அறிவியல் ஆயிரம்

விவரங்கள்

சிதம்பரம் இரவிச்சந்திரன்

பிரிவு: தொழில்நுட்பம்

வெளியிடப்பட்டது: 28 அக்டோபர் 2024

• அறிவியல்

நுகர்வோரை அவர்களின் இயல்பான வாழ்வில் இருந்து திசை திருப்புகின்றன என்று நவீன ஆண்டிராய்டு மொபைல் போன்கள் மீது அடிக்கடி குற்றம் சொல்லப்படுகிறது. ஆனால் இத்தொழில்நுட்பம் நம்மை இயற்கை உலகுடன் இணைக்கும் வலிமையான கருவியாக உள்ளது. செயலிகள் உயிரினங்களை அடையாளம் காண, தாவரங்களை ஆவணப்படுத்த, பறவை அழைப்புகளைக் கண்டுபிடிக்க, காட்டில் சிங்கம், புலி, யானைகளின் நடமாட்டத்தைத் தெரிந்து வனக்காட்சிகளை அறிய, ஆராய உதவுகின்றன.

விரல் நுனியில் நம் மொபைல் போன் இருக்கும்போது உலகின் எந்த மூலையில் இருக்கும் ஆழ்கடல் உயிரினத்தை, அமேசான் காட்டில் பறந்து திரியும் ஒரு அபூர்வ பறவையின் குரலைக் கேட்க, ஆஸ்திரேலியாவில் ஏதோ ஒரு தீவில் இருக்கும் ஒரு தனிமரத்தை அறிய நமக்கு உதவுகிறது. இப்போது ஒரு மொபைல் போனின் உதவியுடன் இதெல்லாம் சாத்தியமே. மர்மமான உயிரினத்தை அறிவது முதல் மெல்லிய குரலில் பாடும் ஒரு பறவையின் பாடலை ரசிக்கலாம்.

நாம் காணும் மதிப்புமிக்க தகவல்கள், உலகில் வாழும் உயிரினங்கள் பற்றி நாம் வழங்கும் விவரங்கள் அறிவியல் ஆய்வுகளுக்கு, சூழல் பாதுகாப்பு முயற்சிகளுக்கு பெரிதும் உதவும். பொதுவாக போன்கள் அவற்றை பயன்படுத்துவோரின் இயல் சூழலைப் பாதிக்கிறது என்று கருதப்படுகிறது. ஆனால் இத்தொழில்நுட்பம் ஒருவரை இயற்கையுடன் இணைக்கவும் உதவுகிறது. இதோ சில எடுத்துக்காட்டுகள்.சீக் (Seek)

தங்களைச் சுற்றியுள்ள பல்வேறு வகை தாவரங்கள், விலங்குகள், பூஞ்சைகளைத் தெரிந்து கொள்ள விரும்பும் குழந்தைகளுக்கு இந்த செயலி ஒரு வரப்பிரசாதம். போனின் மூலம் போட்டோ எடுக்கலாம். செயலியில் உள்ள செயற்கை நுண்ணறிவு தொழில்நுட்பம் உயிரினங்களை அடையாளம் காண, வகைப்படுத்த உதவுகிறது, சில முக்கிய தகவல்களையும் தருகிறது. நாம் வாழும் பகுதியைப் பொறுத்து இந்த செயலி எந்தெந்த உயிரினங்களைப் பார்க்க முடியும் என்று ஆலோசனை வழங்குகிறது. இத்தகவல்கள் ஆண்டு முழுவதும் நமக்குக் கிடைக்கும்.

இதன் மூலம் மண்ணில் வாழும் மக்கிகள் (decomposers), நகர வாழ் உயிரினங்கள், குளத்தில் வாழும் உயிரினங்கள், மகரந்த சேர்க்கை செய்யும் உயிரினங்களை அறியலாம். வளர்ந்த குழந்தைகளுக்கு, வளர்ந்தவர்களுக்கு ஐ நேச்சுரலிஸ்ட் (iNaturalist) என்ற செயலி உதவுகிறது. உள்ளூர் பகுதி இயற்கையை அறிய இது துணைசெய்கிறது.

