தமிழர் விழாவும் தமிழர்புத் தாண்டும்
அமிழ்தினிய தைம்முதலில் ஆமே! - உமிழும்
வடவர் திணித்த வருடத்தைக் கொள்ளல்
மடமையே ஆகும் மதி.
பொங்கல் விழாவும் பொதுமைத் தமிழாண்டும்
தங்குமே தைம்முதலில் தாமென்று - மங்கா
மறைமலையார் சொன்னார்! மதியுடையார் ஏற்றார்!
குறையில்லை என்றும் குறி.
தைம்முத லாண்டே தமிழர்க்குப் புத்தாண்டாம்!
ஐயமே யின்றி அறிந்திடு! - பொய்ப்புனைவாம்
பார்ப்பனர் ஆண்டுதனைப் பாராதே! எஞ்ஞான்றும்
ஈர்ப்பன எந்தமிழாண்டு.
அஞ்சல் எழுதுகையில், ஆவணம் ஆக்குகையில்,
எஞ்சா தெழுதி இயற்றுகையில் - துஞ்சாது
வள்ளுவ ராண்டை வழங்கிடுக! இல்லையேல்
எள்ளுவர் பின்னோர் இகழ்ந்து!
ஆங்கில ஆண்டை அலுவலிற் கொண்டிடினும்
நீங்காது கொள்க நின்ஆண்டை! - தீங்கான
பார்ப்பன ஆண்டைப் பகராதீர்! என்றென்றும்
வேர்ப்பன வேண்டா! விடுக.
தந்தைப் பெரியார், தமிழ்நிறை நற்சான்றோர்
தந்தது வள்ளுவர் தம்ஆண்டே! - செந்தமிழா,
தாயை மதியாமல் தந்தைசொற் கேளாமல்
பேயை மதிப்பரோ? பேசு.
