தற்கொலை
செய்து கொண்டவர்களின் நீண்ட விரல்கள்
துக்கத்துடன் புலம்புவதை உணர்கிறீர்கள் நீங்கள்
கனவுகளில்
பின் தொடராமல் இருப்பதற்கு
ஒரு
கடவுளைத் தயார் செய்து தட்டியெழுப்புகிறீர்கள்

பெருங்கொண்ட அபயத்துடன்
அவர்
தற்காப்பு பயிற்சிகளைக் கற்றுக் கொள்கிறார்
வாகனங்களின்
வேக அளவை மிகச் சரியாகக் கணக்கிட்டு
கூட்டி வைக்கிறார்

துணைக்கு உங்களை
அழைக்கலாமாவென
தேவியிடம் பரிசீலனை செய்கிறார்; ஒரு கட்டத்தில்
பொறுமையின்றி
நீங்கள் கடவுளை வசைபாடிவிடுகிறீர்கள்

தயாரிப்புக்களத்தனையும்
கீழே போட்டுவிட்டு இல்லம் விட்டு நீங்கிய கடவுள்
ஒரு
வாடகை அறையைத் தயார் செய்து
நிதானமாக தூக்கில் தொங்குகிறார்
நீங்கள்
வழிபடும் அவரின் சித்திரத்தில்
பத்து விரல்களும் நசுங்கிய வடிவத்தில்
பத்து விரல்களும் பிசுபிசுத்து
பத்து விரல்களில் ஒன்று அழுகி
பத்து விரல்களும்
ஒன்றன்
பின்
ஒன்றாய்
கீழே சிந்திக்கொண்டிருக்கின்றன.