கோவிட் -19 காரணமாக ஏற்பட்ட ஊரடங்கிற்குப் பிறகு பல ஆக்க பூர்வமான மாற்றங்களும் ஏற்பட்டுள்ளன. குறிப்பாக, கல்விப் பயிற்றுமுறையில் இணையவழிக் கல்வி என்ற அடுத்தக்கட்ட நகர்வை நோக்கிச் செல்ல வேண்டிய தேவை ஏற்பட்டுள்ளது. இணையவழிக் கல்வி பெரிதும் பரவலாகி வரும் சூழலில் நாளொன்றிற்குச் சுமார் பத்து முதல் இருபது வரையிலான குறுகிய கால வகுப்புகளும், உரையரங்கங்கள், திறனறித் தேர்வு முறையிலான பயிற்சி வகுப்புகள் என அணிவகுத்து நிற்கின்றன. தமிழகம் முழுவதும் கல்லூரிகள் பலவும் இந்நிகழ்ச்சிகள் நடத்துவதில் ஈடுபாடு காட்டி வருகின்றன. இவ்வகையில், புதுச்சேரியில் பழம்பெருமை வாய்ந்த தாகூர் அரசுக் கலை அறிவியல் கல்லூரியின் தமிழ்த்துறை நடத்திய ‘புதுச்சேரி வரலாறும் இலக்கியங்களும்’ என்னும் இணையவழி ஏழுநாள் பயிலரங்கு முக்கியத்துவம் வாய்ந்ததாகும்.

கடந்த 2014 ஆம் ஆண்டு நவம்பர் 1ஆம் தேதி புதுச்சேரியில் அதன் அறுபதாவது விடுதலை நாள் விழா கொண்டாடப்பட்டது. இதில் வியப்பூட்டும் செய்தி என்னவென்றால், நவம்பர் 1 இல் புதுச்சேரியில் விடுதலை நாள் விழா கொண்டாடப்பட்டது அதுவே முதல்முறையாகும். அதற்கு முன்னதாக இந்திய விடுதலைநாள் விழாவான ஆகஸ்ட் 15 ஆம் நாளை அடுத்து ஆகஸ்ட் 16 ஆம் நாள் புதுச்சேரி விடுதலைநாள் கொண்டாடப்பட்டு வந்தது. இதனால், இந்தியாவில் ஆங்கிலேயர் ஆட்சியின் கீழிருந்து இந்தியா விடுதலை அடைந்த மறுநாள் பிரெஞ்சியர் ஆட்சியிலிருந்து புதுச்சேரி விடுதலை அடைந்ததைப் போன்றொரு எண்ணத்தை மக்களிடத்தில் ஏற்படுத்தியிருந்தது.

இந்திய விடுதலைக்குப் பிறகு புதுச்சேரி பிரெஞ்சியரிடமிருந்து விடுதலையடைய 7 ஆண்டுகள் காத்திருக்க வேண்டியிருந்து. இந்த ஏழாண்டு காலக் காத்திருப்பிற்குப் பல அரசியல் காரணங்கள் இருந்தன. புதுச்சேரியின் விடுதலைப் போராட்ட வரலாறு இந்திய விடுதலைப் போராட்ட வரலாற்றிற்குச் சற்றும் குறைந்ததல்ல. எனினும், புதுச்சேரி வாழ் மக்களுக்குக் கூட இந்த விடுதலைப் போராட்ட வரலாறும் இதன் பின்னணியும் முழுமையாகத் தெரியாது. பள்ளி கல்வியில் புதுச்சேரியின் விடுதலைப் போராட்ட வரலாறு இந்திய விடுதலைப் போராட்ட வரலாற்றைப் போல் பயிற்றுவிக்கப்படாதது ஒரு முக்கியக் காரணமாகும்.

புதுச்சேரி, தாகூர் அரசுக் கலை மற்றும் அறிவியல் கல்லூரியின் தமிழ்த்துறை நடத்திய ‘புதுச்சேரியின் வரலாறும் இலக்கியங்களும்’ என்னும் தலைப்பிலான பயிலரங்கம் புதுச்சேரி வரலாறு மற்றும் இலக்கியங்கள் பற்றிய ஆழமான பார்வையை வெளிப்படுத்தும் வகையில் அமைந்திருந்தது. இதன் ஒருங்கிணைப்பாளர்களில் ஒருவரான பேராசிரியர் முனைவர் நா.இளங்கோ அவர்கள் உரையரங்கங்கள், கருத்தரங்கங்கள், பட்டிமன்றங்கள் மூலம் புதுச்சேரி, தமிழகம் மட்டுமன்றி உலக நாடுகள் பலவற்றிலும் தமிழின் பெருமையை நிலைநாட்டி வருபவர். இவருடைய உரைகளில் ஆழமான, புதுமையான சிந்தனைகள் மிகுந்திருக்கும். குறிப்பாக, புதுச்சேரி விடுதலைப் போராட்ட வரலாற்றின் நுட்பமான அரசியலை வெளிப்படுத்தி, கல்லூரிகள், பொது நிகழ்ச்சிகளில் விழிப்புணர்வு ஏற்படுத்தும் வகையில் பேசி வருகிறார்.

உண்மையைச் சொல்லப் போனால் இந்த ஏழு நாள் உரைகளையும் அவர் ஒருவரே செய்யும் அளவிற்கு அவரிடம் நுண்மான் நுழைபுலம் இருந்தபோதும், இந்நிகழ்விற்கு மிகப்பொருத்தமான அறிஞர்களைத் தேர்வு செய்து பங்கேற்பாளர்களுக்கு நிறைவான கருத்துக்கள் சென்றடைய வழிவகுத்திருக்கிறார். நிகழ்வின் இடையிடையே, அவரது இணைப்புரை உரைகளுக்கு உரையளிக்கும் விதமாகவும், புதுச்சேரி வரலாறு பற்றிய நுட்பமான கருத்துக்களை வெளிப்படுத்தும் விதமாகவும் அமைந்திருந்தது. இவரோடு இணைந்து இப்பயிலரங்கு வெற்றியடைய வழிவகுத்த பேராசிரியர் முனைவர் வே.கருணாநிதி அவர்கள் முற்போக்குச் சிந்தனையாளர், இதுபோல் பல கருத்தரங்கங்களை முன்னின்று நடத்தியவர். இப்பயிலரங்கின் வெற்றிக்கு இவரது பங்களிப்பும் முக்கியமானதாகும்.

கடந்த 2020 ஏப்ரல் 20 முதல் 26 ஆம் நாள்வரை நடைபெற்ற இக்கருத்தரங்கில் ஓய்வுபெற்ற தமிழ்ப் பேராசிரியர் முனைவர் சு.தில்லைவனம், கல்வெட்டு ஆய்வறிஞர் வில்லியனூர் வெங்கடேசன், புதுச்சேரி வரலாற்று ஆவனங்கள் பற்றிய ஆய்வாளர் முனைவர் நா. இராஜசெல்வம், புதுவைப் பல்கலைக்கழகத் தமிழியற்புல முன்னாள் முதன்மையர் முனைவர் எஸ். ஆரோக்கியநாதன், புதுச்சேரி மொழியியல் பண்பாட்டு ஆராய்ச்சி நிறுவனத்தின் இயக்குநர் முனைவர் இரா. சம்பத், புதுவைப் பல்கலைக்கழகத் தமிழியற்புல பேராசிரியர் ப. இரவிக்குமார் ஆகியோர் பயிற்றுநராகக் கலந்துகொண்டு உரை நிகழ்த்தினர்.

பேராசிரியர் முனைவர் தில்லைவனம் அவர்கள் புதுச்சேரி, காரைக்கால் வரலாறு மற்றும் இலக்கியங்கள் தொடர்பாகப் பல நூல்களை எழுதியுள்ளார். புதுச்சேரியின் பழங்கால வரலாற்றைப் பற்றிய இவரது உரை பெரிப்புளோஸ், தாலமி கால புதுச்சேரி, அதன்பின் யவனர்களோடு தொடர்புடைய அரிக்கமேடு அகழ்வாய்வு, அரிக்கமேட்டுக்கு அருகில் இருக்கும் வீராம்பட்டினம் என்னும் பகுதியில் வாழ்ந்த சங்ககாலப் புலவர்களான வீரைவெளியனார், வீரைவெளியன் தித்தனார், புதுச்சேரியின் பழங்காலப் பெயர்கள் பற்றிய ஆய்வுரையாக அமைந்திருந்தது. அவர் நிகழ்த்திய முதல் நாள் உரையின் முடிவில் புதுச்சேரியின் சமண – பவுத்தத் தொடர்பு பற்றிய செய்திகள் விவாதப்பொருளாய் இருந்தது.

கல்வெட்டு ஆய்வறிஞர் வில்லியனூர் வெங்கடேசன் அவர்களது நூல்கள் புதுச்சேரி காரைக்கால் பகுதியில் உள்ள கல்வெட்டுகள் பற்றிய அரிய பெட்டகங்களாக விளங்குகின்றன. காலஞ்சென்ற பாகூர் குப்புசாமி அவர்களுடன் இணைந்து பல ஆய்வுகளை வெளிப்டுத்தியிருக்கிறார். புதுச்சேரியில், பாகூர், திருவாண்டார் கோயில், மதகடிப்பட்டு ஆகிய ஊர்களில் உள்ள பல்லவர்-சோழர்கால கல்வெட்டுகள், கோயில் மற்றும் சிலைகளின் அமைப்பு முறைகள், அதன் தனிச்சிறப்புகள் பற்றிய விளக்க உரை நுட்பமான பல தகவல்களை உள்ளடக்கியதாக இருந்தது.

