இதுவரை நாம் ‘எல்லோருக்குமான AI’ தொடரில், AI என்றால் என்ன, அதன் வரலாறு, அதன் நம்பகத் தன்மை, அதற்கு ‘கண்கள்’ இருக்கின்றனவா போன்ற பல கேள்விகளைப் பார்த்திருக்கிறோம்.

AI நமக்கு ஒரு நண்பனைப் போல உதவ முடியும். நாம் எழுதுவதற்கும், படிப்பதற்கும், தகவல்களைத் தேடுவதற்கும், புதிய விஷயங்களைக் கற்றுக்கொள்வதற்கும் அது துணையாக இருக்கிறது.

ஆனால், இப்போது உலகம் AI குறித்துப் பேசும் விதம் கொஞ்சம் மாறியிருக்கிறது.

"AI நமக்கு என்ன செய்யப் போகிறது?" என்பதை விட, "AI-யை நாம் எவ்வளவு வேகமாக வளர்த்துக் கொண்டிருக்கிறோம்?" என்ற கேள்விதான் முக்கியமாகி வருகிறது.AI இனி ஒரு சோதனை அல்ல

சில ஆண்டுகளுக்கு முன்பு AI என்றால் அது விஞ்ஞானிகளும் தொழில்நுட்ப வல்லுநர்களும் பேசும் ஒரு விஷயமாக இருந்தது. இன்று நிலைமை அப்படியில்லை. നമ്മில் பலர் தினமும் ஏதாவது ஒரு AI-யைப் பயன்படுத்துகிறோம். ChatGPT, Google Gemini, Claude, Grok போன்ற AI கருவிகள் எழுதுவது, மொழிபெயர்ப்பது, கேள்விகளுக்குப் பதிலளிப்பது, படங்களை உருவாக்குவது, கணினி நிரல்களை எழுதுவது போன்ற பல வேலைகளில் மனிதர்களுடன் இணைந்து செயல்படுகின்றன. AI-யின் திறன் அதிகரித்துக் கொண்டே இருக்கிறது.

அதனால்தான் இப்போது ஒரு புதிய கேள்வி எழுகிறது: AI-யின் திறன் அதிகரிக்கும் வேகத்திற்கு இணையாக அதன் பாதுகாப்பும் அதிகரிக்கிறதா?

இந்தக் கேள்வி வெளியில் இருந்து மட்டும் கேட்கப்படவில்லை. AI-யை உருவாக்கும் நிறுவனங்களுக்குள்ளேயே பணியாற்றிய சில ஆய்வாளர்களும் இதே கேள்வியை எழுப்பத் தொடங்கியுள்ளனர்.

இரண்டு AI ஆய்வாளர்களின் ராஜினாமா

சமீபத்தில் Anthropic நிறுவனத்தில் AI பாதுகாப்பு தொடர்பான ஆய்வில் பணியாற்றிய ஜேக்கப் காக்ஸன் (Jacob Coxon) தனது பதவியை ராஜினாமா செய்தார். AI நிறுவனங்களுக்கு இடையேயான கடும் போட்டி, மிகச் சக்திவாய்ந்த AI மாதிரிகளை உருவாக்குவதற்கான வேகம் ஆகியவை பாதுகாப்பு நடவடிக்கைகளை விட முன்னிலை பெறுகின்றன என்ற கவலையை அவர் வெளிப்படுத்தினார். அவரது ராஜினாமா செய்தி உலகம் முழுவதும் கவனத்தை ஈர்த்தது.

அதற்குப் பிறகு Google DeepMind-ன் AGI பாதுகாப்புக் குழுவில் பணியாற்றிய ஜோஷ் எங்கல்ஸ் (Josh Engels) என்பவரும் தனது பதவியை விட்டு விலகினார். AI அமைப்புகள் மேலும் மேலும் திறன் பெறும் நிலையில், அவற்றின் பாதுகாப்பு குறித்த ஆய்வுகளுக்குப் போதுமான நேரம் கிடைக்க வேண்டும் என்பதே அவரது கவலையாக இருந்தது.

இங்கே கவனிக்க வேண்டிய ஒரு விஷயம் இருக்கிறது. இவர்கள் AI-க்கு வெளியே நின்று விமர்சனம் செய்தவர்கள் அல்ல; AI-யை உருவாக்கும் துறைக்குள்ளேயே பணியாற்றியவர்கள். அதனால் அவர்களின் ராஜினாமாக்கள் AI உலகில் மீண்டும் ஒரு முக்கியமான விவாதத்தை எழுப்பியிருக்கின்றன.

AI-யின் ஒரு தவறு... போர் ஏற்படும் ஆபத்து

சமீபத்தில் வெளியான ஒரு செய்தி, இந்த அச்சத்தை இன்னும் தீவிரமான கோணத்தில் நமக்குக் காட்டுகிறது.

