நீண்ட வரிசையின் நிதானிப்பில்
மெல்ல நகர்கிறது
திரையரங்க வாயிலில்
ரசிகர்களின் பெருங்கூட்டம்!

மாத வருமானத்தின்
மகத்தான பகுதியை
திரையரங்க நுழைவுச்சீட்டு
விழுங்கிவிட
அறிவிக்க இயலா உணர்வுகளை
அசைபோட்டுப் பார்க்கும் மனம்!

எல்லை மீறிய
ரசிகனின் போற்றுதலுக்கு
எடுத்துக்காட்டாக
வானுயர நிற்கும்
நாயகனின் நிழலுருவத்திற்கு
அபிஷேகப்படுத்தப்டுகிறது
பல குடங்களில்
வெறுமையை நிரப்பிய பால்!

நிலைபெற்று நிற்கும்
உன்னதத்தைத் தொலைத்த
நிஜ உலக நாயகர்கள்
தங்களின் வெற்றியை
தொலைத்த எதிர்காலத்தை
எதிர்பார்த்தபடி
கண்டுமகிழ்கின்றனர்
நிழலுலக நாயகனை!