ஜுலியன் வின்சோன் அளித்த குறிப்பின்வழி பாரிசில் உள்ள நூலகத்தில் பல தமிழ்ச் சுவடிகள் இருப்பதை அறிந்த உ.வே.சா அவர்கள் ‘இனி தமிழகத்தில் உள்ள சுவடிகள் இல்லாமல் போனலும் கடல்கடந்து பல்லாயிரம் மைல்களுக்கு அப்பால் ஒரு தேசத்தில் நம் நாட்டு இலக்கியங்கள் பாதுகாப்பாக இருக்கின்றன என்று எண்ணி மகிழ்ந்தேன்.’ என்றார். அதுபோல், புதுச்சேரியின் வரலாற்று ஆவனங்கள் அத்தனையும் இல்லாமல் போனாலும், முனைவர் நா. இராஜசெல்வம் அவர்களிடம் நூலகத்தில் கிடைக்காத பல அரிய செய்திகள் உள்ளன. புள்ளிவிவரங்களை ஆண்டு, மாதம், நாள், கிழமை உட்பட அனைத்தையும் கூறும் இவரது ஆற்றல் வியக்கவைக்கும்படி இருந்தது. கல்வியாளர்கள் இத்தகைய ஆற்றலை வளர்த்துக்கொண்டால் மாணவர்களிடம் ஆழமான கருத்துக்களை விதைக்கலாம் என்பதில் ஐயமில்லை. பிரெஞ்சியர் ஆட்சியின் தொடக்ககாலம் பற்றியதாக அவருடைய உரை அமைந்திருந்தது. போர்த்துகீசியர், டேனிஷ்காரர்கள், ஆங்கிலேயர்கள் ஆகியோரின் வருகைக்குப் பின் தான் பிரெஞ்சுக் கிழக்கிந்திய கம்பெனி இந்தியாவில் கால்பதித்தது. போர்த்துகீசியர் புதுச்சேரியில் வணிக நிறுவனங்கள் அமைத்து சில குடியிருப்புகளை ஏற்படுத்திய காலத்திலிருந்து பல அரிய வரலாற்றுத் தகவல்களை உள்ளடக்கி முனைவர் இராஜசெல்வம் அவர்களுடைய உரை அமைந்திருந்தது. பிரெஞ்சியர்கால வரலாறு பற்றிய பல வினாக்களுக்குப் பல புதிய கருத்துக்கள் அவரது விடைகளில் வழியாக அறியமுடிந்தது.

கல்வெட்டு ஆய்வறிஞர் வில்லியனூர் வெங்கடேசன், முனைவர் இராஜசெல்வம் ஆகியோருடைய உரைகள் மீண்டும் மீண்டும் விவாதப்பொருளாக இருந்ததால் நான்காம் நாளும் இவ்விருவரின் உரை தொடர்ந்தது. இருவர் உரையும் பல புதிய தகவல்களை உள்ளடக்கியதாக இருந்தது. குறிப்பாக, சுமார் முன்னூறு ஆண்டுகளுக்கு முற்பட்ட புதுச்சேரியின் நகரமைப்பு, பிரொன்சுவா மார்த்தேன் உருவாக்கிய நட்சத்திர வடிவிலான கோட்டை ஆகியவை பற்றி முனைவர் இராஜசெல்வம் அவர்கள் காட்சிப்படுத்திய, வரைபடங்கள் பங்கேற்பாளர்களுக்கு ஆர்வத்தை ஏற்படுத்தும் வகையில் இருந்தன.

              பேராசிரியர் முனைவர் எஸ். ஆரோக்கியநாதன் அவர்களின் ‘புதுச்சேரி காரைக்கால் தெருப்பெயர்கள் - ஓர் ஆய்வு’ என்னும் நூல் ஒரு புதிய முயற்சி. இவரது உரை புதுச்சேரி காரைக்கால் தெருப்பெயர்கள் பற்றிய புதிய தகவல்களை உள்ளடக்கியதாக இருந்தது. பிரெஞ்சியர் கால புதுச்சேரியில் கடற்கரை ஒட்டிய நகரக் கட்மைப்பு, வெள்ளை நகரம்(White town), கருப்பு நகரம்(Black town) என்ற நிலையில் இருந்தது. இந்த அமைப்பே இன்றும் தொடர்கிறது. வெள்ளை நகரத்தின் தெருக்களும், கருப்பு நகரத்தின் தெருக்களும் கிழக்கு மேற்காக ஒரே நேர்க்கோடாக நீண்டிருந்தபோதும் கிழக்குப் பகுதியில் உள்ள தெருக்களின் பெயர்கள் பிரெஞ்சு ஆளுநர்கள், அரசு அதிகாரிகள் போன்றொரின் பெயர்களாகவும், மேற்குப் பகுதியில் உள்ள கருப்பு நகரத்தில் உள்ள தெருக்களில் பெரும்பான்மையானவை, சாதிப்பெயர்களாகவும் இருக்கின்றன. இதன் வரலாற்றுப் பின்னணியை விவாதிக்கும் வகையில் இவருடைய உரை அமைந்திருந்தது.

பேராசிரியர் முனைவர் இரா.சம்பத் அவர்கள் புதுச்சேரி இலக்கியப் படைப்பாளர்களைப் பற்றித் தொடர்ந்து பல பதிவுகளைச் செய்துவருகிறார். அண்மையில் வெளியான இவரது தொகுப்பு நூலான ‘உலகத் தமிழ்க் கவிதைகள்’ உலகம் முழுவதும் உள்ள தமிழ்க் கவிஞர்களிடம் பரவலான வரவேற்பைப் பெற்றுள்ளது. புதுச்சேரியின் இலக்கியப் படைப்பாளர்களின் படைப்பைப் பற்றித் தொடர்ந்து ஆய்வு மேற்கொள்வதோடு மட்டுமல்லாமல் தம்முடைய ஆய்வு மாணாக்கர்களுக்கும் அத்தகைய தலைப்பைக்கொடுத்து புதுச்சேரி இலக்கியங்கள் பற்றிப் பரவலாக்கி வருகிறார். இருபதாம் நூற்றாண்டின் தமிழ் இலக்கிய உலகில் புதிய பாதை அமைத்துக்கொடுத்த பாரதியின் குறிப்பிடத்தகுந்த படைப்புகள் அனைத்தும் அவர் புதுச்சேரியில் தங்கியிருந்த காலத்தில்தான் வெளிவந்தன. புதுச்சேரிப் பகுதியில் பாரதி, பாரதிதாசன், வாணிதாசன், புதுவைச்சிவம், தமிழ்ஒளி போன்ற மரபுக் கவிஞர்கள் வாழ்ந்தமையால் இன்றும் இப்பகுதியல் மரபுக் கவிதைப் பாடும் கவிஞர்கள் மிகுந்துள்ளனர். பாரதி காலத்திற்குப் பிறகு தற்காலம் வரை புதுவையில் உள்ள கவிஞர்கள் பற்றிய ஒரு பருந்துப் பார்வையாக இவரது உரை அமைந்திருந்தது.

பேராசிரியர் முனைவர் ப.இரவிக்குமார் அவர்களின் உரை அறிந்த படைப்பார்களின் படைப்புகள் பற்றி அறியாத பல தகவல்களை விளக்கும் விதமாக இருந்ததது. பாரதி, பாரதிதாசன், தமிழ்ஒளி, புதுவைச் சிவம், பிரபஞ்சன் போன்ற சிறந்த படைப்பாளர்களின் கவனப்படுத்தப்படாத படைப்புகளில் இருந்து பல அரிய கருத்துக்களை இவரது உரை வாயிலாக அறியமுடிந்தது. தமிழ் உரைநடை வரலாற்றில் புதுச்சேரியின் பங்களிப்பு மிக முக்கியமானது. பாரதியும், வ.வே.சு ஐயரும் எழுதிய சிறுகதைகளும், மங்கையர்கரசியின் காதல் என்னும் தமிழின் முதல் சிறுகதைத் தொகுப்பும் புதுச்சேரியில் இருந்துதான் வெளிவந்திருக்கின்றன. புதுச்சேரியின் இலக்கிய வரலாறு பற்றி விரிவாக விவாதிக்க, பேராசிரியர் இரவிக்குமார் அவர்களின் உரை களமமைத்துக் கொடுத்திருந்தது.

பேராசிரியர் முனைவர் நா. இளங்கோ அவர்கள் தனது உரையில் குறிப்பிட்டது போல புதுச்சேரி வரலாறு குறித்தும், இலக்கியங்கள் குறித்தும் ஒரு முழுமையான நூல் இதுவரை வெளிவரவில்லை என்பது உண்மை. அவ்வாறான நூல்கள் எழுதுவதற்கான முன் முயற்சியாக இப்பயிலரங்கம் அமைந்தது என்று கூறலாம். இதுபோல் பல பயலரங்கங்களைத் தொடர்ந்து நடத்தவேண்டும். இப்பயிரங்கில் விவாதிக்கப்பட்டவை இணையத்தில் பதிவேற்றம் செய்தால் இது புதுச்சேரி வரலாறாற்றர்வளர்களுக்குப் பயனளிக்கும் விதத்தில் இருக்கும்.

