான எச்சரிக்கை மணியாக ஒலிக்கத் தொடங்கி விட்டது என்பது தான் தற்போதுள்ள செய்தியாக இருக்கிறது.

ஜுன் 3ம் தேதி இஸ்ரேலின் டெல் அவிவ் மற்றும் பென்குரியோன் பல்கலைக்கழகங்களைச் சேர்ந்த சுற்றுச்சூழல் அறிஞர்கள் ஒரு அறிக்கை ஒன்றை வெளியிட்டனர். அந்த அறிக்கையில் “காஸாவில் இடிந்து விழும் கட்டிடங்கள், முறையின்றி வெளியாகும் கழிவுநீர், மின்சார பாதிப்புகள் அனைத்தும் இஸ்ரேலின் நிலத்தடி நீர், கடல்நீர், கடற்கரைப் பகுதியின் சுற்றுச்சூழல் மற்றும் இயற்கை வளங்களுக்குப் பாதிப்புகளை ஏற்படுத்துவதாகவும், உடனடியாக இதற்கு ஒரு தெளிவான நடவடிக்கைகளை மேற்கொள்ள வேண்டும்" என்றும் கூறியுள்ளனர்.

கடந்த 12 ஆண்டுகளாக இஸ்ரேலிய இராணுவம் ஏற்படுத்திய தொடர்ச்சியான தாக்குதல்கள், முற்றுகையால் காஸா சிதைந்து போயுள்ளது. இதுவரை அதனுடைய பாதிப்புகள் எதையும் இஸ்ரேலிய அரசு வெளியிடுவதை தடுத்தே வந்துள்ளது. இதனால், அந்தப் பகுதி 2020ம் ஆண்டில் மக்கள் வாழ்வதற்கு தகுதியற்ற பகுதியாக இருக்கும் என்று காஸாவைப் பற்றி அறிந்த பலரும் எச்சரிக்கை விடுத்து வருகின்றனர்.

இப்படியிருக்கையில், இஸ்ரேலின் வாழ்வு மற்றும் மரணம் காஸாவின் சுற்றுச்சூழலை மேம்படுத்துவதிலே இருக்கின்றது என்றும், காஸாவில் சுற்றுச்சூழல் மோசமானதற்கான முழு காரணமும் இஸ்ரேல் தான் என்றும், அந்த அறிக்கை சுட்டிக்காட்டியுள்ளது. இந்த அறிக்கை வெளியானதில் இருந்து, இஸ்ரேலின் அரசு பத்திரிகையான ஹெராட்ஸும் தேசிய பாதுகாப்பு பிரச்சனையாக விவாதத்தைக் கிளப்பி உள்ளது.

இஸ்ரேல் அரசு ஃபாலஸ்தீன் காஸாவில் மேற்கொண்ட ஆக்கிரமிப்புகள், ராக்கெட்டு மற்றும் குண்டுவீச்சுகள், முற்றுகைகள் அனைத்தும் ஃபாலஸ்தீன் மற்றும் ஃபாலஸ்தீனியர்களுக்குத்தான் ஆபத்தாகவும், அச்சுறுத்தலாகவும் இருந்து வந்தது.

இப்போது, அந்த பாதிப்பை இஸ்ரேலிய நாடும், இஸ்ரேலிய மக்களும் அனுபவிக்கத் துவங்கியுள்ளனர். இதுகுறித்து சீக்கிரமாக ஒரு நடவடிக்கையை மேற்கொள்ள வேண்டும் என்று இஸ்ரேல் அரசுக்கு நாட்டு மக்களும், பத்திரிகை ஊடகங்களும் வலியுறுத்தத் தொடங்கி உள்ளனர். இதனால், இஸ்ரேலில் ஓர் அச்சம் உருவாகி உள்ளது என்பது மட்டும் உண்மையாகும்.

