அதிர்ந்து கொண்டேயிருக்கிறது
ரகசியங்களின் செவிப்பறை.

ஒப்பனைகளைப் பூசிப்பூசி
சவக்களை கட்டுகின்றன
நெறிகட்டிய காயங்களிலிருந்து
தானாகவே கசியும் ரகசியங்கள்

யாரும் யாரிடமும் சொல்லாத
ரகசியமொன்று
தெருவோரம் கிடக்கிறது
அனாதைப் பிணமாய்.

யாரோ கொளுத்திப் போட்ட தீயில்
பற்றி எரிகிறது சொற்களின் காடு.
மீண்டு வந்த ரகசியம்
பொலபொலவென உதிர்கிறது.

ரகசியக் குறியீடுகள் புரியாமல்
விலகி நடந்தவரின்
பால்கட்டிய இடது முலையில் வடிகிறது
ஒரு ஒற்றைச் சொல்.