இப்பயிலரங்கம் ஏழுநாட்களுக்கு மட்டுமே திட்டமிடப் பட்டிருந்ததால் பெரும்பகுதி புதுச்சேரியை மட்டுமே மையமிட்டதாக அமைந்திருந்தது. அடுத்தடுத்து இதுபோன்ற பயிலரங்கங்கள் நடைபெறுமாயின் புதுவை யூனியன் பிரதேசத்தைச் சேர்ந்த காரைக்கால், மாகி, ஏனம் ஆகிய பகுதிகளின் வரலாறு மற்றும் இலக்கியங்களும் இடம்பெறும் என்று இதன் ஒருங்கிணைப்பாளர் பேராசிரியர் முனைவர் நா. இளங்கோ குறிப்பிட்டிருந்தார். அவர் குறிப்பிட்டது போல், இதுபோன்ற பயிலரங்குகளை இனி தொடர்ந்து எதிர்பார்க்கலாம் என்று நம்பிக்கை அளிக்கிறது.

- முனைவர் ப.விவேகானந்ததாசன்,

தமிழ்ப் பேராசிரியர்

இராஜிவ் காந்தி கலை அறிவியல் கல்லூரி

புதுச்சேரி

Pin It

இந்தியாவின், தமிழகத்தின் சமூக அரசியல் பின்னணியில் தமிழகத்தின் தொன்மையும் வரலாறும் தொடர்ந்து புறக்கணிக்கப்பட்டு வந்த சூழலில், கீழடி தந்த புத்தொளியால் வெகுமக்கள் மத்தியில் தொல்லியல் மற்றும் அகழ்வாய்வுகள் குறித்த புரிதலும் ஆர்வமும் தலையெடுக்கத் தொடங்கியுள்ளன.

இத்தகைய காலச்சூழலை முழுமையாகப் புரிந்து கொண்டு திருப்பத்தூர், தூய நெஞ்சக் கல்லூரியின் தமிழ்த் துறை, தொல்லியல் குறித்த இணைய வழிப் பயிலரங்கிணை ஒருங்கிணைத்திருப்பது பாராட்டுக்கு உரியது. ஏழு நாட்களும் பயிற்றுநர்களாக வருகை புரிந்து சிறப்புரை வழங்கிய அறிஞர் பெருமக்கள் அனைவரும் தமது நீண்ட கால உழைப்பின் ஆழ அகலங்களை நிறைவாக வெளிப்படுத்தினார்கள்.

முதல் நாள் உரையை வழங்கிய ஆர்.பாலகிருஷ்ணன் ஐயா தொல்லியல், வரலாறு குறித்த தெளிவான புரிதலை வழங்கினார்கள். அவரது உரையின் சில முக்கியமான பகுதிகளை இங்கே சுட்டிக் காட்ட விரும்புகிறேன்.

இலக்கியம் என்னும் முதுமக்கள் தாழி

• இலக்கியமும் அகழ்வாராய்ச்சியும் என்ற தலைப்புக்கான உருவகமே இத்தலைப்பு

• சரியான வரலாற்றை உரிய தரவுகளோடு நாம் கட்டமைக்கவில்லை என்றால் அச்சமூகத்தில் கட்டுக்கதைகளே வரலாறுகளாகக் கட்டமைக்கப்படும் ஆபத்து ஏற்பட்டு விடும்..

• இலக்கியம் வரலாற்றுக்குத் தரவாகுமா என்றால் 1. தொன்மையான சமூகத்தின் இலக்கியங்கள் வரலாற்றுத் தரவாகும் 2. உண்மையான சமூகத்தின் இலக்கியங்கள் வரலாற்றுத் தரவாகும்.

• வரலாற்றைக் கட்டமைக்க இலக்கியங்கள் வழிகாட்டும், ஒளிகூட்டும்.

• வரலாற்றை எழுதுவதில் வரலாற்று ஆசிரியனின் சார்பும், அரசியலும் தவிர்க்க இயலாத வகையில் இடம்பெற்று இருக்கும்.

• சங்க இலக்கியங்கள் வரலாற்றுத் தரவுகளாக மதிக்கப்படாமைக்குப் பல சமூக அரசியல் காரணங்கள் உள்ளன.

• மனித குல வரலாற்றில் வரலாற்றுக்கு முற்பட்ட காலம் 99 சதவீதம் என்றால் மீதமுள்ள 1 சதவீதமே வரலாற்றுக் காலம்.

• எழுத்துக்கு முந்தைய வரலாற்றைக் கட்டமைக்கத் துணைபுரிவன தொல்லியல் அகழ்வாய்வுகள்

• இலக்கியங்கள் தாம் எழுதப்பட்ட காலத்தின் தரவுகளை மட்டும் சொல்லாமல் அதற்கு முந்தைய நெடுங்கால மனித சமூகத்தின் வரலாற்றையும் பொதிந்து வைத்துள்ளன.

• வரலாறு சமூகத்திற்கானது, மக்களுக்கானது என்ற புரிதல் வேண்டும்.

• சங்க இலக்கியங்கள் வரலாற்றுக்கு வழிகாட்டும் ஒளிகூட்டும் தரவுகளாகும் என்பதே இந்தப் பேச்சின் நோக்கம்.

தமது உரையின் நிறைவாக “கலம்செய் கோவே” என்ற சங்க இலக்கியப் பாடலுக்கு அவர் தந்த விளக்கமும், கீழடி, லோத்தல் அகழ்வாய்வுகளின் போது கிடைத்த பகடைக்காய்கள் குறித்த விளக்கமும் சிறப்பானவை.

இரண்டாம் நாள் 13-05-2020 உரையினைத் தொல்லியல் அறிஞர் ர.பூங்குன்றன் ஐயா வழங்குவதாகப் பயிலரங்க நிகழ்ச்சி அமைக்கப்பட்டிருந்தாலும், தவிர்க்க இயலாத தொழில் நுட்பச் சிக்கல்களால் அவர் தமது உரையை வழங்க இயலவில்லை. இக்கட்டான அந்தச் சூழலில் ஒருங்கிணைப்பாளர்களில் ஒருவரான ஆ.பிரபு அவர்கள் தமது தொல்லியல் களஆய்வுப் பயண அனுபவங்களைப் பகிர்ந்து கொண்டார்.

மூன்றாம் நாள் 14-05-2020 உரையை வழங்கிய சுகவன முருகன் அவர்கள் இந்திய, தமிழகத் தொல்லியல் துறையின் முன்னோடிகளையும் அவர்களின் அரும்பெரும் பணிகளையும் நினைவுகூர்ந்து தமது உரையைத் தொடங்கினார்.

• 'வட தமிழகத்து தொல்லியல் சான்றுகள்' என்னும் தலைப்பில் தொல்லியல் ஆய்வாளர் திரு. சுகவன முருகன் அய்யா அவர்களின் ஆய்வுரை மிகச் சிறப்பாக அமைந்தது.

• தொல்லியலில் மிகச் சிறப்பான பகுதிகளான பாறை ஓவியங்கள், ஈமச் சின்னங்கள், பிராமி எழுத்துகள், நாணயங்கள் என அனைத்துச் சான்றுகளையும் சுட்டிக்காட்டி தெளிவான படங்களுடன் நமது உரையை வழங்கினார்.

• பாறை ஓவியங்கள், நடுகற்கள், கற்திட்டைகள், ஈமப் பேழை, நாணயங்கள், பிராமி எழுத்துக்கள், சுடுமண் பானைகள் மற்றும் பொம்மைகள், வட தமிழக வரலாற்றுத் தடயங்கள் குறித்த சுகவன முருகன் ஐயாவின் உரையில் ஆர்ப்பாட்ட மில்லாத ஆழம் தெரிந்தது. பங்கேற்பாளர்களின் வினாக்களுக்கும் மிகத் தெளிவாக விளக்கமளித்து மனநிறைவு கொள்ளும் வகையில் உரையாற்றிய அன்னாருக்கு நன்றிகள் பல.

நான்காம் நாள் 15-05-2020 உரையை வழங்கியவர் மத்திய தொல்லியல் துறையின் ஆய்வறிஞர் அருண்ராஜ் அவர்கள். தமது பரந்துபட்ட களப்பணி அனுபவங்களின் வழியாகத் தமது உரையை வழங்கினார்.

• புகைப்படங்களுடன் கூடிய அவரின் தொல்லியல் களஆய்வு அனுபவ உரை மிகுந்த சுவை பயப்பனவாகவும் ஆர்வமுட்டக் கூடியதாகவும் அமைந்தது.

• தொல்லியல் அறிஞர் அருண்ராஜ் அவர்களின் முனைவர் பட்ட ஆய்வான அரிக்கமேடு குறித்து தமது உரையில் அவர் சிறப்பாக எதனையும் பதிவு செய்யாதது வருத்தமாய் இருந்தது.

• வரலாற்றுக் கதையாடல்களின் வழி தொல்லியல் வரைபடம் நீள்கிறது என்ற கருத்தியலோடு தொல்லியலின் மாற்று உரையாடலின் அவசியத்தை அவர் வலியுறுத்தினார்.

• புனைகதைகளோடு வரலாற்றுச் சான்றுகளை ஒப்பிட்டுப் பார்த்து கள ஆய்வு மேற்கொள்வது சரி. ஆனால் பக்தி இலக்கியங்களோடு குறிப்பாக இராமாயணம், மகாபாரதம் போன்ற இதிகாசக் கதைகளின் உண்மைத் தன்மையைத் தொல்லியல் சான்றுகளோடு நிறுவ முடியும் என்ற அவரின் தொனி கவலை அளித்தது.

• கீழடி போல் ஆயிரக்கணக்கான தொல்லியல் ஆய்வுகள் வடஇந்தியாவிலும் உண்டு என்று போகிற போக்கில் சொல்லிச்சென்ற அருண்ராஜ் அவர்கள் அதற்கான சான்றுகளையும் சுட்டியிருந்தால் சிறப்பாக இருந்திருக்கும்.

• மத்திய அரசு தொல்லியல் துறையின் அதிகார அரசியல் பார்வை அவரின் பேச்சிலும் வெளிப்பட்டது.

