இன்று ஒரு நாள் மட்டும்

அதிகாலையில் எழுந்திருங்கள்

பறவைகளின் பாடல்களைக் கேளுங்கள்

வீட்டு தோட்டத்தில்

ரோஜா ஒன்றை பதியனிடுங்கள்

தேநீர் தயாரித்து மனைவியை எழுப்புங்கள்

பரம பதம் சதுரங்கம் கேரம் மட்டைப் பந்து

ஏதோ ஒன்று

குழந்தைகளுடன் கொஞ்சம் விளையாடுங்கள்

தயவு செய்து

கவிதை எழுத வேண்டாம்

ஒரு இயற்கை காட்சியை

வரைந்து பாருங்கள்

தேர்ந்தெடுத்த சிவாஜி படப் பாடல்களை

பதிவிறக்கம் செய்து

எம்பி 3 பிளேயருடன்

தந்தைக்கு பரிசளியுங்கள்

அம்மாவை  மருத்துவமனைக்கு

அழைத்துச் செல்லுங்கள்

கீரைக்கட்டு  கொண்டு வரும் மூதாட்டிக்கு

பருத்திப் புடவை ஒன்றை பரிசளியுங்கள் 

சிறிய பிணக்கில்

நீண்ட நாள் பேசாமல் இருக்கும்

நண்பனுக்கு போன் செய்து பேசுங்கள்

இரவில் பூத்துள்ள

அனந்த சயனப் பூவை

தேடிச் சென்று பாருங்கள்

மொட்டை மாடிக்குச் சென்று

நட்சத்திரங்களுடன் பேசுங்கள்

கடைசியாக 

படுக்கைக்கு செல்லுங்கள்

இன்று ஒரு நாளாவது

பதின்ம வயது காதலியை நினைக்காமல்

நன்றாக தூங்குங்கள்