vithai functionபாலக்காட்டில் "விதை" இலக்கிய அமைப்பின் சார்பாக எனது "நிழல் தேசத்துக்காரனின் சித்திர பறவைகள்", "ஊதா நிறக் கொண்டை ஊசி கதைகள்" மற்றும் "எறும்பு முட்டுது யானை சாயுது" ஆகிய மூன்று நூல்களின் பனுவல் நயம் 15.02.2020 பாராட்டப்பட்டது.

மிக அற்புதமான அனுபவமாக இருந்ததை மீண்டும் மீண்டும் விரும்பும் மனதோடு இங்கே சில குறிப்புகளும்... சில பகிர்தல்களும்.

நம் புத்தகங்கள் பற்றி பேசுகிறார்கள் என்ற பிரமிப்பு கொஞ்ச நேரத்தில் போய் விட்டது. எத்தனை நுணுக்கமாக பேசுகிறார்கள் என்பது தான் கூட்டம் முடியும் வரை மனதுக்குள் ஓடிய சப்தங்களாக இருந்தன.

நிகழ்வில் கலந்து கொண்டு பேசியவர்கள் அனைவருமே கல்லூரி மாணவி மாணவர்கள். சிலர்... முனைவர் பட்டத்துக்கான ஆய்வை மேற்கொண்டிருப்பவர்கள். நான் மிகவும் ரசித்து பார்த்தது அவர்களின் அந்த இளமைப் பருவம். இனம் கண்டு கொள்ள முடியாத துறு துறு நிறைந்த அந்த முகங்களில் அன்பின் சுவடுகள்.. ஆசுவாசத்தின் நிறைவுகள். ஆகச் சிறந்த கவிதைகளை சுமந்தலையும் கணத்தின் அழகியல்களை வைத்த மனம் வாங்காமல் பார்த்தேன். இப்படி ஒரு காலத்தில் இருந்து வெகு தூரம் வந்து விட்டதை நினைத்து சற்று தவிப்பாகவும் இருந்ததை சொல்ல வேண்டும்.

ஒரு தோழி "எறும்பு முட்டுது யானை சாயுது" கவிதை தொகுப்பைப் பற்றி பேச ஆரம்பித்ததும் முதலில் திக் என்று இருந்தது. என்னடா உருகி உருகி காதலை கொண்ட கவிதையில் அந்த அப்பெண் வேறு பார்வை கொண்டு காதல் தவிர்த்து குழந்தைதனத்தை கைக்கொள்கிறாளே என்று. ஆனால் அவள் பேசிய பிறகு, "ஆமா... அதை அப்படியும் எடுத்துக் கொள்ளலாம் தானே" என்று புதிய பார்வையை உணர முடிந்தது. மாற்று சிந்தனை எந்த கோணத்தில் இருந்தும் வரும் என்பதை உணர்ந்த போது..... உள்ளிருக்கும் மாணவன் விழித்துக் கொண்டான். தொடர்ந்து மாணவனாக இருப்பவனே மாஸ்டர் ஆக இருக்க முடியும் என்பது உறுதிப்பட்டது. திறந்த மனமும் மூளையும் தான் ஒரு படைப்பாளனுக்கு மிக அவசியமாக இருக்க வேண்டும் என்று இன்னொரு முறை புரிந்து கொள்ள முடிந்தது.

இறுக மூடி இருக்கும் ஜன்னலுக்குள் தென்றல் எப்படி வரும். இறுக மூடி இருக்கும் இதயத்துள் காதல் எப்படி வரும். காதலில் உள்ள குழந்தைமையை மிக அழகாக ஒரு குழந்தையின் முக பாவனையோடு சிரித்துக் கொண்டே பேசியது....எழுத்தில் வராத குறுங்கவிதை.

நிகழ்வுக்கு தலைமை ஏற்ற நண்பர் அம்ரேஷ்-ன் பேச்சில்..... அழகியல் அலை அடித்தது. தமிழும் மலையாளமும் கலந்து.... அது ஒருவகை புது மொழியாக இருந்த போது ரசனை தானாக சேர்ந்து கொண்டது. வெள்ளை புறாக்கள் பறக்கும் வெற்றிடத்தில்.. வியாக்கியானத்துக்கு இடமில்லை. அப்படித்தான் இவரின் தலைமை பேச்சும்.. இடையிடையே கொடுக்கும் கமெண்டுகளும். சிரிக்க நேர்ந்த தருணங்கள் எல்லாம் அம்ரேஷ் அவர்களால் ஆசீர்வதிக்கப்பட்ட தருணங்கள் தான்.

எல்லார் பேச்சிலும் மிக அக்கறையான உண்மை இருந்தது. ஜோடனை இல்லை. பாவனை இருந்தது. ஒப்பனை இல்லை. ஆரம்ப கட்ட பேச்சாளர்களும் இருந்தார்கள். எழுதி வைத்து படித்தவர்களும் உண்டு. எல்லாமே உள்ளம் கொண்ட தெளிவின் தீர்க்கத்தை வெளிப்படுத்தியவை. நகர்ந்து கொண்டே இருக்கும் அறிவின் கனலை பற்ற வைத்தவை. அமர்க்களப்படுத்திய ஸ்டாலினின் பேச்சில்... நிதானமும்.. கன்டென்டை உள்வாங்கும் நுட்பமும் இருந்ததை மெச்சத்தான் வேண்டும்.

ஸ்டாலின் பேசுகையில்...வெறும் காதல் கவிதைகளில் உடன்பாடு இல்லை... அதனால்... கிட்டத்தட்ட புத்தகத்தை மூடி வைத்து விடலாம் என்று நினைத்த போது கடைசி பக்கத்தை புரட்ட நேர்ந்தது... அங்கே சமூக கவிதை பளிச்சிட......பிறகு முழு புத்தகத்தையும் ஒரே வீச்சாக படித்ததாக கூறினார். காதலில் ஆரம்பித்து..... எனது எல்லாமும் காதலால் தான் ஆரம்பிக்கிறது. காதல் என்பது பெண் மீதானது மட்டும் என்று சுருக்கிக் கொள்ள விரும்பா உலக காதலனாக இருப்பதால்... மானுட காதலனாக இருப்பதால்....சமுதாயம் பற்றிய.......சமத்துவம் பற்றிய சிந்தனை இயல்பாக என்னுள் இருப்பதை இன்னும் கொஞ்சம் கூர்ந்து எனது படைப்புகளை படிக்கையில் உணர்ந்து கொள்ள நேரிடும். எனது மொழி கொஞ்சம் சிக்கலான மொழியாக இருப்பினும்.. எங்கு எது தேவையோ அங்கு தேவை கருதி மொழியின் வடிவம் தானே மாறிக் கொள்ளும் பயிற்சியை பெற்றிருப்பதை அழகாக உள் வாங்கிக் கொண்ட தோழிகள்... குறுங்கவிதைகள் அனைத்துமே யதார்த்த மொழியில் இருந்ததாக கூறியது ஆறுதலாக இருந்தது.