ஐந்தாம் நாள் 16-05-2020 உரையை வழங்கியவர் தொல்லியல் அறிஞர் காந்திராஜன் 'கதை சொல்லும் பாறைகள் - பயணமும் ஆய்வும்' என்ற தலைப்பிலான சிறப்புரை மிகச் சிறப்பு.

• நூற்றுக்கணக்கான பாறை ஓவியங்களைக் காட்சிப்படுத்தியதோடு அந்த ஓவியத்தின் நுணுக்கத்தையும் அந்த ஓவியங்களை வரைந்த பழங்கால மனிதக் குழுவின் நுட்ப ஆற்றலையும் வெளிப்படுத்தி அவர் வழங்கிய கருத்துரை உண்மையில் பயிற்சியாளர்களுக்கு ஒரு புதுமையான அனுபவமாக இருந்தது.

• ஒரு ஓவியருக்கே உரிய தொழில்நுட்ப அறிவோடு கூடிய அவரின் விளக்கங்கள் அருமை. அவரின் நுட்பமான அவதானிப்பு வியப்பின் உச்சம். பழங்கால ஓவியங்களை இவ்வளவு சிறப்பாக இதுவரை யாரும் விளக்கியதாகத் தெரியவில்லை.

• பாறை ஓவியங்களின் காலத்தைக் கணக்கிடுவதற்கான முறைகளை தமது உரையின் நிறைவுப் பகுதியில் அவர் சுட்டிக் காட்டியது பயனுள்ளதாக அமைந்தது. பெரும்பாலான பங்கேற்பாளர்கள் காலக் கணக்கீடு தொடர்பாக அவர் விளக்கமளிக்க வேண்டும் என்று எதிர்பார்த்துக் காத்திருந்தனர்.

• பெரும்பாலும் வேட்டைச் சமூகத்தின் பதிவுகளாகவே இவ்வகை ஓவியங்கள் அமைந்துள்ளன. ஓவியங்களில் இடம்பெற்றுள்ள விலங்குகள், பறவைகள் குறித்த விளக்கங்கள் பயனளிப்பன.

• இனி வரும் காலங்களில் பாறை ஓவியங்கள், குகை ஓவியங்களைத் தேடிப் பயணிக்கவும் பார்க்கும் ஓவியங்களை ஆய்வுக் கண்ணோட்டத்துடன் பார்ப்பதற்கும் காந்திராஜன் ஐயாவின் உரை வழிகாட்டியது என்பது உண்மை.

ஆறாம் நாள் 17-05-2020 உரையை வழங்கியவர் தொல்லியல் முனைவர் க. மோகன்காந்தி. வரலாற்றைப் பாதுகாக்கும் திருப்பத்தூர் மாவட்ட மலைவாழ் மக்கள் என்ற தலைப்பில் அவர் தமது உரையை வழங்கினார்.

• திருப்பத்தூர் மாவட்ட ஏலகிரி மலை, ஜவ்வாது மலை இரண்டு மலைகளையும் அம்மலைகளின் மலைவாழ் மக்களையும் அவர்களது தொன்மைப் பண்பாட்டினையும் அங்கு கிடைக்கும் தொல்லியல் எச்சங்களையும் அவர் முறைப்பட வகுத்தும் தொகுத்தும் வழங்கினார்.

• மலைபடு கடாம் விவரிக்கும் நவிர மலை இன்றைக்குப் பருவத மலை என்றழைக்கப்படும் மலை அன்று என்பதனையும், ஜவ்வாது மலைதான் நவிர மலை என்பதனையும் பல்வேறு சான்றுகளால் குறிப்பாகக் கல்வெட்டுச் சான்றுடன் மோகன் காந்தி நிரூபித்துக் காட்டினார்.

• ஏறுதழுவல் நடுகல்லைக் கண்டுபிடித்தமை குறித்த விளக்கம் நன்று

• திருப்பத்தூர் பெயர் காரணத்தை சிறப்பாக விளக்கியுரைத்தார்.

• புலி குத்திப் பட்டான் நடுகல் குறித்தும் புலி குத்தி சீயன் (தாத்தா) குறித்தும் தெளிவாக விளக்கினார்.

• மலைபடுகடாம் – ஜவ்வாது மலையை விவரிக்கிறது என்பதற்கு மேலும் ஒரு சான்றாக மலைபடுகடாம் நூலின் பெயர் கல்வெட்டின் இடம் பெற்றுமை குறித்த சான்று அரிதானது.

• பதியெழு அறியாப் பழங்குடி மன்னன் நன்னன் சேய் நன்னன் பற்றிய விளக்கம் புதுமையாக இருந்தது

• மலைபடு கடாம் – நவிர மலை –நன்னன் மூன்றையும் இலக்கிய கல்வெட்டுச் சான்றுகளால் பொருத்திக் காட்டியமை அருமை.

• ஜவ்வாது மலையில் உள்ள பெருங்கற்கால கல் வீடுகள் கல்திட்டைகள் பற்றிய செய்தி புதுமையானது.

• குவியல் குவியலாக கற்கோடாரிகளைக் கண்டது அரிய காட்சி.

ஏழாம் நாள் 17-05-2020 உரையை வழங்கியவர்கள் மூவர்.

முதல் உரை: தொல்லியல் அறிஞர் முனைவர் ர.பூங்குன்றன் ஐயா – தலைப்பு: தொண்டை மண்டல மாட்டுப் பொருளாதாரம்.

இரண்டாம் உரை: முனைவர் ஆ.பிரபு – தலைப்பு திருப்பத்தூர் வட்டாரத் தொல்லியில் தடயங்கள்.

மூன்றாம் உரை: முனைவர் கி.பார்த்திபராஜா – தலைப்பு: தொல்லியல் அரசியல்.

முதல்உரை – கி.பூங்குன்றன் ஜயா:

பூங்குன்றன் ஜயா முல்லைச் சமூகத்தின் ஊடாகப் பொருளாதாரம் எவ்வாறு வளர்ச்சி பெற்று வளர்ந்தது என்பதனையும், முல்லை நில வாழ்க்கையின் சமூக அரசியல், பொருளியல் பின்னணிகளைத் தொல்லியல் சான்றுகளோடு குறிப்பாக நடுவல் முதலானவற்றோடு தொடர்புபடுத்தி உரையாற்றினார்.

அவர் உரையின் முக்கியமான தரவுகள் பின்வருமாறு:

• தமிழ்ச் சமூகத்தில் முல்லைநில வாழ்க்கையில் முதன்முதலாக வருவாய் ஈட்டல் தொடர்பான வணிக வாழ்க்கை தொடங்கியது. மாடு என்ற சொல் ஆநிரைகளைக் குறித்தது.

• மேற்குத் தொண்டை மண்டலத்தில் வரலாற்றுக் காலம் தொடங்கிப் பல்லவர் காலம் வரை மாட்டுப் பொருளாதாரமே நிலை பெற்றிருந்தது.

• ஆநிரைச் சமூகத்திற்கும் சாம்பல் மேடுகளுக்குமான உறவு கவனிக்கத்தக்கது. சாம்பல் மேடுகளை மிதித்துக் கடப்பதிலிருந்தே தீமிதிச் சடங்குகள் தோற்றம் பெற்றன.

• கிடை என்ற சொல்லில் இருந்தே இடை, இடையர் முதலான வழக்குகள் தோற்றம் பெற்றன.

• முல்லை நிலத்தில்தான் வேளிர்கள் போர் என்பதனைத் தொடங்கினார்கள். வேள்- ஒளியர் ஒப்பு நோக்கத்தக்கன.

• பல்லவர்கள் வேளிர் குலத்தினரே – கால்நடை வளர்ப்புச் சமூகத்திலிருந்தே வேளிர்கள் பல்லவர்கள் எழுச்சி பெற்றனர்.

• முல்லை நில அரண் புறவு எனப்பட்டது. புறவு என்பது கால்நடை மேய்ச்சல் நிலம்.

• வெட்சி, கரந்தைப் போர்கள் மாட்டுப் பொருளாதாரத்தோடு தொடர்புடையது. மழவர் – மறவர் இருவேறு குலங்கள். மழவர்- நிரை கவர்வோர், மறவர் நிரை மீட்போர்.

தொல்லியல் குறித்த முனைவர் கி. பார்த்திபராஜாவின் உரையில் தொல்லியல் குறித்த விழிப்புணர்வின் தேவை குறித்து ஆக்கப்பூர்வமான உரையினை வழங்கினார். அவர் உரையின் சில முக்கியமான பதிவுகள் பின்வருமாறு...

• ஓர் இலக்கிய வரலாற்று மாணவனாகத் தொல்லியலை நாம் எவ்வாறு பார்த்தல் வேண்டும் என்பது மிக முக்கியமான வினா.

• பண்டைய காலப் பெருமை பேசுவதற்காக மட்டுமே தொல்லியல் பயன்பட வேண்டுமா? பண்டைய பெருமைகளிலிருந்து நாம் உத்வேகம் பெறுவது தேவைதான், தவறில்லை. ஆனால் அதிலேயே நாம் தேங்கிவிடக் கூடாது.

• வரலாறு கடந்த காலத்தை மட்டும் பேசவில்லை. அது சமகாலத்தையும் பேசுகிறது. சமகால அரசியலை சமகால வரலாறுகளே பதிவு செய்கின்றன.

• காலந்தோறும் தமிழ்ச் சமூகம் வரலாற்று உணர்வற்று இருந்து வந்துள்ளமையை நாம் கவலையோடு பார்க்க வேண்டி உள்ளது.

