கிளிக்கு சொன்ன ஜோசியம்
நவகவி
ஜோசியன் கூட்டுக் கிளியே-ஒரு
ஜோசியம் உனக்கு சொல்கிறேன்!
இறக்கைக ளேஉன் கைகள் - அதை
பார்த்துஉன் ஜாதகம் கணிக்கிறேன்
(ஜோசியன்)
ஜோசியன் தந்த நெல்லின் - மணி
அரிசியை ருசித்தாலும்... முன்பு
பரந்த வயல்களில் கொத்திநீ கொறித்த
பதரே இதைவிட இனிப்பாகும்!
அலகால் கவ்விநீ எடுக்கும் - அந்த
சீட்டைக் காணுகையில்... அதிலுன்
சுதந்திரத் துக்கு எழுதப் பட்ட
மரண ஓலையின் சாயல்கள்!
சொன்னேன்... ஜோஸ்யம்... சொன்னது சரியா? சொல்கிளியே?
(ஜோசியன்)
அடர்ந்த கானகப் பச்சை - உன்
அங்கத்தில் தெரியவில்லை... அது
சமாதி மேலே அடித்த பச்சை
வர்ணமாய்த் தெரிகிற அவலநிலை!
ஆகா யங்களை அளந்த - உன்
சிறகுசொல் லும்சேதி... உன்
சிறகுடன் உனது வானமும் வெட்டுண்டு
கிடக்கும் கூண்டுக்குள் முடமாகி!
சொன்னேன்... ஜோஸ்யம்... சொன்னது சரியா சொல்கிளியே?
(ஜோசியன்)
அலகில் உள்ள சிவப்பு - அது
காட்டும் ஒரு குறிப்பு... அது
அடிமையாய் உனை வைத்ததால் குமறச்
சிவந்தஉன் மனதின் படப்பிடிப்பு!
ஜோசியம் கூடவிஞ் ஞானம் - எனும்
மூடப் பொய்ப்புரட்டு... பொய்யை
அக்கக் காக பிரித்தெறி யச்சொல்லும்
அக்கக் கா" எனும் உன் அழைப்பு!
சொன்னேன்... ஜோஸ்யம்... சொன்னது சரியா சொல்கிளியே...?
(ஜோஸ்யன்)
செம்மலர் மின்னஞ்சல் முகவரி ([email protected])
படைப்பாளிகளின் கவனத்திற்கு...
கீற்று இணையதளத்திற்கு தங்களது படைப்புகளை அனுப்ப வேண்டிய மின்னஞ்சல் முகவரி: [email protected]. வேறு எந்த இணைய தளத்திலோ, வலைப்பூக்களிலோ வெளிவராத படைப்புகளை மட்டுமே கீற்றிற்கு அனுப்பவும். அப்படியான படைப்புகள் மட்டுமே கீற்றில் வெளியிடப்படும்.
|
|