ஆயுதங்களை ஏற்றிச்செல்லும்
வாகனங்களுக்கான சாலைகளின் வரைபடத்தை
கணக்கிட முயல்வது சவாலான ஒன்று
பெரும்மீன் ஒன்று கரையில் இறந்துகிடக்கும் போது
அதை ஒருவர் அறிவது சுலபம் என்றாலும்
தற்கொலைகளுக்கான அந்தசாலை
ஒரு மனிதனின் வாயிலிருந்தே தொடங்குகிறது
நடுமுதுகுத்தண்டில் இறங்கி புட்டத்தில்
எகிறிக்குதிக்கிறது ஒரு பீரங்கி வாகனம்
கீழ்த்திசையின் சாலைகளில் ஒய்வெடுக்கும்
அவ்வாகனங்களில் இருந்து சிலசமயம்
உணவு பொட்டலங்கள் இலவசமாக கிடைப்பதை
உயிரற்றவர்கள் உண்ண மறுப்பதாக
புள்ளிவிபரங்கள் தெரிவிக்கின்றன
நீங்கள் வரைபடத்தை தெளிவாகப் பாருங்கள்
அழகிய சாலைகளின் குறிப்பல்ல அது
புனித ஆலயங்களுக்குப் போகும் நடைபாதையும் கிடையாது
திரும்ப முடியாமல் முதுகில்
அழுந்தும் துப்பாக்கியுடன் நீங்கள் நடக்கும் சாலை
பெண்களின் யோனியை குகையாய்ப் பாவித்து
சீறிச்சென்று மறையும் ஆயுதங்களின் சாலை
குழந்தைகளின் கோட்டுச் சித்திரத்தில்
அல்லது கிறுக்கல்களில் இருக்கிறது
அதன் உண்மையான வரைபடம்
பறவைகள் விலங்குகள் தாவரங்களுக்கிடையே
வானத்திலும் கடலுக்குள்ளும்
ஒரு வரைபடத்தை தொடர்ந்து செல்வது எத்தனை சிரமம்
எழுதுபவன் கைகளின் மேலும்
கேள்வி கேட்பவனின் கால்களின் மேலும்
நசுக்கிச் செல்லும் அவ்வாகனம்
ஒரு குடும்பஸ்தனை தன்முன்னால் நிறுத்தி
நடுங்கிச் சிறுநீர் கழிக்க வைக்கிறது
அச்சாலையின் வரைபடத்தில்
உங்கள் வாசற்படியை மட்டும்
நீங்கள் கணக்கில் எடுத்துக்கொள்வது அவசியம்