அறுந்து போன கனவுகளை
முடிச்சிட்டுப் பார்க்க
முயற்சிக்கும் சாத்தியக் கூறுகளான
தளத்தில்
நினைவுகளின் வசீகரத்தை
அண்மைக்கு எடுத்துவர
எத்தனிக்கும்
ஏகாதிபத்திய தூரத்து புள்ளிகள்.

விழி உதிர்க்கும் கண்ணீரின்
சொட்டுச் சொட்டான
துளிகளின்
உச்சரிப்பில் அலைபாயும்
விசாரணைத் தளத்தில்
விரல்களின் பிரிவுகளில்
நேசத்தை செருகும்
விசுவாச மனத்தில்
மிச்சமிருக்கும் சேமிப்புகள். .

வேறொரு களத்தில்
இப்படியாக
உன்னை முற்றிலும் சந்திக்க
விரும்பும் என்
தேடல்களின் ஈரங்கள்.

கோணிப்பையில் திணிக்கப்படும்
என் குரல்களின்
சமாதான நிராயுதமறிந்தும்
விரிக்கப்பட்ட இதயத்தில்
ஈட்டியை எறியும்
நிரந்தரப் பணியை
நியதியின் சாதனைக் குறியீடாய்
அடையாளம் காட்டும்
உன்
கீறல்களின் வெளிச்சங்கள்.