சில்லரை
அனிதா
இரண்டு என்ற எண்ணை
விரல்களால் குறித்துக் காட்டுவது போன்ற
இரண்டு ரூபாய் நாணயம் ஒன்று
கொஞ்சம் காலமாய் வைத்திருக்கிறேன்.
எங்கோ போய்விட்ட என் பூனைகுட்டிக்கும்
போன வாரம் இறந்துபோன என் கரப்பான்பூச்சிக்கும் பிறகு
அடிக்கடி நினைவில் வரத் துவங்கிவிட்டது இது.
கைப்பையை எடுக்கையில் சின்னதாய் சிரித்துக்கொண்டும்
திறக்கும்போதெல்லாம் பார்த்தபடியுமிருக்கிறேன்.
பேருந்துக்காய் காத்திருக்கும் இந்த நிமிடம்
ஏறியதும் நடத்துனரிடம் கொடுத்துவிட நினைத்திருக்கிறேன்.
கொடுக்கவேண்டுமெனத் தோன்றுகிறது.
கொடுக்கிறேன்.
உன்னிடம் ஏன் சொல்கிறேனெனத் தெரியவில்லை.
சொல்லவேண்டுமெனத் தோன்றுகிறது.
சொல்றேன்.
படைப்பாளிகளின் கவனத்திற்கு...
கீற்று இணையதளத்திற்கு தங்களது படைப்புகளை அனுப்ப வேண்டிய மின்னஞ்சல் முகவரி: [email protected]. வேறு எந்த இணைய தளத்திலோ, வலைப்பூக்களிலோ வெளிவராத படைப்புகளை மட்டுமே கீற்றிற்கு அனுப்பவும். அப்படியான படைப்புகள் மட்டுமே கீற்றில் வெளியிடப்படும்.
|
|