என் சாம்பல் என்னுடனே இருக்கட்டும்
அதிலிருந்து பூக்கள் பூக்கட்டும்
அது வாசமற்றோ
அதீத வாசனையுடனோ இருக்கட்டும்
என் சாம்பலில்
உன்னைத் தேடாதே
உன் போதனைகளைத் தேடாதே
உன் மந்திரக்கதைகளை கேட்டு
இந்த உடல் வளர்ந்திருக்கலாம்
அதெல்லாம் காற்று
வீசும் போது உதிர்ந்து விட்டன
நான் தனியாகத்தான் அழுதுகொண்டிருந்தேன்
நான் தனியாகத்தான் உழைத்துக்கொண்டிருந்தேன்
நான் தனியாகத்தான் மலை உச்சிக்கு ஏறிக்கொண்டிருந்தேன்
நான் தனியாகத்தான் போராடிக்கொண்டிருந்தேன்
அப்பொழுதெல்லாம் நீ வரவில்லை
நான் பெரும் பள்ளத்தில் உருண்டு விழுந்த போது
நீ வரவில்லை
என்னை தூக்கிவிட ஏதோவொரு கரத்தை
எதிர்பார்க்கும் போதும் வரவில்லை
இப்பொழுது வந்திருக்கிறாய்
உன் கடவுளோடு
எனக்குத் தெரியும்
இந்த பூனைக்குட்டிக்கு
என் வீட்டில் என்ன வேலையென்று.