கருஞ்சட்டைத் தமிழர் ஆகஸ்ட் 26, 2017 இதழை மின்னூல் வடிவில் படிக்க இங்கு அழுத்தவும்.

 

 

Pin It

பழங்காலத்தில் வெளிவந்த தமிழ்த் திரைப்படங்கள் குறித்துப் புரட்சிக் கவிஞர் பாரதிதாசன், “பரமசிவன் அருள்புரிய வந்துவந்து போவார் பதிவிரதைக்கு இன்னல்வரும் பழையபடி தீரும்“

என்று கேலியாக எழுதுவார். இன்று தமிழ்நாட்டின் அரசியல் நிலை அப்படித்தான் இருக்கிறது. தமிழகத்தின் ஆளுநர், ஆளுங்கட்சிக்கு அருள்புரிய அவ்வப்போது வந்து வந்து போகின்றார்.  ஓ.பி.எஸ் - ஈ.பி.எஸ் ஆகிய பதிவிரதைகளுக்கு அவ்வப்போது இன்னல் வருகிறது. பழையபடி தீர்கிறது!

ஒருவரைப் பார்த்து ஒருவர் 420 என்று தீட்டித் தீர்த்துக் கொள்கிறார்கள். இது ஊழல் ஆட்சி என்கின்றனர். மறுநாளே இது அம்மாவின் ஆட்சி என்று கூறுகின்றனர். (இரண்டும் ஒன்றுதான்  என அவர்களுக்குத்  தெரியும்தானே!)

சட்டமன்ற உறுப்பினர்கள் சுற்றுலா விடுதிகளில் வெளியூர்களில் தங்க வைக்கப்படுகின்றனர். அன்றாடம் ஒரு சட்டமன்ற உறுப்பினராவது அணி மாறுகிறார். பெரும்பான்மையை இழந்து ஆட்சி இன்று நடைபெற்றுக்கொண்டிருக்கிறது. ஆனால் சட்டமன்றத்தைக் கூட்டுங்கள் என்று எதிர்க்கட்சிகள் எழுப்பும் கோரிக்கை எவர் காதிலும் விழுவதில்லை.

முதலமைச்சர் மீது நம்பிக்கையில்லை என்று ஆளுநரிடம் சொன்னதற்காக, 19 சட்டமன்ற உறுப்பினர்களைத் தகுதி நீக்கம் செய்ய வேண்டும் என்கிறார் ஆளுங்கட்சிக் கொறடா. அவர் பொழுது போகாத நேரத்தில் சட்டமன்ற விதிகளை ஒருமுறை படித்தால் நல்லது.

இத்தனை குழப்பங்கள் நாட்டில் நடந்து கொண்டுள்ளன. தமிழகம் தாழ்ந்து தாழ்ந்து போய்க் கொண்டிருக்கிறது. ஆனால் நம் பிரதமர் மோடி சொல்கிறார், “தமிழகம் சரியான பாதையில் போய்க் கொண்டிருக்கிறது. இனிமேல் தமிழகம் வளர்ச்சியின் உச்சத்தை எட்டும்.”

ஐயோ, இதற்கு மேலும்  வேறு உச்சம் இருக்கிறதா?

Pin It

ஒரு நாட்டின் அரசு, அந்நாட்டு குடிமக்களுக்குக் குடியுரிமை அடையாள அட்டை வழங்குகிறது என்றால் அது ஏற்புடையது.

மாறாக, இந்த அட்டை குடியுரிமைக்கான அடையாள அட்டை இல்லை என்று சொல்லிக்கொண்டு, ரேசன் கடை முதல் சுடுகாடு வரை இந்த அட்டைதான் கட்டாயம் என்று ஆதார் அட்டையைத் திணிப்பது எந்த வகையில் நியாயமாகும்?

ஆதார் அட்டையை அரசு திட்டங்களுக்காகத் தன்னலமாகக் கருதி கட்டாயமாக்கக் கூடாது என்று முன்னர் உச்ச நீதிமன்றம் கூறியிருந்தது.