CNN வெளியிட்ட செய்தியின்படி, மேற்கு ஆசியப் பகுதியில் நடைபெற்ற போர் நடவடிக்கைகளின்போது, சீனக் கப்பல் ஒன்றில் அணு ஆயுதத் திட்டத்துடன் தொடர்புடைய பொருட்கள் இருப்பதாக AI உதவியுடன் தயாரிக்கப்பட்ட அமெரிக்க உளவுத்துறை அறிக்கை ஒன்று தவறான தகவலை வழங்கியதாகத் தெரிவிக்கப்பட்டது. அந்தத் தகவலை அடிப்படையாகக் கொண்டு, அமெரிக்க ராணுவம் அந்தக் கப்பலைத் தடுத்து நிறுத்துவதற்கான நடவடிக்கையைத் திட்டமிட்டதாகவும் கூறப்படுகிறது. பின்னர் அந்தத் தகவல் மீண்டும் ஆய்வு செய்யப்பட்டபோது, AI கப்பலின் சரக்குகளைத் தவறாக அடையாளம் கண்டிருப்பது தெரியவந்ததாகச் செய்தி கூறுகிறது. இதனால் திட்டமிடப்பட்ட நடவடிக்கை கடைசி நேரத்தில் நிறுத்தப்பட்டது.

இந்தச் சம்பவம் நமக்கு ஒரு முக்கியமான கேள்வியை எழுப்புகிறது. AI தவறான தகவலை உருவாக்குவது புதிதல்ல; ஆனால், அந்தத் தகவலை மனிதர்கள் சரிபார்க்காமல் நம்பி, ராணுவம் போன்ற முக்கியமான முடிவெடுக்கும் துறைகளில் பயன்படுத்தினால், அதன் விளைவு மிகப் பெரியதாகிவிடும். ஒரு தவறான தகவல் நாடுகளுக்கு இடையே பதற்றத்தை ஏற்படுத்தக்கூடும்.

இதிலிருந்து நாம் புரிந்துகொள்ள வேண்டியது ஒன்றுதான்: AI எவ்வளவு வேகமாக வளர்கிறதோ, அதே அளவுக்கு அதன் தகவல்களைச் சரிபார்க்கும் மனிதப் பொறுப்பும் வளர வேண்டும்.

“AI வளர்ச்சியின் வேகம் சரியா?” - AI-யை நிறுத்த வேண்டுமா?

இதிலிருந்து இன்னொரு கேள்வி வருகிறது: AI-யை உருவாக்குவதை நிறுத்திவிட வேண்டுமா? அப்படி யாரும் ஒரே கருத்தில் இல்லை.

AI மூலம் மருத்துவம், கல்வி, அறிவியல், விவசாயம், தொழில் எனப் பல துறைகளில் மிகப்பெரிய மாற்றங்கள் ஏற்படலாம். ஒரு நோயை முன்கூட்டியே கண்டுபிடிப்பதிலிருந்து புதிய மருந்துகளை உருவாக்குவது வரை AI உதவக்கூடும். ஒரு மாணவனுக்குத் தனிப்பட்ட ஆசிரியரைப் போல விளக்க முடியும். ஒரு விவசாயிக்கு வானிலை, மண், பயிர் தொடர்பான தகவல்களைத் தொகுத்துத் தர முடியும். ஒரு எழுத்தாளருக்குப் புதிய யோசனைகளைத் தர முடியும். அப்படியிருக்க, AI வளர்ச்சியை ஏன் நிறுத்த வேண்டும்?

பிரச்சினை AI இருக்கிறதா இல்லையா என்பதில் இல்லை. அதை எவ்வளவு வேகமாகவும், எந்த அளவுக்குக் கட்டுப்பாட்டுடனும் வளர்க்கிறோம் என்பதில்தான் இருக்கிறது.

டிரம்ப்பின் (Trump) மாறுபட்ட பார்வை

AI குறித்து இப்போது உலகம் முழுவதும் ஒரே கருத்து இல்லை என்பதற்கு அமெரிக்க அதிபர் டொனால்ட் டிரம்ப் வெளியிட்ட கருத்துகளும் ஓர் உதாரணம். AI மனிதர்களை அழித்துவிடும் என்ற அச்சங்களையும், AI மீது கடுமையான கட்டுப்பாடுகள் தேவை என்ற கோரிக்கைகளையும் அவர் ஏற்றுக்கொள்ளவில்லை. AI தொடர்பான சில அச்சங்களை அவர் “hoax” என்று குறிப்பிட்டதுடன், அமெரிக்கா AI வளர்ச்சியில் முன்னிலையில் இருக்க வேண்டும் என்ற நிலைப்பாட்டையும் வெளிப்படுத்தியுள்ளார்.