"ஊதா நிறக் கொண்டை ஊசி கதைகள்" சிறுகதை தொகுப்பைப் பற்றி பேசுகையில்.. தோழி சித்ராவின் உள்வாங்கல் பாராட்ட வேண்டியது. கிட்டத்தட்ட பெரும்பாலான.....முக்கியமான கதைகளை எல்லாமே மிக நேர்த்தியாக ஒப்பீட்டு அளவிலும்.. உட்கருத்து கொண்ட அளவீட்டு வகைமையிலும் அலசி ஆராய்ந்திருந்தது...அலாதியானது. நானே மறந்த இடங்களை எல்லாம் சுட்டிக்காட்டி இது எப்படி....இங்க ஏன் போன்ற கேள்விகளால் மீண்டும் கதைக்கு உயிரூட்டிய போது..... கைக்கு வந்ததையெல்லாம் எழுதிவிட முடியாது. இந்த உலகம் நம்மைக் கண்காணித்துக் கொண்டிருக்கிறது என்ற எச்சரிக்கை என்னுள் சூழ்ந்தது. கவிதைகளைப் பற்றி பேசுகையில் இருந்ததை விட கதைகளை பற்றி பேசுகையில் இருக்கும் நான் எனது தாண்டிய என்னுள்ளம் கொண்ட நானாக இருந்ததை மிக ரகசியமாக ரசித்தேன்.

" நிழல் தேசத்துக்காரனின் சித்திர பறவைகள்" கவிதை தொகுப்பில் இருந்து "எங்க ஊர் ராஜகுமாரி" கவிதை பற்றி தோழர் பேசுகையில்... உள்ளே பிரம்மாண்டமாய் பீறிட்டுக் கொண்டிருந்த பழைய நினைவுகளை அடக்கவே முடியவில்லை. அடங்காமல் கொட்டியது... ஆசுவாசம். மரணம் பற்றிய ஆய்வு செய்யும் தோழரின் பேச்சில்.... மரணத்துக்கே உண்டான வெளிச்சம் இருந்ததைக் கண்டேன். மரணம் மிக சிறந்த அமைதியை தரும் கவிதைக்கு சற்று மேலானது என்று சிந்திக்கையில்..... வண்ணமயமான கவனம் அவர் மீது குவிந்தது.

நிறைய பெயர்களை வழக்கம் போல மறந்து போனேன். ஆனாலும் எல்லோரின் முகமும் வார்த்தைகளால் என்னுள் பதிந்து விட்டது. மிக குதூகலமான கூட்டமாக இருந்தது. இலக்கியம் அழுவதற்கு மட்டுமா என்ன. கொண்டாடுவதற்கு தான். கூத்தடிப்பதற்கும் தான். அது அந்த மரங்கள் சூழ்ந்த மாடி கூரையில்... "விதை" நட்டுக் கொண்டேயிருக்கிறது. இது 16 வது கூட்டம். தகுதியான தரமான நடுதலை நேர்த்தியான திட்டமிடுதலில் செய்து கொண்டிருக்கும் கதிரவன் சாருக்கும் ஜானகிப்பிரியா மேடத்துக்கும் கன்னல் இளம்பரிதிக்கும் எத்தனை நன்றிகள் சொன்னாலும் தகும். எத்தனை பாராட்டினாலும் போதா. இவர்களுக்கும் மாணவ மாணவியருக்கும் உள்ள நெருக்கம் அட்டகாசமானது. அப்பட்டமான புரிதலைக் கொண்டது. ஒரு குடும்பமே இலக்கிய வாழ்வை கொண்டாடி தீர்வது கற்றுக் கொள்ள வேண்டியது. காலம் மலர மலர வாழ்த்தும் குவியும். மிக சுவையான மதிய உணவில் வயிறும் நிறைந்தது. ஒரு படைப்பாளனுக்கு முதலில் மனது நிறைய வேண்டும். மனம் நிறையா இடத்தில் வயிறு நிறைவதில்லை. இங்கே இரண்டும் நிறைந்தது. பெண்களின் பரிமாறும் அழகை நீண்ட நாட்களுக்கு பின் மிக அருகில் கண்டேன். ஒப்புக்கொடுத்தலுடைய பரிமாறல்.

பாதியில் ஆரம்பித்து பாதியிலேயே முடித்துக் கொண்ட "கள்வனின் காதலி" கதையை சொன்ன தோழி அத்தனை மிருதுவான ஆதுர மென்மையான பாவனையோடு பேசியது அழகியல் நிறை. ஒரு குழந்தையின் வெள்ளந்தி முகத்தைக் கொண்டிருந்தது... சோ க்யூட். அப்பளத்துக்கு கண்கள் கலங்கிய "அச்சோ" வில் வாழ்வு அன்பால்தான் ஆசீர்வதிக்கப்படும் என்று ஆழமாய் புரிந்தது. உள்ளொன்று வைத்து புறம் ஒன்று பேசினால் அது பிழைத்தல். உள்ளொன்று கண்டு அதையே வெளியொன்றில் நிரப்பினால் அது தான் வாழ்தல். அழுகைக்கும் சிரிப்புக்கும் அப்படி அப்படியே பொருந்தும் முகத்தில் தான்.. நிம்மதி இருக்கிறது.

