மக்களே எங்கள் மக்களே!
தமிழேந்தி
மக்களே எங்கள் மக்களே!
எத்தனை முறைதான் தோற்பீர் - அந்தோ
மக்களே எங்கள் மக்களே!
குருதி நக்கிய கையுடன் வெற்றிக்
குலுக்கலோ எம் மக்களே - நமை
எரித்தே அழித்த இனப்பகை யோடா
இளிப்பும் களிப்பும் மக்களே?
துரோகப் பரம்பரை நேரு பரம்பரை
சோனியா மாற்றோ மக்களே - அவர்
தோகை மயிலா தூக்குக் கயிறா
காலம் சொல்லும் மக்களே?
முல்லைப் பெரியாறு பாலாறு காவிரி
மொத்தமாய் நாமம் மக்களே - நலம்
எல்லாம் கொல்லும் தில்லிக் கேநாம்
ஏவல் நாய்களோ மக்களே!
சீக்கியன் அங்கே டைட்லர் சஜ்ஜனைச்
செருப்பால் அடிக்கிறான் மக்களே - இங்கு
நாக்கை நீட்டி நத்திப் பிழைப்பது
எத்தனை நாள்தான் மக்களே!
"ஒற்றை இந்தியா' "ஒன்றே சந்தை'
ஊரை ஏய்க்கிறார் மக்களே - எவர்
கற்றை மயிரைப் பிடுங்கிக் கட்ட
கழிசடைத் தேர்தல் மக்களே?
அம்பா னிக்கும் டாடா வுக்கும்
அடிமைத் தேசம் மக்களே - இதில்
அத்வா னிக்கும் மன்மோக னுக்கும்
அடியாள் வேலைதான் மக்களே!
நிலமோ உணவோ படிப்போ இல்லை
நெருப்பில் வாழ்க்கை மக்களே - நாம்
பலப்பல தேர்தல் பார்த்தும் இன்னும்
பாழாய்ப் போவதோ மக்களே!
"காட்"ஒப் பந்தம் அணுஉடன் பாடெலாம்
கழுத்த றுப்புக்கே மக்களே - நாம்
காட்டவேண் டாமா யார்என் பதனைக்
கண்திறப் பீரோ மக்களே?
படைப்பாளிகளின் கவனத்திற்கு...
கீற்று இணையதளத்திற்கு தங்களது படைப்புகளை அனுப்ப வேண்டிய மின்னஞ்சல் முகவரி: editor@keetru.com. வேறு எந்த இணைய தளத்திலோ, வலைப்பூக்களிலோ வெளிவராத படைப்புகளை மட்டுமே கீற்றிற்கு அனுப்பவும். அப்படியான படைப்புகள் மட்டுமே கீற்றில் வெளியிடப்படும்.
|
|