• தமிழர்களுக்குள்ள வரலாற்று குருட்டுணர்வு கவலையளிக்கிறது.

• தொல்லியல் சான்றுகளின் வழியாக சமூக நிறுவனங்களின் வரலாறு மற்றும் வளர்ச்சி மாற்றம் இவற்றைப் பார்க்க வேண்டி உள்ளது.

• வடவர்களின் அதிகார அரசியலை எதிர்கொள்ள நமக்குத் தொடர்முயற்சி தேவை. அறிவியல் பார்வையோடு கூடிய களப்பணிகள் மூலம் உண்மையைத் தொடர்ந்து உரத்துப் பேசவேண்டும்.

நிறைவாக உரை வழங்கிய முனைவர் ஆ.பிரபு அவர்கள் இரண்டாம் உரையின் போது அவர் விரித்துரைத்த களஆய்வுப் பயண அனுபவங்களுக்கான சான்றுகளைக் காட்சிப்படுத்தி தம் உரையை நிறைவு செய்தார்.

• குறிப்பாக அவர் களஆய்வு செய்த குண்டு ரெட்டி ஊரில் கிடைத்த (ஏலகிரியின் பின்புறமுள்ள மலைச்சரிவு) சுடுமணி குழாய்கள், கருப்பு சிவப்பு பானையோடுகள், புதிய கற்காலக் கற்கோடாரிகள், வட்டச் சில்லுகள், சுடுமண் பொம்மையின் பகுதிகள், இரும்பாலான அம்பின் ஒரு துண்டு, எழுத்துக் கீறல்களோடு கூடிய சிவப்பு கருப்பு பானை ஓடுகள், சுடுமணி சிவப்பு மணி, மலைக்குகை முகப்பில் காணப்படும் பிராமி எழுத்து போன்ற கீறல்கள், தந்த ஆபரணத்தின் ஒரு பகுதி, எலும்புத் துண்டுகள், சுடுமண் கெண்டி குழிழி போன்ற பகுதிகள், இரும்புத் தாதுத் துண்டுகள் போன்ற தொல்லியல் பொருட்களைக் காட்சிப் படுத்தினார்.

• மேலும் செங்குன்றம் பகுதியில் களஆய்வு செய்தபோது கண்டெடுத்த, பதிவு செய்த கற்பதுக்கை, கல்திட்டை, சதிக்கல், மூதேவி கழுமரம் ஏறிய அரசன் புடைப்புச் சிற்பம் முதலான அரிய சான்றுகளைக் காட்சிப்படுத்தினார்.

- முனைவர் நா.இளங்கோ,
தமிழ்த் துறைத் தலைவர்,
தாகூர் அரசு கலை அறிவியல் கல்லூரி,
புதுச்சேரி-8

Pin It

இலக்கிய விழா என்றாலே இறுகிய முகத்தோடு தான் இருக்க வேண்டுமா என்ன... இளகிய இதயத்தோடும் இருக்கலாம் தானே.

யார் வேணாலும் யார்கிட்ட வேணாலும் பேசி சிரிக்கலாம் தானே.. அன்பை பரிமாறிக் கொள்ளலாம் தானே...

நான் பெரிய கொம்பு.. நானா போய் பேச மாட்டேன்... அவுங்களா வந்து பேசினா... அப்போது தான் பார்த்த மாதிரி டக்கென்று மூஞ்சியை மாத்திக் கொண்டு இன்ஸ்டன் சிரிப்பு சிரித்து மழுப்பவது....எப்போதும் கற்பனை உலகத்தில் இருந்து கொண்டு ஒரு கிலோ வெங்காயம் என்ன விலைன்னு கூட தெரியாம.........எனக்கு இமேஜ் இருக்கு... எனக்கு டேமேஜ் இருக்குன்னு- இப்படி ஒரு வெங்காயமும் இல்லை. எல்லாரும் எல்லாருக்கும் பொதுவாக.. எல்லாரும் எல்லாரையும் மதிப்பது. இலக்கியம் ஒரு வகையில் கூட்டு முயற்சி. அன்பின் மீட்டெடுத்தல். கூடி கொண்டாட்டம் செய்வது. அவரவர் திறமைகளை பொதுவில் வைத்து நல்லது கெட்டது உணர்ந்து கொள்வது... இது தான் இங்கே நிகழ்ந்தது.

மிதமான பொன்னிற நிலவில் மெல்ல மெல்ல கால் எடுத்து வைப்பது போல அத்தனை இலகுவாக நிகழ்ச்சியை தொகுத்து வழங்கினார் "தோழர் ரத்தினசாமி" அவர்கள். எந்த வித தோரணையும் இல்லை. எந்த வித தோற்ற மயக்கமும் இல்லை. என்ன எதுவோ அது தான் அது என்பது தான்..அவரின் உடல்மொழி. மிக தெளிவாக நேரத்தை முடிந்தளவு கட்டுக்குள் வைத்துக் கொண்டிருந்தார்.

முதல் நூல்: வெளி தேடும் சொற்கள்.

"அம்பிகா குமரன்" அவர்களின் முதல் கவிதை நூல். மரபிலும் புதுமை சொல்லும் இவரின் நூலை... இவரின் நண்பர்..."சத்தியசீலன்" அவர்கள் அறிமுகப் படுத்தினார். அலட்டல் இல்லாத அழகிய உரை. ஆரம்ப கட்ட பேச்சாளராக இருப்பதால் கொஞ்சம் நினைவில் இருந்தும் கொஞ்சம் எழுதியதில் இருந்தும்.....ஆனால்.. நம்பிக்கை சார்ந்து இருந்தது உரை. அம்பிகா குமரன் மரபும் எழுதுவார் என்று இவர் பேச்சில் இருந்து தான் தெரிந்தது. மரபு மீது மீரா காதல் இருந்தாலும்... கொஞ்சம் பழைய பயம் என்னுள் இருக்கிறது. அதைத் தகர்க்க வேண்டும் என்று இவரைக் கண்ட பிறகு உத்வேகம் வந்திருக்கிறது.

தனக்கு நிறைய சொல்லிக் கொடுத்து... அதன் அடுத்த கட்ட நகர்வாக தன் நூலை அறிமுகம் செய்யும் வாய்ப்பையும் தனக்கு தந்ததாக தன் குருவைப் பற்றி சத்தியசீலன் சொன்னது நெகிழ்வு. கூட இருப்பவர்களுக்கு நாம் தாம் ஏணிப்படியாக இருக்க முடியும். இருக்க வேண்டும். சொற்களோடு மட்டும் நிற்காமல் வெளி தேடவும் செய்த அம்பிகா குமரன் அவர்கள்.. ஏற்புரையில்... மிக லாவகமாக மேடையை தனதாக்கிக் கொள்ளும் உடல்மொழியை கொண்டிருந்தார். மேடைப் பேச்சு சற்று பிசகினாலும் கோணல் மாணல் கதையாகி விடும் என அறிந்ததால் பிசிறடிக்காத சொற்களால் வாக்கியம் செய்து மேடையில் நடைபயில வைத்த இவர் ஏற்புரையை மெச்சத்தான் வேண்டும்.. வாழ்த்துக்கள்.

அடுத்த நூல் நம்ம "கோ லீலா" அவர்களின் : மறைநீர்.

இந்த நூலைப் பற்றி நான் ஏற்கனவே கட்டுரை எழுதி விட்டதால்.. இவரை விட இந்த நூலில் என்னென்ன இருக்கிறது என்று எனக்கு தெரியும். மேடையிலே இந்த நூலை நான் எழுதி இருக்க வேண்டும்.... நீங்க எழுதியது கொஞ்சம் பொறாமை தான் என்றே சொல்லி விட்டேன். அத்தனை அவசியமாக இருக்கும் இந்த நூலில் இருக்கும் செய்திகள் மனதளவில் மிக பெரிய பயத்தை என்னுள் விதைத்தது என்றால் அது நிஜம். நிஜமும் அது சார்ந்த நித்தியமும்....சதா தொந்தரவு செய்தபடியே இருந்த..... சொட்டுதல்களின் நிமித்தம்.. மறைநூலை மிக கவனமாக மனதுக்குள் ஏற்றிக் கொள்ள வேண்டும். காலத்துக்குமான ஒரு நூல். இது. காலத்தேவைக்கான நூல்.

நூலைப் பற்றி பேசிய "பெண்சிங்கம் சாய்ரா பானு" அவர்கள்.. ஏற்கனவே எனக்கு பழக்கம் என்பதால் மிக எளிதாக முதல் வணக்கத்தை முதல் கை குலுக்கலை அவரிடம் பெற முடிந்தது. அதே தன்னம்பிக்கை.... அதே சொல் விளையாட்டு...... அதே துடுக்குத்தனம்.... நான்கு பக்களில் மறை நீரை பாய்ச்சி தன் ஸ்டைலில் அதகளம் செய்தது ஆஸம்.

ஒரு கட்டத்தில் துருவன் பாலா சார் காலத் தேவையான ஒரு அரசியல் கேள்வியை முன் வைக்க அரங்கம் கிட்டத்தட்ட ஒரு விவாதத்துக்குள் போனது. ஆனால்.. தொகுப்பாளர் நிலைமையை புரிந்து கொண்டு அதோடு அந்த நூலின் நிகழ்வை முடித்துக் கொண்டு... ஆனாலும் லீலா அவர்களின் பதில்கள்.. மிக நேரடியாக உண்மைக்கு அருகாமையில் இருந்ததை நாம் ஒப்புக் கொள்ள வேண்டும். அதே நேரம் துருவன் பாலா சார் கேட்ட கேள்வியின் முக்கோணம்.... சாட்டையடியின் வசம் என்பதையும் நாம் புரிந்துக் கொள்ள வேண்டும்.

