முந்தைய மழைக்காலங்களில் தேங்கிய நீரால்
நிரம்பி வடிந்த அணைக்கட்டுகள்
சிறு குட்டைகளாக மாறத்தொடங்கியிருக்கின்றன

நீர்ப்பசையில்லாமல் வறண்டு செதில் செதிலாக
வெடிக்கத் தொடங்கிவிட்டிருக்கின்றன
குளத்தின் வண்டல்மண் தரைகள்

நீரோட்டமில்லாமல் நதிநீரின் போக்கிற்கேற்ப
உருண்டோட முடியாமல்
ஒரு குறிப்பிட்ட நிலையிலேயே தங்கி
ஓய்வெடுக்க தொடங்கிவிட்டன கூழாங்கற்கள்

பச்சை பசேலென பரந்து விரிந்து கிடந்த
நெல்மணிகள் அறுவடை செய்யப்பட்டு
வெட்டவெளி களமாக வெம்பரப்பாக
காட்சியளிக்க ஆரம்பித்திருக்கின்றன வயல்வெளிகள்

பச்சையமிழந்து பழுப்புநிறத்துக்கு மாறிய
சின்னஞ் சிறு இலைகளை தங்களது கிளைகளிலிருந்து
உதிர்க்க தொடங்கிவிட்டிருக்கின்றன வில்வ மரங்கள்
இளமஞ்சள் நிறத்தில் சற்று செழுமையாக
கொத்து கொத்தாக பூத்து
மதுர மணவாசத்தை வீசத் தொடங்கிவிட்டன மாம்பூக்கள்

பளீரென பாலாக கொட்டுகின்ற போது தெரியாத
அருவிகளின் பின்புற நெடும்பாறைகளின் தாமிரநிறம்
கண்களை கூசச் செய்ய ஆரம்பித்திருக்கின்றது

காற்றின் அலைவரிசையோடு தொடர்பு கிடைக்காமல்
பூத்தது பூத்த படியாக காயத் தொடங்கியிருக்கின்றன
வீட்டோர உயிர்வேலிகளாக உள்ள போகன்வில்லா பூக்கள்

தாகத்தால் தொண்டை வறண்டு போன மனிதர்கள்
மழையின் மகிழை குறித்தும்
மரநிழலின் மகத்துவம் குறித்தும்
அறிமுகமில்லாத சகமனிதர்களிடம் கூட
பரிமாறிக் கொள்ள ஆரம்பித்திருக்கிறார்கள்

இவ்வாறாக மட்டற்ற வெயிலின் மூலம்
பருக முடியாத அமுதத்தை பொழிய ஆரம்பித்து
எந்தவித ஆரவாரமுமில்லாமல் தன் பருவத்தை
தொடங்கியிருக்கின்றது கோடை காலம்