என்னால் முன்புபோல் சோஃபாவில்
எல்லோர் முன்னிலும்
இப்போதெல்லாம் காலை நீட்டி அமர முடிவதில்லை
ஏழாம் வகுப்பில் முதலிடம் பெற்றதெற்கென
என் அப்பாவைக் கட்டிப்பிடித்து முத்தம்
கொடுத்ததுபோல் இப்போதும்
அங்ஙனமே செய்ய நினைப்பது முடிவதில்லை
என் தம்பியுடனான தலையணைச் சண்டைகளை
இப்போதெல்லாம் நடத்த முடிவதில்லை
அருகிலிருக்கும் பேருந்து நிறுத்தத்திற்குச் செல்வதுகூட
இப்போதெல்லாம் ஆண் துணையின்றி முடிவதில்லை
நடைபாதைக் கடையில்
தோழிகளுடன் அரட்டை அடித்துக்கொண்டு
தேநீர் அருந்துவதும்
இப்போதெல்லாம் முடிவதில்லை
தற்செயலாகக் காணக்கிடைத்த
என் மகளின் நாட்குறிப்பின்
பக்கங்களைப் புரட்ட
இதற்கு மேலும்
என்னால் முடியவில்லை.
- சின்னப்பயல் (இந்த மின்-அஞ்சல் முகவரி spambots இடமிருந்து பாதுகாக்கப்படுகிறது. இதைப் பார்ப்பதற்குத் தாங்கள் JavaScript-ஐ இயலுமைப்படுத்த வேண்டும்.)