சிர்ப்போமேடிக் செயலி (ChirpOMatic)

அதிகாலைப் பறவைகளின் கோரஸ் பாடல்களைக் கேட்கும்போது அவை பற்றி அறிய நமக்கு ஆர்வம் ஏற்படும். அல்லது இரண்டு பறவைகளின் குரல்களுக்கு இடையில் இருக்கும் ஒற்றுமை, வேற்றுமையையும் நாம் இச்செயலியின் உதவியால் அறிய முடியும். இதைப் பயன்படுத்தி பாடல்களைக் கேட்டால் எல்லா விவரங்களும் நமக்குக் கிடைக்கும். ஐ போன்களில் இந்த செயலியைப் பயன்படுத்தி பறவைகளைப் பற்றிய தகவல்களை சேமித்து வைக்கவும் வசதி உள்ளது.

காதுக்கு அருகில் போனை வைத்து போனில் வரும் ஓர் அழைப்பைப் போல செயலியைக் கேட்டால் அந்த சத்தம் பறவைகளை, அவற்றின் கூட்டில் உள்ள குஞ்சுகளைப் பாதிக்காது. இந்த ஒலிகளை மீண்டும் கேட்கும்போது ஏதேனும் குழப்பம் இருந்தால் அவை தீர்ந்துவிடும். விஞ்ஞானிகளால் வடிவமைக்கப்பட்ட இந்த செயலி மிக எளிமையானது. இதில் மேற்கு ஐரோப்பா, வட அமெரிக்கா, கரீபியன் மற்றும் ஆஸ்திரேலிய பறவை அழைப்புகள் உள்ளன.

விலங்குகளின் இருப்பிடம் அறிய உதவும் செயலி (Animal Tracker)

நிகழ்நேரத்தில் வன விலங்குகளின் நடமாட்டத்தை அறிய இது பயன்படுகிறது. இதன் உதவியுடன் இங்கிலாந்தில் உள்ள கடற்கரை விலங்குகள் முதல் நமீபிய காடுகளில் வலசை செல்லும் சிங்கங்கள் வரை தெரிந்து கொள்ளலாம். காணும் ஒவ்வொரு காட்சியும் ஆய்வு தரவு ஆய்வு வங்கியில் (movie bank research data base) சேகரிக்கப்பட்டிருக்கும். இதில் இருவழி தொடர்புக்கு உதவும் இலவச இணைய வழி வரைபட கருவி ஒன்று உள்ளது. இச்செயலி ஜெர்மனி மேக்ஸ் ப்ளாங்க் ஆய்வுக்கழக (Max Planck Institute) விஞ்ஞானிகளால் உருவாக்கப்பட்டுள்லது.

சூழலியலாளர்கள், வன அலுவலர்கள், மக்கள் அறிவியலாளர்களுக்கு (People scientists) இத்தகவல்கள் பயன்படுகின்றன.

இ ஃபேர்ட் (eBird)

பறவை உற்றுநோக்கலில் தீவிர ஆர்வமுடையவர்களுக்கு உதவும் செயலி இது. இது 27 மொழிகளில் கிடைக்கிறது. நம் சுற்றுப்புறங்கள், காடுகளில் காணப்படும் பறவைகள் பற்றிய விவரங்களை ஆண்டுதோறும் புதுப்பித்து இதன் மூலம் நாம் அறியலாம். பன்னாட்டு மற்றும் உள்ளூர் இனப் பறவைகள் பற்றிய விவரங்களை தெரிந்து கொள்ளலாம். சுற்றுப்புறத்தில் இருக்கும் பன்மயத்தன்மை செழுமை மிகுந்த இடங்களை இதன் மூலம் நாம் இடம் விட்டு இடம் செல்லும்போதும் பெறலாம். அரிய பறவை தென்பட்டால் அது பற்றிய உடனடியான நிகழ்நேர அறிவிப்புகளை இந்த செயலி வழங்குகிறது.