உலக சினிமாக்கள்... உலக இலக்கியங்கள் என்று எதைத் தொட்டு வந்தாலும்...சுவாரஷ்யம் நீள்கிறது. அறிவு சார்ந்த தேடல் உள்ள கூட்டத்தில் நேற்றைய விதியாக இருந்தது ஆக சிறந்த அனுபவம். கதிரவன் சார் கேட்ட "கவிஜி யார்...?" கேள்வியில்.. மிக வேகமாய் என் ரயில் பின்னோக்கி சென்றதை.... அப்படியே அதே சத்தத்தில் உணர்ந்து கொட்டினேன். ஜானகிப்பிரியா மேடத்தின் மனம் திறந்த பாராட்டை... பொக்கிஷமாக என்னுள் வைத்துக் கொண்டிருப்பதை எவ்வித முரணும் இல்லாமல் சிரித்துக் கொண்டே சொல்லலாம். ஒவ்வொரு முகத்திலும் ஒரு படிப்பினையைக் கண்டேன். பரிசு பொருள்களாக கவிதை நிறைந்தபோது...... புத்தககங்கள் நிறைந்தபோது.....ஏதோ ஒரு பிடித்த வரியாக மாறிப் போனேன்.

மேடை கலாச்சாரம் இல்லை. கீழே அமர்ந்திருப்போர் கை தட்டுதலுக்கு மட்டுமே என்ற தோற்றப் பிழை இல்லை. எல்லாரும் சமம். படிப்பவன் இல்லையென்றால் எழுதுபவனுக்கு என்ன வேலை என்று அந்த தொடர்பை மிக துல்லியமாக புரிய வைத்தது அந்த வட்டம். எங்கிருந்து வேண்டுமானாலும் வந்த கேள்விகளே எனக்கு மிக பொருத்தமான நிறைவைத் தந்தது. தனியாக பேச ஒன்றுமில்லாத போது கேள்வி பதில்களில் விளங்கி கொள்தலும் விளக்கிக் கொள்தலும் மிக பிரம்மாண்டமாக நிகழ்ந்தது. ஒவ்வொரு மாணவனும் ஒவ்வொரு மாணவியும்.. அசுர வேகத்தில் தெரிகிறார்கள்.

எவனுக்கு என்ன பலம் எவனுக்கு என்ன குணம் கண்டதில்லை ஒருவருமே..
ஒரு விதைக்குள்ள அடைபட்ட ஆலமரம் கண் விழிக்கும் அது வரை பொறு மனமே...

வைரமுத்துவின் வரிக்கிணங்க இந்த "விதை" இலக்கிய அமைப்பின் விருட்சம் மிக பெரிதாகும். நானும் ஒரு கிளையாகி போனேன் என்பது திருப்தி. அது பொறுப்பும் கூட.

எழுத்தாளன் பெரிதாக என்ன கேட்டு விட போகிறான்...? போகிற போக்கில் இதுபோன்ற சில கை தட்டல்கள் தான்...!

- கவிஜி

Pin It

பெரியாரிய உணர்வாளர்கள் கூட்டமைப்பின் ஒருங்கிணைப்பில் 9-2-2020 அன்று கோவையில் நடைபெற்ற சாதி ஒழிப்பு மாநாட்டில் நிறைவேற்றப்பட்ட தீர்மானங்கள்:

neelachattai perani 700வீரவணக்கத் தீர்மானங்கள்

1. சாதிக் கொடுமைகளை எதிர்த்தும், சாதி ஆதிக்கத்தை ஒழிக்கும் நோக்கத்தோடும் களமாடி, 1957 ஆம் ஆண்டு சாதி ஒழிப்புக்காக சாதியைப் பாதுகாக்கின்ற சட்டத்தைத் தீயிட்டுக் கொளுத்திச் சிறை சென்றதோடு மட்டுமின்றி, அப்போராட்டக் காலச் சூழலில் ஈகியர்களான எண்ணற்ற தோழர்கள் உள்ளிட்ட 20 - ஆம் நூற்றாண்டின் சாதி ஒழிப்புப் போராளியர்களாக முனைந்து எழுந்த அறிஞர்கள், இயக்கச் செயற்பாட்டாளர்கள், களப் போராளியர்கள், முன்னின்ற பொதுமக்கள் என அனைவருக்கும் மற்றும் அண்மையில் மேட்டுப்பாளையத்தில் தீண்டாமைச் சுவர் இடிந்து விழுந்த நிலையில் மறைவுற்ற பதினேழு ஏதுமறியா மக்களுக்கும் பெரியாரிய உணர்வாளர்கள் கூட்டமைப்பு வீரவணக்கம் செலுத்துகிறது.

2. தமிழ்நாட்டிற்கு வெளியே பார்ப்பனிய சாதிய வெறிகளுக்கு எதிராகப் போராடி உயிர்நீத்த அறிஞர்கள் எழுத்தாளர்கள் மற்றும் பல்லாயிரக்கணக்கான போராளியர், வெகு மக்கள் என அனைவருக்கும் இம்மாநாடு வீரவணக்கம் செலுத்துகிறது.

3. தமிழீழ விடுதலைப் போராட்டத்திற்காகத் தன்னுயிர் ஈந்த எண்ணற்ற போராளிகளுக்கும் ஈகம் செய்திருக்கின்ற தமிழீழ மக்களுக்கும் ஆதரவு தெரிவித்து உயிரை ஈந்த தமிழ்நாட்டுத் தமிழர்கள் அப்துல் ரகூப், முத்துக்குமார், செங்கொடி உள்ளிட்ட அனைவருக்கும் இம்மாநாடு வீரவணக்கம் செலுத்துகிறது.

கொள்கைத் தீர்மானங்கள் :

4. சாதிவெறி, மதவெறியைத் தூண்டி மக்களிடையே ஒரு பக்கம் பகை உணர்வுகளை உருவாக்கிக் கொண்டிருப்பதோடு ஒரே மக்கள், ஒரே சட்டம், ஒற்றைப் பண்பாடு, ஒற்றை அடையாளம் என்கிற வகையில் பார்ப்பனிய அதிகார வெறி கொண்டு இயங்குகிற இந்திய அரசு, இந்தியாவிற்குள் உள்ளடக்கப்பட்டுள்ள பல்வேறு மொழித் தேசங்களின் வரலாற்றையும், பண்பாட்டையும், அடையாளங்களையும் மறுக்கிறது. தமிழ் ஈழ ஏதிலியர்களுக்குக் குடியுரிமை வழங்க மறுப்பதோடு, மதச் சிறுபான்மை மக்களுக்கும் குடியுரிமை வழங்க மறுத்து, இரண்டாம் தரக் குடிமக்களாக மாற்றுகிற முயற்சி செய்கிற நோக்கில் உள்ள இந்திய அரசை இம் மாநாடு வன்மையாகக் கண்டிக்கிறது. இந்நிலையில் மக்கள் தங்கள் இன அடையாள உரிமைகளையும், மொழித் தேச அளவில் தங்களைத் தமிழர்கள் என்றே பதிந்து கொள்ளவும், தமிழக மக்களைக் குடியுரிமையோடு இங்கு வாழ வைக்கவும், மதச் சிறுபான்மையினருக்கு எவ்வகை இடர்களும் ஏற்படாத வகையில் குடியுரிமை வழங்கவும் இம் மாநாடு வலியுறுத்துகிறது..