அண்மையில் உச்ச நீதிமன்றம் தனி நபர் இரகசியம் அடிப்படை உரிமை. அதை மறுக்கும் வகையில் ஆதார் இருக்கக் கூடாது எனத் தீர்ப்பளித்தது.

கைரேகை முதல் கருவிழி வரை விஞ்ஞான அடிப்படையில் பதிவு செய்து, தனிமனித உரிமையில் தலையிட்டு மனித உரிமையை மீறியிருக்கிறது பா.ஜ.க.வின் மத்திய அரசு, இந்த ஆதார் அட்டையின் மூலம்.

மத்திய அரசின் ஆதார் நெருக்கடியைப் பயன்படுத்தித் தனியார் கைபேசி நிறுவனங்கள் தங்கள் வாடிக்கையாளர்களை ஆதார் எண்களை இணைக்க வற்புறுத்தி வருகின்றன.

தனிப்பட்ட ஒருவரின் இரகசியத்தை அரசாங்கமே அறிந்துகொள்ள உரிமையில்லாத போது, தனியார் நிறுவனங்களுக்கு இந்த அத்து மீறிய உரிமை எப்படி வந்தது-?

மத்திய அரசு வழங்கறிஞர் சொல்கிறார் நீதிமன்றத்தில், கள்ளப்பணத்தை கட்டுப்படுத்திக் கண்டுபிடிக்கவும், பெரும் அளவிளான வருமான வரி ஏய்ப்பைக் கண்டுபிடிக்கவும் ஆதார் உதவு-கிறது என்று.

தினக்கூலிகள், அன்றாடம் காய்ச்சிகள் என்று மக்கள் தொகையில் அதிகமாக வாழும் அடித்தட்டு மக்களிடம் இருக்கும் கருப்புப் பணம், வருமான ஏய்ப்புகளைக் கண்டுபிடிக்க இந்த ஆதார் பயன்படும் என்கிறாரா வழக்கறிஞர்?

எரிவாயுவில் ஆதார் எண்ணை இணைத்தால் மானிய விலையை வங்கியில் போடுவோம் என்றார் மோடி.

ஆதார் எண்ணை ரேசன் அட்டையில் இணைக்கச் சொன்னார் அதே மோடி. இரண்டையுமே இழுத்து முடும் நிலைக்கு வந்து விட்டது மத்திய அரசு.

இப்படித் தனிநபர் இரகசியங்களை, அவர்களின் அடிப்படை உரிமைகளைக் காலில் போட்டு மிதித்துவிட்டு, மக்கள் நலத் திட்டங்களை ஆதார் அட்டையின் மூலம் மூடுவிழா நடத்திக் கொண்டிருக்கும் மக்கள் விரோத மோடி அரசுக்கு இந்தத் தீர்ப்பு ஒரு தடை, பின்னடைவு.

இதில் எல்லாத் திட்டங்களிலும் ஆதார் அட்டையை இணைக்கும் பா.ஜ.க. அரசு, வாக்காளர் பட்டியலில் ஏன் அதை இணைக்கச் சொல்லவில்லை.

தனிமனித இரகசியம் என்றால் என்ன? அதுகுறித்து நீதிமன்றம் விளங்கச் சொல்லவில்லை.

துள்ளுக்குட்டியின் ஒரு கவிதை இப்படிச் சொல்கிறது&

‘‘காப்பதற்கு ஏதுமற்ற பின்பு

ரகசியம் உரிமையாகி

எதைகாக்கப் போகிறது-? & ஆதார்!’’

தீர்ப்பு வரவேற்கத் தக்கது! ஆனால் தெளிவாக இல்லை!

 

Pin It

ராஜிவ் கொலை வழக்கில் கைதாகி, 26 ஆண்டுகளுக்கும் மேலாகச் சிறையில் வாடுவோரில் ஒருவரான பேரறிவாளனுக்கு முதல் முறையாக ஒரு விடுப்பு (பரோல்), ஒருமாத காலத்திற்கு வழங்கப்பட்டுள்ளது. இளமையின் வசந்தங்கள் எல்லாம் சிறையில் எரிந்து போனதற்குப் பிறகு, இப்போதுதான் அவர் பரோலில் வெளிவருகின்றார்.