லீஃப் ஸ்னாஃப் (LeafSnap)

வழக்கத்திற்கு மாறாக இருக்கும் தாவரங்களை அறிய இச்செயலி பயன்படுகிறது. ஒரு சமயத்தில் ஒரே ஒரு தாவரத்தின் மீது மட்டும் கவனம் செலுத்தி பயன் பெறலாம். இலை, பூ, பழம் அல்லது தண்டை க்ளிக் செய்தால் இந்த செயலி தாவரத்தை வகைப்படுத்தி தகவல் தரும்.

பார்க்கும் தாவரத்திற்கு அருகில் இருக்கும் இதே போன்ற மற்ற தாவரங்களைப் பற்றியும் தகவல் தரும். ஒன்றுக்கும் மேற்பட்ட வாய்ப்புகள் கொடுக்கப்பட்டால் ஒப்பிட்டுப் பார்த்து நாம் காணும் தாவரம் எது என்று முடிவு செய்யலாம். ஆரோக்கியமாக தாவரத்தை வளர்ப்பது பற்றிய சிறிய குறிப்புகளை இச்செயலி தருகிறது. செடிக்குத் தண்ணீர் ஊற்ற, உரம் போட இது நமக்கு நினைவூட்டுகிறது.

கடற்புற்களை அடையாளம் காண (Seagrass Spotter)

கடலில் நீந்திக் கொண்டிருக்கும்போது, வெய்யில் காயும்போது நம் காலுக்கு கீழ் இருக்கும் புல்வெளிப் பகுதியில் வளர்ந்திருக்கும் கடற்புற்களை அடையாளம் காண இந்த செயலி பயன்படுகிறது. கடல் நீரில் வாழும் பூக்கும் தாவரங்கள் இவை மட்டுமே. கடல் ஆரோக்கியத்தை மீட்டெடுக்க நீருக்கடியில் வாழும் இத்தாவரங்களைப் பாதுகாப்பது முக்கியம்.

உலகில் எந்த இடத்தில் இருக்கும் கடற்புற்கள் நிறைந்த படுகையையும் இச்செயலியைப் பயன்படுத்தி அறியலாம். இந்த செயலி கடற்புற்கள் பாதுகாப்பு திட்டம் (Sea Grass) அமைப்பால் தொடஞ்கப்பட்டது. காணும் கடற்புற்களின் வகை, விவரங்களை இச்செயலியின் உதவியுடன் நாம் அறியலாம். கடல் மாசு, கடற்கழிவுகள் போன்றவற்றால் இத்தாவரங்கள் அழியும் ஆபத்தில் உள்ளன.

கடல் சார் விஞ்ஞானிகளால் இவற்றைப் பாதுகாக்க எடுக்கப்பட வேண்டிய நடவடிக்கைகளைத் தீர்மானிக்க விநியோகத்தை மேம்படுத்த நம்மால் வழங்கப்படும் புதிய தகவல்கள் உதவும். ஒரு காலத்தில் கடற்புற்கள் அதிகம் காணப்பட்ட பகுதிகளில் இன்று அவை அருகி வருகின்றன. ஆய்வாளர்களுக்கு இது பற்றி நாம் அளிக்கும் விவரங்கள் இவற்றைப் பாதுகாத்து மேம்படுத்த பேருதவியாக அமையும்.

வானத்தைக் காண (SkyView Lite)

இரவு வானத்தைப் பார்க்க வீட்டு சாளரத்தின் கதவுகளைத் திறந்து இதைப் பயன்படுத்தலாம். போனில் உள்ள கேமராவை வானில் ஒரு குறிப்பிட்ட இடத்தை நோக்கிக் காட்டினால் அந்த இடத்தில் இருக்கும் நட்சத்திரங்கள், விண்மீன் திரள்களை இச்செயலி காட்டும். நாம் இருக்கும் இடத்திற்கு மேல் பன்னாட்டு விண்வெளி ஆய்வு மையம் (ISS) எப்போது வரும், தொலைதூரத்தில் சுற்றிக் கொண்டிருக்கும் கோள்கள் எவை என்பதை அறியலாம்.