5. தமிழகத்தில், சாதி ஆணவப் படுகொலைகள் ஆண்டுக்கு ஆண்டு அதிகமாகிக் கொண்டே வருகின்றன. சாதி ஆணவப் படுகொலைகளைத் தடுப்பதற்குச் சிறப்புச் சட்டம் இயற்ற வேண்டும் என உச்ச நீதிமன்றமே வலியுறுத்தி உள்ளது. தவிரவும் இந்தியச் சட்ட ஆணையம் மற்றும் இந்திய மகளிர் ஆணையம் ஆகியவையும் சாதி ஆணவப் படுகொலைக்கு எதிராகத் தனிச்சட்டம் இயற்ற வேண்டும் எனப் பரிந்துரைத்துள்ளன. இந்நிலையில் சாதித ஆணவப் படுகொலைகள் குறித்து இதுவரையில் தமிழக அரசு ஏதும் கருத்தறிவிக்காமல் இருப்பது சரியன்று. எனவே, இவற்றைக் கருத்தில் கொண்டும், நடப்பு நிலையைக் கருத்தில் கொண்டும் சாதி ஆணவப் படுகொலையைத் தடுக்கச் சிறப்புச் சட்டம் இயற்ற வேண்டும் என்றும், சாதிமறுப்புத் திருமணங்களை ஊக்கப்படுத்தவும், சாதிமறுப்புத் திருமணங்களை நடத்தி வைக்கவும், சாதிமறுப்புத் தம்பதிகளுக்குச் சட்ட, சமூகப் பாதுகாப்பு வழங்கவும் அவர்களின் வாரிசுகளைச் சாதியற்றவர்களாகப் பதிவு செய்து அவர்களுக்குச் சிறப்புரிமை வழங்கவும் சாதிமறுப்புத் திருமணப் பாதுகாப்பு ஆணையம் என்கிற பெயரில், ஒரு தனி ஆணையம் அமைத்திட வேண்டும் எனவும் தமிழ்நாடு மற்றும் இந்திய அரசுகளை இம் மாநாடு வலியுறுத்துகிறது.

6. சாதி ஆணவப் படுகொலைகள் நடந்தால், அதற்கு மாவட்ட ஆட்சியரும், மாவட்டக் காவல்துறைக் கண்காணிப்பாளரும் பொறுப்பு ஏற்க வேண்டும் என நீதிமன்றங்கள் வலியுறுத்தி உள்ளன. எனவே சாதி ஆணவப் படுகொலைகள் அதிகமாக நடக்கும் மாவட்டங்களில் அம் மாவட்ட ஆட்சியரும், மாவட்டக் காவல்துறைக் கண்காணிப்பாளர் உள்ளிட்ட அதிகாரிகள் மீது தமிழக அரசு கடும் நடவடிக்கை எடுக்க வேண்டும் என இம் மாநாடு கோருகிறது.

7. சாதி, மத மறுப்புத் திருமணம் செய்யும் இணையருக்குக் குறிப்பிட்ட காலம் வரை பாதுகாப்பு வழங்கப் பாதுகாப்பு இல்லங்களைப் பஞ்சாப் அரசு நிறுவி உள்ளது. அதைப் போன்ற பாதுகாப்பு இல்லங்களைத் தமிழக அரசு உருவாக்க வேண்டும் என இம்மாநாடு பரிந்துரைக்கிறது.

8. சாதி, மத மறுப்புத் திருமணம் செய்து கொண்ட இணையர்களை நாட்டின் சிறந்த குடிமக்களாக அறிவிக்க வேண்டும். மேலும் வட்டாட்சியர், மாவட்ட ஆட்சியர், காவல் உயரதிகாரிகள், அமைச்சர்கள் மற்றும் முதலமைச்சர் பங்கேற்கும் அரசு விழாக்களில் அவர்களைப் பாராட்டிச் சிறப்பிக்க அரசு கொள்கை முடிவு எடுக்க வேண்டும் என்றும், சாதிமறுப்புத் திருமணங்களை ஊக்கப்படுத்தவும், நெருங்கிய இரத்த உறவுத் திருமணங்கள் செய்வதைத் தவிர்க்கப் பொதுமக்களுக்கு அறிவுறுத்தல் வழங்க வேண்டும் என்றும், குறிப்பாக நெருங்கிய இரத்த உறவுத் திருமணங்கள் மூலம் பிறக்கும் குழந்தைகளுக்கு ஏற்படும் மூளை மற்றும் உடலியல் குறைபாடுகள் குறித்து பொதுமக்களுக்கு அறிவியல் அடிப்படையிலான விழிப்புணர்வை ஏற்படுத்த அரசு விளம்பரம் செய்ய வேண்டும் என்றும் இம்மாநாடு வலியுறுத்துகிறது.

9. தமிழ்நாடு திருமணப் பதிவுச் சட்டம் 2009, அனைத்துத் திருமணங்களும் பதிவு செய்யப்பட வேண்டும் என வலியுறுத்துகிறது. மேலும் திருமணம் நடந்த இடத்தில்தான் திருமணம் பதிவு செய்யப்பட வேண்டும் என்ற சலுகையையும் அது வழங்கி உள்ளது. அச்சட்டப்படி சாதி குறித்து எதுவும் கேட்கப்படுவதில்லை. ஆனால் தற்பொழுது அச் சட்டத்தின் கீழ்த் திருமணம் செய்ய இருப்பவர்களின் மதம் பற்றிக் கேட்கப்படுகிறது. சாதி / மதம் குறித்து எவரும் தெரிவிக்க வேண்டியதில்லை என 1973 ஆம் ஆண்டு தமிழ்நாடு அரசு ஆணை பிறப்பித்துள்ளது. எனவே தமிழ்நாடு திருமணப் பதிவுச் சட்டத்தில் மதம் பற்றிக் கேட்கக் கூடாது என்பதோடு, எந்த வகைக் கால வரையறையும் இருக்கக் கூடாது என்றும் இம் மாநாடு வலியுறுத்துகிறது.

