மெளனமாய் கடந்து செல்லும்
காலத்தின் கதவிடுக்கில் நசுங்கி
பிசுபிசுக்கும், தங்கிவிட்ட
ரகசியங்கள் - இன்று
ரம்பமாய் கதறக்கதற
அறுக்கும்போது - யாரும்
அறியாமல் விம்மிப்புடைத்து
விசும்பலை அடக்கி - மீறியும்
கரைகடந்து கண்ணோரம்
வழியும் ஒரு துளி கண்ணீரில்

யுகங்களைக் கடந்த - எதனாலும்
விளக்க முடியாத விமர்சிக்க இயலாத
ஒரு இன்பம், வேதனை
காதோரம் இறங்கி ரகசியம்
சொல்லி, கன்னத்தில் வழியும்போது
உயிரற்று, லஜ்ஜையின்றி துடைக்கும்போது
குபுக்கென்று ஒரு உணர்வு
அறுந்து தெறிக்குமே - அப்போது
இழப்பேன் 'என்னை' என்னுள்.