Keetru "மறந்து கொண்டே இருப்பது
 மக்களின் இயல்பு
 நினைவுபடுத்தித் தூண்டிக் கொண்டே
 இருப்பது எம் கடமை"
கீற்றில் தேட
கீற்றினை வளர்த்தெடுக்க
உதவுங்கள்...

ஒன்றுக்கொன்று
கிடைமட்டமாகவும்,
மேற்பாதி குறைநீள செங்குத்தாகவும் பொருத்தப்பட்ட
இரு கழித்தல் குறிக்கட்டைகளின் சேர்ப்பையே நீங்கள்
சிலுவை என்றுரைக்கின்றீர்கள்.

இயேசுவின்
உள்ளங்கை அறையவென
ப்ரத்யேக ஆணிகளைத் தயார்செய்கின்றீர்.
சமயத்தில்
முள்முடிக்கும் தயாராகிறது
தேவனின் சிரசு.

இச்சமூகத்தின் பார்வையில்
உங்களுக்கு சந்தர்ப்பம் வாய்க்கும்போதெல்லாம்
பெண்ணென்றும் பாராமல்
என்னைச் சிலுவையில் அறைய
உத்தரவு பிறப்பிக்கிறீர்.
முள்கிரீடம் அணிவிக்கின்றீர்.

என் உடலில் எஞ்சி நிற்கும் குருதித்துளிகள் வெளிச்சொட்ட
விலா எலும்பை அடித்து நொறுக்குகிறீர்.
தொக்கி நிற்கும் உயிரை
உங்கள் பசிக்கென பருகிக்கொள்கின்றீர்.

நான் உயிர்துறக்கும் முன்பாக
அவசியம் இதைச்
சொல்லியாக வேண்டும்.
உங்களுக்கென
தரம்வாய்ந்த பரிசுப்பொருள்களை
சிலுவைக்குக் கீழாக முளைத்து
வானுயர வளர்ந்து நிற்கும்
கிறிஸ்மஸ் மரத்தில்தான்
முடிந்துவைத்திருக்கிறேன்.
தயக்கமின்றி சேகரித்துக்கொள்ளுங்கள்.

பேரன்பானோர்களே....
ஒன்றை மட்டும் மனதில் நிறுத்துங்கள்.
மரமும் ஆணியும் கொண்டு
வடிவமைக்கக் கிடைப்பது
சிலுவை மட்டுமல்ல ,
சவப்பெட்டியும்தான்.
தாமதம் செய்யாமல்
அடுத்த புண்ணிய காரியமாக
ஆகவேண்டியதை கவனியுங்கள்.

- வான்மதி செந்தில்வாணன்

கீற்றில் வெளியாகும் படைப்புகள்/பின்னூட்டங்கள், எழுதியவரின் சொந்தக் கருத்துக்களே! அவை கீற்றின் நிலைப்பாடல்ல. வேறு எந்த இணைய தளத்திலோ, வலைப்பூக்களிலோ வெளிவராத படைப்புகளை மட்டுமே கீற்றிற்கு அனுப்பவும். படைப்புகளை அனுப்ப வேண்டிய முகவரி: editor@keetru.com. அநாகரிகமான பின்னூட்டங்கள் பகுதியாகவோ அல்லது முழுமையாகவோ நீக்கப்படும்.

Add comment


Security code
Refresh