10. சாதி மறுப்புத் திருமணம் செய்யும் இணையருக்குச் சிறுதொழில் நடத்த வட்டியில்லாக் கடன், தொழில் நடத்த அனுமதி வழங்குவதில் முன்னுரிமை, இலவச வீட்டுமனைப் பட்டா, வேலை வாய்ப்பில் தனி இடஒதுக்கீடு போன்றவை அனைத்துப் பிரிவு சாதியினருக்கும் வழங்கப்பட வேண்டும் எனவும், சாதி மறுப்புத் திருமணம் செய்த இணையரின் குழந்தைகளுக்கு அனைத்து நிலைகளிலும் கட்டணமில்லாக் கல்வியும், கல்வி மற்றும் வேலைவாய்ப்பில் சிறப்பு இடஒதுக்கீடும் வழங்க வேண்டும் எனவும் இம் மாநாடு வேண்டுகிறது.

11. சாதி மறுப்புத் திருமண இணையருக்கு இராசசுத்தான் அரசு ரூ.5 இலட்சம் உதவித் தொகை வழங்குகிறது. பல மாநிலங்கள் குறைந்தது ஒரு இலட்சம் ரூபாய் வரை உதவித் தொகை வழங்குகின்றன. ஆனால் இந்தியாவிலேயே மிகக் குறைந்த உதவித் தொகையைத்தான் தமிழக அரசு வழங்கி வருகிறது. அதிலும் பட்டம் பெற்ற பெண்களுக்கு அதிக உதவித் தொகையும், பட்டம் பெறாத பெண்களுக்குக் குறைவான உதவித் தொகையும் வழங்குகிறது. எனவே இந்தப் பாகுபாட்டைக் களைந்து, சாதிமறுப்பு இணையருக்கு இராசசுத்தான் அரசு வழங்குவதுபோல் ஐந்து இலட்சம் ரூபாய் உதவித் தொகை வழங்க வேண்டும் என இம்மாநாடு வேண்டுகிறது.

12. சாதி மறுப்புத் திருமணம் செய்து கொண்ட இணையரின் குழந்தைகளுக்கு மருத்துவம். மற்றும் பொறியியல் கல்லூரிகளில் சிறப்பு இடங்களைத் தமிழ்நாடு அரசு வழங்கி வருகிறது. ஆனால் 69 விழுக்காட்டிற்கு மேல் இந்த இட ஒதுக்கீடு வருவதால், அதை வழங்கக் கூடாது என சென்னை உயர் நீதிமன்றம் தீர்ப்பு அளித்தது. இதை எதிர்த்துத் தமிழ்நாடு அரசு உச்ச நீதிமன்றத்தில் வழக்குத் தொடுத்தது. ஆனால் அந்த வழக்கு நீண்ட காலமாக நிலுவையில் உள்ளது. சாதிமறுப்புத் திருமண இணையரின் குழந்தைகளுக்கு வழங்கப்பட்டு வந்த சலுகையைப் பறிக்கும் இந்த வழக்கை உச்ச நீதிமன்றத்தில் விரைவுபடுத்தி நீதியை மீட்டுத் தருமாறு இம் மாநாடு தமிழக அரசைக் கோருகிறது.

13. பட்டியலினத்தவர் மீதான வன்கொடுமைகள் குறித்துத் தொடர்ந்து மீளாய்வுகள் நடத்தப்பட வேண்டும் எனும் சட்டப் பொறுப்பு இருந்தாலும், மாவட்ட அளவிலும், மாநில அளவிலும் அப்படிப்பட்ட கூட்டங்கள் நடைபெறுவதில்லை. எனவே இப்படிப்பட்ட மீளாய்வுக் கூட்டங்கள் தொடர்ந்து நடத்தப்பட வேண்டும் எனவும், அவற்றின்மீது எடுக்கப்பட்ட நடவடிக்கைகள் குறித்த அறிக்கைகள் பொதுவெளியில் பகிரப்பட வேண்டும் எனவும் இம் மாநாடு வலியுறுத்துகிறது.

14. ஒரு குறிப்பிட்ட சாதியைச் சார்ந்தவர்கள் அதிகமாக வாழும் பகுதிகளிலுள்ள காவல் நிலையங்களில், அதே சாதியைச் சார்ந்தவர்களை அந்தக் காவல் நிலையத்தில் உயர் அதிகாரிகளாக எக்காரணம் கொண்டும் நியமிக்கக் கூடாது என இம்மாநாடு வற்புறுத்துகிறது.

15. கல்வி நிலையங்களில் சாதியை வெளிப்படுத்தும்படி வண்ணக் கயிறுகளை அக் கல்வி நிலையங்களில் பயிலும் மாணவர்கள் கட்டி வரக் கூடாது என்ற தெளிவான ஆணையை வெளியிட வேண்டும் என இம் மாநாடு தமிழக அரசைக் கோருகிறது.

16. ஆதிதிராவிடர் மற்றும் பழங்குடி மக்களுக்கான பள்ளிகளில், போதிய எண்ணிக்கையில் ஆசிரியர்களை நியமிக்க வேண்டும் எனவும், அப் பகுதியிலுள்ள கல்வி நிலையங்களின் அடிப்படைக் கட்டமைப்பை விரைந்து மேம்படுத்த வேண்டும் எனவும் தமிழக அரசை இம்மாநாடு வேண்டுகிறது.

17. கல்வி நிலையங்களின் பெயர்களில் உள்ள சாதிப் பெயரை நீக்க வேண்டும் எனவும், தீண்டாமை மற்றும் சாதி ஒழிப்பு குறித்த செய்திகளைப் பாடத் திட்டத்தில் இணைக்க வேண்டும் எனவும் இம்மாநாடு வலியுறுத்துகிறது.

18. அனைத்துப் பட்டியல் சாதி, பழங்குடியர்களின் மற்றும் பிற பிற்படுத்தப்பட்ட சாதியர்களின் வீடு, நிலமற்றக் குழந்தைகளுக்கு ஒன்று முதல் பத்தாம் வகுப்பு வரையிலான கல்வி உதவித் தொகைத் திட்டத்தை அறிவிக்க வேண்டும்.