இந்த செயலியை எப்போதும் இரவில் பயன்படுத்தும் வகையில் (nightmode) வைக்க வேண்டும். இச்செயலி wifi வசதி இல்லாமலேயே செயல்படுகிறது. அதனால் வான் உற்றுநோக்கல் முகாம்களில் பங்கேற்பவர்கள், மிகத் தொலைவில் உள்ள வான் பொருட்களை ஆராய்பவர்களுக்கு இந்தச் செயலி பெரிதும் பயன்படுகிறது.

உலக வனங்களை அறிய (WWF Forests)

உலக வனநிதிய அறக்கட்டளையால் (WorldWide Fund for Nature WWF) இந்த செயலி உருவாக்கப்பட்டுள்ளது. இதன் உதவியுடன் முதல் தரமான வன அனுபவங்களைப் பெறலாம். கணினியால் உருவாக்கப்பட்ட தோற்றங்களை மெய்யுருவம் போல் காட்டும் தொழில்நுட்பத்தைப் பயன்படுத்தி இது இயங்குகிறது.

நாம் இருக்கும் அறையில் இருந்தபடியே குறியீடுகளை க்ளிக் செய்தால் வன விலங்குகளுக்கு அச்சுறுத்தலாக அமையும் செயல்கள் பற்றிய தகவல்களுடன் உலகின் பல்வேறு பகுதிகளில் இருக்கும் காடுகள் பற்றிய விவரங்களைப் பெறலாம். வனப்பயணத்தின்போது மரவாழ் குரங்குகளையும் புலிகள் போன்றவற்றின் நடமாட்டத்தையும் கண்டு ரசிக்கலாம்.

இந்த செயலிகள் பலவும் இலவசமாகவும் சில சிறியதொரு தொகை செலுத்தியும் பதிவிறக்கம் செய்து பயன்படுத்தும் வகையில் உருவாக்கப்பட்டுள்ளன. தமிழ்நாடு பகுதியில் இது போன்ற பல செயலிகள் உள்ளன. 'தாவரத்தை படம் வரைந்து அடையாளம் காட்டு' (Picture this plant identifier), தாவரங்களை அடையாளம் காண உதவும் ப்ளாண்ட் ஸ்னாப் (Plant snap) போன்றவை சில எடுத்துக்காட்டுகள். இவற்றை அறிந்து இயற்கையைப் பாதுகாத்து அதனுடன் இணைந்து வாழ்வோம்.

மேற்கோள்: https://www.theguardian.com/environment/2023/oct/26/the-best-apps-for-nature-lovers-from-identifying-birdsong-to-tracking-lions?

- சிதம்பரம் இரவிச்சந்திரன்

விவரங்கள்

சிதம்பரம் இரவிச்சந்திரன்

பிரிவு: தொழில்நுட்பம்

வெளியிடப்பட்டது: 02 செப்டம்பர் 2024

• ஜப்பான்
• இஸ்ரேல்

நன்னீர் ஈல் (Eel) மீன்கள் அளவிற்கு அதிகமாகப் பிடிக்கப்படுவதால் அழிந்து வரும் நிலையில் செல் திசு வளர்ப்பு தொழில்நுட்பத்தைப் பயன்படுத்தி முதல்முறையாக செயற்கை மீன் இறைச்சி ஆய்வகத்தில் உருவாக்கப்பட்டுள்ளது. இந்த மீன்களின் எண்ணிக்கை பெருமளவில் குறைந்து வரும் நிலையில் இவற்றின் விலை அதிகரிக்கிறது. இனி இந்த கவலைகள் ஈல் மீனை வழக்கமாக உண்பவர்களுக்கு இல்லை என்று ஆய்வாளர்கள் கூறுகின்றனர்.

ஆய்வகத்தில் மீன் இறைச்சி

இஸ்ரேலின் ஃபோர்சீ உணவுகள் (Forsea Foods) என்ற நிறுவனத்தால் இந்த ஈல் இறைச்சி நன்னீர் ஈல் மீனில் இருந்து உருவாக்கப்பட்டுள்ளது. இந்நிறுவனம் ஜப்பானின் சமையற்கலை வல்லுநர் ஒருவருடன் ஒன்றிணைந்து அரிசியுடன் சேர்த்து சமைக்கும்போது பலவகை நறுமணப் பொருட்களுடன் வெவ்வேறு பருவ காலங்களில் வினிகர் அல்லது வைன் மற்றும் எண்ணெயுடன் கலந்து உருவாக்கும் marinated grilled eel over rice என்ற உணவு வகையையும், பச்சை மீனுடன் கடற்செடியை கலந்து உருவாக்கும் அரிசி உணவையும் தயாரித்துள்ளது.

