சாலையோரங்களில் பிளாட்பாரங்களில்
இளநீர் விற்கிறார்கள்
நுங்கும் கோசாப்பழமும்
முன்னொரு முன்னொரு காலத்தில்
பாட்டி வடை சுட்டு விற்றாள்
சமீபத்தில் அவளை நிலவுக்கு அனுப்பி வைத்தோம்.
டை கட்டிய ஒருவன்
கார் கழுவும் கையடக்கக் கருவியை
சாலையோரத்தில் விற்றுக்கொண்டிருந்தான் நேற்று.
மோட்டர் சைக்கிள் கார் சிம்கார்டு கடன் அட்டை
இட்லி தோசை பரோட்டா
எல்லாம் பிளாட்பாரத்திற்கு வந்தபின்னும்
வீடு பாதுகாப்பானது என்று நம்பிக் கொண்டிருக்கிறீர்கள்.

இரவை பகலென்றும்
விடியலை இரவென்றும் பழக்கப்பட்டுத்தப்பட்ட ஒருவன்
சத்தியத்தின் அடையாள அட்டையுடன்
பிளாட்பாரத்தில் கம்யூட்டர் விற்றுக்கொண்டிருக்கிறான்
இந்தியப் பகலின் வெம்மை தாங்காமல்
உருகி வழிகிறது அவன் உடல்.

வெறிச்சோடிய வீடுகள் அச்சமூட்டுவதாகவும்
நெரிசலான பிளாட்பாரம் பாதுகாப்பானதாகவும்
தோற்றம் கொள்ளத் துவங்கிவிட்டன.

உங்கள் வாயிற்படிக்கு அருகிலுள்ள கையகலப்பாத்தியில்
மொட்டைமாடி மண் தொட்டியில்
நீங்கள் வளர்க்கப்போவது
குரோட்டன்சா ரோஜாவா போன்சாயா
கத்தரியா வெண்டையா அவரையா
நீங்கள்தான் முடிவு செய்ய வேண்டும்

அல்லது

இரண்டு விரல்களில் ஒன்றைத் தொட்டு
தெரிவு செய்து கொள்ளுங்கள்
கொலையா? தற்கொலையா?