உன் மௌனத்தின்
நிசப்த அலைவரிசைகளில்
மொழிபெயர்க்கப்படுவது
நமக்கான ஊடலாகவே
இருக்கலாம்....!
நீ என்பதும்
நான் என்பதும்
நீ என்றே வரையறுக்கப்பட்டு இருக்கிறது.
நம் காதல் அகராதிகளில்....!
ஏமாற்றுதல் முதிர்நிலை
ஏமாறுதல் தளிர்நிலை...!
"காதலும் கடந்து போகும்"
என்ற வாசகம் மட்டுமே
கால சக்கரத்தால்
புலம் பெயர்ந்து விடுகிறது....!
பார்க்கவல்ல உயரமும்
உனதான என் நேசங்களின்
குறைப்பாடாகவே
இருந்து விட்டு போகிறது...!
நேசத்தை மறுத்தளித்தலும்
மாறாதவைகளும்
புலன்களை கடந்த நிலையெனவே
அறியப்படுகிறது....!
- ஆனந்தி ராமகிருஷ்ணன்