எத்தனையோ நீச்சலடிக்க
அத்தனையும் தான் முந்தி
வித்தகனாய் மொட்டுடைத்து
கருப்பையின் உள்ளே
பொறுப்பாய் போனதுவே
இவன் செய்த முதல் சாதனை

உருகாமல் உடையாமல்
ஒரு இடத்தில் நீர் புற்றினுள்
ஒன்பது மாதங்கள் தவமிருந்து
இன்பமாய் இவ்வுலகில் வந்தது
இவனின் அடுத்த சாதனை

வறுமையில் பலர் உழன்றிருக்க
வெறுமென பலர் சோம்பியிருக்க
திறமையாய் பலர் லஞ்சம் வாங்க
நேர்மையாய் இவன் வேலை பார்த்தது
இவன் செய்த இளம் சாதனை

யாரோ..யாரோ.. இவன் யாரோ..
பெயரே தெரியா அவள் யாரோ
உயிரோ உடம்போ ஒன்றிணைந்து
பயிரோ களையோ பெற்றெடுத்தான்
இதுவோ இவனின் மண சாதனை

விதையை இவன் போட்டதினால்
சதையாய் வளர்ந்த ஒரு செடியை
நிதியாய் நீரை இவன் விட்டு
விதியால் வந்த களை புடுங்கி
மதியாய் வளர்த்த இளம் பயிரை
பொதியாய் தோளில் தூக்கி வைத்து
சதியால் இவன் ஏறா தூரத்தில்
பதமாய் கொண்டு சேர்த்ததுவே
இதுவரை செய்த சாதனையில்
இமாலய சாதனையாம்

- கற்பனை பாரதி (இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)