19. நிலமற்ற பட்டியலின மற்றும் பழங்குடியின மக்களின் பொருளாதாரத்தை மேம்படுத்துவது தொடர்பாக 1892 ஆம் ஆண்டு பிரிட்டிஷ்- இந்திய அரசால் பஞ்சமி நிலம் என்ற பெயரில் விவசாய நிலம் வழங்கப்பட்டது. தற்போது அந்த நிலத்தின் பெரும்பகுதி வசதி படைத்த பட்டியல் மற்றும் பழங்குடிகள் அல்லாதவர்கள் அரசியல் மற்றும் சாதி செல்வாக்கைப் பயன்படுத்தி பஞ்சமி நிலத்தை அபகரித்துக் கொண்டனர். தொடர் பஞ்சமி நில மீட்புப் போராட்டங்களின் விளைவாக கடந்த 2015 ஆம் ஆண்டு சென்னை உயர்நீதிமன்றம் தனது தீர்ப்பில் அனைத்து பஞ்சமி நிலங்களையும் மீட்டு உரிய பயனாளிகளுக்கு ஒப்படைக்கும் வகையில் தமிழ்நாடு அரசு முதன்மைச் செயலாளர் தலைமையில் அனைத்து மாவட்ட ஆட்சித் தலைவர்களையும் உறுப்பினராகக் கொண்டு ஒரு மத்திய கமிட்டி அமைத்து ஆறு வார காலங்களுக்குள் நடவடிக்கைகள் மேற்கொள்ள வேண்டும் என தீர்ப்பளித்துள்ளது. ஆனால் இன்றுவரை எந்த நடவடிக்கைகளையும் தமிழ்நாட்டு அரசும், நீதிமன்றத்தால் அமைக்கப்பட்ட பஞ்சமி நில மத்தியக் கமிட்டியும் எடுக்கவில்லை. இதை இம்மாநாடு வன்மையாக கண்டிக்கிறது. மேலும் பஞ்சமி நிலங்களை மீட்டு உரிய பயனாளிகளுக்கு வழங்க வேண்டும் என இம் மாநாடு வலியுறுத்துகிறது.

20. தீண்டாமைச் சுவர்கள் சாதிய வன்கொடுமைகளை அதிகப்படுத்தும் நிலையில் கடந்த காலங்களில் பல்வேறு இழப்புகளை ஒடுக்கப்பட்ட மக்கள் சந்தித்து வருகின்றனர். இந்நிலையில் தமிழக அரசே முழுப் பொறுப்பெடுத்து தமிழகமெங்கும் அமைக்கப்பட்டுள்ள தீண்டாமைச் சுவர்களைக் கணக்கெடுத்து அவற்றையெல்லாம் தரைமட்டமாக்க வேண்டும் என இம்மாநாடு வலியுறுத்துகிறது.

21. தமிழ்நாடு முழுவதும் உள்ள ஆலயங்களில் தமிழில் மட்டுமே குடமுழுக்கு நடைபெற வேண்டும் என்ற நடைமுறையைத் தமிழக அரசு கொண்டு வர வேண்டும் எனவும், இந்து சமய அறநிலையத் துறை என்ற பெயரைத் தமிழர்களின் சமய அறநிலையத் துறை என மாற்றிப் பெயரிட வேண்டும் எனவும், தமிழக ஆலயங்களில் சமசுக்கிருத பூசனை (அர்ச்சனை)க் கட்டணத்தில் பாதிக் கட்டணம் மட்டுமே தமிழ்ப் பூசனை (அர்ச்சனைக்கு)ப் பெறப்பட வேண்டும் எனவும் தமிழக அரசை இம் மாநாடு வேண்டுகிறது.

22. தமிழக உயர்நெறி மன்றத்தில் தமிழை வழக்காடு மொழியாக்க வேண்டுமென்று மிக நீண்ட காலமாகப் போராடி வருகின்ற வழக்கறிஞர்களின் கோரிக்கைகளை தமிழக உயர்நெறிமன்றம் சிறிதும் பொருட்படுத்தாமல் தட்டிக் கழிப்பதை இம் மாநாடு வன்மையாகக் கண்டிக்கிறது. மிக விரைவில் தமிழை வழக்காடு மொழியாக ஆக்கவில்லை என்றால் வெகுமக்களைத் திரட்டி அதற்கெனத் தனியே போராட வேண்டியிருக்குமென தொடர்புடைய துறையினருக்கு இம் மாநாடு வலியுறுத்திச் சொல்லிக் கொள்கிறது.

22. தமிழகத்தில் செயல்படுகிற ஐஐடி உள்ளிட்ட இந்திய அரசு அலுவலகங்கள் அனைத்திலும் முழுமையான அளவில் இடஒதுக்கீடு முறையாகப் பின்பற்றப்பட வேண்டும் என இம் மாநாடு கடுமையாக வலியுறுத்துகிறது.

23. கேரள மாநிலத்தைப் போல, பூசகர் (அர்ச்சகர்)களாகப் பயிற்சி பெற்ற ஒடுக்கப்பட்ட பிரிவைச் சார்ந்தவர்களையும் கோயில்களில் பூசகர் (அர்ச்சகர்)களாகத் தமிழக அரசுப் பணி நியமனம் செய்ய வேண்டும் என இம்மாநாடு கேட்டுக் கொள்கிறது.

25. இந்திய அரசியல் சட்டத்தை யாத்தளித்த சிற்பி என்கிற பெருமைக்கும், சாதி ஒழிப்புப் போராட்டக் குறியீடாகவும் அறியப்படுகிற அண்ணல் அம்பேத்கர் அவர்களின் திருவுருவச் சிலைக் கோவை, ஈரோடு உள்ளிட்ட மேற்கு மாவட்டங்களில் நிறுவ காவல்துறை தொடந்து மறுத்து வரும் நிலையில் தமிழக அரசே பொறுப்பெடுத்துத் தமிழ்நாட்டின் அனைத்து மாவட்டத் தலைநகரங்களிலும் நிறுவ வேண்டும் என இம் மாநாடு தமிழக அரசை வலியுறுத்துகிறது.

26. அண்மைக் காலமாய்ச் சாதிவெறியோடும், மதவெறியோடும் பெரியார், அம்பேத்கர் எனக் குமுகத் தலைவர்களின் சிலைகளை உடைத்திடும் கயவாளிகளின் போக்கை இம் மாநாடு வன்மையாகக் கண்டிக்கிறது. மேலும், அப்படியான குமுகப் பகைவர்களை அரசு கடுமையாக ஒடுக்க வேண்டும் என மாநாடு வலியுறுத்துகிறது.