இவை ஜப்பானிய மொழியில் முறையே அனாகி கபயாக்கி (unagi kabayaki) மற்றும் அனாகி நிஜீரி (unagi nigiri) அல்லது சூஷி (Sushi) என்று அழைக்கப்படுகின்றன. இரண்டு ஆண்டுகளுக்குள் இந்த நிறுவனம் தன் செயல்பாடுகளை அதிகரிக்கத் திட்டமிட்டுள்ளது. திசு வளர்ப்பு இறைச்சியின் உற்பத்திக்கு ஜப்பான் அரசு ஊக்கமளிக்கிறது. ஜப்பானில் உணவகங்களில் இந்த மீன் ஒரு கிலோ 250 டாலர் என்ற விலைக்கு விற்கப்படுகிறது. இதே விலைக்கு ஆய்வக இறைச்சியை விற்க இந்நிறுவனம் முயல்கிறது.

(Marinated grilled eel over rice - Photograph: Anatoly Michaello)

ஒழுங்கற்ற மீன் பிடித்தல் மற்றும் மாசுபடுதலால் உலகம் முழுவதும் இந்த இனம் பரவலாக அழிந்து வருவது இதை வழக்கமாக உண்பவர்களுக்கு கவலையை ஏற்படுத்தியுள்ளது.

இவை சட்டவிரோதமாக கடத்தப்பட்டு கள்ளச் சந்தையில் அதிக விலைக்கு விற்கப்படுகிறது. இதனால் இப்போது இது பல மில்லியன் டாலர் தொழிலாக மாறிவிட்டது.

“2000ம் ஆண்டு முதல் ஜப்பானில் இந்த மீனின் நுகர்வு 80% குறைந்து விட்டது. ஆனால் இப்போது ஆய்வகத்தில் தயாரிக்கப்படுவதால் நுகர்வோர் உண்பதற்காக இவற்றை அழிக்கிறோம் என்ற குற்ற உணர்வு இல்லாமல் எடுத்துக் கொள்ளலாம். அதிக விலைக்கு விற்கப்படும் மீன் என்பதால் இதை விநியோகம் செய்ய இன்று எவரும் இல்லை.

இது தனித்துவமான யுமாமி நறுமணம் (umami flavor) , புற அமைப்பு, உண்ணத் தூண்டும் சுவை, தொடுவதன் மூலம் தீர்மானிக்கக்கூடிய தரத்துடன் உள்ளது. யுமாமி நறுமணம் என்பது குளுட்டாமேட் (Glutamate) என்ற வேதிப்பொருள் நாவில் படும்போடு உருவாகும் சுவை. யுமாமி ஜப்பானிய சொல். இச்சுவை ஒரு புதிய சுவையாக அறிவியல் உலகில் ஏற்கப்பட்டுள்ளது. இந்த பொருளை நாவில் உள்ள சுவை மொட்டுகள் உணர்வதால் உருவாகிறது.

இதை 1908ல் கிக்குனே இக்கேடா என்பவர் கடற்களைச்செடி ஒன்றில் இருந்து கண்டுபிடித்தார். இது சீன மொழியில் சியன்வே அல்லது புதுச்சுவை என்றும், ஆங்கிலத்தில் நற்சுவை என்றும் அழைக்கப்படுகிறது. இதை நாவில் உள்ள தனித்தேர்வு சுவை மொட்டுகள் உணர்கின்றன. உவர்ப்பு, இனிப்பு, புளிப்பு, கசப்பு ஆகிய நான்கு அடிப்படை சுவைகள் போல இதுவும் ஒரு சுவையாக அங்கீகரிக்கப்பட்டுள்ளது.

