பிரியங்களின் சாயல் தென்படும்
உன் முகத்துக்கு நேராய் போட்டுடைத்தேன்
ஒரு ரசம் போன கண்ணாடியை.
நின்று நிதானமாய்த் திருத்திக் கொண்டாய்
உன் மயிரை.
0
கைலியை அணிந்து கொண்டு
பொசுக்கென வெளியேறிவிடுகிறாய்.
திருத்த வேண்டியதைத் திருத்தி
மடிக்க வேண்டியதை மடித்து
அலச வேண்டியதை அலசி
உலர்த்த வேண்டியதை உலர்த்தி
நிமிர்ந்தால்...
பின்பக்கம் கைகட்டி
அடியாள் கணக்காய் நிற்கிறது
உன் உலகாயுதம்.
0
சுள்ளான்களைப் போல
கொஞ்சம் கொஞ்சமாக
உதிர்த்துப் போட்டுவிட்டதாய் அல்லது
ஒன்றுமில்லாமல் செய்துவிட்டதான
வீராப்போடு வெளியேறுகிறாய்.
வளைந்து நெளிந்து சென்ற
அந்த ஒற்றையடிப்பாதையில்
லயித்துக் கிடக்கிறேன்
தன்னந்தனியாய்.
0

மாறாத பனிச்சிகரங்களில்
அலைந்து கொண்டிருக்கும் என் காமத்தின்
அதீத பாரம் தாங்காமல்
அறுத்து வீசினாய் ஒற்றை முலையை.
ஒதுங்கி நில்.
உறையலாம் அல்லது உறையச் செய்யலாம்
உன் பாதத்தில் படியும் நீர்.