எங்கோ ஒரு கிணற்றில்
கருவறுத்துக் கருகிய
சருகாய் மிதக்கிறாள்
எங்கோ ஒரு
காட்டுப் புதருக்கருகே
கரிப்பிடித்த கற்போடு
பாதியெரிந்த விறகாகிறாள்
எங்கோ ஒரு குப்பைத் தொட்டியில்
மட்கும் மட்காத
குப்பைகளுக்கு நடுவே
தங்கத்தால் உயிரிறுகி
உடல் பொறுக்கக் கசங்கியிருக்கிறாள்
எங்கோ ஒரு மாநிலத்தில்
எப்பெருங்குற்றமெனினும்
ஊர் கூடிப் படமெடுக்க
கருங்கல் சாலையில் முகந்துடைத்து
பெண்மைக்கெனும் குருதி
சிவந்து வழிவதாகவே
தோன்றுகிறது
அதோடு விடுகிறதா இப்படம்
அந்தரங்கமாய்
இதுவரை கற்பனித்ததெல்லாம்
வீதிக்கு வருகிறது
குப்பைத் தொட்டியுமல்லாது
கிணறுமல்லாது
காட்டுப் புதருமல்லாது
கொளுத்திப் போடுகிறானொருவன்
மிருகவதைக்கெதிரான
யுகதர்மப் பிரதிநிதியவன்
எரிய எரியக் கிழிந்து தொங்குகிறது
யாவருக்குமான முகங்கள்
தொங்கும் முகங்களின்
அவமானம் கலையுமுன்னே
இன்னொருவன் எரிகிற நெருப்பில்
ஏதோவொன்றையூற்ற
காட்டுப் புதராகவும்
கிணற்று நீராகவும்
குப்பைத் தொட்டி நாற்றமுமாகவுமென
குபுக்கென்று பரவியெரிகின்றது
அவளின் மேலாடையுடன்
அரைக்கால் சட்டையுமாக
தணிந்து கொண்டிருக்கும் மானத்தை
வெள்ளைத் தோலுக்குள்
குரலொழிந்து கனன்றபடியே
எரிதழலாகிய ஒரு மனித உயிரை
ஏன் பார்த்தோமென வெந்து
அடங்குவதற்குள்
எங்கோ ஒரு தேசத்தில்
பெண் குழந்தையொன்றைக்
கண்ணிமைக்கும் நேரத்தில்
காப்பாற்றியிருப்பதாக
கொண்டாடப்படும் ஆணைச்
சாகசமாக
எண்ணத் தோன்றுகிறது......

- புலமி