நோயாளிப் படுக்கையில் அதிகாரத்தின்
பிராணியை கட்டி வைத்திருக்கிறேன்
சுற்றி கூட்டமில்லாததால் இப்பிராணி
சிறிது நேரத்தில் இறந்து விடும்
இரத்தக் கொதிப்புக்கு அகங்கார மாமிசத்தை
விருந்தாக்கியிருந்ததை தனிமை
நினைவு குறிப்புகளிலிருந்து காட்டிக் கொண்டிருக்கிறது
சர்க்கரையில் கரைந்தது திமிர் என்றாலும்
உடல் பருமனெனும் பன்றியைக் கொழுக்க
வைக்கப் பிசுபிசுவென்ற நச்சுத்தன்மையை
சுவைத்துக் கொண்டிருந்தேன்
இன்சுலினை தினம் பரிசளித்துக்
கொண்டிருந்தனர் விசவாசிகள்
கால் பிடிப்பு கைப் பிடிப்பு உடல் பிடிப்பில்
துடித்துக் கொண்டிருந்த போது கூட
பொன் நகை மதிப்பை கணித்துக் கொண்டிருந்தது
மமதையெனும் சாத்தான்
வயது கூடக் கூடக் குறைத்து காட்டிக் கொண்டிருந்தது
அழகெனும் அழுகிய புழு
இத்தனையையும் கட்டி மேய்த்தது பணமெனும் பாதள மிருகம்
சிறுநீரும் மலமும் அள்ளும் ரோபோவை
தேடிக் கொண்டிருக்கும் போதே
உடல் பலூன் வெடித்து விட்டது
பணத்துக்குப் புண்ணியம் கிடைக்கவேயில்லை
பண்ட மாற்றம் போலில்லையாம் பாவம்
உடை மாற்றலுக்கும் அறுவை சிகிச்சைக்குமே
மொத்த தைரியமும் துகிலுரிந்து விட்டது
பாடுபட்டு சேர்த்த பட்டுடைகளையும்
ரொக்கத்தையும் நிலத்தையும்
பாம்பாகச் சுற்றியிருந்த மனம்
விடுபட்டு தலை வருடும் உயிரின் தடத்தில்தான்
தன்னம்பிக்கை துளிர் விடத் தொடங்கியது
இனி வரும் காலங்களில் நோயாளியின்
படுக்கைதான் போதிமரமாகப் போகிறது...

- சீதா