வேறு வேறாய் இருந்த நம்மை
வேர்களாக்கிக் கொண்டது காதல் !

உன்னை அழகாய்க் காட்டுவது
அலங்காரமல்ல என் காதல் !

அண்மையில் புதிதாய் என்ன நூல் வாங்கினாய்?
என்கிறாய் சொல்லட்டுமா...?
நேற்றைய சந்திப்பில் என்
சட்டைப் பொத்தானில் சிக்கிக் கொண்ட
உன் புடவை நூல்தான் !

என் வீட்டு விசேசம் ஒன்றிற்கு
வந்து போனாய் நீ அதுமுதல்
நீ வந்து போனதே விசேசமாகிவிட்டது
என் வீட்டுக்கு !

கூறுகெட்ட காகம் குயில் முட்டையைத்
தன் முட்டையென்று அடைகாத்தது மாதிரி
நாமிருவரும் நட்பென்று
அடைகாத்திருக்கிறோம் காதலை !

சேர்ந்து நின்றவாறு புகைப்படம் எடுத்தால்
பிரிந்து விடுவோம் என்கிறாய்
அப்படியானால் வா சேர்ந்து நின்றவாறு
கண்ணாடியாவது பார்ப்போம் !

நான் வந்தால் நகர்ந்து விடுமுன்
தோழிதான்
உனக்கு நானெழுதிய
முதல் காதற்கடிதம் !