27. கோவை மாவட்ட சிறுவாணி நீர்வளம் புகழ்பெற்ற நிலையிலிருக்க அதை இதுவரை கையாண்டு வந்த கோவை மாநகராட்சி கோவை மாநகருக்கும், கோவை மாவட்ட அளவில் பல ஊர்களுக்கும் தண்ணீரை நிறைவோடு வழங்கி வரும் நிலையில் பிரான்சு நாட்டைச் சார்ந்த சூயஸ் எனும் பன்னாட்டு நிறுவனத்திற்கு அப்படியே அக் குடிநீர் உரிமையை விற்றுவிட்ட கொடுமையை தமிழக அரசு செய்திருக்கிறது. இதன்மூலம் இலவயமாகவும், மிகவும் மலிவான விலையிலும் தண்ணீரைப் பெற்று வந்த கோவை மாநகர, மாவட்ட வெகுமக்கள் அனைவரும் பெரும் நெருக்கடிகளுக்குள்ளாகி அதிகப்படியான நீரைப் பெறக்கூடிய அவலமான சூழல் உருவாக இருக்கும் நிலையில், அந்தப் பன்னாட்டு நிறுவனத்தின் உறவிற்கும், அதை ஏற்படுத்திய தமிழக அரசின் நடைமுறைக்கும் பெரியாரிய உணர்வாளர்கள் கூட்டமைப்பு கடும் கண்டனத்தைத் தெரிவிக்கிறது. தமிழக அரசு உடனடியாக இவ் வொப்பந்தத்தை கைவிட்டுவிட்டு கோவை மாவட்டவாழ் மக்களுக்கு மாநகராட்சியின் பொறுப்பிலேயே தண்ணீரை வழங்க வலியுறுத்துகிறது.

28. தமிழக மக்களின் எவ்வகை உரிமைகளுக்கும் குரல் கொடுக்காத திரைப்பட நடிகர் இரஜினிகாந்து, அண்மைக் காலமாகத் தமிழகத்தின் உரிமைகளுக்குப் போராடுகிற மக்களின் போராட்டங்களையும், போராடுபவர்களையும் இழிவுபடுத்தித் திமிரோடு பேசி வருவதை இக் கூட்டமைப்பு வன்மையாகக் கண்டிக்கிறது. மக்கள் போராடி வென்றெடுத்த பல உரிமைகளை ஏற்று மகிழ்கிற அவரின் திமிர்பிடித்த பேச்சுகள் இனி தொடரக் கூடாது என்றும், அவர் நாவடக்கிப் பேச வேண்டும் என்றும் எச்சரிக்கிறோம்..

29. குடிமக்கள் திருத்தச் சட்டம், தேசியக் குடிமக்கள் பதிவேடு மற்றும் தேசிய மக்கள் தொகைப் பதிவேடு போன்றவற்றை எதிர்த்து இந்தியா முழுவதும் தீவிரமான மக்கள்திரள் போராட்டங்கள் நடைபெற்று வருகின்றன. ஆனால் மக்களின் நியாயமான கோரிக்கைகளை ஏற்க மறுத்து, தனது மக்கள் பகை நடவடிக்கைகளைச் செயல்படுத்தியே தீருவோம் எனும் பாசிச பாரதீய ஜனதாக் கட்சிக்குப் பெரியாரிய உணர்வாளர்கள் கூட்டமைப்பு தனது கடுமையான கண்டனத்தைத் தெரிவித்துக் கொள்கிறது. மேலும் சாதி / மத வேறுபாடுகளை ஊக்குவிக்கும் பார்ப்பனிய பாரதீய ஜனதாக் கட்சிக்கு எதிராகத் தமிழக மக்கள் சமரசமற்ற போராட்டங்களை எழுச்சியுடன் முன்னெடுக்க வேண்டும் எனவும் பெரியாரிய உணர்வாளர்கள் கூட்டமைப்பு இம் மாநாட்டின்மூலம் அறைகூவல் விடுக்கிறது.

30. பெரியார் மண் எனப்படும் தமிழகத்தில் பகுத்தறிவு மற்றும் அறிவியலுக்கு எதிரான பரப்புரை, பார்ப்பன இந்துத்துவ அமைப்புகளால், ஊடகங்களால் தீவிரமாக முன்னெடுக்கப்பட்டு வருகின்றது. மூடநம்பிக்கைகளுக்கு எதிரான அறிவியல் மனப்பான்மையை (Scientific Temper) ஒவ்வொருவரிடமும் பெருமளவில் வளர்த்தெடுக்க வேண்டும் என அரசியல் அமைப்புச் சட்டம் வலியுறுத்துகிறது. எனவே பெருகி வரும் சாதி / மதப்பாகுபாடு மற்றும் மூடநம்பிக்கைகளுக்கு எதிராகத் தமிழகம் எங்கும் தமிழ்ச் சான்றோர் திருவள்ளுவர், தந்தை பெரியார், அண்ணல் அம்பேத்கர் மற்றும் பேராசான் கார்ல் மார்க்சு போன்றோர் உள்ளிட்ட தமிழ் அறிஞர்கள் பெயர்களில் படிப்பகங்கள், நூலகங்கள் போன்றவற்றைப் பெரியாரிய உணர்வாளர்கள் ஒவ்வோர் ஊரிலும் தொடங்க வேண்டும்.

போராட்ட அறிவிப்புத் தீர்மானம்:

31. சாதி ஆணவ வெறிகளுக்கு அடித்தளமாகவும், பார்ப்பனியக் கருத்தாக்கங்களின் தொகு மொத்த வெளிப்பாடாகவுமே மனுதர்மம் எனும் பார்ப்பனிய, சாதிவெறி பிடித்த நூல் உள்ளது என்பதைத் தமிழ் அறிஞர்கள் பலரும், தந்தை பெரியார் அவர்களும், அண்ணல் அம்பேத்கர் அவர்களும் அடையாளப்படுத்தியும், அதை மறுத்த செயல்பாடுகளை முன்னெடுத்தும் இருக்கின்றனர். அம்பேத்கரும், பெரியாரும் அக் கருத்துக்கும், செயற்பாடுகளுக்கும் முன்னோட்டமாக மனுதர்மத்தைத் தீயிட்டுக் கொளுத்தியும் இருக்கின்றனர். அவர்களின் வழிகாட்டலில் வெறிபிடித்த பார்ப்பனிய சாதிய ஆணவ நூலான மனுநுாலை எதிர்வரும் மே 20-ஆம் நாள் அதாவது அயோத்திதாசப் பண்டிதர் பிறந்தநாளில் தமிழகமெங்கும் தீயிட்டுக் கொளுத்தும் போராட்டத்தை முன்னெடுப்பது எனப் பெரியாரிய உணர்வாளர்கள் கூட்டமைப்பு, சாதி ஒழிப்பு மாநாட்டின்வழி அறிவிக்கிறது.

