என் முதல் விபத்தின் தடம்.......

குரங்கு பெடல்
அடித்து சைக்கிளோடு
விழுந்து புரண்ட
முதல் விபத்து,
எந்த சாலையில் நினைவில்லை......

முதல் நீச்சலில்
கயிறோடு கட்டிய
அரைஞாண்கயிறு அறுந்து
அச்சத்தில் தத்தளித்த
இரண்டாம் விபத்து
எந்த கிணற்றில் நினைவில்லை.......

நூலோடு வாலறுந்துவிட
என் பிடியிலிருந்து,
தும்பி நழுவிவிட,
விரட்டி பிடிக்கையில்
இடறிவிழுந்து கடைவாய்ப் பல்தொலைத்த
மூன்றாம் விபத்து
அரங்கேறிய சுவரெது, நினைவில்லை......

விபத்தின்
தடங்களையும்,
இடங்களையும்
யாரும் நினைவிற்கொள்ள விழையார்,

ஆனால்,

எப்படியடி
இன்றுவரை மறக்காதிருக்கிறேன்,
உன்னை முதன் முதலாய்
பார்த்த இடத்தை மட்டும்.............