ஜாதியுடன் போரிட்ட முன்வரிசை வீரர்
அவர் பிணங்களின் மீதும்
குருதிக் கறையின் மீதும் நின்று
இன்று நாங்கள் களத்தில் முன்னேறுகிறோம்
நாளை எம் உடல்களின் மேல்நின்று
எம் பிள்ளைகள் போரிடலாம்
எவ்வளவு உயரமாயினும் சரி
எங்கள் உடல்களை அடுக்கியேறி
விடுதலையைப் பறிப்போம்

எங்கள் தந்தையர்
எமது மந்தையின் முதல் ஈற்றுக் குட்டிகள்
அவர்களே எமக்குப் பாய்ச்சலை கற்றுத்தந்தனர்

மனிதக் காட்டை சமமாக்கி
எம்மை இம்மண்ணில் ஊன்றியது
எங்கள் தந்தையரே

எங்கள் தந்தையர்
உள்ளங்கை ரேகைகளில்
பூமியின் வரைபடத்தை வைத்திருந்தனர்
அவற்றைத் தொட்டுணர்ந்தே திசையறிந்தோம்

அவர்தம் விழிகளால்
பார்க்கப் பழகினோம்

எங்கள் தந்தையரே எமக்கு
நாவைப் பொருத்தினர்
அதிகாரம் திணித்த மவுனத்தை நொறுக்கியது
அவர் முதல் குரல்
இன்றெமது நாவின் பேச்சொலி
நேற்றவர் பேச்சின் எதிரொலி

சொல்லின் சுவையை அறியத்தந்தது
எங்கள் தந்தையரே
எங்களை அருகமர்த்தி
கறித்துண்டுகளின் சுவையைக் காட்டித் தந்தது போல்
அவரதைச் செய்தனர்

அகரம் வைத்திருக்கும் அதிகாரத்தை
சொன்னது எங்கள் தந்தையரே
எழுத்துக் கோடுகளின் வளைவுகளை
தட்டி நிமிர்த்தினால்
அந்த வரியின் வழியே உலகம் சுற்றலாம்
என்ற ரகசியத்தை போதித்ததும் அவர்கள்தான்

எங்கள் தந்தையரின்
உயிரின் பதியம் நாங்கள்
முதிர்ந்த இலையொன்றைப் போல்
உதிரும் அவர்கள்
எங்கள் நிலத்தில் கலக்கின்றனர்
அந்த உரம் பெற்று நாளை
எம் வேர்களிலிருந்து
வலிய காட்டு மரத்தின் கன்றுகள் முளைக்கும்

எங்கள் தந்தையர்
சுவாசித்த காற்று இது
அவர் எச்சில் படுத்திய உணவு
அவர் மகிழ்வுற்றிருந்த மண்
இப்பிரபஞ்சத்திலிருந்த அவர்கள்
இன்று பிரபஞ்சமாக இருக்கின்றனர்
நாங்கள் அதனுள்ளே இருக்கிறோம்
அவ்வாறெனில்
அவர் எம்மை மீண்டும்
கருத்தரித்திருக்கின்றார்

எதிரிகள் அவர்களை அரக்கரென
அழைத்ததாய் எங்கள் தந்தையர் கூறுவர்
அது பொருத்தமானதுதான்
எங்கள் தந்தையர் நடத்திய
எண்ணற்ற போர்களில் அவர் சிந்திய
உயிர்த்துளியிலிருந்து பிறப்பெடுத்தோம்
குருதித் துளியிலிருந்து பிறப்பெடுத்தோம்
வியர்வைத் துளியிலிருந்து பிறப்பெடுத்தோம்
எங்கள் தந்தையரைப் புதைத்திட்ட
மண்ணின் துகள்களிலிருந்தும்
இனி பிறப்பெடுப்போம்.

(குறிப்பு: தோழர் கம்பீரனின் தந்தையர் திரு.பழனி அவர்களின் நினைவாக...)

- அழகிய பெரியவன்