தெரிகிறது க்ருஷாங்கினி
புல்வளர்ந்த இடம் மாட்டுக்கு
எங்கெங்கென்றாலும் உடன் பசியும்
தெரிகிறது
விரைவு வண்டியோட்டிக்கு
தண்டவாள மாடுகள்
தப்ப இயலாது என்ஜினிலிருந்து
தெரிகிறது
மேலும் விரைவு வண்டி
கட்டுப்படாது என
வண்டியுயிர்கள் காக்கப்பட
தெரிகிறது
மோதும் அக்கணம் கையிரண்டை
தூக்கி கண்களைத் தாழ்த்திக் கொள்ள
தெரிகிறது
பார்வையாளருக்கு கணத்தில்
அரைத்து, சிதறி, இறைத்து
தண்டவாளத்தின் நடுவிலும் அருகிலும்
சதைத் துண்டுகளும் பாகங்களும்
தெரிகிறது
இரைப்பையில் அசைபோடப்படாதபுல்
பசுமை, அரைத்த கூழ்,
மொத்தையாகவும் நாடாவாகவும்
கணிசமான அளவு கூழாகாத
பிளாஸ்டிக் பைகள்
தெரிகிறது
உடன் நடந்த ஒரு மாட்டுக்கு
ஏதோ சோகம்
கண்கள் வழிய கதற மட்டும்
தெரிகிறது
மற்றொன்றுக்கு வாயில் நுரைதள்ள
தண்டவாளத்தைப் பார்த்து
தலை ஆட்டி ஆட்டி
மிரண்ட கண்களுடன் ஏதோ சொல்ல
தெரிகிறது
கூட்டமாக வந்தடைந்த
காகங்களுக்கும், மேயும் நாய்களுக்கும்
சிதறுண்டு கிடக்கிறது இரை
தெரிகிறது
மாட்டுடையோனுக்கும்
பசு பால் கொடுக்கும்
காளை வண்டியிழுக்கும்
சதை சாப்பிட இயலும்
தெரிகிறது
எனக்கோ அடுத்தடுத்த
வண்டிகளுக்கு எது எதுவோ?
யார் யாரோ? என்று.
படைப்பாளிகளின் கவனத்திற்கு...
கீற்று இணையதளத்திற்கு தங்களது படைப்புகளை அனுப்ப வேண்டிய மின்னஞ்சல் முகவரி: [email protected]. வேறு எந்த இணைய தளத்திலோ, வலைப்பூக்களிலோ வெளிவராத படைப்புகளை மட்டுமே கீற்றிற்கு அனுப்பவும். அப்படியான படைப்புகள் மட்டுமே கீற்றில் வெளியிடப்படும்.
|
|