*
அயற்சியின் பள்ளத்தாக்கில்
வீழ்தல்
ஒரு தன்முனைப்பல்ல

என் பகலின் விலா எலும்பில்
நீங்கள் செருகிச் செல்லும்
உங்கள் பிரியத்துக்குரிய
ஆயுதம் அது

அதன் கூர்மையை
நீங்கள் உங்கள் இரவுகளில்
மது அருந்திக் கொண்டே
கட்டமைக்கிறீர்கள்

உங்கள் வரையறைகளை மீறாத
கோட்பாடுகளின்
இறுதி வாக்கியத்தில்
சிதையாத முற்றுப்புள்ளி அது

என் நரம்புகள் மொத்தமும்
பின்னிய வலையில்
தொங்கிக் கொண்டிருக்கும்
என்
இரவுகள் யாவும்

அயற்சியின் பள்ளத்தாக்கில்
வீழ்தல்
ஒரு தன்முனைப்பல்ல..

அது
உங்களின் வரைபடம்..

****
--இளங்கோ ( இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும். )