பார்த்தவுடன் மனதில் மகிழ்ச்சியை ஏற்படுத்தும் பறவைதான் மஞ்சள் கிளி. இவற்றின் அழகும் ஸ்வரம் பிசகாமல் பாடும் இவற்றின் திறனும்தான் நம்மைக் கவர்வது. தென்னிந்தியாவில் பொதுவாக மூன்று வகையான மஞ்சள் கிளிகளைக் காணலாம். வாழைப்பழத்தின் தங்க நிறம் உள்ளதால் சில பிரதேசங்களில் இவற்றை வாழைப்பழப் பறவை என்றும் அழைக்கின்றனர். வட இந்தியாவில் பழுத்த மாம்பழத்தின் பொன்னிறத்துடன் உள்ளதால் இவை மாம்பழப் பறவை என்றும் அழைக்கப்படுகின்றன.மாம்பழக் காலங்களில்தான் அங்கு இவை அதிகமாகக் காணப்படுகின்றன. இப்பெயர் ஏற்பட இதுவும் ஒரு காரணம். மஞ்சள் கறுப்புக் கிளி என்ற இனம் மட்டுமே தென்னிந்தியாவில் பொதுவாகக் காணப்படுகிறது. மஞ்சள் கிளிகளைப் பார்த்தால் இனிப்புப் பலகாரங்கள் கிடைக்கும் என்ற ஒரு நம்பிக்கை கிராமப்புறங்களில் முன்பு இருந்தது. இப்பறவைகள் மார்ச் முதல் ஆகஸ்ட் வரை கூடு கட்டுகின்றன. மற்ற இரண்டு இனப் பறவைகள் வலசை வந்து செல்பவை.

இதனால் இந்த வலசை இனங்கள் பள்ளி விடுமுறை நாட்களில் அதிகம் காணப்பட்டன. வேனில் காலத்தில் விடுமுறையின்போதுதான் ஊரில் பல திருவிழாக்கள் நடைபெறும். அப்போது வீடுகள்தோறும் இனிப்புப் பலகாரங்கள் செய்யப்படும். அதனால் இந்தச் சொல்வழக்கு ஏற்பட்டிருக்கலாம். மஞ்சள் கிளிகள் நிலத்தில் இறங்கிப் பார்த்தால் அவை இருக்கும் இடத்தில் புதையல் கிடைக்கும் என்ற ஒரு நம்பிக்கையும் இருந்தது. இவை பொதுவாகத் தரையில் இறங்குவதில்லை. ஒரு கிளையிலிருந்து மற்றொன்றிற்குத் தாவிப் பறப்பதே இவற்றின் இயல்பு.

இவை அரிதாகவே பூச்சிகளைப் பிடிக்கத் தரையில் இறங்கும். அதனால் இந்த நம்பிக்கை ஏற்பட்டிருக்கலாம். “வண்ணமயமான அழகுள்ள பறவைகளின் பட்டியலில் இவை உள்ளன. நன்றாகப் பழுத்த மாம்பழம், பலாப்பழம் போலப் பளபளக்கும் மஞ்சள் நிறத்தில் இவை காணப்படுகின்றன. தலையிலும் கழுத்திலும் முகமூடி அணிந்தது போலக் கறுப்பு மற்றும் மஞ்சள் நிறத்துடன், கறுப்பு நிறத்தில் சிறகும் மின்னும் சிவப்பு நிறத்தில் அலகும் காணப்படுகின்றன. ஆண், பெண் பறவைகளிடையே நிற வேறுபாடு இல்லை.

வயதிற்கு வராத பறவைகள் பளபளக்கும் மஞ்சள் நிறத்தைப் பெற்றிருப்பதில்லை. கம்பளிப் புழுக்கள் போன்ற புழு வகைகளே இவற்றின் முக்கிய உணவு. அரிதாகப் பழங்களைச் சாப்பிடும். சாதாரணமாகக் கரகரப்பான குரலில் பாடுகின்றன. சாதாரணமாக நகரங்களிலும் இவற்றைக் காணலாம். மஞ்சள் கறுப்புக் கிளிகள் ஏப்ரலில் கூடு கட்டும்போது மிக இனிமையாகப் பாடுவதுண்டு. தொட்டில் போல மிக அழகான கூடுகளைக் கட்டுகின்றன.

