KeetruLiteraturePoem
கவிதை

மழைக் குறிப்புகள்
குட்டி செல்வன்

Rain கேட்பாரற்று
எங்கோ கசியும் பாணனின் இசை
அலையாய் வருடிச் செல்கின்றது மனதை

நேற்று வந்த பட்டாம்பூச்சியை
எதிர்பார்த்திருக்கின்றேன்
குழந்தைகளின் நம்பிக்கையோடு

இங்கு நிகழ்பவை எல்லாம்
ஏதோ ஒரு தேவையை
மையப்படுத்தியே நிகழ்கின்றன
என்பதைப் புரிந்துகொள்வதற்குள்
என்னை விட்டு வெகுதூரத்தில் நீ

என் தனிமையின் பக்கங்களில்
இம்மழைப் பயணங்கள் எழுதுகின்ற
பாவனைகள் நன்றாகதான் இருக்கின்றன
உடலை குளிர்த்துச் சிலிர்ப்பூட்டி
மனதை சற்று இலகுவாக்கி
ஒருவித வரையறையற்ற மென்மையாக

சிறுவயதில் இருந்ததைவிட
மழை இன்று நல்ல சினேகிதமாகியிருக்கின்றது
உன்னையும்விட

உன் அலட்சியங்களால்
என்னுளேயே மெளனமான உணர்வுகளும்
இம்மழைப் போன்றதே

இடையூறுகளின்றி
தொடர்ந்து பொழியும் மழையானது
என்றேனும் பெரும் வெள்ளமாய் உருவாகிச்
சிதைக்கக்கூடும் அனைத்தையும்
எவ்விதப் பாகுபாடுகளுமின்றி

- குட்டி செல்வன் ([email protected])

இவரது மற்ற படைப்புகளைக் காண இங்கே அழுத்தவும்