எனக்கும் உனக்கும்
இடையிலான
அந்தக் கதவுகளை
நான் தட்டிக்கொண்டே இருக்கிறேன்
நீ மூடிக்கொண்டே இருக்கிறாய்

காலங்காலமாய் இதுவே பழகிவிட்டது

எப்போதும் அந்தக் கதவு
மூடியே இருப்பதால்
நான் உள்ளே வருவதும் இல்லை
நீ வெளியே போவதும் இல்லை

உன்னைப் பாதுகாக்க
கதவுகளை அமைத்த நீ
அந்தக் கதவுகளைப் பாதுகாக்கவே
உன்னை அர்ப்பணித்தாய்
வாழ்வின் உச்சபச்ச
முரண்நிலை இது

நான் தட்டுவதை நிறுத்தினாலோ
நீ மூடுவதை நிறுத்தினாலோ
நமக்குள் ஒரு பயம்
உருளத் துவங்குகிறது

அதனால் தானோ என்னவோ
நான் தட்டிக்கொண்டே இருக்கிறேன்
நீ மூடிக்கொண்டே இருக்கிறாய்

தட்டுவதும் மூடுவதும்
நிற்கப் போவதேயில்லை
அந்தக் கதவுகளை
கழற்றி எறியாத வரையில்

- ப்ரணா