- நெல்லை சலீம்

விவரங்கள்

செந்தூவல்

பிரிவு: சுற்றுச்சூழல்

வெளியிடப்பட்டது: 06 மே 2019

• தமிழ்த் தேசியம்
• சுற்றுச்சூழல்
• இயற்கைப் பேரிடர்

பானி புயல் வங்கக் கடலில் மையங்கொண்டு தீவிர சூறாவளியாக மாறி ஒடிசாவைத் தாக்கியுள்ளது. புயல் கரையைக் கடக்கும்போது காற்றின் வேகம் 170 கிலோமீட்டரில் இருந்து 180 கிலோமீட்டர் வரை இருக்கும் என்று வானிலை ஆய்வு மையம் கூறியது. இப்புயல் ஒடிசாவின் பூரி மற்றும் பாலசபூர் இடையே கரையை கடக்கும் என அறிவித்தது வானிலை ஆய்வு மையம். கடந்த 118 ஆண்டுகளில் ஏற்பட்ட புயல்களில் மிக வலிமையான புயல் பானி புயல்தான் என்று கூறியுள்ளார் புவி அறிவியல் அமைச்சகத்தின் செயலர் ராஜீவன்.

2010 ஆம் ஆண்டுக்குப் பின்னர் கிழக்கு கடற்கரையை அதிகமான புயல்கள் தாக்கி உள்ளது. அவற்றின் விவரங்கள் பின்வருமாறு:

1.ஜல் 2010
2. தானே 2011
3.நீலம் 2012
4.மடி 2013
5.ரோனி 2016
6.கியான்ட் 2016
7.நாட 2016
8. வர்தா 2016
9.ஒக்கி 2017
10.கஜா 2018
11.பானி 2019

கடந்த 10 ஆண்டுகளில் மொத்தமாக 11 புயல்கள் கிழக்கு கடற்கரையைத் தாக்கி உள்ளன‌. இவற்றில் நான்கு புயல்கள் தமிழகத்தைத் தாக்கி உள்ளன‌. அதாவது வங்கக்கடலில் ஏற்படும் மொத்த புயல்களில் மூன்றில் ஒரு புயல் தமிழகத்தைத் தாக்குகிறது. இயற்கை நிகழ்வுதானே என்று நாம் யோசிப்போம். ஆனால் புயல்கள் பின் உள்ள பருவநிலை மாற்றம்தான் முதன்மையான காரணம் ஆகும். இந்த பருவநிலை மாற்றத்தின் காரணமாகத்தான் புவியின் வெப்பநிலை தொடர்ச்சியாக உயர்ந்து வருகிறது. இதன் காரணமாக கடல் பகுதிகளில் குறைந்த காற்றழுத்த தாழ்வுநிலை உருவாகி, புயல்களாக மாறி கரையைத் தாக்குகிறது. இந்தப் புயல்கள் ஏற்படும்போது காற்றின் வேகம் அதிகரித்துள்ளது. இதுமட்டுமல்லாமல் அதிகளவிலான மழைப்பொழிவு ஏற்படுத்துகிறது.

புயல்கள் ஏற்படும் கால இடைவெளி குறைந்து கொண்டே வருகிறது. அதனாலதான் கடந்த 10 ஆண்டுகளில் மொத்தம் 11 புயல்கள் வங்கக் கடலில் ஏற்பட்டு உள்ளது. அதாவது 11 மாதங்களுக்கு ஒரு புயல் என்ற விகிதத்தில் வங்கக் கடற்கரை பகுதிகளை தாக்குகிறது. இது வெறுமனே வங்கக் கடற்கரை மட்டுமான பிரச்சனை அல்ல, உலகம் முழுவதும் பல நாடுகளில் இதுபோல தொடர்ச்சியாக புயல்கள் தாக்குகின்றன‌. அதுவும் குறிப்பாக பருவ காலங்களில் அல்லாமல், எந்த நேரத்தில் வேண்டுமானாலும் புயல்கள் கடற்கரையில் உள்ள பகுதிகளைத் தாக்குகிறது.

பருவநிலை மாற்றம் ஏற்படுவதற்கான அடிப்படைக் காரணம் என்ன? இதற்கு முதன்மையான காரணம் புதைபடிம எரிபொருட்கள் எரிப்பதனால் ஏற்படும் பசுமை இல்ல வாயுக்கள் நேரடியாக வளி மண்டலத்தைத் தாக்குவதால் தொடர்ந்து புவியின் வெப்பநிலை உயர்ந்து கொண்டே வருகின்றது. புதைபடிம எரிபொருட்களான டீசல், பெட்ரோல், நிலக்கரி மற்றும் மீத்தேன் போன்ற எரி வாயுக்கள் அதிகமாக உபயோகப்படுத்துவதன் காரணமாக பசுமை இல்ல வாயுக்கள் அதிகமாக வெளிப்படுகிறது. இதன் காரணமாக புவி வெப்பமயமாதல் ஏற்படுகிறது.