அடுத்து துபாயில் இருந்து வந்திருந்த தோழி "ஸ்ரீ" அவர்களின் தமிழ் சார்ந்த அனுபவங்களை எடுத்து வைத்தார். வறுமை எப்படி தன் வாழ்நாளில் பெருமையாக மாறியது என்றும் அதற்கு தமிழ் எவ்விதம் உதவியது என்றும்..... இப்போது தமிழ் சார்ந்து தன் இயக்கங்கள் குறித்தும் முகம் நிறைய பேசினார்.

சில கருத்துக்களில் முரண்பாடு இருந்தாலும்.. ஒரு தமிழ் குழந்தையின் குதூகலத்தை அவர் கண்களில் காண முடிந்தது. தமிழ் பேய் பிடித்தால் தான் அல்லது தமிழ் சாமி பிடித்தால் தான்.. இப்படி தனியாக எங்கு வேண்டுமானாலும் வந்து தமிழ் பற்றி பேச இயலும். கேட்க இயலும். அந்த வகையில் அவரின் ஆர்வத்தையும் சேவையையும் நாம் பாராட்ட வேண்டும்.

கிட்டத்தட்ட விழா முடியும் நேரம்... அடுத்து இருப்பது எனது நூல் "நிழல் தேசத்துக்காரனின் சித்திர பறவைகள்" மட்டும் தான். பேசப் போவதோ வயதில்......அனுபவத்தில் ரெம்ப குறைவாக இருக்கும் "முத்துமீனாட்சி" அவர்கள். எப்படி பேசப் போகிறார்களோ.. சரி பேசி முடித்தால் கிளம்பலாம் என்ற மனோபாவனை தான் எனக்கு.

இந்த நூல் எனது முதல் நாள் இதற்கு பின் மூன்று நூல்கள் வந்து அதற்கான அங்கீகாரத்தை ஓரளவு பெற்று விட்ட போதிலும்.. இந்த முதல் நூல் அது வெளி வந்த கால கட்டத்தில் (4 வருடங்களுக்கு முன் ) அதற்கான அங்கீகாரத்தை பெறவில்லை. படித்த பெரிய மேதாவி அறிவாளிகள் இந்த நூல் புரியவில்லை என்று சொல்லி கை விட்டு விட்டார்கள். அவர்களுக்கு கை விட ஒரு காரணம் வேண்டும் என்று எப்போதோ உணர்ந்தது தான்.... இப்போது புரிந்தது.

மீனாட்சி பேச ஆரம்பித்த பிறகு நூல் பற்றிய அறிமுக உரை ஜெட் வேகத்தில் டேக் ஆப் ஆனது. கிரிக்கெட்டில் கடைசி நேர ஆட்டத்தை மாற்றி விடுவாரே யூசுப் பதான். அப்படி ஒரு அட்டகாசம். சின்னவங்க பெரியவங்க என்றெல்லாம் ஒன்றுமில்லை. அவரின் ஆழமான நுட்பமான உள்வாங்கும் வெளிப்படுத்தும் அறிவு எப்படி என்று தான் பார்க்க வேண்டும் என்று மீனாட்சியிடம் இருந்து ஒரு பாடம் கண்டேன். எடுத்துக் கொண்ட எல்லா கவிதைகளிலும் நான் எழுதும் போது என்ன ஆழத்தில் இருந்ததோ அதில் துளியும் குறைய விடாமல்.... சும்மா போட்டு வாங்குவதென்பது நிகழ்ந்தது. ஒரு நிகழ்த்துக் கலையை மீனாட்சி நிகழ்த்தியதை ஒரு மேஜிக் போல தான் பார்த்துக் கொண்டிருந்தேன். அசராமல் அடித்துக் கொண்டே போவது அதுவும் சிரித்த முகத்தோடு மெய் சிலிர்ப்பு..

இந்த நூலுக்கு முதன் முறையாக மிகச்சிறந்த அங்கீகாரம் இது. நல்ல சரக்கு காலம் கடந்து விலை போகும். என்னைத் தாண்டி என்னைத் தெரியாத ஒருவருக்கு மிக துல்லியமாக என் கவிதை நூல் சென்று சேர்ந்திருப்பது மனநிறைவு. மீனாட்சி தன் அப்பா அம்மாவுடன் விழாவுக்கு வந்திருந்தது அழகியல்.

பொதுவாகவே ஏற்புரையில் விருப்பம் இல்லாதவன் நான். எழுதுபவனைக் கூட்டி போய் பேசு பேசு என்றால் என்ன பேசுவது. மேடையில் பேசி ஏதாவது வம்பை விலைக்கு வாங்கி விடுவேனோ என்ற பயம் இருப்பதால் எழுதி வைத்துக் கொண்டு ட்ரேக் மாறாமல் பேசி விட்டு வந்து விடுவேன். ஆனால்.. மீனாட்சி கொடுத்த தைரியம்.. எழுதி வைத்திருந்ததை தாண்டி மிக இயல்பாக நண்பர்களிடம் பேசுவது போல பேச முடிந்தது. அதை கூட்டமும் கவனித்து அங்கீகரித்தது.....கனம் குறைந்த மனநிறைவு. என் ஆசான் அகன் ஐயாவுக்கு நன்றி கூற ஒரு வாய்ப்பு கிடைத்ததை பெருமையாக கருதுகிறேன்.

ஒரு கை தேர்ந்த புகைப்படக்காரர் என்பது "விஷாகன்" அவர்கள் உடல் மொழியிலேயே நான் உணர்ந்து கொண்டேன்.

இதற்கெல்லாம் காரணமாக இருந்த "மருத்துவர் கவிஞர் செல்லம் ரகு" சார்க்கு எத்தனை நன்றிகள் சொன்னாலும் தகும். இப்படி ஒரு கூட்டத்தை நடத்துவதெல்லாம் சிக்கல் நிறைந்த ஒன்று. எல்லாவற்றையும் மிக அழகாக ஒருங்கிணைத்து.....எழுத்தாளனுக்கு செய்ய வேண்டிய மரியாதையை செய்து... விருது கொடுத்து...... அனுப்பி வைத்த... அந்த மேன்மையான குணம்.. மெச்சத்தக்கது. நன்றி சார்.

துருவன் பாலா சாருக்கும் குமரன் சாருக்கும் தனிப் பட்ட முறையில் எனது நன்றிகள். அன்புகள். எப்போதும் என்னோடு இருக்கும் என் நண்பன் கமல்- க்கு அன்பு.

தம்பி காதலாரா....... டியர் சேகுவேரா சுகன் உள்பட கவிதை வாசித்த நண்பர்கள் அனைவர்க்கும் வாழ்த்துக்களும் பாராட்டுகளும்.

தளிர் இலக்கிய களம் மற்றும் தமிழ்நாடு முற்போக்கு கலை இலக்கிய மேடைக்கும் அது சார்ந்த அனைவர்க்கும் மனமார்ந்த நன்றிகள். வந்திருந்த தோழர்கள் அனைவர்க்கும் மனம் கனிந்த நன்றிகள். அன்புகள்.

மீண்டும் மீண்டும் புரிந்து கொள்வது இதுதான். இலக்கிய கொம்பு என்று ஒன்றும் இல்லை. தொடர்ந்து படித்துக் கொண்டும் எழுதிக் கொண்டும் இருப்பது தான் நாமாக இருப்பதற்கான இயல்பான வாழ்வியல் முறை.

அந்த நிழல் தேசத்துக்காரன் என்பவன் ரகசியம் என்று மீனாட்சி சொன்னது எத்தனை நிஜம் என்று ஒரு ரகசியனாகவே உணர்ந்து பார்க்கிறேன். சித்திர பறவைகள் சிறகடிக்க ஆரம்பிக்கின்றன.

- கவிஜி

Pin It

தலித் மக்களின் விடுதலைப் போராட்டத்தைத் தலைமையேற்று நடத்தியவரும், தேசத் தலைவர்களில் ஒருவருமான டாக்டர் B.R.அம்பேத்கர் அவர்களை இழிவு செய்து எழுதிய, எழுத்தாளரும் நடிகருமான வசுமித்ர அவர்களை இதன் கீழ் கையொப்பமிட்டுள்ள நாங்கள் வன்மையாகக் கண்டிக்கிறோம்.

சமூகப் பொது ஊடகமான முகநூலில் "புத்தரது ஆண்குறியில் அறிவைக் கண்டுபிடிக்கும் அம்பேத்கரது அறிவு" எனப் பதிவு செய்து, ஒப்பற்ற அறிஞரும் சட்டமேதையும் ஆய்வாளருமான டாக்டர் B.R. அம்பேத்கர் அவர்களை இழிவு செய்த வசுமித்ர அவர்கள், தனது பதிவுக்கு வருத்தம் தெரிவித்துப் பதிவை மீளப் பெற்றுக் கொள்ள வேண்டும் என்று இந்த அறிக்கையின் மூலம் வலியுறுத்திக் கேட்டுக் கொள்கிறோம்.