- பெரியாரிய உணர்வாளர்கள் கூட்டமைப்பு

Pin It

தமிழகத்தில் விளைநிலங்களில் உயர்மின் கோபுரங்கள் அமைக்கப்பட்டு உள்ளதால் ஏற்கனவே சுமார் 2¼ லட்சம் உழவர்கள் அவர்களின் வாழ்வாதரமான நிலத்தின் மதிப்பை இழந்து மீளாத்துயரில் ஆழ்ந்து உள்ளார்கள்.

மக்களின் நலனுக்காக உயர்மின் கோபுரங்கள் அமைக்கப்பட்ட நிலை மாறி, தனியார்ப் பெரு நிறுவனங்களின் வர்த்தக வளர்ச்சிக்காகவும், லாபம் கிடைக்கும் சந்தைக்காகவும் தற்காலங்களில் உயர்மின் கோபுரத் திட்டங்கள் செயல்படுத்தப்பட்டு வருகின்றன.

வேளாண்மை தொடர்ந்து லாபகரமாக இல்லாத நிலையில் நிலத்தின் மதிப்பு மட்டுமே உழவர்களின் ஒரே வாழ்வாதரமாகும். உயர்மின் கோபுரத் திட்டங்கள் தற்போது விளைநிலங்களின் மதிப்பை எந்த வகையிலும் மீட்க முடியாத அளவிற்கு பெரும் சேதத்தை ஏற்படுத்தி விடுகிறது.

தற்போது தமிழகத்தில் கோவை, திருப்பூர், ஈரோடு, நாமக்கல், சேலம், தர்மபுரி, கிருஷ்ணகிரி, வேலூர், திருவண்ணாமலை, விழுப்புரம், திருச்சி, கரூர், திண்டுக்கல் என 13 மாவட்டங்களில் 12 உயர்மின் கோபுரங்களின் திட்டங்களை விளை நிலங்கள் வழியாக செயல்படுத்தி வருகிறார்கள். இதனால் பாதிக்கப்பட்ட 13 மாவட்ட உழவர்கள் மற்றும் உழவர் சங்கங்கள் இணைந்து உயர்மின் கோபுரங்களுக்கு எதிரான விவசாய சங்கங்களின் கூட்டு இயக்கம் என்ற அமைப்பை தொடங்கி கடந்த 3 ஆண்டுகளாக அறவழியில் போராடி வருகிறார்கள்.

பாதிக்கப்படட உழவர்களின் கோரிக்கைகள் பின்வருமாறு:

1. அடுத்து செயல்படுத்த உள்ள அனைத்து உயர்மின் கோபுரத் திட்டங்களை புதைவடமாக (கேபிள்) சாலை ஓரமாகப் பதித்திடும் முடிவை மத்திய, மாநில அரசுகள் கொள்கை முடிவாக அறிவித்திடுதல் வேண்டும்.

2. இந்திய அரசியல் அமைப்புச் சட்டம் வழங்கியுள்ள அடிப்படை உரிமைகளைப் பறிக்கும் வகையில் உள்ள பிரிட்டிஷ் காலனி ஆதிக்கச் சட்டமான இந்திய தந்தி சட்டம் 1885 நீக்கிவிட்டு பாதிக்கப்பட்ட உழவர்களின் கோரிக்கைகளை உள்ளடக்கிய புதிய சட்டம் நிறைவேற்ற வேண்டும்.

3. நிலத்தை இழக்கும் அனைத்து உழவர்களுக்கும் 2013-ம் ஆண்டு புதிய நிலம் எடுப்புச் சட்டத்தின்படி நிலத்தின் முழுமதிப்பு இழப்பை சந்தை விலையில் நிர்ணயம் செய்து நான்கு மடங்கு வழங்கிட வேண்டும்.

4. ஏற்கனவே உயர்மின் கோபுரங்கள் அமைத்து மின்சாரம் சென்று கொண்டிருக்கும் திட்டங்களில் நிலம் இழந்த உழவர்களுக்கு கோபுரம் அமைந்த இடத்திற்கும், கம்பி செல்லும் இடத்திற்கும் மாத வாடகை நிர்ணயம் செய்து வழங்கிட வேண்டும்.

5. நியாயமான கோரிக்கைகளை வழியுறுத்திப் போராடி வரும் கூட்டு இயக்கத்தோடு மின்சாரத் துறை அமைச்சர் மாண்புமிகு தங்கமணி அவர்கள் நான்கு முறை பேச்சுவார்த்தை நடத்தியும் எந்த முடிவும் எட்டப்படவில்லை. எனவே மாண்புமிகு தமிழக முதல்வர் அவர்கள் முன்வந்து உடனடியாக கூட்டு இயக்கத்தோடு பேச்சுவார்த்தை நடத்தி தீர்வு காண வேண்டும் எனக் கேட்டுக் கொள்கிறோம்.

மேற்கண்ட கோரிக்கைகளை வலியுறுத்தி கூட்டு இயக்கத்தின் சார்பில் 13 மாவட்டங்களில் 50 இடங்களில் சாலை மறியல் போராட்டம் நாளை மறுதினம் அதாவது நவம்பர் 18 அன்று நடைபெற உள்ளது.

தி.மு.க, காங்கிரஸ், ம.தி.மு.க, சி.பி.ஐ, சி.பி.எம், கொ.ம.தே.க, எஸ்.டி.பி.ஐ, அ.ம.மு.க உள்ளிட்ட அரசியல் கட்சிகளும், பல்வேறு விவசாயிகள் சங்கங்களும், சமூக நல அமைப்புகளும் இப்போராட்டத்தில் கலந்து கொள்கின்றனர். பொதுமக்களும் பெரும் திரளில் இப்போராட்டத்தில் கலந்து கொண்டு ஆதரவு தெரிவிக்க வேண்டும்.

- கி.வே.பொன்னையன்

Pin It

thirukkural mani book release 1

thirukkural mani book release 2

Pin It

manjal drama chennai

Pin It