அவர்களின் வாக்குமூலம் தவறாகப் பதிவு செய்யப்பட்டுள்ளது என்று தன் மனசாட்சி உறுத்தலால், அதனைப் பதிவு செய்த காவல் உயர் அதிகாரியே சொன்னபிறகு, விடுதலையே அளித்திருக்க வேண்டும்.  ஆனால் இப்போதுதான் சிறு விடுப்பாவது கிடைத்துள்ளது.

அவரை நேரில் சென்று பார்க்க அனைவரையும் போல நம் உள்ளமும் அவாவுகின்றது. எனினும் பிரிந்த தன் குடும்பத்தினரோடு அவர் சில நாள்களாவது சேர்ந்து இருக்கட்டும். 10, 15 நாள்களுக்குப் பிறகு நாமெல்லாம் சென்று அவரைச் சந்திக்கலாம். அதுவரையில் காத்திருங்கள் தோழர்களே!

Pin It

திராவிட இயக்கத் தமிழர் பேரவையின் 8ஆவது பொதுக்குழு, 20.08.2017 காலை 10 மணி முதல் மதியம் 1 மணி வரை, சென்னை, கொளத்தூரில், பேரவையின் துணைத்தலைவர் அ.இல. சிந்தா தலைமையில், பொதுச்செயலாளர் சுபவீ முன்னிலையில் நடைபெற்றது.  மாநிலப் பொறுப்பாளர்களும், அணிகளின் பொறுப்பாளர்களும், 13 மாவட்டங்களைச் சேர்ந்த  தோழர்களும்  கூட்டத்தில் கலந்து கொண்டனர்.  கீழ்க்காணும் தீர்மானங்கள் நிறைவேற்றப்பட்டன.

dravidian iyakam 6001) கீழடி அகழ்வாய்வை நிறுத்தி வைத்திருக்கும் மத்திய அரசின் போக்கைக் கண்டித்து, 10.09.2017 காலை 11 மணிக்கு, மதுரையில், தோழர் சுபவீ தலைமையில் பெருந்திரள் ஆர்ப்பாட்டம் நடத்துவதென்று தீர்மானிக்கப்பட்டது.

2) பேரவையின் மூன்றாவது மாநில மாநாட்டை, விரைவில் திண்டுக்கல் மாவட்டத்தில் நடத்துவதென்று தீர்மானிக்கப்பட்டது.

3) மாவட்டம்தோறும் ஆர்வமுள்ள இளைஞர்களைத் தேர்ந்தெடுத்து, மண்டல வாரியாக அவர்களுக்குத் திராவிட இயக்க வரலாறு, கோட்பாடுகள், அதன் இன்றையத் தேவைகள் குறித்துத்  தொடர் பயிற்சி வகுப்புகள் நடத்துவதென்று முடிவெடுக்கப்பட்டது.

4) பேரவையின் புதிய கிளைகளான கரூர், நாமக்கல், மணப்பாறை ஆகியனவற்றில் இணைந்துள்ள தோழர்களை வரவேற்றுத் தீர்மானம் நிறைவேற்றப்பட்டது.

தோழர் எட்வின் தமைமை நிலையச் செயலாளராகவும், தோழர் ஜெயம்பெருமாள் தெற்கு மண்டலச் செயலாளராகவும்  நியமிக்கப்பட்டனர். மதுரை மாவட்டம், மாநகர், புறநகர் என்று பிரிக்கப்பட்டு, இரண்டு மாவட்டங்களுக்கான பொறுப்பாளர்களும்,  வேலூர் மாவட்டப் பொறுப்பாளர்களும், மணப்பாறை உள்ளிட்ட புதிய கிளைகளுக்கான பொறுப்பாளர்களும் நியமிக்கப்பட்டனர்.  

Pin It