நன்றி.
18/05/2020
1.அழகிய பெரியவன் (எழுத்தாளர்)
2.குட்டி ரேவதி (எழுத்தாளர்)
3.சுகிர்தராணி (எழுத்தாளர்)
4.வ. கீதா (எழுத்தாளர்)
5.அ.மங்கை (எழுத்தாளர்/அரங்கக் கலைஞர்)
6.வெள்ளைமொழி ரேவதி (அரங்கக் கலைஞர்/எழுத்தாளர்)
7.மாலதி மைத்ரி (எழுத்தாளர்)
8.லிவிங் ஸ்மைல் வித்யா (அரங்கக் கலைஞர்/எழுத்தாளர்)
9.கோபி நயினார் (திரைப்பட இயக்குனர்)
10.கரன் கார்கி (எழுத்தாளர்)
11.லீனா மணிமேகலை (எழுத்தாளர் / திரைப்பட இயக்குனர்)
12.கவின் மலர் (எழுத்தாளர்/ ஊடகவியலாளர்)
13. கே.வி.ஷைலஜா (எழுத்தாளர்)
14. பவா செல்லத்துரை (எழுத்தாளர்)
15.எவிடென்ஸ் கதிர் (மனித உரிமைகள் செயற்பாட்டாளர்)
16.ஜெயராணி (எழுத்தாளர்)
17.லெனின் பாரதி (திரைப்பட இயக்குனர்)
18.ராமு (திரைக் கலைஞர்)
19.மதிவண்ணன் (எழுத்தாளர்)
20.கிரிஷ் (எழுத்தாளர்)
21.மௌலி (Queer செயற்பாட்டாளர்)
22 காமாட்சி (ஆய்வாளர்)
23.தமிழ் ஸ்டுடியோ அருண் (எழுத்தாளர்/ செயற்பாட்டாளர்)
24.முரசு கலைக்குழு ஆனந்தன் (கலை செயற்பாட்டாளர்)
25. முரசு கலைக்குழு செல்வி (கலை செயற்பாட்டாளர்)
26.ராஜன் குறை (எழுத்தாளர்)
27.நிவேதிதா லூயிஸ் (எழுத்தாளர்)
28.நா.பெரியசாமி (எழுத்தாளர்)
29.ப்ரஸன்னா ராமஸ்வாமி (எழுத்தாளர்/அரங்கக் கலைஞர்)
30.அமுதன் R.P. (ஆவணப்பட இயக்குனர்)
31. ஜீவமணி (ஓவியர்)
32. நாறும்பூநாதன் (எழுத்தாளர்)
33. கருணா பிரசாத் (அரங்கக் கலைஞர்)
34. மேகவண்ணன் (எழுத்தாளர்)
35.கருப்பு அன்பரசு (அரசியல் செயற்பாட்டாளர்)
36.மீரா கதிரவன் (திரைப்பட இயக்குனர்)
37.பொ.வேல்சாமி (எழுத்தாளர்)
38. த.ஜீவலட்சுமி (கவிஞர்)
39.கருப்பு பிரதிகள் நீலகண்டன் (பதிப்பாளர்/ சமூக செயற்பாட்டாளார்)
40.களப்பிரன் (எழுத்தாளர்)
41.லக்ஷ்மி மணிவண்ணன் (எழுத்தாளர்)
42.Dr. லக்ஷ்மணன் (பேராசிரியர்)
43. யாழன் ஆதி (எழுத்தாளர்)
44.புதுகை பூபாளம் பிரகதீஸ்வரன் (அரங்கக் கலைஞர்)
45.கவிதா முரளிதரன் (ஊடகவியலாளர்)
46. கவிதா சொர்ணவல்லி (எழுத்தாளர்)
47. சிராஜுதீன் (அரசியல் செயற்பாட்டாளர்)
48. நிறைமதி (திரைக் கலைஞர்)
49. கெளதம் (சமூக செயற்பட்டாளர்)
50.கருப்பு பிரதிகள் அமுதா (சமூக செயற்பாட்டாளர்)
51. இரா.தெ.முத்து (சமூக செயற்பாட்டாளர்)
52. தமிழ்ப் பிரபா (எழுத்தாளர்)
53. பாக்கியம் சங்கர் (எழுத்தாளர்)
54.ஆசை (சமூக செயற்பாட்டாளர்)
55. சம்சுதீன் ஹீரா (எழுத்தாளர்)
56. நவநீதன் (சமூக செயற்பாட்டாளர்)
57.பெரோஸ் பாபு (சமூக செயற்பாட்டாளர்)
58. சல்மா (எழுத்தாளர்)
59.ஸ்டாலின் சரவணன் (எழுத்தாளர்)
60. குணசீலன் (சமூக செயற்பாட்டாளர்)
61. ஸ்டாலின் ராஜாங்கம் (எழுத்தாளர்)

Pin It

vithai functionபாலக்காட்டில் "விதை" இலக்கிய அமைப்பின் சார்பாக எனது "நிழல் தேசத்துக்காரனின் சித்திர பறவைகள்", "ஊதா நிறக் கொண்டை ஊசி கதைகள்" மற்றும் "எறும்பு முட்டுது யானை சாயுது" ஆகிய மூன்று நூல்களின் பனுவல் நயம் 15.02.2020 பாராட்டப்பட்டது.

மிக அற்புதமான அனுபவமாக இருந்ததை மீண்டும் மீண்டும் விரும்பும் மனதோடு இங்கே சில குறிப்புகளும்... சில பகிர்தல்களும்.

நம் புத்தகங்கள் பற்றி பேசுகிறார்கள் என்ற பிரமிப்பு கொஞ்ச நேரத்தில் போய் விட்டது. எத்தனை நுணுக்கமாக பேசுகிறார்கள் என்பது தான் கூட்டம் முடியும் வரை மனதுக்குள் ஓடிய சப்தங்களாக இருந்தன.

நிகழ்வில் கலந்து கொண்டு பேசியவர்கள் அனைவருமே கல்லூரி மாணவி மாணவர்கள். சிலர்... முனைவர் பட்டத்துக்கான ஆய்வை மேற்கொண்டிருப்பவர்கள். நான் மிகவும் ரசித்து பார்த்தது அவர்களின் அந்த இளமைப் பருவம். இனம் கண்டு கொள்ள முடியாத துறு துறு நிறைந்த அந்த முகங்களில் அன்பின் சுவடுகள்.. ஆசுவாசத்தின் நிறைவுகள். ஆகச் சிறந்த கவிதைகளை சுமந்தலையும் கணத்தின் அழகியல்களை வைத்த மனம் வாங்காமல் பார்த்தேன். இப்படி ஒரு காலத்தில் இருந்து வெகு தூரம் வந்து விட்டதை நினைத்து சற்று தவிப்பாகவும் இருந்ததை சொல்ல வேண்டும்.

ஒரு தோழி "எறும்பு முட்டுது யானை சாயுது" கவிதை தொகுப்பைப் பற்றி பேச ஆரம்பித்ததும் முதலில் திக் என்று இருந்தது. என்னடா உருகி உருகி காதலை கொண்ட கவிதையில் அந்த அப்பெண் வேறு பார்வை கொண்டு காதல் தவிர்த்து குழந்தைதனத்தை கைக்கொள்கிறாளே என்று. ஆனால் அவள் பேசிய பிறகு, "ஆமா... அதை அப்படியும் எடுத்துக் கொள்ளலாம் தானே" என்று புதிய பார்வையை உணர முடிந்தது. மாற்று சிந்தனை எந்த கோணத்தில் இருந்தும் வரும் என்பதை உணர்ந்த போது..... உள்ளிருக்கும் மாணவன் விழித்துக் கொண்டான். தொடர்ந்து மாணவனாக இருப்பவனே மாஸ்டர் ஆக இருக்க முடியும் என்பது உறுதிப்பட்டது. திறந்த மனமும் மூளையும் தான் ஒரு படைப்பாளனுக்கு மிக அவசியமாக இருக்க வேண்டும் என்று இன்னொரு முறை புரிந்து கொள்ள முடிந்தது.

இறுக மூடி இருக்கும் ஜன்னலுக்குள் தென்றல் எப்படி வரும். இறுக மூடி இருக்கும் இதயத்துள் காதல் எப்படி வரும். காதலில் உள்ள குழந்தைமையை மிக அழகாக ஒரு குழந்தையின் முக பாவனையோடு சிரித்துக் கொண்டே பேசியது....எழுத்தில் வராத குறுங்கவிதை.

நிகழ்வுக்கு தலைமை ஏற்ற நண்பர் அம்ரேஷ்-ன் பேச்சில்..... அழகியல் அலை அடித்தது. தமிழும் மலையாளமும் கலந்து.... அது ஒருவகை புது மொழியாக இருந்த போது ரசனை தானாக சேர்ந்து கொண்டது. வெள்ளை புறாக்கள் பறக்கும் வெற்றிடத்தில்.. வியாக்கியானத்துக்கு இடமில்லை. அப்படித்தான் இவரின் தலைமை பேச்சும்.. இடையிடையே கொடுக்கும் கமெண்டுகளும். சிரிக்க நேர்ந்த தருணங்கள் எல்லாம் அம்ரேஷ் அவர்களால் ஆசீர்வதிக்கப்பட்ட தருணங்கள் தான்.

எல்லார் பேச்சிலும் மிக அக்கறையான உண்மை இருந்தது. ஜோடனை இல்லை. பாவனை இருந்தது. ஒப்பனை இல்லை. ஆரம்ப கட்ட பேச்சாளர்களும் இருந்தார்கள். எழுதி வைத்து படித்தவர்களும் உண்டு. எல்லாமே உள்ளம் கொண்ட தெளிவின் தீர்க்கத்தை வெளிப்படுத்தியவை. நகர்ந்து கொண்டே இருக்கும் அறிவின் கனலை பற்ற வைத்தவை. அமர்க்களப்படுத்திய ஸ்டாலினின் பேச்சில்... நிதானமும்.. கன்டென்டை உள்வாங்கும் நுட்பமும் இருந்ததை மெச்சத்தான் வேண்டும்.