கூட்டில் முட்டையிட்டு அடைகாத்துக் குஞ்சு பொரிக்கின்றன. குஞ்சுகளுக்குப் புழுக்கள், பிராணிகளின் மலம் போன்றவற்றை உணவாகக் கொடுக்கின்றன. இந்தியன் ஓரியோல் (Indian Oriole) என்பது மஞ்சள் கறுப்புக் கிளியின் ஆங்கிலப் பெயர். மஞ்சள் கிளியின் ஆங்கிலப் பெயர் பிளாக் வுட்டன் ஓரியோல் (Black Hooded Oriole). இந்திய மஞ்சள் கிளிக்குப் பிரகாசிக்கும் மஞ்சள் நிறமும் கண்ணுக்கு மட்டும் கரியால் எழுதப்பட்டது போன்ற கறுப்பு நிறமும் உள்ளன.

சீன மஞ்சள் கிளி சீனா போன்ற நாடுகளிலிருந்து நம் நாட்டிற்கு அரிதாக வலசை வருகின்றது. இவற்றின் கண்ணைச் சுற்றிலும் கொள்ளைக்காரர்கள் போலக் கறுப்புப் பட்டை கட்டியது போலப் பட்டை தலையின் பின்பகுதி வரை நீண்டு செல்கிறது. இவற்றை அடையாளம் காண இது உதவுகிறது. பறவைகளை உற்றுநோக்கத் தொடங்குபவர்கள் இவ்வகைப் பறவைகளிலிருந்து ஆரம்பித்தல் நல்லது” என்று பறவை ஆய்வாளரும் எழுத்தாளருமான பி. சுஷாந்த் கூறுகிறார்.

மஞ்சள் கறுப்புக் கிளிகள் பலவிதமாகப் பாடுவதுண்டு. மழைக்காலம் தொடங்குவதற்குச் சற்று முன்பு அவை பாடும் பாடலே அதிகம் கேட்க வாய்ப்புள்ள பாடல். மழைக்காலத்தில் விடாமல் பெய்யும் சாரலின்போது நீர்நிலைகளிலிருந்து வரும் இவற்றின் பாடல்களைக் கேட்டுக் கொண்டே இருக்கலாம். மா அல்லது பலா மரத்தில் உட்கார்ந்து கொண்டு அவை மெல்லிய குரலில் பாடிக் கொண்டே இருக்கும்.

மழையின் குளிர்ச்சியும் பாடலின் இனிமையும் என்றும் நம் மனதில் மகிழ்ச்சியை ஏற்படுத்தும். அவை மகிழ்ச்சியாக இருக்கும்போது மட்டுமே இனிமையான குரல்களில் பாடுகின்றன. ஆனால் காக்கையையும் மற்ற எதிரிகளையும் கொத்தி விரட்ட வேண்டி வரும்போது அவை கடுமையான குரலில் கத்தும். மூன்று, நான்கு பறவைகள் சேர்ந்து உல்லாசமாக இருக்கும்போது அவற்றின் பாடல் ஆனந்தமயமானதாகக் கலகலவென்று ஆரவாரத்தோடு இருக்கும்.

தமக்குள் சண்டையிட்டுக் கொள்ளும்போது அவற்றின் குரல் கடுமையானதாக மாறும். மஞ்சள் கறுப்புக் கிளியின் அறிவியல் பெயர் ஓரியோலஸ் சாந்தோஃபிளவஸ் (Oriolus xanthornus). இந்திய மஞ்சள் கிளியின் ஆங்கிலப் பெயர் இந்தியன் கோல்டன் ஓரியோல் (Indian Golden Oriole). இதன் அறிவியல் பெயர் ஓரியோலஸ் ஓரியோலஸ் (Oriolus oriolus).

மஞ்சள் கறுப்புக் கிளியின் தலை, தொண்டை, தாடை, மார்புப் பகுதி, அலகு ஆகியவை கறுப்பாக இருக்கும்.

