நீ பிறந்ததிலிருந்தே
என்னோடு ஒட்டிக்கொண்டது
உன் உறவு....
அன்னையிடம் பாலருந்தும் நேரம் போக
என்னோடுதான் கழித்திருக்கிறாய்
மிச்சங்களை

காலத்தின் கட்டாயத்தால்
பிரிந்துவிட்டேன் என்னிடமிருந்து
உன்னை

நீ இருக்கும் திசை நோக்கிப்
பயணப்படும் நேரங்களில்
உன்னை எண்ணியபடியே...

நானும்

***********

நாற்காலிச் சண்டை எங்களுக்குள்
வழக்கமாய் நடப்பதுதான் !

இன்றைக்குக் கொஞ்சம்
வித்தியாசமாய் ஆரம்பித்தது!

சண்டைக்கு முற்றுப்புள்ளி
வைப்பதற்காய்ப் போடப்பட்ட
புதிய நாற்காலியில்
அவசரமாய்ச் சென்று
அமர்ந்து கொண்டேன் !

வெற்றிப் பெருமிதத்தோடுப்
பார்வையைத் திருப்பினேன்.
பழைய நாற்காலியை நோக்கி !
அமைதி பூங்காவாய் வீற்றிருந்தது
இருக்கையை இழுத்த சப்தத்தில்
தூக்கத்திலிருந்து விடுபட்ட
பூனை !