அதே நேரத்தில், AI துறையில் உள்ள சில முக்கியமான தொழில்நுட்பத் தலைவர்கள் அதிகமான பாதுகாப்பு ஏற்பாடுகள் தேவை என்று கூறிவருகின்றனர்.

இதனால் உலகம் முழுவதும் ஒரு சுவாரஸ்யமான விவாதம் உருவாகியுள்ளது: AI-யின் வேகத்தை அதிகரிப்பதா அல்லது அதன் பாதுகாப்புக்காக வேகத்தைக் கொஞ்சம் குறைப்பதா? இரண்டு கருத்துகளும் இப்போது வெளிப்படையாக விவாதிக்கப்படுகின்றன.

பில் கேட்ஸ் (Bill Gates) என்ன சொல்கிறார்?

Microsoft நிறுவனத்தின் இணை நிறுவனர் பில் கேட்ஸ் கூட AI குறித்துச் சமீபத்தில் பேசியுள்ளார். AI ஏற்படுத்தக்கூடிய மாற்றங்களைப் பற்றி மக்கள் இன்னும் முழுமையாக உணரவில்லை என்பது அவரது கருத்துகளில் ஒன்றாக உள்ளது. AI ஒரு சாதாரண புதிய தொழில்நுட்ப மாற்றமாக மட்டும் இருக்காது; அது வேலை, கல்வி, மருத்துவம், பொருளாதாரம் உள்ளிட்ட பல துறைகளில் மிகப்பெரிய மாற்றங்களை ஏற்படுத்தக்கூடும். இதில் AI தரக்கூடிய நன்மைகளும் இருக்கின்றன.

அதே நேரத்தில், அதன் வேகமான வளர்ச்சி சமூகத்திற்கு ஏற்படுத்தக்கூடிய மாற்றங்களைப் புரிந்துகொள்ளவும், அதற்குத் தயாராகவும் நாம் வேண்டியிருக்கிறது.

அப்படியானால் நாம் AI-யைக் கண்டு பயப்பட வேண்டுமா?

என் பார்வையில், பயப்படுவதற்கு முன்பு புரிந்துகொள்ள வேண்டும். கால்குலேட்டர் வந்தபோது மனிதர்கள் கணக்கிடுவதை நிறுத்தவில்லை. கணினி வந்தபோது மனிதர்களின் சிந்தனை முடிந்துவிடவில்லை. இணையம் வந்தபோது புத்தகங்கள் மறைந்துவிடவில்லை. அதேபோல் AI வந்துவிட்டதால் மனிதனின் தேவையும் முடிந்துவிடாது.

ஆனால், ஒவ்வொரு புதிய தொழில்நுட்பமும் சில புதிய கேள்விகளை எழுப்புகிறது. AI குறித்து அந்தக் கேள்விகள் இன்னும் பெரியவை.

• AI தவறான தகவலை உருவாக்கினால் என்ன செய்வது?
• AI-யைத் தவறான நோக்கத்திற்குப் பயன்படுத்தினால் என்ன செய்வது?
• AI மனிதர்களை விட அதிகமான முடிவுகளை எடுக்கத் தொடங்கினால், அந்த முடிவுகளைக் கட்டுப்படுத்துவது யார்?
• AI வளர்ச்சியின் வேகத்திற்கு மனித சமூகம் தயாராக இருக்கிறதா?

இவைதான் நாம் கேட்க வேண்டிய கேள்விகள்.

நமக்கு வேண்டியது பயமல்ல; புரிதல்

AI-யை முழுமையாக எதிர்ப்பதும் சரியல்ல. அதே நேரத்தில் AI சொல்வதையெல்லாம் உண்மை என்று நம்புவதும் சரியல்ல. AI நமக்கு ஒரு கருவி. அதை எப்படிப் பயன்படுத்துகிறோம் என்பதுதான் முக்கியம்.

நாம் முன்பு இந்தத் தொடரில் பார்த்தது போல, AI சொன்னது உண்மையா என்பதைச் சரிபார்ப்பது நம்முடைய பொறுப்பு.

இப்போது அதனுடன் இன்னொரு வரியையும் சேர்த்துக்கொள்ளலாம்: AI எவ்வளவு வேகமாக வளர வேண்டும் என்பதையும் மனித சமூகம் சிந்திக்க வேண்டிய நேரம் வந்துவிட்டது.

AI-யை உருவாக்குபவர்களுக்குள்ளேயே இந்த விவாதம் தொடங்கியிருக்கிறது. இரண்டு AI ஆய்வாளர்களின் ராஜினாமாக்கள் அந்த விவாதத்தை இன்னும் தீவிரப்படுத்தியுள்ளன. ஒருபுறம் AI வளர்ச்சியை வேகமாக முன்னெடுக்க வேண்டும் என்ற கருத்து இருக்கிறது. மறுபுறம், அதன் வளர்ச்சிக்கு இணையாகப் பாதுகாப்பு ஏற்பாடுகளும் இருக்க வேண்டும் என்ற எச்சரிக்கை இருக்கிறது.

