எப்படி யானது இன்ப வாழ்க்கை!
அன்னை மடியின் ஆறுதல் விட்டு
அப்பா நினைத்த ஆசை விலக்கி
கட்டில் சுகத்தைக் கனவுக ளாக்கி
கடலைத் தாண்டிக் காசு பார்த்தோம்!
வட்டியும் முதலுமே வாழ்க்கை யாகி
வாலிப மெல்லாம் விரக்தியில் தொலைத்தோம்!
வார இறுதியின் வருகை மட்டுமே
வசந்தம் இருப்பதை வந்து சொல்லும்!
தொலைபேசி வழியே உதிரும் வார்த்தைகள்
தொலைவின் எல்லையைச் சுருக்கிப் போடும்!
அப்பா அம்மா அண்ணன் தம்பி
அத்தனை உறவும் அருகே இருக்க
அரைகுறை வார்த்தையில் சுருங்கிக் கொள்ளும்
அன்பு மனைவியின் ஆசைக் கனவுகள்!
காசு போகிறதாய்த் தாயும் சொல்ல
தேயும் கனவு! அடுத்த பௌர்ணமிக்காய்!
- ரா விமலன் இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.
