நகப்பூச்சு புட்டியொன்று
மேசைமீது
வைக்கப்பட்ட இடத்திலேயே இருக்கிறது
சாவிக்கொத்தில்
தொங்கும் கரடி பொம்மையை
வயிற்றில் அழுத்த
அழும் சத்தமும் கேட்கவில்லை
டீபாயில்
வண்ண அடிப்பான்களைப்
பரப்பிவிட்டிருக்கிறேன்
அவைகளின் மூடிகள் கழன்று
காற்றில்
காய்ந்து கொண்டிருக்கவுமில்லை
துணி அலமாரியில்
புதிதாக வாங்கிவந்து ஒட்டிய
டிஸ்னி ஃப்ரோஷான் குழுவினர்
தங்களின் திறமைகளை
எத்தகு இடையூறுமின்றி
முழுமையாக வெளிப்படுத்துகிறார்கள்
பின்வாசல் கதவு
பாதி அடைத்துவைக்கப்பட்ட
யோகநிலையில்
ஒரு நீண்ட ஒளிக்கீற்றோடு
ஐக்கியமாகி வெகுநேரமுமானது
எதிர்த்துப் பேச ஆளின்றி
சுர்ரென்று எழும் கோபத்திற்கும்
வேலையில்லை
அங்கும் இங்கும் எங்கும்
ஒரு இல்லை ஆமென்றும்
ஒரு ஆம் இல்லையென்றும்
இடம்மாறி ஏங்கிய போது
அவ்வீடு குட்டியம்முவை இழந்து உயிரற்றவைகளாகின.....!

- புலமி