பாவாடை சட்டை வயதில்
கீச்சிடும் சத்தத்துடன் கூடிய சிரிப்பு
ஒரு பறவையின் பறத்தலை ஒத்துப்
பறந்து திரிகையில்

பொம்பளப் புள்ள
இப்படியா சிரிக்கிறது?
முதிர் பெண்டிரின் குரல் எழும்பும்
திசை நோக்காது விரிப்பாள்

சில வருடங்களுக்குப்பின்
விசேச வீடுகளில் பேசப்பட்டது
"சரசு... உன்னமாதிரி இல்ல
உன் மருமக
கொஞ்சம் முசுடுதான் போல''

நெடுந்தடங்கண்ணில் முத்துருட்டி
நின்றவளை
சற்றேனும் திரும்பிப் பார்க்க
யாருமற்றுப் போனபோது...

பாரம் தாங்காக்
கழுதையின் நடையில்
போய்க் கொண்டிருந்தது மனசு.