உண்மையான மீனை உண்ணும்போது ஏற்படும் இந்த சுவையை ஆய்வக முறையில் தயாரிக்கப்படும் மீனிலும் உருவாக்க இப்போது உள்ள முன் மாதிரியில் பல மேம்பாட்டு பணிகள் செய்யப்படும்” என்று ஃபோர்சீ நிறுவனத்தின் தலைமைச்செயல் அலுவலர் ரோ நெர் (Roee Nir) கூறுகிறார்.

"இந்த மீன் மிகச்சுவையானது. ஜப்பானில் மிக பிரபலமானது. ஆனால் உணவிற்காக வேட்டையாடி இதை அழிப்பதை விட பாதுகாக்க வேண்டும் என்ற விழிப்புணர்வு இன்று அதிகமாக உள்ளது” என்று டோக்கியோ செடோ (Saido) என்ற சைவ உணவகத்தின் உரிமையாளரும் சமையற்கலை நிபுணருமான கட்ஸூமி குஸுமோட்டோ (Katsumi Kusumoto) கூறுகிறார்.

அழிவில் இருந்து உயிரினங்களைக் காக்க

இது போல அழியும் ஆபத்தில் இருக்கும், உணவகங்களில் மிக அதிக விலைக்கு விற்கப்படும் உயிரினங்களை ஆய்வக முறையில் உற்பத்தி செய்ய ஃபோர்சீ திட்டமிட்டுள்ளது. இந்த மீன்களின் வாழ்க்கைச் சுழற்சி சிக்கலானது. ஆறுகளில் இருந்து கடலிற்குச் செல்லும் இவற்றின் வலசை காலம் நீண்டது. இவற்றின் வாழ்க்கைச் சுழற்சி பல தனித்துவமான மாற்றங்களைக் கொண்டது. இதனால் மற்ற மீன்கள் போல இவற்றை பண்ணைகளில் செயற்கையாக பெரும் எண்ணிக்கையில் வளர்க்க முடியாது.

இந்த மீனிறைச்சி மருத்துவ ஆய்வுகளுக்காக உருவாக்கப்பட்ட உடல் உறுப்பின் ஒரு சிறிய பதிப்பாகக் கருதப்படும் உறுப்புப் போலிகள் எனப்படும் மிகச்சிறிய திசுக்கற்றைகளை (Organoids) பயன்படுத்தி தயாரிக்கப்பட்டது. ஈல் மீனின் கருவுற்ற முட்டைகளில் இருந்து எடுக்கப்பட்ட இந்த கற்றைகள் கரு குருத்தணு செல்களால் ஆனது. இவற்றை எந்த வகை திசுவாகவும் வளர்க்கலாம். வளரும்போது இவை தாமாகவே ஈல் மீனின் இறைச்சியாக மாறி விடுகின்றன.

கடைசியில் உண்டாகும் விளைபொருளில் சில தாவர அடிப்படை பொருட்களும் கொண்டது. திசு வளர்ப்பு தொழில்நுட்பத்தில் இறைச்சியை உற்பத்தி செய்யும் மற்ற முறைகளுக்கு செலவுமிக்க வேதிமுறை வளர்ச்சிப் பொருட்களும், செல்கள் வளர சாரக்கட்டு (Scaffolds) போன்ற கட்டமைப்புகளும் தேவைப்படுகின்றன. இத்தொழில்நுட்பம் மீன்கள், கடல் உணவுகளைத் தயாரிக்கப் பொருத்தமானது.

இந்த ஆய்வக மீனிறைச்சி தசை நார் இடை கொழுப்பைப் பயன்படுத்தி தயாரிக்கப்படும் மாட்டிறைச்சியை (marbled beef) போல இல்லாமல் சீராக இருக்கும். மற்ற இறைச்சிகள் போல இல்லாமல் இந்த இறைச்சி பாக்டீரியா எதிர் பொருட்களையும், ஹார்மோன்களையும் கொண்டு தயாரிக்கப்படுவதில்லை. இந்த தொழில்நுட்பத்தைப் பயன்படுத்தி ஃபோர்சீ நிறுவனம் மட்டுமே ஆய்வக இறைச்சியை உற்பத்தி செய்கிறது.