எது சரி என்று இன்று நாம் இறுதி முடிவு சொல்ல வேண்டியதில்லை. ஏனென்றால், AI பற்றிய நமது கதை இன்னும் முடியில்லை. இது ஆரம்பம்தான்.

AI எங்கே செல்கிறது? மனிதன் அதை எவ்வளவு தூரம் அழைத்துச் செல்கிறான்? ஒரு நாள் AI மனிதனின் உதவியாளராக மட்டுமே இருக்குமா அல்லது மனிதனுடன் இணைந்து சிந்திக்கும் புதிய சக்தியாக மாறுமா? இந்தக் கேள்விகளுக்கான பதில்களை எதிர்காலம்தான் சொல்லப்போகிறது.

பல்வேறு திறன்கள் கொண்ட ஏஐ கருவிகள்

இன்று உலகம் முழுவதும் பல்வேறு AI கருவிகள் பயன்பாட்டில் உள்ளன. அவற்றில் சில நமக்கு ஏற்கனவே பரிச்சயமானவை:

• ChatGPT – OpenAI நிறுவனத்தின் AI; கேள்விகளுக்குப் பதிலளிப்பது, எழுதுவது, மொழிபெயர்ப்பது, யோசனைகளை உருவாக்குவது போன்ற பல பணிகளில் பயன்படுகிறது.
• Gemini – Google நிறுவனத்தின் AI; தகவல் தேடல், எழுதுதல், படங்கள் மற்றும் பல்வேறு பணிகளில் உதவுகிறது.
• Claude – Anthropic நிறுவனத்தின் AI; குறிப்பாக நீண்ட ஆவணங்களைப் புரிந்துகொள்வது, எழுதுதல், பகுப்பாய்வு போன்ற பணிகளில் பயன்படுத்தப்படுகிறது.
• Grok – xAI நிறுவனத்தின் AI; கேள்விகளுக்குப் பதிலளிப்பது, தகவல்களைப் புரிந்துகொள்வது போன்ற பணிகளில் பயன்படுகிறது.

இவை சில முக்கியமான AI கருவிகள் மட்டுமே. ஒவ்வொரு நிறுவனமும் தொடர்ந்து புதிய திறன்களைக் கொண்ட AI மாதிரிகளை உருவாக்கிவருகின்றன. அதனால், AI என்பது ஒரே ஒரு கருவி அல்ல; பல நிறுவனங்கள் உருவாக்கும், தொடர்ந்து வளர்ந்துகொண்டிருக்கும் ஒரு பெரிய தொழில்நுட்ப உலகம்.

AI குறித்த அச்சங்களையும், அதன் வளர்ச்சியைச் சுற்றியுள்ள விவாதங்களையும் நாம் பார்த்தோம். AI பாதுகாப்பு குறித்த கவலைகள், தவறான தகவல்களால் ஏற்படக்கூடிய ஆபத்துகள் போன்றவை, AI-யை நாம் பொறுப்புடன் அணுக வேண்டியதன் அவசியத்தை உணர்த்துகின்றன.

அதே நேரத்தில், AI என்பது அச்சப்பட வேண்டிய ஒரு தொழில்நுட்பம் மட்டுமல்ல. அது நம்முடைய அன்றாட வாழ்க்கையிலும், கல்வியிலும், மருத்துவத்திலும், விவசாயத்திலும், எழுத்திலும், தொழிலிலும் பல்வேறு வகைகளில் உதவக்கூடிய ஒரு கருவியாகவும் வளர்ந்துவருகிறது.

இதுவரை நாம் AI என்றால் என்ன, அது எவ்வாறு வளர்ந்தது, அதன் நம்பகத்தன்மை, அதன் கண்கள், அதன் பல்வேறு வகைகள், முக்கியமான AI நிறுவனங்கள் எனப் பார்த்தோம். அடுத்து, நம்முடைய வாழ்க்கையில் AI-யை எப்படிப் பயன்படுத்தலாம்? அது நமக்கு என்னென்ன வழிகளில் உதவக்கூடும்? என்பதைப் பார்க்கலாம்.

AI-யைக் கண்டு பயப்படாமல் புரிந்து கொள்வோம்.

AI-யைப் பயன்படுத்துவோம்.

ஆனால், சிந்திப்பதை நிறுத்திவிடாமல் பயன்படுத்துவோம்.

இதுதான் “எல்லோருக்குமான AI”.

- அ. தமிழ்ச்செல்வன்