உலகம் முழுவதும் பல நாடுகள் புதைபடிவ எரிபொருட்களை குறைத்துக் கொண்டு, வேகமாக புதுப்பிக்கத்தக்க எரிபொருட்களை பயன்படுத்துவதை அதிகப்படுத்தியுள்ளன‌. அதுமட்டுமல்லாமல் உலகம் முழுவதும் பருவநிலை மாற்றத்திற்கான ஆய்வுகள் தொடர்ச்சியாக நடைபெற்றுக் கொண்டுள்ளன‌. இந்த ஆய்வுகளின் அடிப்படையில் உலகில் உள்ள பல நாடுகள் மிக வேகமாக புதைபடிவ எரிபொருட்களை பயன்பாட்டை குறைத்துக் கொண்டுள்ளன‌. உலகம் முழுவதும் உள்ள பல நாட்டு மக்கள் தங்கள் நாட்டு அரசு, புதைபடிம எரிபொருட்களின் பயன்பாட்டு அளவை குறைக்கக் கோரி போராட்டம் நடத்திக் கொண்டுள்ளனர். ஆனால் தமிழகத்தில் அதிக அளவிலான அனல் மின் நிலையங்களை உருவாக்கிக் கொண்டுள்ளது இந்திய அரசு. இது போதாதென்று டெல்டா மாவட்டங்களில் மீத்தேன் திட்டத்தை செயல்படுத்த உள்ளது இந்திய அரசு. இது மட்டுமல்லாமல் பெட்ரோல், டீசல், நிலக்கரி மற்றும் எரிவாயுவின் பயன்பாட்டைக் குறைப்பதற்கு இந்திய அரசு எந்த ஒரு நடவடிக்கையும் எடுக்கவில்லை. மாறாக புதைபடிவ எரிபொருட்களின் பயன்பாட்டை அதிகப்படுத்திக் கொண்டு உள்ளது. இதே நிலை தொடர்ந்தால் பதினோரு மாதங்களுக்கு ஏற்படும் புயல் என்பது ஆறு மாதங்களுக்கு ஒரு புயல் என்ற நிலைக்கு மாறும். இது மட்டுமல்லாமல் தற்போது 150 கிலோமீட்டர் வேகத்தில் வீசும் புயல்களின் வேகத்தின் அளவு மேலும் அதிகமாகும். 

இந்தியாவின் அடிமைக் காலனியாக இருக்கும் தமிழகம் பருவநிலை மாற்றத்தினால் ஏற்படும் இயற்கைப் பேரிடர்களை எதிர்கொள்வதற்குத் தயார் நிலையில் இல்லை. காரணம் தமிழகத்தின் இயற்கை வளங்கள் மட்டுமல்லாமல் ஜிஎஸ்டி போன்ற வரிகள் மூலம் இந்திய அரசு அனைத்தையும் கொள்ளை அடித்துச் செல்கிறது. பருவநிலை மாற்றத்தின் காரணமாக ஏற்படும் இயற்கைப் பேரிடர்களான புயல், பெருவெள்ளம், காட்டுத்தீ மற்றும் வறட்சி போன்றவற்றில் இருந்து மீள்வதற்கான நிதியை இந்திய அரசு கொடுப்பதில்லை. இதன் காரணமாக தமிழக மக்கள் மிகக் கடுமையாக பாதிக்கப்பட்டுள்ளனர். மேலும் எதிர்காலத்தில் இதுபோன்ற பருவநிலை மாற்றத்தின் காரணமாக ஏற்படக்கூடிய இயற்கைப் பேரிடர்கள் ஏற்படாமல் தடுப்பதற்கான ஆய்வுகள் எதனையும் பெரிய அளவில் இந்திய அரசு செய்வது இல்லை.

தமிழ்த் தேசத்தை தொடர்ந்து வஞ்சித்து வரும் டெல்லி ஏகாதிபத்தியத்திற்கு எதிராக ஓரணியில் திரளுவதுதான் பருவநிலை மாற்றம் மற்றும் அதனால் ஏற்படக்கூடிய பேரழிவுகளில் இருந்து தமிழகத்தைப் பாதுகாப்பதற்கான வழியாகும்.

- செந்தூவல்