இந்நிறுவனம் இந்த ஆய்வுகளுக்காக 5.2 மில்லியன் டாலர் நிதியை ஒதுக்கியுள்ளது. “இத்தொழில்நுட்பத்தை பயன்படுத்தி சூழலிற்கு நட்புடைய விதத்தில் விலங்குகளின் இறைச்சியை ஆய்வகத்தில் உருவாக்கலாம். கடல்சார் சூழலை அழியாமல் பாதுகாக்கலாம். மிதமிஞ்சிய மீன் பிடித்தலால் இது சிறந்த தீர்வு. மக்கள் விரும்பும் உள்ளூர் சுவையில் ஆரோக்கியமான உணவுகளைத் தயாரிக்கலாம்” என்று திங்க் டேங்க் நல்லுணவு அமைப்பின் ஐரோப்பியப் பிரிவு நிபுணர் செரன் கெல் (Seren Kell) கூறுகிறார்.

சூழலைப் பாதுகாக்க உதவும் ஆய்வக இறைச்சி

இந்த அமைப்பின் ஆதரவுடன் ஃபோர்சீ நிறுவனம் இந்த ஆய்வுகளை 2021 முதல் 2023 வரை நடத்தியது. அமெரிக்காவின் வைல்டு டைப் (Wildtype) என்ற நிறுவனம் சால்மன் (salmon), நீல டூனா (BlueNalu tuna) ஆகிய கடல்வாழ் மீன்களில் இருந்து இறைச்சியைத் தயாரிக்கிறது. இஸ்ரேலின் ஸ்டேக்ஹோல்டர் உணவுகள் (Steakholder Foods) நிறுவனம் திசுவளர்ப்பு குரூப்பர் (grouper) மீன்களை ஆய்வக முறையில் உற்பத்தி செய்கிறது.

சிங்கப்பூரில் உள்ள ஷியாக் மீட்ஸ் (Shiok Meats) நிறுவனம் இரால், (shrimp), லாஃப்ஸ்ட்டர் (lobster) மற்றும் நண்டுகலை தயாரிக்கும் முயற்சியில் ஈடுபட்டுள்ளது. செல்4 உணவு (Cell4Food) என்ற மற்றொரு நிறுவனம் நீராளிகளை செயற்கை முறையில் வளர்க்கிறது. உலகில் முதல்முறையாக ஆரோக்கிய ரீதியில் ஆய்வக உணவுகளை உற்பத்தி செய்ய இஸ்ரேலில் உள்ள அலெஃப் பண்ணை (Aleph Farms) அனுமதி பெற்றுள்ளது.

திசு வளர்ப்பு முறையில் கோழிகளை உருவாக்க அமெரிக்காவின் குட் மீட் (Good Meat) மற்றும் Upside foods நிறுவனங்கள் அனுமதி பெற்றுள்ளன. சிங்கப்பூர் குட் மீட் நிறுவனமே 2020 முதல் பொதுமக்களுக்கு ஆய்வக கோழி இறைச்சியை தயாரித்து வழங்கி வரும் உலகின் முதல் நிறுவனமாக செயல்படுகிறது. கால்நடைகளைக் கொன்று தயாரிக்கப்படும் இறைச்சியால் ஏற்படும் சூழல் தாக்கத்தை விட குறைவான தாக்கமே ஆய்வக இறைச்சி தயாரிப்பில் உண்டாகிறது.

பூமியில் ஒவ்வொரு மனிதனும் ஏற்படுத்தும் சூழல் தாக்கத்தைக் குறைக்க வழக்கமான முறையில் தயாரிக்கப்படும் இறைச்சியையும் பால் பொருட்களையும் தவிர்ப்பதே மிகச் சிறந்த ஒரே வழி என்று ஆய்வாளர்கள் நம்புகின்றனர்.

மேற்கோள்: https://www.theguardian.com/environment/2024/jan/22/reinventing-the-eel-first-lab-grown-eel-meat-revealed?

- சிதம்பரம் இரவிச்சந்திரன்