கருகிய மடியில் பாலைக் கறப்பது
போன்றது உங்கள் சிரிப்பு
இருள் கவ்விய எல்லைகளின் ஓரத்தில்
வாழத் திணித்து விட்டு
நீங்கள் இருக்குமிடத்தை மட்டும் ஊர் என்கிறீர்கள்
நிலம்பறித்து விரட்டி அடித்துவிட்டு
நிலம் வைத்திருக்கக் கூடாதென
மனுச்சட்டம் எழுதி வைத்தீர்
இறந்தவர் உடையைத்தான் நாங்கள்
அணிய வேண்டும் என்னும்
அநியாயம் சொல்லித் தந்தீர்
இழிவானப் பெயரன்றி
வேறெதுவும் கூடாதென்று
பெயரிலக்கணம் எமக்குப் புரிந்தீர்
நாயையும் பன்றியையும்
எங்களை வளர்க்க வைத்துவிட்டு
நறுநெய்யை நக்கி நாக்கு வளர்த்தீர்
பன்னாட்டு வணிகம் காக்க
தேர்தல் தாகம் தீர்க்க
அவ்வப்போது இப்போதெல்லாம்
எங்கள் குடிசையில் வந்து குந்துகின்றீர்
உங்கள் குண்டிகள் கொதிக்கும் வெப்பம்
எரிக்கப்பட்ட எம்பாட்டன்களின்
சாம்பலில் உயிர்த்தது.