மாற்றம்
**********

இன்று மாறும்
நாளை மாறும்
நாளை மறு நாளேனும் மாறிவிடும்
கண்டிப்பாக மாறும்
என்றாவது மாறும்
நீங்களும் மாறுவீர்கள்
நானும் மாறுவேன்
அவர்களும் மாறுவார்கள்
ஆன்மா இழந்து 
இரத்தம் சுண்டி 
சதை, நரம்பு, உறுப்புகளை
மண் தின்ன
தலைகனம், திமிர், கர்வம், ஆணவம் 
இழந்து ஒன்றுமே இல்லாமல்
மொத்தமாய் நினைவுகளாய் மாறி போவோம் 
நினைக்க மனிதர்கள் மட்டுமே தேவை...

வேடிக்கை விளையாட்டு
*****************************

கடைசியில் நாக்கு கேட்கும் ஒரு சொட்டு
தண்ணீராகவும் இருக்கலாம்
கண்ணீராகவும் இருக்கலாம்
செங்குருதியாகவும் இருக்கலாம்
காலத்துக்கும் விதிக்கும் தெரிந்த விளையாட்டு அது
நீங்கள் எப்போதும் வேடிக்கை பார்க்கும் வாடிக்கையானவர்கள்தான்...

ஜீவன்
********
வானத்தை வரைந்தவள்
சிறகை வரைய சாளரத்தை தேர்ந்தெடுத்து விட்டாள்
ஓவியத்தின் ஜீவன் சாளரத்திற்குள் 
அடைபட்டுவிட்டது...

இங்கிதம்

************
இலைகளுக்கெல்லாம் இங்கிதம் தெரிகிறது!
வேருக்கு உரமாகுமே தவிர விஷமாகாது...

- சீதா, சென்னை