கார்த்திகை மாலைப்பொழுதில் வீடுதோறும்
சின்னஞ்சிறிய தீப்பந்தங்கள்.
விடியலில் பூக்கவுள்ள தீமொட்டுக்கள் போல
வீட்டிற்குள்ளிருந்து வீதிவரை
எண்ணெய்ப்புகை மணக்க
அலைஅலையாய் அசைந்தபடி.
கிளியாஞ்சட்டிகளைக் கண்காணிக்கவும்,
மங்கும் ஒளியைத் தூண்டிவிடவும்,
பிற தீக்கோலங்களை ஒப்பிட்டுப் பார்க்கவும்
பொன்னகைசூடி புன்னகை சிதற
அவ்வப்போது வெளியே வருகின்றனர்
புத்தாடை தேவதைகள்.

நடை வேகத்தில் காற்றடித்து அணையாமலும்,
தீ நாவில்பட்டுப் புத்தாடை கருகாமலும்
மெல்லடி வைத்து மிதப்பதுபோல நடந்து
என் தீத்தோட்ட வீட்டினுள் நுழைந்தேன்.
தீபங்கள் நடுவில் நான். என் பிம்பம்
சுவர்களில் பூதாகரமாக வளர்ந்து
அலைந்து வளைந்து நிகழ்த்துகிறது
நான் ரசிக்க ஒரு நிழல் நடனம்.