மிகவும் வரவேற்கத்தக்க, தமிழர்களனைவரும் ஆதரவளிக்க வேண்டிய போராட்டம். தமிழர்களின் பாரம்பரிய மதங்களாகிய சைவமும், மாலியமும் (வைணவம்) தமிழாக்கப்பட வேண்டும். எமது முன்னோர்கள் எமக்கு விட்டுச் சென்ற சொத்துக்களாகிய ஆலயங்கள் தமிழர்களின் கட்டுப்பாட்டுக்குள் வரவேண்டும். ஆலயங்களிலுள்ள தமிழர்களின் கலைச்சொத்துக்கள் பேணிப்பாதுகாக்கப் படவேண்டும். அதற்கு முதல் படி, தமிழர்கள் கைகட்டி வாய்புதைத்து வெளியில் நிற்காமல் கருவறைக்குள் புகவேண்டும், அதில் எந்த உண்மையான தமிழனுக்கும் மாற்றுக் கருத்து இருக்க முடியாது, இருக்கவும் கூடாது. ஆனால் பிரச்சனை என்னவென்றால் பெரும்பாலான தமிழர்களின் மதவுணர்வையும், சைவ, மாலிய சமயங்களும், இலக்கியங்களும் எந்தளவுக்கு தமிழர்களின் பண்பாட்டில், மொழியில், கலாச்சாரத்தில் பின்னிப்பிணைந்து உள்ளது என்பதை உணராமல், பெரும்பான்மையான தமிழர்களின் மதவுணர்வைப் புண்படுத்தும் வகையில் நடந்து கொள்ளும், அவ்வாறான கருத்துக்களைத் தெரிவிக்கும், இந்து மதத்தை மட்டும் எதிர்க்கும் பெரியாரிஸ்டுக்களும், இந்துக்கடவுள்களை மட்டும் மறுக்கும் திராவிடவாதிகளும் நடத்தும் இப்படியான போராட்டங்களுக்கு மத நம்பிக்கையுள்ள தமிழர்கள் ஆதரவளிக்கத் தயங்குவார்கள் என்பது தான் உண்மை. இப்படியான போராட்டங்கள் பெரும்பான்மை இந்துக்களாகிய தமிழர்கள் அனைவராலும் சாதி வேறுபாட்டை மறந்து நடத்தப்பட வேண்டியதே தவிர பெரியாரிஸ்டுக்களால் அல்ல. தமிழர்கள் கருவறை புகும் போராட்டம் கடவுள் நம்பிக்கையுள்ள தமிழர்களால் நடத்தப்பட வேண்டிய முக்கியமான போராட்டமாகும். அதை கடவுள் நம்பிக்கையற்ற திராவிட வீரர்களும், பெரியாரிஸ்டுக்களும் கடத்திக் கொண்டு போய் அவர்களின் பார்ப்பன எதிர்ப்புக் கொள்கைக்கு ஒரு கருவியாக்கி, சாதி வேறுபாடற்று தமிழர்களனைவரும் கருவறைபுகும் உரிமைப்போராட்டத்தைக் கொச்சைப்படுத்தி, பிசு பிசுத்துப் போகச் செய்து விடப் போகிறார்கள் என்பது தான் என்னைப் போன்ற சைவமும் தமிழும் பிரிக்க முடியாதவை என நம்பும் ஈழத்தமிழர்களுக்குக் கவலையைக் கொடுக்கின்றது.