பிறைச் சந்திரன்
அழ. வள்ளியப்பா
நறுக்கி எறிந்த நகத்தைப் போல
இருக்கும் நிலாவே - நீ
நகர்ந்து நகர்ந்து போவ தெங்கே?
சொல்லு நிலாவே.
ஓடம் போல வானில் ஊர்ந்து
செல்லும் நிலாவே - நான்
உன்மேல் ஏறிக்கொள்ள லாமோ?
சொல்லு நிலாவே
கொம்பைப் போலக் கூர்மையாக
இருக்கும் நிலாவே - என்னைக்
குத்திக் கீழே தள்ளுவாயோ?
சொல்லு நிலாவே
வில்லைப் போல வளைந்திருக்கும்
வெள்ளை நிலாவே - நீ
வேட்டையாட உதவு வாயோ?
சொல்லு நிலாவே.
பறங்கிக் கீற்றைப் போல வானில்
தெரியும் நிலாவே - உன்னைப்
பக்குவம் செய்துண்ண லாமோ?
சொல்லு நிலாவே.
உடைந்து போன கண்ணாடி போல்
இருக்கும் நிலாவே - என்
உருவத்தை நீ காட்டுவாயோ?
சொல்லு நிலாவே!
படைப்பாளிகளின் கவனத்திற்கு...
கீற்று இணையதளத்திற்கு தங்களது படைப்புகளை அனுப்ப வேண்டிய மின்னஞ்சல் முகவரி: [email protected]. வேறு எந்த இணைய தளத்திலோ, வலைப்பூக்களிலோ வெளிவராத படைப்புகளை மட்டுமே கீற்றிற்கு அனுப்பவும். அப்படியான படைப்புகள் மட்டுமே கீற்றில் வெளியிடப்படும்.
|
|