ஆண், பெண் பறவைகள் ஏறக்குறைய ஒரே மாதிரியாக இருக்கும். வயது வராத குஞ்சுகளின் தொண்டை, தாடை, மார்புப் பகுதி ஆகிய இடங்களில் வெள்ளை நிறத்தில் வரிகள் இருக்கும். இந்திய மஞ்சள் கிளியின் அலகு சிவப்பாக இருக்கும். அலகிலிருந்து ஆரம்பித்துக் கண் பகுதிகள் வழியாகச் செல்லும் பட்டை கறுப்பு நிறத்தில் காணப்படுகிறது. ஆண் பறவையின் சிறகுகளின் அடிப்பகுதியும் நல்ல கறுப்பு நிறத்தில் இருக்கும். இதற்கு நடுவில் ஒரு மஞ்சள் பொட்டு உள்ளது. வாலின் நடுப்பகுதி மஞ்சள் நிறத்துடன் இருக்கும்.

பெண் பறவை ஆண் பறவை போலச் சிவப்பாக இருப்பதில்லை. உடலில் மஞ்சள், ஆரஞ்சு நிறத்திற்குப் பதில் பசுமை கலந்த சாயம் போன்ற நிறத்தில் காணப்படும். மார்புப் பகுதியில் தவிட்டு நிறத்தில் வரிகள் உள்ளன. இறகுகள் பச்சை கலந்த தவிட்டு நிறத்துடன் உள்ளன. வயது வராத ஆண் பறவை பெண் பறவை போலவே இருக்கும். சீன மஞ்சள் கிளியின் அலகு ரோஸ் நிறமாக இருக்கும். கண் பகுதி வழியாகச் செல்லும் கறுப்புப் பட்டை நல்ல அகலமாக இருக்கும். பின்பகுதியில் நீண்டு இது உடலின் மற்றொரு கண் வரை செல்கிறது.

இந்த நிற வேறுபாடு இவற்றின் மூன்று இனங்களையும் அடையாளம் காண உதவுகிறது. மஞ்சள் கிளிகள் வசதியாக இருக்கும் இடங்கள் எல்லாவற்றிலும் கூடு கட்டும். இந்திய மஞ்சள் கிளிகள் காஷ்மீர், இமயமலைப் பகுதி, வட இந்தியாவில் சில இடங்களில் கூடு கட்டி வாழ்கின்றன. கூடு கட்டும்போது இனிய குரலில் பாடுகின்றன. சீன மஞ்சள் கிளி சைபீரியா, ஆசியாவின் வடக்கு, கிழக்குப் பகுதி நாடுகளில் கூடு கட்டி வாழ்கிறது. எல்லா இனப் பறவைகளும் சிறிய பூச்சிகளை உணவாக உண்கின்றன.

பூச்சிக் கட்டுப்பாட்டில் முக்கியப் பங்கு வகிக்கின்றன. மஞ்சள் கறுப்புக் கிளிகள் உயரமான மரங்களில் தொட்டில் போன்ற வடிவத்தில், மரப்பட்டையை நார் போலச் சீவி எடுத்து முடைந்து கூடு கட்டுகின்றன. உலர்ந்த இலைகள், உரோமங்கள் போன்றவற்றைக் கொண்டுவந்து கூட்டின் உட்புறத்தை அழகுபடுத்துகின்றன. இவற்றின் கூட்டைப் பார்த்தால் தேநீர் கோப்பை போல இருக்கும். பலசாலியான பறவைகளுக்கு அருகில் கூடு கட்டி வாழும் சுபாவம் இவற்றிற்கு உண்டு.

பொது எதிரிகளை விரட்ட இது அவற்றிற்கு உதவும். காகத்தைப் போன்ற எதிரிகள் வரும்போது அப்பகுதியில் கூடு கட்டி வாழும் எல்லாப் பறவைகளும் சேர்ந்து அவற்றை விரட்டுகின்றன. ஆனால் பலசாலியான பறவைகளுக்குக் கோபம் வந்தால் பாவம் மஞ்சள் கறுப்புக் கிளிகளின் மீது தாக்குதல் நடத்தி முட்டைகளையும் குஞ்சுகளையும் கொத்தி அழித்துவிடும். பலசாலிப் பறவையின் குஞ்சுகளுக்குக் கிளிகளின் குஞ்சுகள் உணவாகும். பறவைகளின் நடத்தையும் வாழ்க்கைமுறையும் அதிசயமானவை. பறவைகளை உற்றுநோக்கினால் பாடம் கற்கலாம்.

- சிதம்பரம் இரவிச்சந்திரன்