ஸ்டாலின் பேசுகையில்...வெறும் காதல் கவிதைகளில் உடன்பாடு இல்லை... அதனால்... கிட்டத்தட்ட புத்தகத்தை மூடி வைத்து விடலாம் என்று நினைத்த போது கடைசி பக்கத்தை புரட்ட நேர்ந்தது... அங்கே சமூக கவிதை பளிச்சிட......பிறகு முழு புத்தகத்தையும் ஒரே வீச்சாக படித்ததாக கூறினார். காதலில் ஆரம்பித்து..... எனது எல்லாமும் காதலால் தான் ஆரம்பிக்கிறது. காதல் என்பது பெண் மீதானது மட்டும் என்று சுருக்கிக் கொள்ள விரும்பா உலக காதலனாக இருப்பதால்... மானுட காதலனாக இருப்பதால்....சமுதாயம் பற்றிய.......சமத்துவம் பற்றிய சிந்தனை இயல்பாக என்னுள் இருப்பதை இன்னும் கொஞ்சம் கூர்ந்து எனது படைப்புகளை படிக்கையில் உணர்ந்து கொள்ள நேரிடும். எனது மொழி கொஞ்சம் சிக்கலான மொழியாக இருப்பினும்.. எங்கு எது தேவையோ அங்கு தேவை கருதி மொழியின் வடிவம் தானே மாறிக் கொள்ளும் பயிற்சியை பெற்றிருப்பதை அழகாக உள் வாங்கிக் கொண்ட தோழிகள்... குறுங்கவிதைகள் அனைத்துமே யதார்த்த மொழியில் இருந்ததாக கூறியது ஆறுதலாக இருந்தது.

"ஊதா நிறக் கொண்டை ஊசி கதைகள்" சிறுகதை தொகுப்பைப் பற்றி பேசுகையில்.. தோழி சித்ராவின் உள்வாங்கல் பாராட்ட வேண்டியது. கிட்டத்தட்ட பெரும்பாலான.....முக்கியமான கதைகளை எல்லாமே மிக நேர்த்தியாக ஒப்பீட்டு அளவிலும்.. உட்கருத்து கொண்ட அளவீட்டு வகைமையிலும் அலசி ஆராய்ந்திருந்தது...அலாதியானது. நானே மறந்த இடங்களை எல்லாம் சுட்டிக்காட்டி இது எப்படி....இங்க ஏன் போன்ற கேள்விகளால் மீண்டும் கதைக்கு உயிரூட்டிய போது..... கைக்கு வந்ததையெல்லாம் எழுதிவிட முடியாது. இந்த உலகம் நம்மைக் கண்காணித்துக் கொண்டிருக்கிறது என்ற எச்சரிக்கை என்னுள் சூழ்ந்தது. கவிதைகளைப் பற்றி பேசுகையில் இருந்ததை விட கதைகளை பற்றி பேசுகையில் இருக்கும் நான் எனது தாண்டிய என்னுள்ளம் கொண்ட நானாக இருந்ததை மிக ரகசியமாக ரசித்தேன்.

" நிழல் தேசத்துக்காரனின் சித்திர பறவைகள்" கவிதை தொகுப்பில் இருந்து "எங்க ஊர் ராஜகுமாரி" கவிதை பற்றி தோழர் பேசுகையில்... உள்ளே பிரம்மாண்டமாய் பீறிட்டுக் கொண்டிருந்த பழைய நினைவுகளை அடக்கவே முடியவில்லை. அடங்காமல் கொட்டியது... ஆசுவாசம். மரணம் பற்றிய ஆய்வு செய்யும் தோழரின் பேச்சில்.... மரணத்துக்கே உண்டான வெளிச்சம் இருந்ததைக் கண்டேன். மரணம் மிக சிறந்த அமைதியை தரும் கவிதைக்கு சற்று மேலானது என்று சிந்திக்கையில்..... வண்ணமயமான கவனம் அவர் மீது குவிந்தது.

நிறைய பெயர்களை வழக்கம் போல மறந்து போனேன். ஆனாலும் எல்லோரின் முகமும் வார்த்தைகளால் என்னுள் பதிந்து விட்டது. மிக குதூகலமான கூட்டமாக இருந்தது. இலக்கியம் அழுவதற்கு மட்டுமா என்ன. கொண்டாடுவதற்கு தான். கூத்தடிப்பதற்கும் தான். அது அந்த மரங்கள் சூழ்ந்த மாடி கூரையில்... "விதை" நட்டுக் கொண்டேயிருக்கிறது. இது 16 வது கூட்டம். தகுதியான தரமான நடுதலை நேர்த்தியான திட்டமிடுதலில் செய்து கொண்டிருக்கும் கதிரவன் சாருக்கும் ஜானகிப்பிரியா மேடத்துக்கும் கன்னல் இளம்பரிதிக்கும் எத்தனை நன்றிகள் சொன்னாலும் தகும். எத்தனை பாராட்டினாலும் போதா. இவர்களுக்கும் மாணவ மாணவியருக்கும் உள்ள நெருக்கம் அட்டகாசமானது. அப்பட்டமான புரிதலைக் கொண்டது. ஒரு குடும்பமே இலக்கிய வாழ்வை கொண்டாடி தீர்வது கற்றுக் கொள்ள வேண்டியது. காலம் மலர மலர வாழ்த்தும் குவியும். மிக சுவையான மதிய உணவில் வயிறும் நிறைந்தது. ஒரு படைப்பாளனுக்கு முதலில் மனது நிறைய வேண்டும். மனம் நிறையா இடத்தில் வயிறு நிறைவதில்லை. இங்கே இரண்டும் நிறைந்தது. பெண்களின் பரிமாறும் அழகை நீண்ட நாட்களுக்கு பின் மிக அருகில் கண்டேன். ஒப்புக்கொடுத்தலுடைய பரிமாறல்.

பாதியில் ஆரம்பித்து பாதியிலேயே முடித்துக் கொண்ட "கள்வனின் காதலி" கதையை சொன்ன தோழி அத்தனை மிருதுவான ஆதுர மென்மையான பாவனையோடு பேசியது அழகியல் நிறை. ஒரு குழந்தையின் வெள்ளந்தி முகத்தைக் கொண்டிருந்தது... சோ க்யூட். அப்பளத்துக்கு கண்கள் கலங்கிய "அச்சோ" வில் வாழ்வு அன்பால்தான் ஆசீர்வதிக்கப்படும் என்று ஆழமாய் புரிந்தது. உள்ளொன்று வைத்து புறம் ஒன்று பேசினால் அது பிழைத்தல். உள்ளொன்று கண்டு அதையே வெளியொன்றில் நிரப்பினால் அது தான் வாழ்தல். அழுகைக்கும் சிரிப்புக்கும் அப்படி அப்படியே பொருந்தும் முகத்தில் தான்.. நிம்மதி இருக்கிறது.

உலக சினிமாக்கள்... உலக இலக்கியங்கள் என்று எதைத் தொட்டு வந்தாலும்...சுவாரஷ்யம் நீள்கிறது. அறிவு சார்ந்த தேடல் உள்ள கூட்டத்தில் நேற்றைய விதியாக இருந்தது ஆக சிறந்த அனுபவம். கதிரவன் சார் கேட்ட "கவிஜி யார்...?" கேள்வியில்.. மிக வேகமாய் என் ரயில் பின்னோக்கி சென்றதை.... அப்படியே அதே சத்தத்தில் உணர்ந்து கொட்டினேன். ஜானகிப்பிரியா மேடத்தின் மனம் திறந்த பாராட்டை... பொக்கிஷமாக என்னுள் வைத்துக் கொண்டிருப்பதை எவ்வித முரணும் இல்லாமல் சிரித்துக் கொண்டே சொல்லலாம். ஒவ்வொரு முகத்திலும் ஒரு படிப்பினையைக் கண்டேன். பரிசு பொருள்களாக கவிதை நிறைந்தபோது...... புத்தககங்கள் நிறைந்தபோது.....ஏதோ ஒரு பிடித்த வரியாக மாறிப் போனேன்.

மேடை கலாச்சாரம் இல்லை. கீழே அமர்ந்திருப்போர் கை தட்டுதலுக்கு மட்டுமே என்ற தோற்றப் பிழை இல்லை. எல்லாரும் சமம். படிப்பவன் இல்லையென்றால் எழுதுபவனுக்கு என்ன வேலை என்று அந்த தொடர்பை மிக துல்லியமாக புரிய வைத்தது அந்த வட்டம். எங்கிருந்து வேண்டுமானாலும் வந்த கேள்விகளே எனக்கு மிக பொருத்தமான நிறைவைத் தந்தது. தனியாக பேச ஒன்றுமில்லாத போது கேள்வி பதில்களில் விளங்கி கொள்தலும் விளக்கிக் கொள்தலும் மிக பிரம்மாண்டமாக நிகழ்ந்தது. ஒவ்வொரு மாணவனும் ஒவ்வொரு மாணவியும்.. அசுர வேகத்தில் தெரிகிறார்கள்.

எவனுக்கு என்ன பலம் எவனுக்கு என்ன குணம் கண்டதில்லை ஒருவருமே..
ஒரு விதைக்குள்ள அடைபட்ட ஆலமரம் கண் விழிக்கும் அது வரை பொறு மனமே...

வைரமுத்துவின் வரிக்கிணங்க இந்த "விதை" இலக்கிய அமைப்பின் விருட்சம் மிக பெரிதாகும். நானும் ஒரு கிளையாகி போனேன் என்பது திருப்தி. அது பொறுப்பும் கூட.

எழுத்தாளன் பெரிதாக என்ன கேட்டு விட போகிறான்...? போகிற போக்கில் இதுபோன்ற சில கை தட்டல்கள் தான்...!

- கவிஜி

Pin It